Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 Xoru̷ 2

¿Kjo ngeje e Mizhokjimi?

¿Kjo ngeje e Mizhokjimi?

1. ¿Pjenga ra a̷ta̷ji e Mizhokjimi?

E Palesito ajensʼe dya bʼu̷bʼu̷ na paa ke ro mbu̷ru̷ ro bʼu̷bʼu̷, dya xo bʼu̷bʼu̷ na paa ke ra nrru̱u̱ (Salmo 90:2). Angeze go dya̷trʼa̷ nrrexe kʼo i̱ janrrage ajensʼe ñe kʼo i̱ janrrageba kja ne Xoñijomu̷. Kja ne Biblia e Mizhokjimi mama ke ra tsjaa kʼo me na joo (1 Timoteo 1:11). In Tatazgojme kʼu̷ bʼu̷bʼu̷ ajensʼe o dyaku̷ji ne Xoñijomu̷ ngekʼua ro minjiba. Ngekʼua ngextrjo e Palesito ajensʼe ra unu̷ji po̷jo̷, ra sʼiyaji ñe ra a̷ta̷ji kʼo mama angeze. Xoru̷ge kja Apocalipsis 4:11.

2. ¿Jaga kjaa e Mizhokjimi?

Dya kjo soo ra jñanrra e Diosi. E Diosi dya pe̷sʼi o kuerpo nzakjazgoji. Angeze bʼu̷bʼu̷ ajensʼe, nutsʼkojme ke ri ka̱xtrjojme kja ne Xoñijomu̷ dya soo ra janrraji (Juan 1:18; 4:24). E Mizhokjimi me sʼiyazgoji ngekʼua o ñe̷me na punkju̷ nzha̷jna̷, na punkju̷ zaʼa kʼu̷ unu̷ lulu kʼu̷ me na kintrjo ngekʼua ra ziji. Ma ra pjonguenrraji jaga kjaayo ra unkoji nguenrra e Mizhokjimi me pa̱ra̱ na punkju̷. Me na nojo ne Xoñijomu̷ ja ri minkoji, xo me na nojo e jyaru̷, me na nojo yo seje ñe yo tanseje kʼu̷ ri janrrgoji ma xomu̷ ga kjanu ri unkoji nguenrra ke e Mizhokjimi kʼu̷ o dya̷trʼa̷kʼo me na zezhi. Xoru̷ge kja Romanos 1:20.

Ma ra xoru̷ji ne Biblia ra pa̱ra̱ji jaga kjaa e Palesito ajensʼe xo mama pje nge kʼo mama Mizhokjimi ke ra kjaji ñe pje nge kʼo na sʼoo kʼu̷ dya nee ke ra kjaji. Kja ne Biblia mama jama zoʼo e Mizhokjimi ma yo ntee dya mi a̷ta̷ji mi kjaji kʼo na sʼoo xo mama jama zoʼo ma mi kjaji kʼo ma joo. Xoru̷ge kja Salmo 103:7-10.

3. ¿Pje ni chju̱u̱ e Palesito ajensʼe?

E Mizhokjimi go mama: “Ni chju̱zgo Jeoba” (Isaías 42:8). Zo ri xipji Diosi, Mizhokjimi, e Palesito ajensʼe ni chju̱u̱ Jeoba. Yo jñatrjo ma na̷mbʼa̷ji o chju̱u̱ ri dya̷ra̷ge ga kjaba: “Jeoba”. Xo bʼu̷bʼu̷ ntee kʼo xipjiji “Yavé”. Xoru̷ge kja Salmo 83:18.

 Nudya na punkju̷ Biblia dya kja jñusʼu̷ji o trju̱u̱ e Jeoba. Pe mi jingua ma go opju̷ji ne Biblia axto zoo 7.000 bes ke go jñusʼu̷ji Jeoba. E Jesús mi pa̱ra̱ ke e Palesito ajensʼe ni chju̱u̱ Jeoba ngekʼua go jichi yo ntee pje ni chju̱u̱ o tata. Xoru̷ge kja Juan 17:26.

Nzakja ne bʼe̷zo nu i̱ janrrageba me sʼiya nu tsʼixutrʼi, ga kjanu e Jeoba me sʼiyazgoji ngekʼua ra mbo̷xkʼu̷goji

4. ¿Nezgoji e Jeoba?

Na punkju̷ ntee manji ngeje Mizhokjimi kʼu̷ penkʼezgoji nrrumu̷ kʼo na sʼoo, pe dya nge ga kjanu. E Jeoba me sʼiyazgoji. Xoru̷ge kja Santiago 1:13.

E Jeoba je̷zkoji pje ni mbe kʼo ri nee ra kjagoji, ma ra kjagoji kʼo nee angeze ra soʼo na joo (Josué 24:15). Zo ri pa̱ra̱ji pje ra kjaji, na punkju̷ ntee dya a̷ta̷ji e Jeoba kjaji kʼo na sʼoo ngekʼua dya mimiji na joo. E Jeoba dya nee ke ra kjajikʼo, sentio kja in mu̷bʼu̷ ma ga jñanrra ri kjogu̷ji kʼo na sʼoo. Xoru̷ge kja Génesis 6:5, 6.

E Jeoba me nezgoji, angeze nuu ke ra ka̱ra̱ji na joo ma dya kja ra bʼu̷bʼu̷ ntee kʼo kjaji kʼo na sʼoo. Ngekʼua angeze ra chjotu̷ yo ntee kʼo kjaji kʼo na sʼoo, akjanu yo ntee dya kja ra supjreji. Kja ne xiskuama nu xoru̷ 8, ra nuji pjenga e Jeoba je̷zgoji ke ra supjreji. Xoru̷ge kja 2 Pedro 2:9; 3:7, 13.

5. ¿Pje ra kjaji ngekʼua ra joji ko e Mizhokjimi?

E Jeoba nee ke ri zopju̷ge, angeze ra dya̷tkʼa̷ ra mbo̷xkʼu̷ (Salmo 65:2; 145:18). Angeze me mbenzgoji jarga mbo̷xkʼu̷jme. Zo ri kjagoji kʼo na sʼoo dya nugoji na u̷u̷. Ma ri o̷tu̷ ra ponkʼu̷tsʼu̷ dya ra tsjapu̷ nguenrra kʼo bi tsjage. Akjanu me ri ma̷ja̷bi ri jobigebi. Xoru̷ge kja Salmo 103:12-14; Santiago 4:8.

Ra dya̷ta̷ji e Jeoba, ra sʼiyaji kʼua janzi ga sʼiyazgoji (Marcos 12:30). Xoru̷ge pje mama o Jñaa e Jeoba akjanu ri pa̱rge jaga kjaa angeze. Ri pjechi jargi tsjage kʼo mama angeze. Akjanu ra ñetsʼe kʼu̷ me gi sʼiyage, ri soge ke bʼemi bʼu̷bʼu̷ na Mizhokjimi ke me sʼiyatsʼu̷. Xoru̷ge kja 1 Timoteo 2:4; 1 Juan 5:3.