Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 9

E Jeremías o sido o zopju̷ yo ntee o jñaa e Jehová

E Jeremías o sido o zopju̷ yo ntee o jñaa e Jehová

¿Pjekja yo ntee mi u̷mbu̷ji e Jeremías?

E Jehová go mbo̷sʼu̷ e Jeremías ngekʼua o ngu̷su̷ji kja kʼe meje ja mi oʼo

Ma ri jichkʼoji yo ntee o Jñaa e Jehová, bʼu̷nkʼo mbe̷kue̷ji ñe kʼo trjengegoji. Ma ri kjogu̷jikʼo, dya joo rga soji. Bʼu̷ma ri manji: “Dya kja ra jichigo yo ntee o Jñaa e Jehová, kja, dya nee ra dya̷ra̷ji”. ¿Go bʼu̷bʼu̷ na paa kʼu̷ gui mbeñe ga kjanu?... Ne Biblia mama ke go mimi na bʼe̷zo kʼu̷ mi chju̱u̱ Jeremías, angeze mi a̷ta̷ e Jehová, pe go bʼu̷bʼu̷ na paa ma dya kja mi nee ro zopju̷ yo ntee o jñaa e Mizhokjimi. Ra xo̷ru̷ji pjenga go tsjaa akjanu.

Ma mi trʼii e Jeremías, e Jehová go mbejñe ro ma xipji yo ntee kʼu̷ ro jye̷ziji kʼo ma sʼoo kʼu̷ mi kjaji. Pe e Jeremías mi su̱u̱ ro zopju̷ kