Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 9

Nutsʼkʼe ñe in pjamilia so̷o̷ ri tsjageji kʼo mama e Jehová

Nutsʼkʼe ñe in pjamilia so̷o̷ ri tsjageji kʼo mama e Jehová

“Matʼu̷ji Mizhokjimi kʼu̷ o dya̷tʼa̷ [ne] jensʼe ñe ne Xoñijomu̷.” (Apocalipsis 14:7)

Yo bi xo̷rge kja ne folleto ba e̱je̱ kja ne Biblia, nujyo ra mbo̷xkʼu̷ge ñe in pjamiliage ngekʼua ri tsjaji kʼo nee e Jehová ñe ri minkʼeji na joo. Je akjanu nee e Jehová kʼu̷ ri tsjaji ngekʼua ri ma̷ji. Ma nutsʼkʼe ñe in pjamilia otrʼu̷ ri tsjaji kʼo nee e Mizhokjimi, “ra dyakʼu̷geji texe kʼu̷ ni jyonkʼeji” (Mateo 6:33NTD). E Mizhokjimi nee ra mbo̷xkʼu̷geji, ngekʼua dya ri jye̷zi ri xo̷rgeji ne Biblia ngekʼua ri joji na joo angeze, nange mi na joo ma je ri tsjaji ga kjanu (Mateo 22:37, 38).

 1 YO RI TSJAA NGEKʼO RI JOBI E JEHOVÁ

NE BIBLIA MAMA GA KJABA: “Ri ngetsʼkʼo in Tata[tsʼu̷ge]ji. Y ra kjakʼoji in chitsʼkʼoji ñe in xuntʼitsʼkʼoji, eñe [e Jehová]” (2 Corintios 6:18). E Jehová nee ke ri jyodʼu̷ ri xipji ja rga mbo̷xkʼu̷, nange angeze nee ke ri jogui. Ne Biblia mama ga kjaba: “Dya ri jye̷zi rgi dyo̷tu̷ji Mizhokjimi” (1 Tesalonicenses 5:17). E Mizhokjimi nee ke ri xipji ja gi soge ñe pje kjakʼu̷ ri supjre (Filipenses 4:6). Ma ri dyo̷tu̷ Mizhokjimi ko in pjamilia ra unu̷ji nguenda gi enchʼe kja in mu̷nkʼe e Mizhokjimi.

Ma ri ñage ko Mizhokjimi xo ri dya̷ra̷ kʼo xitsʼi angeze. ¿Ja rgi dya̷ra̷ kʼo mama Mizhokjimi? Ma ri xo̷ru̷ ne Biblia ñe yo skuama kʼu̷ pjo̷xkʼu̷ ri pa̱rge ja ga kjaa kʼo mama ne Biblia, nge nzakja kʼu̷ ri dya̷ra̷ kʼo mama Mizhokjimi (Salmo 1:1, 2). Dya ngextrjo ri xo̷ru̷ yo skuama, xo ñe ri tendio na joo (Salmo 77:11, 12). Mi na joo ri mage ja jmuru̷ji yo testigo e Jehová ngekʼua ri dya̷ra̷ yo nee e Mizhokjimi ke ri tsjage (Hebreos 10:24, 25).

Me ra ma̷ja̷ e Jehová ma ri jichi yo ntee kʼo mama ne Biblia. Ma ri tsjagekʼo, ra ñetsʼe gi sʼiyage e Jehová ñe gi enchʼe kja in mu̷nkʼe angeze (Mateo 28:19, 20).

TSJAGE KʼO MAMABA:

  • Dya ri jye̷zi ri dyo̷tu̷ Mizhokjimi ra mbo̷xkʼu̷ ñe ri xo̷ru̷ ne Biblia texe yo paa

  • Mu̷ in pjamiliage dya kjapu̷ nguenda ra xo̷ru̷ji o Jñaa Mizhokjimi, mazi ra nee ra jñanrraji televisión o ra eñeji, pe nutsʼkʼe ri pjo̷sʼu̷ ngekʼo ra tsjaji yo mama e Jehová

2 RI JMURGE KO TEXE IN PJAMILIAGE RI XO̸RGEJI NE BIBLIA

NE BIBLIA MAMA GA KJABA: “Che̷zhgeji a jmii Mizhokjimi; angeze xo ra che̷zhi in jmigeji” (Santiago 4:8). Juajnu̷ pje ma paa ñe nu ora nu ri xo̷rge ne Biblia ko in pjamilia (Génesis 18:19). Pama pama ri dyo̷tu̷ Mizhokjimi ra mbo̷xkʼu̷ ri tsjage yo ri xo̷ru̷ kja ne Biblia, xo ri pjo̷sʼu̷ in pjamiliage ngekʼua ra tsjaji kʼo mama e Jehová. Ne Biblia mama ke “ri jichi [in pjamilia kʼo mama e Jehová] [...] ma ri bʼu̷nkʼeji kja in nzungeji, ma ri nzhodʼu̷geji kja ñʼiji, ma ri ma i̱ji̱ ñe ma ri ñangageji” (Deuteronomio 6:6, 7). Tsjage ja gua tsjaa e Josué kʼu̷ go mama: Nutsʼko ñe yo ka̱ra̱ kja in nzungo ngextrjo e Jehová ra matrʼu̷jme (Josué 24:15).

TSJAGE KʼO MAMABA:

  • Ri jñusʼu̷ kja dʼa skuama pje ri jichi in pjamiliage ma ri jmuru̷ji