Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 Xoru̷ 3

Na joo kʼo mama ne Biblia, ¿mejme nge e Mizhokjimi kʼu̷ o mamakʼo?

Na joo kʼo mama ne Biblia, ¿mejme nge e Mizhokjimi kʼu̷ o mamakʼo?

1. ¿Kjo nge kʼu̷ go mama pje ro jñusʼiji kja ne Biblia?

Kja ne Biblia mama ke yo ntee kʼo kjaji kʼo mama Mizhokjimi ra minji texe yo paa kja ne Xoñijomu̷ (Salmo 37:29). Ne Biblia pe̷sʼi 66 tsʼilibro. E Mizhokjimi o juajnu̷ 40 bʼe̷zo ro opju̷ji ne Biblia. Kʼu̷ go mbu̷ru̷ ne Biblia ngeje e Moisés, a ni paa 3,500 tsje̷e̷ ma gua dyopju̷ kʼo tsichʼa tsʼilibro kʼo ba e̱je̱ nuja mbu̷ru̷ ne Biblia. O kjogu̷ 1,600 tsje̷e̷ ma kʼe apostol Juan go jñusʼu̷ kʼe libro Apocalipsis, kʼu̷ ba e̱je̱ nuja ni nguaru̷ kʼe Biblia. O espiritu Mizhokjimi Jeoba o mbo̷sʼu̷ kʼo bʼe̷zo ngekʼua go jñusʼu̷ji na joo (2 Samuel 23:2). Kʼo bʼe̷zo dya go jñusʼu̷ji kʼo mi nee angezeji o jñusʼu̷ji jama nee e Jeoba ngekʼua yo jñaa kʼu̷ go opju̷jinu nge o tsjaja e Jeoba. Xoru̷ge kja 2 Timoteo 3:16; 2 Pedro 1:20, 21.

2. ¿Mejme kʼo mama ne Biblia?

Kʼo mama kja ne Biblia ngeje e Jeoba kʼo mamakʼo ngekʼua ga kjogu̷ kʼua janzi ba mamanu (Josué 23:14). Dya bʼu̷bʼu̷ na bʼe̷zo kʼu̷ ra mama pje ra kjogu̷ ra xo̱ru̷, ngextrjo e Jeoba soo ra xitsigoji pje ra kjogu̷ a ma axojñi. Xoru̷ge kja Isaías 42:9; 46:10.

E Biblia nge o tsjaja e Mizhokjimi. Ne Biblia go dyopju̷ji kja na punkju̷ jñaa kʼu̷ ñaji yo ntee, ngekʼua na punkju̷ pe̷sʼiji dʼa Biblia. Ne Biblia dya go tsjaji para ra xopu̷ji yo trʼii kja ngunxoru̷, pero ma ga mama jaga kjaa kʼo bʼu̷bʼu̷ kja ne Xoñijomu̷ mama kʼo na kjuana. Zo mi kuarenta bʼe̷zo kʼu̷ go dyopju̷ji ne Biblia, dya mi bʼu̷bʼu̷ dʼa bʼe̷zo kʼu̷ ro mama dya ma kjuana kʼo mi mamaji kʼo nrre bʼe̷zo. * Ma ri xoru̷ji ne Biblia ri unu̷ji nguenrra ke e Mizhokjimi me sʼiyazgoji. Ngekʼua kja ne Biblia xitsʼkoji ra kjaji kʼo na joo ngekʼua ra mimiji na joo. Na punkju̷ ntee unu̷ji nguenrra ke me na joo ga mimiji ma ga kjaji kʼo mama kja ne Biblia. Ga kjanu xo unu̷ji nguenrra ke ne Biblia ngeje o Jñaa e Mizhokjimi. Xoru̷ge kja 1 Tesalonicenses 2:13.

 3. ¿Pje ri pa̱rge ma ri xorge ne Biblia?

Kja ne Biblia mama e Adán ñe kʼe Eva o mimibi na joo, pero dya go mboru̷bi kʼo mi pe̷sʼibi o pekabi. Janzitrjo paa kʼu̷ go mimibi kja kʼe xoñijomu̷ kʼu̷ me ma zo̷o̷, kjanu go pjongu̷bi dya kja xi go mimibinu. Ne Biblia xitsigoji kʼo me na joo, mama e Mizhokjimi me sʼiyazgoji ngekʼua nrro ra tsjaa ne Xoñijomu̷ me rru̷ zo̷o̷ ngekʼua ra minji na joo. Xoru̷ge kja Apocalipsis 21:4, 5.

Kja ne Biblia ri cho̷trʼu̷ge o ley Mizhokjimi. Ko ne Biblia e Mizhokjimi jitsʼkoji jarga minji na joo. Nu kʼo go tsjaa mi jingua ma mi zopju̷ yo ntee, nujyo mbo̷xku̷goji ra mba̱ra̱ji jaga kjaa Mizhokjimi. Ri xoru̷ge ne Biblia, ri tsjage kʼo na joo akjanu ri jobi e Mizhokjimi. Xoru̷ge kja Salmo 19:7, 11; Santiago 2:23; 4:8.

4. ¿Pje ri tsjage ngekʼua ri pjechi kʼo mama ne Biblia?

Ma ri xorge ne skuama ri pjechi kʼo mama ne Biblia. E Jesús mi pjechi pje mama ne Biblia, mi xipji yo ntee na jñaa kʼo mi mama ne Biblia kjanu mi jichi pje mi nee ro mama kʼe jñaakʼu̷. Xoru̷ge kja Lucas 24:27, 45.

Me na joo kʼo ri pjechigeba. Dya bʼu̷bʼu̷ na libro nzakja ne Biblia. Bʼu̷bʼu̷ ntee kʼu̷ dya nee ra dya̷ra̷ji kʼo mama ne Biblia, pe nutsʼkʼe dya ri tsjage nzakja angezeji. Ma gi nee ke e Jeoba ra mbo̷xkʼu̷ge ngekʼua ri minkʼe nrrexe yo paa kja ne Xoñijomu̷ kʼu̷ me rru̷ zo̷o̷ sido ri pjechige kʼo mama ne Biblia. Xoru̷ge kja Juan 17:3.

^ par. 7 Ri xoru̷ kʼe skuama ¿Pje mama ne Biblia?