Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 3

Pje ri tsjagebi ngekʼua dya ri chu̱bi

Pje ri tsjagebi ngekʼua dya ri chu̱bi

“Ri potki sʼiyaji ko texe in mu̷bʼu̷ji. Nange ma i sʼiyaji, i perdonaoji, ma kjo kʼo pje tsjakʼu̷ji.” (1 Pedro 4:8)

Ma a ni paa ja nzi kje̷e̷ kʼu̷ gui chju̷ntu̷ge kja ra e̱kʼua yo paa ke ri chu̱bi. Kjogu̷ ga kjanu nangeje kʼe ntee kʼu̷ bi chju̷ntkui dya nge nzakjatsʼkʼe, kʼua ja gi nee ri minkʼe dya nge kʼo nee angeze, dya soʼo kʼua ja gi soge, dya kjijñi kʼua ja gi kjijñige. Xo ra bʼu̷bʼu̷ paa kʼu̷ ri pe̷sʼibi nrrumu̷ ko in minte, bʼu̷ma ra kjogu̷tsʼu̷bi kʼo na sʼoo kʼu̷ ra tsjakʼu̷bi ra so̷xu̷ in mu̷bʼu̷gebi.

Ne Biblia mama kʼu̷ ma ri pe̷sʼibi nrrumu̷ kja in pjamilia ri joku̷bi, dya ri jye̷stjogebi ga kjanu (Mateo 5:23, 24). Ma ri tsjagebi kʼo mama ne Biblia ri minkʼebi na joo.

 1 ÑAGEBI PJE RI TSJAGEBI

NE BIBLIA MAMA KE: Bʼu̷bʼu̷ nrrajme ma ri so̷o̷ ri ñage (Eclesiastés 3:1, 7). Ma pje go tsjakʼu̷ge ni suge o ni xira ke dya gi soge na joo, dya ri jye̷zi ga kjanu, ri jyodʼu̷ nu nrrajme kʼu̷ ri ñagebi ri xipji ja gi soge, ri mamagebi “kʼo na kjuana” ja gi sogebi (Efesios 4:25). Zo ri soge me na sʼoo kʼu̷ go tsjakʼu̷, dya ri mapju̷ rgi ñage. Ne Biblia mama ke ma pje ra xitsʼi ri chju̷ru̷ge na joo ngekʼua dya ri chu̱gebi (Proverbios 15:4; 26:20).

Zo dya gi nee kʼo mama in suge o in xira, dya ri u̷dʼu̷, dya ri xipji kʼo na sʼoo, ri respetao ñe ri xipji ke me ki nege (Colosenses 4:6). Ma ri pe̷sʼibi nrrumu̷ dya ri jye̷zi ra kjogu̷ yo paa, ri ñabi pje ri tsjagebi, pe dya ri jye̷zi ri zopju̷ ni suu o ni xira (Efesios 4:26).

TSJAGE KʼO MAMABA:

  • Ri ñagebi ma dya kja ri mbe̷kue̷bi

  • Ma ni suu o ni xira ra xitsʼi ja ga zoʼo, ri jye̷zi ra ñaa, ma ra nguaru̷ kja ri xipji ja gi soge

 2 DYA̸RA̸ NA JOO KʼO RA XITSʼI GA KJANU RI SO̸O̸ RI PJO̸SʼU̸

NE BIBLIA MAMA GA KJABA: “Ri potki sʼiyaji nangeje nde in kjuarmaji in texeji. Dya ri envidiaji yo nin kjuarmaji. Pero ri tsjijñiji kʼu̷ xe nda na joo nzi naja angezeji ke na ngetsʼkʼeji” (Romanos 12:10). Ri dya̷ra̷ na joo kʼo xitsʼi ni suge o ni xira, “ri potki sentio[bi], y ri potki ma̷kje[bi], [...] dya ri tsjapu̷ na notsʼu̷[bi]” (1 Pedro 3:8; Santiago 1:19). Ma ni suu o ni xira ra nee ra ñaa ko nutsʼkʼe ri tsjapu̷ nguenda. Nzakja ma gi pe̷pjitrjo ri jye̷zi kʼo i kjage ri dya̷ra̷ pje ra xitsʼi, ma jiyo ri dyo̷nu̷ ma so̷o̷ ra nrrepkʼe, ri ñabi ma ri kjuaru̷. Ni suge o ni xirage dya u̷nkʼu̷, dya ri jyombeñe gui chju̷ntu̷ ko angeze, ngekʼua dya tsʼi rgi mbe̷kue̷ ma pje ra xitsʼi (Eclesiastés 7:9).

TSJAGE KʼO MAMABA:

  • Ma ra xitsʼi ja ga zoʼo ni suge o ni xira ri dya̷ra̷ na joo kʼo mama zo dya gi nuu na joo kʼo na xitsʼi

  • Ma ra ñaa in suge o in xirage, ri unu̷ge nguenrra ja ga kjaa kʼo nee angeze ma ri jñanrrba na joo a jmii, ma ri jñanrra ja ga ñaa ñe ja ga tsjaa

3 SIDO RI TSJAGE KʼO NA JOO

NE BIBLIA MAMA KE: Kʼe ntee ke pe̷pji ra ndo̱njo̱. Pero kʼe ntee kʼu̷ ñabi ko o dyojui mama pje ra tsjaa pe dya pe̷pji, ra pobrekʼu̷ (Proverbios 14:23). Ngekʼua mu̷ gi ñage ko in suge o in xirage gi kejmebi pje ri tsjagebi, pe̷ski ri pe̷pjibi na ze̷zhi ngekʼua ri tsjagebi kʼo gui mangebi (Proverbios 10:4). Nza ga yetsʼebi ri pe̷pjibi na ze̷zhi, ga kjanu ndexe yo ri tsjagebi ra mbedye na joo (Eclesiastés 4:9).

TSJAGE KʼO MAMABA:

  • Ri ñugebi pje nge kʼu̷ ri tsjagebi ngekʼua ri joku̷bi in nrrumu̷

  • Ma ra kjogu̷ yo paa a ri ñugebi mu̷ go mbedye na joo kʼo gui tsjagebi