Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 6

Pje ri tsjaa ma ri ñʼekje dʼa tsʼimbane

Pje ri tsjaa ma ri ñʼekje dʼa tsʼimbane

“Yo tsʼitrʼi ngeji dʼa regalo kʼu̷ ni ñe̱ji kja e Jehová.” (Salmo 127:3)

Mu̷ kja gi ñʼekjebi dʼa tsʼimbane bʼu̷ma me ri ma̷ja̷bi, pe xo ra so̷xu̷ in mu̷bʼu̷gebi nange dya i pa̱rgebi ja rgi chezhebi in tsʼimbane. Nudya ri tsjogu̷bi na punkju̷ ora ke ri pjo̷ru̷gebi, bʼu̷ma ra za̷dʼa̷ nu paa kʼu̷ ra mboo in kuebi. In tsʼimbane dya ra jye̷skʼibi ri i̱ji̱ na joo, ra bʼu̷bʼu̷ paa kʼu̷ me ri ma̷ja̷bi ñe ra bʼu̷bʼu̷ paa kʼu̷ in tsʼimbane ra tsjakʼu̷ ri mbe̷kue̷bi. Zo rga kjanu, ri ñubi pje ri tsjabi ngekʼua ri pjo̷ru̷bi in tsʼimbane, pe xo ri ñuu pje nesta ni suu o ni xira. ¿Ja rga mbo̷xkʼu̷bi kʼo mama ne Biblia ngekʼua dya ri chu̱bi?

 1 JA RGI MINKʼEBIDYA KʼU̸ GI ÑʼEKJEBI DʼA TSʼIMBANE

NE BIBLIA MAMA GA KJABA: “Ma ra sʼiyaji yo nin minteji, [...] dya ra jodʼu̷ji ja rga pjo̷sʼu̷tsje̷ji; ra jodʼu̷ji ja rga pjo̷sʼu̷ji yo nin minteji. Ma ra sʼiyaji yo nin minteji, dya ra u̷ngoji ma kjo pje ra tsjaku̷ji ” (1 Corintios 13:4, 5). Ma kja gi musʼu̷ na tsʼilele, bʼu̷ma ngextrjo kʼu̷ gi nee ri pjo̷ru̷. Pe ma ra jñanrrakʼo ni xira, ra zoʼo kʼu̷ dya kja gi sʼiyagekʼu̷, ngekʼua xo ri juajnu̷ na nrrajme ke ri bʼu̷nkʼe ko ni xira, akjanu dya ra soʼo kʼu̷ bʼu̷ntsje̷. Ri pe̷spʼi paciencia ni xira, xipji kʼu̷ me ki soge na joo ma pjo̷xkʼu̷ ri pjo̷ru̷ in tsʼimbane, ri xipji me ti po̷kju̷ kʼu̷ ga mbo̷xkʼu̷, ga kjanu ra unu̷ nguenda kʼu̷ me gi sʼiya.

“Nutsʼkʼeji in bʼe̷zoji, ri minkʼeji na joo ko yo nin suji, ri respetaoji.” (1 Pedro 3:7.) Ma in suge ra musʼu̷ na tsʼimbane, dya ri jyombeñe kʼu̷ angeze pama pama ra mbo̷ru̷ in tsʼimbane. Nudya ra mbe̷sʼi na punkju̷ bʼe̷pji, ra bʼu̷bʼu̷ paa ma dya ra zoʼo na joo, ra mboo o kuee o ra so̷xu̷ o mu̷bʼu̷. Bʼu̷ma ra sa̷ja̷ nu paa ma ra mbe̷kue̷, ma pje ra xitsʼi dya pje ri chju̷ru̷, dya ri jyombeñe ke “texe yo bʼe̷zo yo [trju̷mbeñe] na joo, [...] ra mezhe kja ra u̷dʼu̷” (Santiago 1:19NTD). Ri ñuu ja rgi pjo̷sʼu̷ ni suge (Proverbios 14:29).

TSJAGE KʼO MAMABA:

  • Nutsʼkʼe tata: Ma nrrempa ñe ma xomu̷ ri pjo̷sʼu̷ in suge ra mbo̷ru̷ in tsʼimbane. Zo ri pe̷sʼi na punkju̷ pje ri tsjaa, ri ñuu ja rgi tsjapu̷ ngekʼua ri so̷o̷ ri pjo̷sʼu̷ ni male ri pjo̷ru̷bi in tsʼimbane

  • Nutsʼkʼe nana: Ma ni xira ra xitsʼi ra mbo̷ru̷ ne tsʼimbane, ri jye̷spi. Ma dya ra tsjaa na joo, ri pjo̷sʼu̷ ñe ri xipji ja rga tsjaa, pe dya ri gue̷nchʼi

 2 RI ÑUBI PJE RI TSJABI NGEKʼUA RI MIMIBI NA JOO

NE BIBLIA MAMA GA KJABA: “Ra natrjo ntee nza ga yejebi” (Génesis 2:24). Zo a i sʼikjebi dʼa tsʼimbane, pe nutsʼkʼebi xi gi “natrjo ntee nza ga” yetsʼkui. Pama pama ri ñubi pje ri tsjabi ngekʼua ri mimibi na joo.

