Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 1

Ma i nee ri bʼu̷nkʼe na joo ko ni suge o ni xira, tsjage kʼo mama Mizhokjimi

Ma i nee ri bʼu̷nkʼe na joo ko ni suge o ni xira, tsjage kʼo mama Mizhokjimi

Mi jingua e Mizhokjimi “o ñe̷me e bʼe̷zo ñe e ndinxu.” (Mateo 19:4)

Ne Biblia mama ke e Jehová * o dya̷trʼa̷ nu primer ndinxu, kjanu go zimbi kʼe bʼe̷zo kʼu̷ mi chju̱u̱ Adán ngekʼua ro chju̷ntu̷bi. Me ko ma̷ja̷ e Adán ma go jñanda kʼe ndinxu, o mama ga kjaba: “Nujnu nge in nrrodyegodyajnu, nge in tsʼingegodyajnu” (Génesis 2:22, 23). E Jehová ma̷ja̷ ma ga jñanda ke ndexe yo ya chju̷ntu̷ me ma̷ji ga minji.

Ma bi chju̷ntu̷ge, bʼu̷ma mi mbenkʼe rgui ma̷ja̷, mi mbenkʼe dya rgui chu̱ge ko ni xira o ni suu. Pe dya nge ga kjanu, zo me ri sʼiyage ni xira o ni suu ra bʼu̷bʼu̷ paa ma ri chu̱gebi (1 Corintios 7:28). Kja ne skuama ri cho̷trʼu̷ kʼo mama ne Biblia kʼu̷ ri tsjage ngekʼua ri ma̷ja̷ rgi minkʼe ko ni xirage o ni suge ñe in pjamiliage (Salmo 19:8-11).

 1 TSJAGEBI NU BʼE̸PJI KʼU̸ O CHE̸CHKʼIBI E JEHOVÁ

NE BIBLIA MAMA KE: Yo bʼe̷zo mandaji kja o pjamilia (Efesios 5:23).

Nutsʼkʼe bʼe̷zo mu̷ a gui chju̷ntu̷ge, e Jehová nee ke ri pjo̷ru̷ge na joo ni suge (1 Pedro 3:7). E Mizhokjimi o dya̷trʼa̷ yo ndinxu ngekʼua ro mbo̷sʼu̷ o xira. Ngekʼua angeze nee ke ri sʼiyage ñe ri respetao ni suu (Génesis 2:18). Ri unu̷ ndexe kʼo ni jyodʼu̷ angeze, xo ga kjanu ma pje kʼo gi nee ri tsjage, ri dyo̷nbʼu̷ ja ga nuu kʼo gi nee ri tsjage, kjanu ri tsjapu̷ nguenda kʼo ra xitsʼi. Ma ri tsjagekʼo ra ñetsʼe me ki nege na punkju̷ ni suge (Efesios 5:25-29).

Nutsʼkʼe ndinxu ma ya gui chju̷ntu̷, e Jehová nee ke ri respetao ni xira ko texe in mu̷bʼu̷, ri pjo̷sʼu̷ ngekʼua ra mbo̷ru̷ na joo in pjamilia (1 Corintios 11:3; Efesios 5:33). Ma pje kʼo ra mama ni xira ke ri tsjagebi, ri dya̷ta̷, ri ma̷ja̷ rgi tsjage kʼo mama angeze (Colosenses 3:18). Ma ri tsjagekʼo, me rgi mubitsʼu̷ a jmii e Jehová ñe ni xirage ra netsʼe na punkju̷ (1 Pedro 3:1-6).

TSJAGE KʼO MAMABA:

  • Dyo̷nu̷ ni xirage o ni suge pje bʼe̷xtjo ri tsjage ngekʼua ri minkui na joo. Dya̷ra̷ na joo kʼo ra xitsʼi ngekʼua ri tsjagekʼo

  • Ri pe̷spʼi paciencia, jmanchʼa jmanchʼa ri pjechi pje ri tsjage ngekʼua ri ma̷pa̷ ni suge o ni xira

2 PJO̸NGUENRRA YO RI XIPJI NI SUGE O NI XIRAGE

NE BIBLIA MAMA KE: Dya ngextrjo ri tsjage kʼo gi nee, ri ñage ko ni suu ri tsejmebi pje ri tsjabi (Filipenses 2:3, 4). Dya ri gue̷nchʼi ni suge o ni xira, e Jehová janrra me na mubikʼu̷, nee ke ra jonteji, ke “ra sʼiya[ji] texe yo ntee” (2 Timoteo 2:24NTD). Zopju̷ge na joo ni suge o ni xira ngekʼua dya ra zichʼi o mu̷bʼu̷, nange ne Biblia mama ga kjaba: “Bʼu̷nkʼo ntee kʼu̷ dya mbeñeji na joo pje ma jñaa ra mbedye kja o nee, ngeje nzakja kʼu̷ ra dyʼe̷chi ko na espada in minte, pe yo ntee yo trju̷mbeñe na joo ma pje kʼo ra manji ngeje nzakja dʼa ñechje” (Proverbios 12:18). E Jehová ra mbo̷xkʼu̷ ngekʼua ri pa̱rge ja rgi ñage na joo (Gálatas 5:22, 23; Colosenses 4:6NTD).

TSJAGE KʼO MAMABA:

  • Ma ri pe̷sʼi dʼa nrrumu̷, ri dyo̷tu̷ Mizhokjimi ra mbo̷xkʼu̷ ngekʼua dya ri chu̱bi ni suge o ni xirage ma ri ñabi, dya nrrajme ri mbe̷kue̷bi

  • Pjo̷nguenrra pje kʼo ri xipji ñe ja rgi zopju̷ ni suu o ni xira

 3 MA PJE KʼO RI TSJABI, RI POTKI PJO̸STEBI

NE BIBLIA MAMA KE: Ma a gi chju̷ntu̷ge, nutsʼkʼe ñe ni suge o ni xirage “a ri natrjo tsʼingebi” nza yetsʼkui (Mateo 19:5). Pe dya ri jyombeñe ke ni xira o ni suu dya mbeñe kʼua ja gi mbenkʼe. Ngekʼua, nutsʼkʼe bʼe̷zo nesta ri tsjapu̷ nguenda ja ga soʼo ñe pje mbeñe ni suge, xo ñetsʼkʼe ndinxu ri tsjagekʼo, ga kjanu ri natrjo in pjeñegebi (Filipenses 2:2). Pe̷ski ri ñabi ri nubi pje ri tsjabi. Ne Biblia mama ke ma ri dyo̷tu̷ consejo, kʼo gi nee ri tsjage ra mbedye na joo (Proverbios 20:18). Ma pje gi nee ri tsjage, dyo̷nu̷ ni suu o ni xira ma nuu na joo kʼo gi nee ri tsjage, xo ri jyodʼu̷bi kʼo mama ne Biblia ngekʼua ri pa̱rgebi pje nge kʼo mazi na joo ke ri tsjagebi (Proverbios 8:32, 33).

TSJAGE KʼO MAMABA:

  • Ma ri ñabi ni suge o ni xirage dya ngextjo ri xipji kʼo bi tsjage, ri xipji ja gi soge amboo kja in mu̷nkʼe

  • Ma gi nee ri tsjage dʼa compromiso, otrʼu̷ ri ñaa ko ni suge o ni xira

^ par. 4 Ne Biblia mama ke e Mizhokjimi ni chju̱u̱ Jehová.