Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 Xoru̷ 11

¿Pjekja na joo ra mimiji jaga mama ne Biblia?

¿Pjekja na joo ra mimiji jaga mama ne Biblia?

Ra kjaji kʼo mama e Jeoba ngekʼua dya ra kjagu̷zgoji kʼo na sʼoo(SALMO 36:9)

1. ¿Pjenga ra jodʼu̷ji e Jeoba ra mbo̷xkʼu̷ji?

Dya kjo pa̱ra̱ na punkju̷ nzakja e Jeoba. E Jeoba me sʼiyazgoji, dya je̷zgiji pjo̷xkʼu̷goji. Ma go tsjaa kʼu̷ ro nga̱ra̱ ntee kja ne Xoñijomu̷, dya go ngama ro tsjatsje̷ji jakʼo ma neji (Jeremías 10:23). Yo tsʼitrʼi ñe yo tsʼixutrʼi dya pa̱ra̱ji na punkju̷, o tata ga mbo̷sʼu̷ji ñe jichiji pje ra tsjaji. Nzakja yo tsʼitrʼi, nutsʼkoji dya ri pa̱rgoji na punkju̷ ngekʼua e Mizhokjimi pjo̷xkʼu̷goji akjanu ra pjechiji pje ra kjaji (Isaías 48:17, 18). Kja ne Biblia e Jeoba xitsiji jñaa kʼo me pjo̷xkʼu̷ji. Xoru̷ge kja 2 Timoteo 3:16.

E Jeoba xitsʼkoji ke ma ra kjaji kʼo mama kja nu Jñaa ra mimiji na joo nudya ñe ga ma axojñi e Jeoba ra dyakoji kʼo me na joo. Angeze o dyakoji ra bʼu̷njiba kja ne Xoñijomu̷ ngekʼua me joo ga soʼo kja o mu̷bʼu̷ ma ga jñanrra ri mimiji jaga nee angeze. Xoru̷ge kja Salmo 19:7, 11; Apocalipsis 4:11.

2. ¿Jargi pa̱rge jaga kjaa kʼo mama e Jeoba?

¿E Jeoba xitsʼi kja ne Biblia nrrexe kʼo ri tsjage? Iyo. Pe ma dya ri pa̱rge pje ri tsjaa, ri zopju̷ ri zopju̷ ne Biblia ga kjanu e Jeoba ra mbo̷xkʼu̷ ri pa̱rge pje ni mbe kʼo na joo ke ri tsjaa ñe pje ni mbe kʼo dya ga joo kʼo dya ri tsjaa (Deuteronomio 22:8). Pama pama ri xoru̷ ne Biblia ga kjanu ri unu̷ nguenrra jaga kjaa kʼo nee Mizhokjimi (Proverbios 2:10-12). Ne Biblia mama ke e Jeoba me sʼiyazgoji, go dyaku̷goji kʼo me na zo̷o̷, o tsjaa ke ra bʼu̷bʼu̷goji. Ma ra xoru̷jikʼo kja ne Biblia, ri unu̷ji nguenrra kʼu̷ na joo ra pjonguenrraji kʼo ri kjaji ngekʼua dya pje ra kjogu̷zu̷ji ja ri pepjiji, kja in nzunji ñe ja ri nzhodʼu̷ji. Xoru̷ge kja Hechos 17:28.

3. ¿Pje go mama e Jesús kʼu̷ ra kjaji?

E Jesús go mama pje ra kjaji, o mama ke na joo ra pa̱rgoji jaga kjaa e Mizhokjimi ngekʼua ra sʼiyaji ñe ra kjaji kʼo mama angeze.  Dya ri jyombeñe kʼo mama e Jeoba ma pje kʼo ri tsjage (Proverbios 3:6). Nukʼu̷ ra tsjaa kʼo mama e Mizhokjimi me ta ma̷ja̷ ñe ra mimi texe yo paa kja ne Xoñijomu̷ ma me rga zo̷o̷. Xoru̷ge kja Mateo 22:36-38.

E Jesús go mama ra sʼiyaji yo ntee, ma ra kjajikʼo ra ka̱rgoji na joo ko yo ntee, dya ra chu̱ji (1 Corintios 13:4-7). Ra kjaji kʼo go mama e Jesús, ra sʼiyaji yo ntee kʼua janzi ga sʼiyazgoji e Jeoba. Xoru̷ge kja Mateo 7:12; 22:39, 40.

4. ¿Jarga mimiji ma ra kjaji kʼo mama ne Biblia?

Kja ne Biblia e Jeoba mama ke yo bʼe̷zo ra sʼiyaji o suu, yo nrrinxu ra sʼiyaji o xira, ra sʼiyaji o trʼiji akjanu ra mimiji na joo (Colosenses 3:12-14). Kʼo ya chju̷ntu̷ dya ra jiambu̷bi ra mimibi nrrenxe yo paa. Xoru̷ge kja Génesis 2:24.

Kja ne Biblia e Jeoba xitsiji ra pepjiji, dya ra ponu̷ji, ma ri tsjagekʼo yo ntee dya ra netsʼeji ñe dya ra nee ra dyakʼu̷ji bʼepji. Ma pje kjogu̷tsʼu̷ dya gi soge na joo, ne Biblia xitsʼige jñaa kʼu̷ ra mbo̷xkʼu̷ (Proverbios 10:4, 26; Hebreos 13:18). Ne Biblia mama ke ma gi pe̷sʼi pje ri sige ñe gi bʼu̷bʼu̷ge na joo, dya ri tsjijñi jargi tsjaa ngekʼua ri pe̷sʼige na punkju̷ merio. Xoru̷ge kja Mateo 6:24, 25, 33; 1 Timoteo 6:8-10TNM.

E Jeoba xitsigoji kja ne Biblia ke dya ga joo ke ra ti̱ji (Proverbios 14:30; 22:24, 25). Ga kjanu ri bʼu̷bʼu̷ge na joo, dya kjo ri sadʼu̷ge, dya kjo ri jyombʼu̷ge chu̱ʼu̱, dya ri sodye nzakja kʼo ntee kʼo ti̱ji, dya xo ra kjogu̷tsʼu̷ kʼo na sʼoo (Proverbios 23:20). E Jeoba mama ke ma gi nee ri sige pare soo ri sige, pe dya ri ti̱ge (Salmo 104:15; 1 Corintios 6:10). Ma ra xoru̷ji kʼo mama e Mizhokjimi kja ne Biblia ra kjijñiji kʼo na joo ñe ra kjaji kʼo na joo (Salmo 119:97-100). Kʼe relijion kʼu̷ na kjuana pa̱ra̱ ke ma ra kjaji kʼo mama e Mizhokjimi ra minji na joo. Angezeji me sʼiyaji e Jeoba xo neji ra soʼo na joo o mu̷bʼu̷. Xoru̷ge kja Mateo 5:14-16.