Nutsʼkʼe nrrinxu ma ra mbo̷xkʼu̷ ni xira ri unu̷ po̷jo̷. Ma ri tsjagekʼo, ni xira na joo rga zoʼo ñe xi ra nee ra mbo̷xkʼu̷ (Proverbios 12:18). Nutsʼkʼe bʼe̷zo, ri xipji ni suge kʼu̷ me ki sʼiyage, kʼu̷ me na joo kʼo kjaa ñe ri unu̷ po̷jo̷ kʼu̷ pjo̷ru̷ in pjamilia (Proverbios 31:10, 28).

“Dya kjo ra jyodʼu̷tsje̷ kʼu̷ ra bʼu̷bʼu̷ na joo. Nu kʼu̷ ni jyodʼu̷ ngeje kʼu̷ ra mbo̷sʼu̷ kʼu̷ ra bʼu̷bʼu̷ na joo yo o dyoji.” (1 Corintios 10:24NTD.) Pama pama ri ñuu ja rgi pjo̷sʼu̷ ni suge o ni xira. Ri xipji na joo kʼo kjaa ma ga mbo̷xkʼu̷. Ri juajnu̷bi na nrrajme kʼu̷ ri ñabi, ri dya̷ra̷ kʼo ra xitsʼi in suge o in xira. Ma ra bʼu̷bʼu̷ dʼa paa ke ni suu o ni xira dya ra nee ke ri dyobʼu̷bi, dya ri mbe̷kue̷. Ri unu̷ ni suu o ni xira yo ni jyodʼu̷. Dya ri jyombeñe kʼo mama ne Biblia: “Nutsʼkʼeji in bʼe̷zoji, dya ri tsa̷nba̷ji in kuerpoji yo in suji. Xo ñetsʼkʼeji in ndinxuji, dya xo ri tsa̷nba̷ji in kuerpoji yo nin xiraji. Ra so̷o̷ ri potki tsa̷da̷bi a kjanu, ngextjo ma ri ñatsje̷bi in nza yejui” (1 Corintios 7:3-5). Ma ri ñagebi, ri tsejmebi na joo pje ri tsjagebi. Ri pe̷spʼi na punkju̷ paciencia in suge o in xira, akjanu ri minkʼebi na joo.

TSJAGE KʼO MAMABA:

  • Zo ra bʼu̷bʼu̷ na punkju̷ pje ri tsjage, pe dya ri jyombeñe ri bʼu̷nkʼe ko ni suu o ni xira

  • So̷o̷ ri chʼatrʼpʼu̷ dʼa tsʼiregalo ni suu o ni xira, ma iyo ri chʼatrʼpʼu̷ na tsʼixiskuama ri jñusʼu̷ kʼu̷ me ki sʼiyage ko texe in mu̷bʼu̷ge

 3 RI CHEZHE NA JOO IN TSʼIMBANE

NE BIBLIA MAMA GA KJABA: “Xo i pa̱ra̱ge o jitsʼkʼeji o jñaa Mizhokjimi ndeze ma kja mi tsʼitʼige. Ngekʼua i pa̱ra̱ge ja ga kjaa e Cristo Jesús. Nukʼu̷, ra sido ra joku̷tsʼu̷ in mu̷bʼu̷, nange i enchʼe in mu̷bʼu̷kʼu̷” (2 Timoteo 3:15). Ri ñabi ni suge o ni xira ngekʼua ri ñubi pje ri jichibi in tsʼimbane. Dya ri jyombeñebi kʼu̷ in tsʼimbane ma oʼo amboo a mbeme o nana so̷o̷ ra pjechi na punkju̷, ra dya̷tkʼa̷bi ma ri zopju̷bi, ra mba̱ra̱ kjo ngetsʼkʼebi, ra zoʼo na joo ma ra dya̷ra̷ ke me ki ma̷ja̷bi. Ri xo̷trpu̷bi in tsʼimbane, zo kja tsʼikʼe ra tendio, ma ra teʼe ra nee ra xo̷ru̷ yo skuama.

Zo kja tsʼikʼe ri jichi o Jñaa e Mizhokjimi. Ri dyo̷tu̷ e Jehová ko in tsʼimbane (Deuteronomio 11:19). Ma ri eñebi ri xipji kʼu̷ e Mizhokjimi go dya̷trʼa̷ yo ri janrrgoji (Salmo 78:3, 4). Ma in tsʼimbane ra noku̷ ra unu̷ nguenda i kjage kʼo mama e Jehová, angeze xo ra nee ra tsjaa kʼo i kjage.

TSJAGE KʼO MAMABA:

  • Dyo̷tu̷ Mizhokjimi ra mbo̷xkʼu̷ ngekʼua ri chezhe na joo in chʼige

  • Ri yepe yo ri jichi in tsʼimbane ngekʼua ra ngejme kja o pjeñe