Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XORU̸ 21

E Jeoba o xosu̷ e Jesús

E Jeoba o xosu̷ e Jesús

E Jesús kʼu̷ ya bi nrru̱u̱ nrro go bʼu̷bʼu̷trjo na yeje, o xipji o discípulo pje ro tsjaji ñe o mbosʼu̷ji ngekʼua dya ro soxu̷ o mu̷bʼu̷ji

KʼU̸ NA jñii nu paa ma ya bi nrru̱u̱ e Jesús, janzi nrrinxu kʼu̷ mi ejme kja o mu̷bʼu̷ e Cristo o moji o maa nuji ja go dyogu̷ji e Cristo. Kʼe nrrojo kʼu̷ mi kobʼu̷ kʼe trʼoʼo dya kja mi bʼu̷bʼu̷ ya bi chjechpeji. Dya kja o chotrʼu̷ji e Cristo.

Nudyakʼua kʼo nrrinxu o jñantrji yeje anxe. Naja anxe o mama: “In jodʼu̷ji e Jesús kʼu̷ mi menzumu̷ a Nazaret [...]. Ya tetrjokʼu̷; dya kja bʼu̷nkʼuakʼu̷” (Marcos 16:6). Ma o dya̷ra̷ji akjanu kʼo ndinxu, o xa̷da̷ji o moji o maa xipjiji kʼo apóstole. Ma mi pebi kja ñii o chjeji e Jesús, angeze o xipji kʼo nrrinxu: “Dya ri su̱gebi. Mebi ri maa xipjibi kʼo mi kjuarmaji ra moji a Galilea, je ra chjejmenu” (Mateo 28:10).

Kʼe paakʼu̷, yeje discípulo o mbe̷dye̷bi a Jerusalén ro mebi a Emaús, kja kʼe ñii ja mi pebi o chjeji na bʼe̷zo. Kʼe bʼe̷zo o dyonu̷ pje mi ñaabi. Me ma soxu̷ o mu̷bʼu̷ ba nrru̷ru̷bi ba xipji pje go kjogu̷ e Jesús. Kʼe bʼe̷zo o mama ko bi tsjaa e Jesús, nge kʼo bi manji kʼo profeta kja o Jñaa e Mizhokjimi. * Dya mi unu̷bi nguenrra mi ngeje e Jesús kʼe bʼe̷zo nange mi nʼaño a jmii. Ma o unu̷bi nguenrra mi ngeje e Cristo, nangua otrjo, dya kja go jñanrrabi.

Kʼo yeje discípulo nrro go nzhogu̷bi a Jerusalén, o maa xipjibi kʼo apóstole e Jesús mi bʼu̷bʼu̷trjo bi jñanrrgui. Mi bʼu̷nji amboo kja na ngumu̷ bi ngotrʼu̷ji kʼe ngoxtrʼi. Ma o jñantrji, ya mi bʼu̷bʼu̷ amboo e Jesús, me ko ngentrjoji. Nukʼua e Jesús go xipjiji: “Dya ri su̱u̱ji; dya ri tsjijñiji”. Kjanu o xipji o discípulo: “Kʼua janzi ga tʼopju̷ o jñaa Mizhokjimi, mi jyodʼu̷ ro tu̱u̱go nuzgo e Cristo, kjarru tetkjo kʼu̷ na jñii nu paa” (Lucas 24:38, 46).

Ma o nrru̱u̱ e Jesús, e Jeoba o tsjapu̷ ro bʼu̷bʼu̷trjo na yeje xe go bʼu̷bʼu̷ba cuarenta paa ante ke ro maa ajensʼe. Na punkju̷ ntee o jñantrji. Na nu paa, ix ko kjoktrjo quiniento ntee kʼu̷ o jñantrji e Jesús. Kʼe paakʼu̷, bʼu̷ma nge ma o xipji: “Ri mokjeji ri maa zopju̷ji yo ntee yo ka̱ra̱ texe kja ne Xoñijomu̷, [...] ri xopu̷ji yo ntee ra tsjaji texe kʼo ya ro xitsʼiji. Jñuntʼu̷ in mu̷nkʼeji nutsʼkʼo ra bʼu̷bʼu̷ ko nutsʼkʼeji texe yo paa jesta ma ra nguaru̷ texe kʼo bʼu̷bʼu̷ kja ne Xoñijomu̷” (Mateo 28:19, 20NM).

Kʼe último paa ma xe go jñantrji e Jesús kʼo once apóstole kʼo me mi sʼiya, o tsjapu̷ na promesa: “Tokatsʼu̷ji ri pa̱ra̱ji, ngeje kʼu̷ ra e̱tsʼu̷ji o Espíritu Mizhokjimi ra e̱e̱ bʼu̷bʼu̷ kja in mu̷bʼu̷ji ra dyakʼu̷ji poder. Ngekʼua ri zopju̷geji yo ntee [...] texe kja ne Xoñijomu̷” (Hechos 1:8). Ma mi ñaa e Jesús maa nginsʼi ajensʼe. Kjanu o tsjobʼu̷ kja ngo̱mu̷.

(Nu kʼo gua e̱je̱ba xo ri jyodʼu̷ kja Mateo nu capítulo 28, Marcos nu capítulo 16, Lucas nu capítulo 24, Juan nu capítulo 20 y 21 ñe 1 Corintios 15:5, 6.)

^ par. 6 Kja ne xiskuama nu xoru̷ 14 a 16, ñe kʼe libro ¿Qué enseña realmente la Biblia? nu apéndice nu mama “Jesucristo, el Mesías prometido” ri chotrʼu̷ kʼo profecía kʼo o cumple e Jesús.