Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 5

Pje ri tsjage ngekʼua dya ri chu̱ge ko in pjamilia

Pje ri tsjage ngekʼua dya ri chu̱ge ko in pjamilia

“Ri tsjageji na jonte. [...] Dya ri tsjatsje̷geji kʼu̷ me na notsʼu̷ji. Tsjapu̷ji kʼu̷ xe nda na jonte kʼo dyaja ke na ngetsʼkʼeji. [...] Ri potki pe̷spʼiji paciencia.” (Colosenses 3:12, 13)

Mu̷ a gui chju̷ntu̷ge, nudya ni suge o ni xirage nge in pjamilia. Zo me gi nege ni tata ñe ni nana, nudya, kʼu̷ me ri ñege nge kʼe ntee kʼu̷ gui chju̷ntkui. Pe ra bʼu̷bʼu̷ ntee kja in pjamiliage kʼu̷ dya ra ngijñiji ga kjanu, dya ra nuji na joo yo i kjage, o dya ra nee ja gi minkʼebi. Pe ma ri xo̷ru̷gebi ne Biblia ri pa̱rgebi pje ri tsjagebi ngekʼua ri sʼiyagebi ñe dya ri chu̱gebi ko in pjamilia.

 1 JA RGI NUGE IN PJAMILIAGE

NE BIBLIA MAMA GA KJABA: “Ri respetaogeji nin tataji ñejni mamaji” (Efesios 6:2). Zo a gi sʼikje ni suge o ni xira, pe̷ski ri nege ko texe in mu̷bʼu̷ ni tata ñe ni nana, xo pe̷ski ri respetaogekʼo. Xo ñe ni suge o ni xira pe̷ski ra mbo̷sʼu̷ o nana ñe o tata. Ne Biblia mama ke “ma ra sʼiyaji yo nin minteji, dya ra mbidiaji”, ngekʼua dya ri mbe̷kue̷ ma ni suge o ni xira ra mama ra ma zengua o tata ñe o nana, o ra ma mbo̷sʼu̷ (1 Corintios 13:4; Gálatas 5:26).

TSJAGE KʼO MAMABA:

  • Dya ri mama: “In pjamiliage dya nezgo” o “In nanage dya nuu na joo yo ri kjago”

  • Ja rgui soge ma rgui ngetsʼkʼe ro tsjakʼu̷jikʼo

 2 NA JOO KE RI ÑAGE KO IN PJAMILIA

NE BIBLIA MAMA GA KJABA: “Yo bʼe̷zo ra zogu̷ o tata ñe o nana, kjanu ra minkui ko nu suu ngekʼua ra natrjo ntee nza ga yejebi” (Génesis 2:24). Zo a gui chju̷ntu̷ge, bʼu̷ma ni tata ñe ni nana ra mbeñebi kʼu̷ dya i pa̱rge ja rgi minkʼe ko ni suu o ni xira ñe ra nee ra xitsʼi yo ri tsjage.

Ma ra kjogu̷ ga kjanu, ri ñage ko ni suu o ni xira ri ñubi pje ri xipjibi, pe ma pje ri xipjigebi ni tata ñe ni nana ri jonte rgi ñagebi, dya ri tsjapu̷bi ra mbe̷kue̷bi (Proverbios 15:1). Ri mimige na joo ko in pjamiliage ñe ko o pjamilia ni xira o ni suge, dya ri tsjatsje̷ kʼu̷ me na notsʼu̷, ri tsjage na jonte, ri pe̷spʼi paciencia, ri sʼiya (Efesios 4:2).

TSJAGE KʼO MAMABA:

  • Ma ri jñanrra ke ni toge o ni nzha̱ʼa̱ ga xipji ni suge o ni xira ja rgi minkui, ri ñagebi na joo ri ñubi pje ri tsjabi pe dya ri chu̱bi

  • Ma ni pjamilia nee ra mandatsʼkʼebi, na joo ke ri ñagebi ri nubi pje ri tsjagebi