E Daniel o opju̷ jingua ro e̱je̱ kʼe Mesías, o opju̷ kjo nge kʼu̷ ro manda kja o Reino e Mizhokjimi ñe pje kʼo ro tsjaa. Kʼe rey Ciro o nrro̱jo̱ chu̱ʼu̱ a Babilonia

MA DYA be mi chjotu̷ji kʼo babilonio e Jerusalén, e Daniel mi ngeje judío mi ejme e Mizhokjimi, ma kja mi trʼatrʼi o zidyiji angeze ñe janzi judío ga ma a Babilonia, ma mi bʼu̷bʼu̷jinu zo dya mi jezpiji ro tsjaji texe kʼo mi neeji mi ka̱ra̱ji na joo. E Mizhokjimi o mbosʼu̷ e Daniel. Nzakja ma o pa̱ntrʼa̱ji kja kʼe foso nuja mi ka̱ra̱ kʼo lion, e Jeoba o ngotrʼpu̷ o nee kʼo lion dya go zaaji. E Mizhokjimi o jyezpi ro jñanrra pje ro kjogu̷ ga ma axojñi. E Daniel o opju̷ jingua ro e̱je̱ kʼe Mesías ñe pje ro tsjaa o Reino e Mizhokjimi.

Jingua ro e̱je̱ kʼe Mesías. ¿Jingua ro sa̷ja̷ kʼe “Mesías”? E Mizhokjimi o xipji e Daniel: Ma ra xitsʼkʼeji ri nzhogu̷ji a Jerusalén nrro ri maa jya̷bʼa̷ji kʼe trʼabarda, ra bʼu̷bʼu̷ 69 ngoʼo kjanu ra sa̷ja̷ kʼe Mesías. Kʼe kje̷e̷ 455 a.C. nge ma kʼe rey Artajerjes go manda kʼo judío ro moji a Jerusalén, nrro ro jya̷bʼa̷ji kʼo trʼabarda. Kʼo paakʼo dya mi ngeje paa, mi ngeje kje̷e̷, ma ri tsibʼi nguenrra kʼo 69 ngoʼo ra zoo 483 kje̷e̷, ma ri pezhe desde kʼe kje̷e̷ 455 a.C. ra maa zo̷ʼo̷ kʼe kje̷e̷ 29 d.C. ¿Pje kjogu̷ma? Ra nuji axojñi. E Mizhokjimi o xipji e Daniel kʼe Mesías ro mbotrʼu̷ji, ngekʼua akjanu ro ngotrʼu̷ in pekadogoji (Daniel 9:24-26).

Kʼe Mesías ra manda ajensʼe. E Daniel ma mi i̱ji̱ go ngi̱chʼi̱ na bʼe̷zo kʼu̷ mi bʼu̷bʼu̷ ajensʼe, kʼe bʼe̷zo “mi ngeje nzakja o trʼii yo ntee kja ne xoñijomu̷”. Nukʼu̷, mi ngeje kʼe Mesías, o jñanrra go sa̷ja̷ ja mi bʼu̷bʼu̷ o trono e Jeoba, nukʼua e Jeoba “o ñeme ro manda kja o reino”, kʼe Reino dya ra nguaru̷ ra mezhe texe yo paa. E Daniel o jñanrra e Jeoba “o juajnu̷ ntee” o ñeme ro manda ko e Jesús (Daniel 7:13, 14, 27).

O Reino e Mizhokjimi ra chjotu̷ texe yo gobierno yo ka̱ra̱ kja ne Xoñijomu̷. Da xomu̷ e Nabucodonosor o ngi̱chʼi̱ na trʼi̱ji̱ kʼu̷ me ko pizhi. O jñanrra na estatua me ma nojo ñe me mi juesʼikʼu̷, o ñiʼi mi dyabo oro. O chijmi ñeje a dye̷e̷ mi dyabo plata. O pjeme ñeje o chankju̷ mi dyabo cobre. Nu o jo̱ʼo̱ mi dyabo trʼezi, o ngua mi dyabo trʼezi ñe mbejomu̷. Ma xe mi janrra kʼe estatua nango xa̷tʼa̷ na nrrojo kʼo mi jusʼu̷ kja na trʼeje, o ne̱e̱ yabu̷ o ngua kʼe estatua ix ko nzu̷ntrʼu̷. Nudyakʼua e Daniel o xipji e Nabucodonosor: O ñiʼi kʼe estatua nge in reinoge, ma dya kja ri mandage xe nrro ra e̱je̱ nʼaño rey kʼo ra manda texe kja ne Xoñijomu̷. Ma xe ra manda yo reyyo, e Mizhokjimi ra ñesʼe o Reino ra manda dya ix ta nguaru̷ ra manda, ra kjuatu̷ nrrexe kʼo gobierno kja ne Xoñijomu̷, ngextrjo angeze ra manda (Daniel, capítulo 2).

E Daniel a mi tita, xe go jñanrra ma o za̷dʼa̷ kʼo bi manji kʼo profeta, kʼe rey Ciro o nrro̱jo̱ chu̱ʼu̱ kja Babilonia. Nudyakʼua o zoo kʼo setenta kje̷e̷ kʼo bi mama Mizhokjimi, kʼo judío o mbe̷dye̷ji kja Babilonia o nzhogu̷ji a Jerusalén. Ma o nzhogu̷ji kʼo israelita a Jerusalén nujnu nrro go bʼu̷bʼu̷ gobernador, nrro go bʼu̷bʼu̷ ntee kʼu̷ mi otrʼu̷ axojñi kja o religión, ñe profeta, angezeji mi xipjiji kʼo judío jargua jya̷bʼa̷ji e Jerusalén ñe kʼe trʼangumu̷ ja mi matrʼu̷kjimi Jeoba. Nudyakʼua, ¿pje o kjogu̷ ma o zoo kʼo 483 kje̷e̷ kʼo bi mama Mizhokjimi?

(Nu kʼo gua e̱je̱ba xo ri jyodʼu̷ kja kʼe libro Daniel.)