Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 7

Jichige yo in chʼige ja rga mimiji

Jichige yo in chʼige ja rga mimiji

“Nujyo jñaa yo ri xitsʼijidya ri jñuntrʼu̷geji kja in mu̷bʼu̷ji; xo ri jichiji in chʼigeji ngekʼua ra jñuntrʼu̷ji kja o mu̷bʼu̷ji.” (Deuteronomio 6:6, 7)

Mi jingua ma e Jehová o ñe̷me nu primer bʼe̷zo ñe nu primer ndinxu kja ne Xoñijomu̷, o che̷chpibi dʼa bʼe̷pji kʼu̷ me mi mubi: ke ro mbo̷ru̷bi o trʼibi (Colosenses 3:20). Nutsʼkʼe tata ñetsʼkʼe nana ma ri jichige na joo in chʼigebi, ma ra nokʼu̷ji ra so̷o̷ ra tsjaji kʼo mama e Jehová, xo ñe ra jonteji, ra pjechiji ra tsjaji o bʼe̷pji (2 Timoteo 1:5; 3:15). Para ke ri tsjagebikʼo, pe̷ski ri dyo̷nbʼu̷bi in chʼige ja ga zoʼo, pje mbeñe, pje nee ra tsjaa, ga kjanu ri so̷o̷ ri pa̱rgebi je nge kʼo bʼu̷bʼu̷ amboo kja o mu̷bʼu̷. Dya ngextrjokʼo, ma ri minkʼebi ja ga nee e Mizhokjimi, yo in chʼigebi ra unu̷ji nguenda i kjagebi kʼo na joo, ma ra kjogu̷ yo paa, angezeji xo ra nee ra tsjaji nzakjatsʼkʼebi (Salmo 40:8).

 1 MA PJE KʼO RA NEE RA XITSʼI IN CHʼIGE, RI DYA̸RA̸ NA JOO

NE BIBLIA MAMA GA KJABA: “Texe yo bʼe̷zo yo na joo, ndajmetjo ra dya̷ra̷ji, ra ndebʼe kja ra ndu̷ru̷” (Santiago 1:19NTD). Ma gi nee ke in chʼige me ra jyonkʼu̷ ri ñabi, jye̷zi kʼo i kjage, ri dya̷ra̷ na joo yo ra xitsʼi, dya ri gue̷nchʼi, jye̷zige ke ra ñaa, ma ra nguaru̷ ra ñaa ri zopju̷ na joo (Santiago 3:18). Ma ri ñage ko in chʼige, dya ri xipji dya ga joo texe yo na kjaa ñe yo ga mbeñe, ma ri tsjage akjanu, dya kja ra xitsʼi yo na kjuana. Dya tsʼi rgi mbe̷kue̷, xipjige ke i sʼiya na punkju̷ (Mateo 3:17; 1 Corintios 8:1TNM).

TSJAGE KʼO MAMABA:

  • Ma in chʼige nee ke ri ñage ko angeze, jye̷zi yo i kjage ñe dya̷ra̷ na joo yo ra xitsʼi

  • Ma gi so̷o̷, ri ñaa ko in chʼige pama pama, dya ri chebʼe ma kja ra mbe̷sʼi dʼa nrrumu̷

2 MA RI ÑABI KO IN CHʼIGE RI TENDIO PJE NEE RA XITSʼI

NE BIBLIA MAMA GA KJABA: “Kʼe ntee kʼu̷ trju̷mbeñe na joo, ra mbedye na joo kʼo nee ra tsjaa” (Proverbios 16:20). Ma ri ñage ko yo in chʼige, ri dya̷ra̷ na joo ngekʼua ri chunu̷ nguenda kʼo nee ra xitsʼiji, akjanu ri so̷o̷ ri pa̱rge ja ga zoji. Bʼu̷bʼu̷ paa ma yo trʼii ñe yo xuntrʼi nee ra ñaji dabadiji ke dya mbeñeji kʼo manji. Ne Biblia mama: “Dya ga joo yo kjaa kʼe ntee kʼu̷ dabadiji nee ra ñaa ma dya bʼe a̷ra̷ yo nee ra xipjiji, yo ntee yo kjaji ga kjanu dya trju̷mbeñeji” (Proverbios 18:13). Otrʼu̷ ri dya̷ra̷ na joo, dya tsʼi rgi mbe̷kue̷ (Proverbios 19:11).

