Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 Xoru̷ 9

Yo pjamilia ra tsjaji kʼo mama ne Biblia ngekʼua ra minji na joo

Yo pjamilia ra tsjaji kʼo mama ne Biblia ngekʼua ra minji na joo

1. ¿Pjenga ri mimige na joo ma ri chju̷ntu̷ge jaga manda kʼe gobierno kja in pais?

E Jeoba nge na Mizhokjimi kʼu̷ me ma̷ja̷ ngekʼua mama pje ra kjaji yo pjamilia ngekʼua ra minji na joo xo ñe me ra to̱jiaji (1 Timoteo 1:11TNM). E Mizhokjimi go dya̷trʼa̷ e Adán go unu̷ dʼa nrrinxu ro mimibi. Ma dʼa bʼe̷zo nee ra mimi kʼo dʼa nrrinxu ra chju̷ntu̷bi jaga manda kʼe gobierno. Ga kjanu ra minkui na joo ra mboru̷bi o trʼibi. Yo kristiano ma ra chju̷ntu̷ji ra tsjaji jaga mama kʼo gobierno nuja menzumu̷ji. Xoru̷ge kja Lucas 2:1, 4, 5.

¿Pje nee Mizhokjimi ke ra kjaji yo ya chju̷ntu̷? Angeze dya nee ke ra jiambu̷bi ra mimibi texe yo paa. E Jeoba mama ke yo bʼe̷zo ñe yo nrrinxu ke a chju̷ntu̷ji dya kjo xe ra ñʼeje (Hebreos 13:4). E Jeoba dya nee ke ri jiambu̷bi ni suu o ni xira (Malaquías 2:16). Ma ni xira ñʼeje na nrrinxu o ma ni male dyompu̷ge ñʼeje na bʼe̷zo nge ma soo ri jiambu̷bi. Xoru̷ge kja Mateo 19:3-6, 9.

2. ¿Jarga mimi kʼo ya chju̷ntu̷?

E Jeoba go dya̷trʼa̷ e Eva ngekʼua ro mbo̷sʼu̷ o xira xo e Adán ro mbo̷sʼu̷ o suu (Génesis 2:18). Dʼa bʼe̷zo kʼu̷ a chju̷ntu̷ ra sʼiya o suu ra dyonu̷ pje nee ke ra tsjabi, dya ra tsjaa ngextrjo kʼo mama angeze, ra dya̷ra̷ kʼo mama o suu ra ngotrʼpu̷ ñiʼi angeze. Ma kʼe ndinxu pje go tsjaa o xira, ra pongatrjo dya ra ngotrʼu̷ ñiʼi kʼu̷ go tsjapʼu̷ ngekʼua ra mimibi na joo. Xoru̷ge kja Efesios 4:31, 32; 5:22-25, 33; 1 Pedro 3:7.

3. ¿Soo ra jiambu̷bi nu xira o nu suu ma pe̷sʼibi nrrumu̷?

Kʼo ya chju̷ntu̷ ma dya kja mimibi na joo ñe me chu̱bi, ne Biblia mama ke dya ra tsjabi ga kjanu, ra sʼiya o xira, ra sʼiya o suu, dya ra trjamabi, ra ñabi na joo ngekʼua ra mimibi na joo (1 Corintios 13:4, 5). E Mizhokjimi dya nee ke ri jiambu̷bi, nee ke ri ñubi pje ri tsjagebi ngekʼua ri minkui na joo. Xoru̷ge kja 1 Corintios 7:10-13.

 4. Trʼii ñe xuntrʼi, ¿jaga nee e Mizhokjimi ke ri minkʼe?

E Jeoba nee ke ri mimige na joo ñe me ri ma̷ge ngekʼua mama ke ri dya̷ta̷ge ni tatage ñe ni nanage akjanu ri pjechi pje ri tsjage (Colosenses 3:20). Xo nee ke ri tsjage kʼo mama angeze ñe kʼo mama o Trʼii ngekʼua ri ma̷ge. Xoru̷ge kja Eclesiastés 11:9–12:1; Mateo 19:13-15; 21:15, 16.

5. Tata ñe nana, ¿pje ri tsjagebi ngekʼua ra mimi na joo in chʼigebi?

E Jeoba mama ri pepjige ngekʼua ri chomu̷ge pje ra zii in chʼigeji, ri chomu̷ge bʼitu kʼu̷ ra jyeji, xo ri jyodʼu̷ge na ngumu̷ nuja ra mimiji (1 Timoteo 5:8). Ri jichige in chʼige pje mama ne Biblia jaga kjaa e Jeoba ngekʼua ra kjaji jaga nee angeze (Efesios 6:4). Ri tsjagebi kʼo mama e Jeoba ngekʼua in chʼigebi ra jñanrraji kʼo i̱ kjagebi xo ra tsjaji akjanu. Ma ri zopju̷gebi in chʼigebi ri jichigebi kʼo mama ne Biblia. Xoru̷ge kja Deuteronomio 6:4-7; Proverbios 22:6.

Ma in chʼii kjaa kʼo na joo, ri xipji: “Me ri ma̷kjo ke i̱ kjage kʼo na joo, xe ri tsjage ga kjanu”. Pe ma ra tsjaa kʼo na sʼoo ri zopju̷ge ri xipji ra jye̷zikʼo (Proverbios 22:15). Dya ri dye̷e̷ na punkju̷ in chʼii, ma ri zopju̷ dya ri sadʼu̷, ri zopju̷ na joo. Xoru̷ge kja Colosenses 3:21.

Yo nrrestigo e Jeoba opju̷ji libro nuja mama pje ra tsjaji yo tata ngekʼua ra mbo̷sʼu̷ji in chʼiji ñe ra pjechiji pje ra tsjaji. Kʼo mama yo libro je ni ñe̱je̱ kja ne Biblia. Xoru̷ge kja Salmo 19:7, 11.