Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 1

¿Gi nee ri pa̱ra̱ dʼa secreto kʼu̷ dya kjo mi pa̱ra̱?

¿Gi nee ri pa̱ra̱ dʼa secreto kʼu̷ dya kjo mi pa̱ra̱?

¿Gi nee ri pa̱rge pje ngeje na secreto?... * Ngeje ma pje ra xitsʼiji, pe ngextrjotsʼu̷ge ri pa̱rgekʼo. Ne Biblia mama pje mi nee ro tsjaa e Yose kʼo me ni mubi, pe dya kjo go mba̱ra̱, ni yo anxe ajensʼe, ngextrjo angeze. ¿Gi pa̱rge pje ma secreto mama ne Biblia?...

Kʼo anxe mi nee ro mba̱ra̱ji pje mi ngeje kʼe secreto

Mi jingua ma e Yose go dya̷trʼa̷ ndexe kʼo bʼu̷bʼu̷ kja ne Xoñijomu̷, go dya̷trʼa̷ na bʼe̷zo ñe na ndinxu. ¿Gi mbeñe pje mi chju̱bi?... Adán ñe Eva. E Yose o ñe̷me ro mimibi kja kʼe jardín Edén, me ma zo̷trjonu. E Yose mi nee ke angezebi ñe ndexe kʼo o trʼii ro minji ndexe yo paa, ro tsjaji ndexe nu Xoñijomu̷ me rru̷ zo̷trjo nzakja kʼe jardín Edén. Pe e Adán ñe e Eva dya go mimibi ndexe yo paa. ¿Gi pa̱rge pje go tsjabi?

E Adán ñe e Eva dya go dya̷ta̷bi e Yose, go tsjabi kʼo na sʼoo. Ngekʼua, nudya dya ri bʼu̷nji kja ne Xoñijomu̷ kʼu̷ me rru̷ zo̷trjo. Pe e Yose mama ra tsjaa ne Xoñijomu̷ nzakja kʼe jardín Edén ngekʼua ndexe yo ntee ra mimiji ndexe yo paa ñe ra ma̷ji. ¿Pje ra tsjaa e Yose ngekʼua ra za̷dʼa̷kʼo? Go mezhe na punkju̷ tsje̷e̷, e Yose dya kjo mi xipji ja rgua tsjaakʼo.

Pe ma go kjogu̷ yo kje̷e̷ e Jesús go e̱je̱ kja ne Xoñijomu̷, go mama ja ma kja kʼo ro tsjaa e Yose. Angeze mi xipji yo ntee ke ro za̷dʼa̷ nu paa ma o Reino e Yose ra manda kja ne Xoñijomu̷. Mu̷ ri o̷tu̷ji e Yose: “Pejñe in reino ra manda kja ne Xoñijomu̷”. ¿Pjekja ri o̷tu̷jikʼo? Ri o̷tu̷jikʼo nange o Reino e Yose nge nu ra tsjaa nu Xoñijomu̷ me rga zo̷o̷.

¿Gi nee ri bʼu̷bʼu̷ge kja ne Xoñijomu̷ ma me rga zo̷trjo?... Dya ri jyombeñema ke ngextrjo yo ntee kʼo a̷ta̷ji e Jehová nge yo ra nga̱ra̱ kja nu Xoñijomu̷. Ne Biblia mama ke mi jingua go nga̱ra̱ji bʼe̷zo ñe ndinxu kʼu̷ go tsjaji ñe o mimiji ja ma nee e Jehová. ¿Gi nee ri pa̱rge kjo mi ngeje yo bʼe̷zo ñe yo ndinxu?... Kja ne xiskuama so̷o̷ ri pa̱rge pje go tsjaji ñe ja gua minji, ga kjanu xo ri tsjage ja ba tsjaji angezeji.

^ par. 3 Kja texe ne skuama bʼu̷bʼu̷ yo trʼo̷nu̷ kʼo pebi jñii punto (...). Ma ri tsjapu̷ trʼo̷nu̷ nu tsʼitrʼi ri chebʼe na tsʼinrrajme ngekʼua ra ndu̷ru̷.