Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 Xoru̷ 12

¿Pje ri tsjage ngekʼua ra dya̷tkʼa̷ e Mizhokjimi ma ri tsjage orasion?

¿Pje ri tsjage ngekʼua ra dya̷tkʼa̷ e Mizhokjimi ma ri tsjage orasion?

1. ¿Pjo̷sʼu̷ Mizhokjimi yo ntee kʼo kjaa kʼo na sʼoo?

E Jeoba nee ke nrrexe yo ntee ra tsjaji orasion, nee ra dya̷ra̷ pje ra xipjiji (Salmo 65:2). Pe yo ntee kʼo kjaa kʼo na sʼoo nzakja kʼo bʼe̷zo kʼo pa̷ra̷ nu male, e Jeoba dya a̷ra̷ ma pje ra o̷tu̷ji (1 Pedro 3:7). Nzakja mi jingua ma kʼo israelita mi kjaa kʼo ma sʼoo, e Jeoba dya mi soʼo na joo ngekʼua ma pje mi o̷tu̷ji dya kja mi kjotrʼpu̷ ñiʼi kʼo mi manji. Xoru̷ge kja Isaías 1:15; 55:7.

2. ¿Jargi tsjage orasion?

Ma ra kjaji orasion ngeje e Jeoba kʼu̷ ra zopju̷ ra o̷tu̷ji (Mateo 4:10; 6:9). Ri xipji e Jeoba ra dya̷tka̷ por o trʼii e Jesucristo angeze go unu̷ o bida por nutsʼkoji (Juan 14:6). E Jeoba dya nee ke ri zopju̷ kja na xiskuama nu kʼo ri dyo̷tu̷, dya xo nee ke ri yepe ri yepe yo jñaa yo ri xipji. Xoru̷ge kja Mateo 6:7; Filipenses 4:6, 7.

Ma ri dyo̷tu̷ Mizhokjimi zo dya ri ñage na jensʼe angeze ra dya̷tkʼa̷ (1 Samuel 1:12, 13). Ma ra ñonu̷ji, ma ra i̱ji̱, ma pje kjogu̷zu̷ji kʼo na sʼoo, angeze nee ke ra zopju̷ji ra xipji pje ri kjaji ñe jaga kjaa kʼo ri soji. Ngekʼua dya ri jye̷zi ra kjogu̷ na paa ke dya ri ñaa ko e Jeoba. Xoru̷ge kja Salmos 55:22; Mateo 15:36.

3. ¿Pjenga ri mage nuja poji kʼo kjaji kʼo go tsjaa e Jesús?

Nudya na punkju̷ ntee dya kreoji Mizhokjimi, ma gi xipjiji ke e Mizhokjimi Jeoba ra tsjaa ne Xoñijomu̷ me rga zo̷o̷ dya kreojikʼo, me trjenkʼeji. Bʼu̷ma ma gi a̷rge ga kjanu dya gi soge na joo (2 Timoteo 3:1, 4; 2 Pedro 3:3, 13). Pe ka̱ra̱ ntee kʼo mimi  jaga nee Mizhokjimi, ma i̱ pa̱rge ntee ga kjanu, jyodʼu̷gekʼo ri ñaji ngekʼua xo ri tsjage kʼo na joo jaga tsjaji angezeji. Xoru̷ge kja Hebreos 10:24, 25.

Ngekʼua na joo ri mage ja jmuru̷jikʼo, angezeji kjaji kʼo go tsjaa e Jesús. Akjanu xo ri pjechi ri tsjage kʼo na joo jaga nee e Jeoba. Xoru̷ge kja Romanos 1:11, 12.

4. ¿Jarga soo ri pa̱rge e Mizhokjimi?

Ne Biblia mama pje go tsjaa e Jeoba mi jingua, ma ri xoru̷ge ri pa̱rge jaga kjaa angeze. Kja ne Biblia e Jeoba xitsigoji jaga nee ke ra minji. Jmanchʼa jmanchʼa ri zopju̷ge ne Biblia ñe pama pama dya ri jyombeñe ri tsjage orasion, ga kjanu ri unu̷ nguenrra ke e Jeoba me nezgoji, ri unu̷ nguenrra angeze pjechi na punkju̷. Xoru̷ge kja 1 Timoteo 4:15, 16.

Ma ri tsjage kʼo mama e Mizhokjimi angeze ra mbo̷xkʼu̷. Pama pama gi ñonu̷ji ngekʼua na zetsʼi xo ga kjanu dya ri jye̷zi ni ri na paa ri zopju̷ ne Biblia ñe ri tsjijñi jarga mbo̷xkʼu̷ yo ri xoru̷. Xoru̷ge kja Mateo 4:4; Hebreos 11:1, 6.

5. ¿Jarga pa̱rgoji ke e Jeoba sʼiyazgoji?

E Jeoba sʼiyazgoji, pjo̷xku̷ji ngekʼua ra nuji kʼe paa ma ra tsjaa ne Xoñijomu̷ me rga zo̷o̷ (Salmo 91:1, 2, 7-10). E Jeoba jitsʼkoji pje ra kjaji ngekʼua ra minji na joo, ra pjoru̷ji in bida ñe ra ma̷ji rga minji. Xoru̷ge kja Salmo 73:27, 28; Santiago 4:4, 8.