Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 Xoru̷ 5

¿Jaga nee e Mizhokjimi ke ra mimiji kja ne Xoñijomu̷?

¿Jaga nee e Mizhokjimi ke ra mimiji kja ne Xoñijomu̷?

1. ¿Pjekja e Jeoba go tsjaa ne Xoñijomu̷?

E Jeoba go tsjaa ne Xoñijomu̷ ngekʼua ra bʼu̷njiba yo ntee. Dya go dya̷trʼa̷ e Adán ñe e Eva ngekʼua ro ma mimibi ajensʼe, e Jeoba ix go dya̷trʼa̷ yo anxe ngekʼua ro nga̱ra̱ji ajensʼe ko angeze (Job 38:4, 7). E Mizhokjimi o ñe̷me e Adán ñe e Eva kja na xoñijomu̷ kʼu̷ me ma zo̷o̷, mi ngeje kʼe jardin a Edén (Génesis 2:15-17). E Jeoba mi nee angezebi ro mimiji na joo kja ne Xoñijomu̷, dya ro nrru̱ji. Xoru̷ge kja Salmo 37:29; 115:16.

Ma e Jeoba o dya̷trʼa̷ ne Xoñijomu̷ ngextrjo kʼe jardin Edén me ma zo̷trjo. E Mizhokjimi mi nee e Adán ñe e Eva ro musʼu̷ na punkju̷ chʼii, ro pepjiji ro tsjaji nrrexe ne Xoñijomu̷ me na zo̷o̷ (Génesis 1:28). E Mizhokjimi dya ra chjotu̷ ne Xoñijomu̷, nrrexe yo paa ra bʼu̷bʼu̷ ntee kʼu̷ ra nga̱ra̱jiba. Xoru̷ge kja Salmo 104:5.

2. ¿Pjenga ne Xoñijomu̷ dya kja nge nzakja kʼe jardin Edén?

E Jeoba go pjongu̷ e Adán ñe e Eva kja kʼe jardin Edén nange dya go dya̷ta̷bi e Mizhokjimi, o pekabi. Yo ntee dya soo ra tsjaji ne Xoñijomu̷ na zo̷o̷ nzakja kʼe jardin Edén. Ma go peka e Adán ñe e Eva kʼo ntee go tsjaji kʼo na sʼoo (Job 9:24). Xoru̷ge kja Génesis 3:23, 24.

¿Pje mbeñe Mizhokjimi? ¿Ra tsjaa ne Xoñijomu̷ me na zo̷o̷ ja nzakja kʼo mi nee mi jingua? E Jeoba me na zezhi angeze mama ra tsjaa ne Xoñijomu̷ me rga zo̷o̷ (Isaías 45:18). Ra bʼu̷bʼu̷ ntee kʼo ra minji kja ne Xoñijomu̷ me nrro na zo̷trjo ja nzikja ma go mimi e Adán ñe kʼe Eva kja kʼe jardin Edén. Xoru̷ge kja Salmo 37:11, 34.

3. ¿Pje ra kjogu̷ ngekʼua ne Xoñijomu̷ ra nge me rga zo̷o̷?

E Jesús ñe kʼo o anxe e Mizhokjimi ra mbotrʼu̷ji yo ntee kʼo na sʼonte kja Armagedón. E Jesús ra manda kja o Reino e Jeoba, ra  mbo̷sʼu̷ yo ntee kʼu̷ kjaji kʼo mama e Jeoba ngekʼua dya ra nrru̱ji, ra minji texe yo paa kja ne Xoñijomu̷ kʼu̷ me rga zo̷o̷. Kjanu e Jesús ra nrru̷tʼu̷ji e Satanás, kjanu ra pa̱ntrʼa̱ kja na trʼoʼo kʼu̷ me na je̱e̱, ra ngotrʼu̷nu mil kje̷e̷. Xoru̷ge kja Apocalipsis 20:1-3; 21:3, 4.

4. ¿Jingua dya kja ra supjreji?

Nudya na punkju̷ ntee kjaji kʼo na sʼoo, ma ra jye̷zi Mizhokjimi ke xe ra kjaji ga kjanu ra za̷dʼa̷ nu paa ke ra trjezeji yo ntee. Ngekʼua e Mizhokjimi ra chjotu̷ yo ntee kʼo kjaji kʼo na sʼoo, ¿jingua ra tsjaakʼo? E Jesús go mama ke ma ro janrrgoji ke ro bʼu̷bʼu̷ ntee kʼu̷ ro tsjaji na punkju̷ kʼo na sʼoo, dya kja ro mezhe kʼe paa ma ra chjotu̷ e Mizhokjimikʼo. Xoru̷ge kja Mateo 24:3, TNM; Mateo 24:7-13, 21, 22; Marcos 13:10NTD.

Ma e Jesús ra manda ajensʼe kja o Reino e Jeoba mil kje̷e̷, ra pjo̷xku̷goji ngekʼua dya kja ra supjreji (Isaías 9:6, 7; 11:9). E Jesús ra tsjaa bʼepji nzakja na rey xo ra nge na nrrambo̷kjimi kʼu̷ ra mbo̷sʼu̷ yo ntee kʼo sʼiyaji e Diosi ngekʼua dya kja ra titaji, dya kja ra sodyeji ñe dya kja ra tu̱ji. Xoru̷ge kja Isaías 25:8; 33:24.

5. ¿Kjo ngeje kʼo ra minji kja ne Xoñijomu̷?

Nuja jmuru̷ji yo nrrestigo e Jeoba poji ntee kʼu̷ sʼiyaji e Jeoba ñe pjechiji jarga tsjaji kʼo nee angeze

Yo ntee ke kjaji kʼo nee e Mizhokjimi nge yo ra mimiji kja ne Xoñijomu̷ ma me rga zo̷o̷ (1 Juan 2:17). E Jesús o nrra̷jna̷ o disipulo ro ma jichiji yo ntee pje ro tsjaji ngekʼua ro minji na joo jaga nee e Jeoba. E Jeoba pjo̷sʼu̷ yo ntee, jichi pje ra tsjaji ngekʼua ra mimiji kja ne Xoñijomu̷ ma me rga zo̷o̷ (Sofonías 2:3). ¿Jaga mbo̷sʼu̷ e Jeoba yo ntee? Nuja jmuru̷ji yo nrrestigo jichiji kʼo na joo kʼo mama ne Biblia, jichiji ra sʼiyaji o maleji, o paleji ñe o trʼii. Xoru̷ge kja Miqueas 4:1-4.