Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 4

Ja rgi pjo̷ru̷ na joo in merio

Ja rgi pjo̷ru̷ na joo in merio

Ma ri kjapji nguenda yo consejo, texe yo ri mbenkʼoji ra kjaji ra mbedye na joo (Proverbios 20:18).

Texezu̷ji ri pe̷pjiji ngekʼua ra so̷o̷ ra unu̷ji kʼo ra nestaji in pjamilia ngekʼua dya pje ra bʼe̷tsʼpʼiji (Proverbios 30:8). Ne Biblia mama ke ma ra ju̷̱goji merio dya pje ra bʼe̷tsʼkʼoji, dya nge kʼu̷ me ra negoji yo merio, pe ri nestaji merio ngekʼua ra so̷o̷ ra uiñiji in pjamilia ñe dya pje ra bʼe̷tsʼpʼiji (Eclesiastés 7:12). Ra bʼu̷bʼu̷ paa ma dya ri pe̷sʼige merio, pe dya ri chu̱gebi (Efesios 4:32). Dya ri mbeñe ke ni suu o ni xira sʼodʼu̷ texe ne merio, ri ñubi ja rgi pjo̷ru̷bi in merio.

 1 JÑUSʼU̸GEBI KJA DʼA XISKOMU̸ JA RGI SʼODʼU̸BI IN MERIO

NE BIBLIA MAMA GA KJABA: “Ma kjo kʼo nee ra jya̷bʼa̷ na ngumu̷, ni jyodʼu̷ otrʼu̷ ra tsjaa nguenda, kjo ra za̷sʼa̷ kʼu̷ rgui kjuatu̷ kʼe ngumu̷” (Lucas 14:28). Ma pje kʼo ri nee ri chomu̷, otrʼu̷ ri ñabi ni suge o ni xira, nza yetsʼkui ri tsejmebi ja rgi sʼodʼu̷bi in merio (Amós 3:3). Ma ri ñagebi, ri mangebi pje nesta ri chomu̷bi ñe janzi merio i pe̷sʼibi ngekʼua ri so̷o̷ ri chomu̷bikʼo (Proverbios 31:16). Ra bʼu̷bʼu̷ paa kʼu̷ ri pe̷sʼige na punkju̷ merio, bʼu̷ma ri mange: ¡So̷o̷ ra tomu̷ ndexe kʼo ri nego! Pe dya ri mbeñe ga kjanu, ri pjo̷nguenda ja rgi sʼodʼu̷ in merio ngekʼua dya ri chu̱sʼu̷ nguenda. Kʼo ri tsjage, ri ñuu janzi merio i pe̷sʼi ñe janzi merio ri so̷o̷ ri sʼodʼu̷ (Proverbios 21:5; 22:7).

TSJAGE KʼO MAMABA:

  • Juankʼebi yo merio yo ri tsjontrʼu̷bi ñe yo ri chomu̷bi kʼo ni jyonkʼu̷bi, ma xi ra mbonkju̷ merio, ri ñagebi pje ri tsjapu̷bi

  • Ma gi nuu kʼu̷ dya soo in merio, ri pjo̷ru̷ ngo̷ñi, a̷jna̷ ñe ri pe̷pji in juajma ngekʼua ri pe̷sʼi pje ri sige, ga kjanu dya ri ma chomu̷

 2 PJO̸NGUENDABI JANZI MERIO RI SʼODʼU̸BI

NE BIBLIA MAMA GA KJABA: “Ri negojme ra kjagojme kʼu̷ na joo kja a jmii Mizhokjimi [Jehová]; xo ñeje kja a jmii yo bʼe̷zo” (2 Corintios 8:21NTD). Ma i pe̷sʼi bʼe̷pji, xipji ni suge o ni xirage janzi merio kjontʼkʼu̷ji ñe janzi merio i sʼodʼu̷ nzi dʼa paa.

Ma pje kʼo gi nee ri chomu̷ kʼo na mizhi, ri ñaa ko ni suu o ni xira, dyo̷nu̷ ma nuu na joo kʼo gi nee ri tsjaa o iyo (Proverbios 13:10). Ri ñugebi pje ri tsjapu̷bi yo merio yo i pe̷sʼibi, ma ri tsjagebi akjanu dya ri chu̱gebi ri bʼu̷nkʼebi na joo. Yo merio yo i to̱nkje dya ngextrjo in tsjakje, xo ngeje o merio in pjamilia (1 Timoteo 5:8).

TSJAGE KʼO MAMABA:

  • Ma ri ñage ko ni suu o ni xira ri mangebi janzi merio so̷o̷ ri sʼodʼu̷ge ma i bʼu̷ntsje̷

  • Ñage ko ni suu o ni xira ja rgi pjo̷ru̷gebi in merio, dya ri chebʼe ma kja ra sa̷ja̷ yo nrrumu̷