Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 Xoru̷ 10

¿Pje ma relijion kjaa kʼo mama ne Biblia?

¿Pje ma relijion kjaa kʼo mama ne Biblia?

“Kjapu̷ji na joji [...] pero amboo o mu̷bʼu̷ji me na sʼoji [...]. Ngekʼua ri pjotpu̷ji nguenrrakʼo.”(MATEO 7:15)

“Mama kʼo xopu̷nte kʼu̷ pa̱ra̱ji Mizhokjimi. Pero kʼu̷ ni tsjaji na sʼoo, ixi ñetsʼe kʼu̷ dya pa̱ra̱ji.”(TITO 1:16)

1. ¿Janzi relijion kjaji kʼo na kjuana?

E Jesús o jichi o disipulo na relijion kʼu̷ ma kjuana. E Jesús go mama: “Dya punkju̷ kʼo to̷trʼu̷ kʼe ngoxtrʼi kʼu̷ rgi moji kʼe ñiji” (Mateo 7:14). Nudyo paadya, bʼu̷bʼu̷ dʼatrjo relijion kʼu̷ mimi kʼua ja ba mama e Jesucristo ñe kjaji jaga mama o Jñaa e Mizhokjimi. Xoru̷ge kja Juan 4:23, 24; 14:6.

2. ¿Pje go mama e Jesús ro tsjaa kʼe relijion kʼu̷ dya kjuana?

E Jesús go mama ro bʼu̷bʼu̷ ntee kʼu̷ dya ro jizhiji kʼo na kjuana kʼo mama kja ne Biblia. Manji ke o relijion na kjuana, eñe kjaji kʼo mama e Palesito ajensʼe, pero dya ga kjuanakʼo. ¿Jargi pa̱ra̱ kjo nge kʼo bʼemi na kjaji kʼu̷ janzi bo mama e Jesús? Kʼo bʼu̷bʼu̷ kja kʼe relijion kʼu̷ na kjuana mimiji ñe kjaji jaga mama ne Biblia. Xoru̷ge kja Mateo 7:14-23.

3. ¿Pje ma relijion kjaji janzi ba mama e Jesús?

Ra nuji pje kjaa yo ntee kʼo bʼemi mimiji kʼua ja ba mama e Jesús:

  • Kjaji kʼo mama o Jñaa e Mizhokjimi. Kʼe relijion kʼu̷ na kjuana dya kjaji jaga neji angezeji, kjaji kʼo mama ne Biblia (Mateo 15:7-9). Angezeji jichiji yo ntee ra mimiji jaga mama ne Biblia. Xoru̷ge kja Juan 17:17; 2 Timoteo 3:16, 17.

  • Kʼe relijion kʼu̷ kjaa kʼo na kjuana jichi yo ntee pje ni chju̱u̱ e Mizhokjimi. E Jesús mi xipji yo ntee pje ni chju̱u̱ e Mizhokjimi ñe  jaga kjaa angeze. E Jesús mi nee ke yo ntee ro mba̱ra̱ji pje ni chju̱u̱ e Jeoba ngekʼua go jichi ro dyo̷tu̷jikʼu̷ ma ro tsjaji orasion (Mateo 6:9TNM). Nuja i̱ menzumu̷ge, ¿pje ma ntee poji kja o ngumu̷ yo ntee ñe jichiji pje ni chju̱u̱ e Mizhokjimi? Xoru̷ge kja Juan 17:26; Romanos 10:13, 14.

  • Kʼo na kjuana kjaji kʼo go mama e Jesús jichiji yo ntee pje ngeje o Reino e Mizhokjimi. E Palesito ajensʼe o nrra̷ja̷ o trʼii kja ne Xoñijomu̷ ro ne̱e̱ jichi yo ntee pje ra tsjaa o Reino e Mizhokjimi ñe jango rga mbo̷sʼu̷ yo ntee. E Jesús o tsjaakʼo asta kʼe paa ma go mbotrʼu̷ji (Lucas 4:43; 8:1, TNM; 23:42, 43, TNM). E Jesús go xipji o disipulo ke ro jichiji yo ntee jaga kjaa o Reino e Mizhokjimi kʼua jaba tsjaa angeze. ¿Pje i̱ jñanrrage, kjo ngeje kʼo jichiji yo ntee pje nge o Reino e Mizhokjimi? Xoru̷ge kja Mateo 24:14.

  • Yo disipulo e Jesús dya kjaji kʼo na sʼoo nzakja yo ntee. Kʼo ntee kʼo bʼu̷bʼu̷ji kja relijion kʼu̷ dya ga kjuana kichiji kja politika xo kjaji manipjestasion ngekʼua ra unu̷ji kʼo neji. Yo ntee kʼo bʼu̷bʼu̷ji kja kʼe relijion kʼu̷ na kjuana dya kjajikʼo (Juan 17:16, NTD; 18:36). Dya kjaji kʼo na sʼoo jaga tsjaa yo ntee kja ne Xoñijomu̷. Xoru̷ge kja Santiago 4:4.

  • Kʼo ntee kʼo bʼemi kjaji jagua mama e Jesús, me sʼiyaji o dyojui. Kjaji kʼo mama ne Biblia, sʼiyaji nrrexe yo ntee zo nʼaño ga ñaji, zo nʼaño ja menzumu̷ji. Ma yo pais tsjaji chu̱ʼu̱ kʼo nʼaño pais, yo relijion kʼu̷ dya ga kjuana potrʼu̷ji yo ntee, pero yo disipulo e Jesús pa̱ra̱ji dya ga jookʼo, dya potrʼu̷nteji (Miqueas 4:1-3). Zo dya pe̷sʼiji na punkju̷ merio ñe zo dya kjo̱trʼu̷ji merio kʼo ga tsjaji, me pjo̷sʼu̷ji yo ntee. Xoru̷ge kja Juan 13:34, 35; 1 Juan 4:20.

4. ¿Bʼu̷bʼu̷ na relijion kʼu̷ kjaa kʼo na kjuana?

Dʼatrjo relijion kʼu̷ jichi yo ntee jango ga mama ne Biblia, jichi o trju̱u̱ e Mizhokjimi, jichi ke o Reino e Mizhokjimi ra mbo̷sʼu̷ yo ntee xo jichi ra sʼiyaji o minte dya ra mbotrʼu̷ji. ¿Pje ma relijion i̱ mange ga tsjaa ga kjanu? Xoru̷ge kja 1 Juan 3:10-12.