Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 4

Na xuntrʼi kʼu̷ o tsjapu̷ ro ma̷ja̷ o mu̷bʼu̷ e Jehová ñe o tata

Na xuntrʼi kʼu̷ o tsjapu̷ ro ma̷ja̷ o mu̷bʼu̷ e Jehová ñe o tata

¿Pje ma promesa go tsjapu̷ e Jefté e Jehová?

E Jefté o tsjapu̷ na promesa e Jehová, o xuntrʼi o tsjaa kʼo bi mama o tata zo me ma sʼe̷zhikʼo

¿Gi pa̱rge kjo mi ngeje ne tsʼixutrʼi kʼu̷ kuatrʼu̷ba kja ne dibujo?... Ne Biblia mama mi ngeje o tsʼixutrʼi e Jefté, pe dya mama pje mi chju̱u̱. Kʼo go tsjaa kʼe tsʼixutrʼi o tsjapu̷ ro ma̷ja̷ e Jehová ñe e Jefté. Mo ra xo̷ru̷jiba ngekʼua ra pa̱ra̱ji pje go tsjaa e Jefté ñe pje go tsjaa o xuntrʼi.

E Jefté mi ngeje na bʼe̷zo kʼu̷ me ma jonte. Pama pama mi jichi o tsʼixutrʼi, mi xipji ja ma kjaa e Jehová. E Jefté mi ngeje na bʼe̷zo kʼu̷ me ma ze̷zhi, mi pa̱ra̱ ja rgua ndo̱njo̱ chu̱ʼu̱. Ngekʼua kʼo israelita go ñe̷meji ro manda kja kʼo xundaro.

Na nu paa e Jefté go dyo̷tu̷ e Jehová, go xipji: “Ma ri pjo̷xku̷jme ra to̱mpu̷jme chu̱ʼu̱ kʼo ntee kʼo me u̷ngu̷zgojme. Ma ra nzhogo kja in nzungo, nu ntee kʼu̷ otrʼu̷ ra mbedye ra dakʼu̷ ngekʼua ra mbe̷pkʼige  kja in nzunge”. Kʼe ntee pe̷ski ro ma mimi bʼe̷xtrjo kja kʼe tabernáculo ngekʼua ro ma pe̷pjinu ndexe yo paa asta kja ro ndu̱u̱. Kʼe tabernáculo mi ngeje na ngumu̷ ja mi matrʼu̷ji e Jehová. ¿Go ndo̱njo̱ kʼe chu̱ʼu̱ e Jefté? Ja̱a̱, go ndo̱njo̱ kʼe chu̱ʼu̱. Ma go nzhogu̷ kja o ngumu̷, ¿gi pa̱rge kjo nge kʼu̷ go mbedye go ma ndu̷nru̷?...

¡Mi ngeje o xuntrʼi! Ma go jñanrra e Jefté me go nzhumu̷, mi pa̱ra̱ ke ngextrjo kʼe xuntrʼi kʼu̷ mi ñʼeje. Nudya pe̷ski ro tsjaa kʼo bi xipji e Jehová, o xuntrʼi ro ma pe̷pji kja kʼe tabernáculo. ¿Pje go mama kʼe xuntrʼi? Angeze go xipji o tata: “Mi tatago pe̷ski ri tsjaa kʼo gui xipji e Jehová”.

Tsje̷ma tsje̷ma kʼo xuntrʼi kʼo mi joji o xuntrʼi e Jefté mi pa zenguaji

Kʼe xuntrʼi me go zichʼi kja o mu̷bʼu̷ ma go mba̱ra̱kʼo, nange mi pa̱ra̱ ke ma ro zidyiji kja kʼe tabernáculo ro zogu̷ o ngumu̷, dya ro chju̷ntu̷ ñe dya ro ñʼeje tsʼitrʼi. Pe angeze mi nee ro ma̷pa̷ e Jehová, ngekʼua go tsjaa ja nzi ma nee o tata. Go ma pe̷pji kja kʼe tabernáculo ndexe yo paa asta ma go ndu̱u̱.

¿Ja ba zoʼo e Jehová ñe e Jefté ma go jñandabi kʼo bo tsjaa kʼe xuntrʼi?... ¡Ja̱a̱, me ko ma̷ja̷bi! Nutsʼkʼe so̷o̷ ri tsjage ja ba tsjaa o xuntrʼi e Jefté. Mu̷ ri dya̷ta̷ in tata ñe ni nana ñe mu̷ ri tsjage ja ga nee e Jehová, angezeji me ra ma̷ja̷ji.