Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 Xoru̷ 4

¿Kjo ngeje e Jesucristo?

¿Kjo ngeje e Jesucristo?

¿Jama kjaa e Jesús ko yo ntee?(MATEO 11:29; MARCOS 10:13-16)

1. ¿Ja mi bʼu̷bʼu̷ e Jesús ma dya bʼe ma e̱je̱ kja ne Xoñijomu̷?

Ma dya bʼe ma e̱je̱ e Jesús kja ne Xoñijomu̷, je mi bʼu̷bʼu̷ ajensʼe mi ngeje dʼa anxe (Juan 8:23). O bʼu̷bʼu̷ yo paa ma e Palesito ajensʼe mi bʼu̷ntsje̷, kjanu o unu̷ ro bʼu̷bʼu̷ e Jesús, dya kjo go mbo̷sʼu̷ ro tsjaa o trʼii ngekʼua kja ne Biblia mama: “Kʼu̷ nʼatjo o Trʼii e Mizhokjimi”. Kʼe trʼii kʼu̷ mamaba ngeje e Jesús kʼu̷ otrʼu̷ go bʼu̷bʼu̷trjo. Ma go bʼu̷bʼu̷ e Jesús nge ma go mbo̷sʼu̷ Mizhokjimi, o dya̷trʼa̷bi kʼo bʼu̷bʼu̷ ajensʼe ñe kʼo bʼu̷bʼu̷ kja ne Xoñijomu̷ (Juan 1:14). Ma e Jeoba mi bʼu̷bʼu̷ kjo nge kʼu̷ mi nee ro penpe na jñaa, mi ngeje e Jesús mi ta̷ga̷ ro maa xipji pje mi nee e Jeoba. Ngekʼua ne Biblia mama e Jesús ngeje e “Jñaa”. Xoru̷ge kja Proverbios 8:22, 23, 30; Colosenses 1:15, 16.

2. ¿Pje go ne̱e̱ tsjaa e Jesús kja ne Xoñijomu̷?

E Mizhokjimi o juajnu̷ e María kʼu̷ mi ngeje judía, nukʼu̷ dya bʼe mi chju̷ntu̷, o tsjapʼu̷ ro nrrunte. E Jesús dya go ñʼee na tata kja ne Xoñijomu̷, o tata e Jesús bʼu̷bʼu̷ ajensʼe (Lucas 1:30-35). E Jesús go e̱je̱ ngekʼua (1) ro jichi yo ntee jama kjaa e Mizhokjimi, (2) go ne̱e̱ jitsʼkoji jarga soo ra kjaji kʼo nee Mizhokjimi zo ra kjogu̷ji nrrumu̷ kʼu̷ na se̷zhi. (3) E Jesús go mama: “xo rba e̱kjo ra tu̱go, ngekʼua ra kjotpʼu̷ o nzhubu̷ na punkju̷ ntee”. Xoru̷ge kja Mateo 20:28.

3. ¿Pjekja o mbo̷xku̷goji e Jesús?

E Jeoba dya mi nee ke ro titaji ni ke ro nrru̱ji, mi nee ke ro bʼu̷bʼu̷ji nrrexe yo paa. E Mizhokjimi o xipji e Adán: “Ma ri sige ne lulu kʼu̷ kisʼi kja ne zaʼa ri chu̱ge”. Ngekʼua ma e Adán dya ro zii kʼe lulu dya ro nrru̱u̱ xe ro bʼu̷ntrjodya (Génesis 2:16, 17; 5:5). Ne Biblia mama: “E Adán o tsjaa kʼo na sʼoo. Ngekʼua je ba teʼekʼua in nzhubu̷ kja ne Xoñijomu̷. Je akjanu ba mbu̷ru̷ kʼu̷ ri tu̱ji”. ¿Kjo  xe ro soo ke e Jeoba xe ro pjo̷sʼu̷ yo ntee ngekʼua dya kja ra tu̱ji? Ja̱a̱, go nrra̷ja̷ dʼa ntee kʼu̷ ro mbo̷xku̷goji (Éxodo 21:29, 30). Xoru̷ge kja Romanos 5:12; 6:23.

¿Kjo nge kʼu̷ ro mbo̷xku̷goji? Dya soo ra mbo̷xku̷goji dʼa ntee kʼu̷ kjaa kʼo na sʼoo nzakjazgoji. Kʼu̷ soo ra mbo̷xku̷goji ngekʼua dya kja ra tu̱ji nge dʼa ntee kʼu̷ dya kjaa kʼo na sʼoo. Ma ri tu̱ji nge nzakja ma ri ngo̱trʼu̷ji na nguenrra ke ri pe̷sʼiji. Pe dya soo ra tsjo̱trʼu̷ji kʼo na sʼoo kʼo kjaji yo ntee ngekʼua dya kja ra nrru̱ji. Xoru̷ge kja Salmo 49:7-9.

4. ¿Pjekja go nrru̱u̱ e Jesús?

E Mizhokjimi me sʼiyazgoji ngekʼua o nrra̷ja̷ kja ne Xoñijomu̷ e Jesús ro ne̱e̱ mbo̷xku̷goji. E Jesús dya mi pe̷sʼi pekado ngekʼua angeze dya ro nrru̱u̱, pe me sʼiyazgoji ngekʼua o jye̷zi ro mbotrʼu̷ji akjanu ra soo ra mbo̷xku̷goji ngekʼua dya kja ra tu̱ji. Xoru̷ge kja Juan 3:16; Romanos 5:18, 19.

5. ¿Ja je bʼu̷bʼu̷dya e Jesús ñe pje na kjaa?

E Jesús ma go mimi kja ne Xoñijomu̷ o mbo̷sʼu̷ yo ntee kʼo mi supjre, mi joku̷ kʼo mi sodye, kʼo ya bi nrru̱u̱ tsjapu̷ ro mimiji na yeje. Kʼua janzi gua mbo̷sʼu̷ yo ntee ma go mimi kja ne Xoñijomu̷ je xo rga kjanu ra mbo̷sʼu̷ yo ntee ma ra manda kja o Reino Mizhokjimi (Mateo 15:30, 31; Juan 5:28). Ma e Jesús go nrru̱u̱, e Jeoba o xosu̷ o tsjapu̷ ro bʼu̷bʼu̷ na yeje. Dya kja mi ngeje na ntee nzakjazgoji, mi ngeje na anxe (1 Pedro 3:18). Kjanu o maa ajensʼe ja bʼu̷bʼu̷ e Jeoba o tebʼenu jesta ma ro xipji e Mizhokjimi ro manda (Hebreos 10:12, 13). Nudya, o disipulo e Jesús xipjiji yo ntee ke e Jesús bʼu̷bʼu̷dya ajensʼe a go mbu̷ru̷ go mandanu. Xoru̷ge kja Daniel 7:13, 14; Mateo 24:14.

Nudya, dya kja ra mezhe ra pju̷ru̷ ra manda kja ne Xoñijomu̷ ra chjotu̷ yo ntee kʼo kjaji kʼo na sʼoo. Yo ntee kʼo kjaji kʼo mama e Jesús me ra ma̷ji ra nga̱ra̱ji kja ne Xoñijomu̷ kʼu̷ me rga zo̷o̷. Xoru̷ge kja Salmo 37:9-11.