TSJAGE KʼO MAMABA:

  • Ma ri ñaa ko in chʼige, jye̷zi ra ñaa, ri chebʼe ra nguaru̷. Zo pje nde ra xitsʼi kʼo na sʼoo kʼu̷ go tsjaa, dya tsʼi rgi mbe̷kue̷

  • Ma mi e̷nkʼe yo kje̷e̷ yo e̷dyi in chʼige, ¿ja ma kjatsʼkʼe?, ¿ja mi soge? ñe ¿pje mi nege? Ma ri tsjatsje̷ yo trʼo̷nu̷, ri so̷o̷ ri pjo̷sʼu̷ in chʼige

 3 NUTSʼKʼE TATA ÑETSʼKʼE NANA, NZA GA YETSʼKUI SO̸O̸ RI JICHIBI NA JOO IN CHʼIGEBI

NE BIBLIA MAMA GA KJABA: “In chʼigo, ma ra gue̷nchʼkʼi ni tatage, ri dya̷ta̷ge, xo ri dya̷ta̷ge na joo yo xitsʼige ni nanage” (Proverbios 1:8). E Jehová nee ke yo tata ñe yo nana ra mbo̷ru̷ji na joo o trʼiji, nee ke ra jichiji na joo ja rga minji. Nza yejebi, pe̷ski ra jichibi yo in chʼii ra dya̷ta̷ji ñe ra respetaoji (Efesios 6:1-3). Yo in chʼige so̷o̷ ra unu̷ji nguenda yo na kjogu̷ kja in nzunge, ngekʼua na joo ke “ri natjo pjeñe kʼu̷ ri tsjijñige[bi] ñe kʼu̷ ri tsjage[bi]” (1 Corintios 1:10). Ma dya ri nuu na joo kʼo mama ni xira o ni suu, dya ri chu̱gebi a jmii yo in chʼige, ma jiyo, dya ra respetaotsʼu̷gebi.

TSJAGE KʼO MAMABA:

  • Ri ñaa ko ni xira o ni suu, ri mangebi ja rgi zopju̷bi in chʼigebi

  • Ma dya gi mbeñe kʼua ja ga mbeñe ni xira o ni suu ja rgi jichibi yo in chʼige, dya ri mbe̷kue̷, ri tendio ja ga kja kʼu̷ ga mbeñe angeze ñe pjenga ga mbeñe ga kjanu

 4 OTRʼU̸ RI ÑUBI JA RGI JICHIBI YO IN CHʼIGEBI

NE BIBLIA MAMA GA KJABA: “Jichige na joo in chʼige ngekʼua ra nzhodʼu̷ kja nu ñʼiji kʼu̷ na joo” (Proverbios 22:6). Ma gi nee ke yo in chʼige me ra jonteji, ri jichige na joo pje nge kʼo gi nee ke ra tsjaji ñe pje nge kʼo dya gi nee ke ra tsjaji (Salmo 127:4; Proverbios 29:17). Ma ra bʼu̷bʼu̷ dʼa paa ke ra tsjaji kʼo na sʼoo, dya ngextjo ri yabu̷, kʼo ri tsjage ri pjo̷sʼu̷ ra tendioji pjenga gi nee ke ra tsjaji kʼo na joo (Proverbios 28:7). Xo ri jichige ra sʼiyaji e Jehová, pjo̷sʼu̷ge ra tendioji pje nee ra mama yo jñaa yo junsʼu̷ kja nu Biblia (Salmo 1:2). Ga kjanu ra mba̱ra̱ji pje nge kʼo na joo kʼu̷ ra tsjaji ñe pje nge kʼo na sʼoo kʼu̷ dya ra tsjaji (Hebreos 5:14).

TSJAGE KʼO MAMABA:

  • Jichige yo in chʼige pje mama ne Biblia ngekʼua ra mba̱ra̱ji na joo ja ga kjaa e Mizhokjimi, ri xipjiji ke ma pje kʼo ra kjogu̷ji kʼo na sʼoo, e Mizhokjimi so̷o̷ ra mbo̷sʼu̷ji

  • Jichi yo in chʼige ja rga mbo̷ru̷tsje̷ji ngekʼua dya ra jñanrraji kʼo na sʼoo, nzakja ma pje jodʼu̷ji kja Internet ñe kja yo redes sociales. Xipji ra pjo̷nguenrra yo ntee kʼo nee ra dyobʼu̷ji ko yo tsʼitrʼi ñe yo tsʼixutrʼi

“Jichige na joo in chʼige ngekʼua ra nzhodʼu̷ kja nu ñʼiji kʼu̷ na joo”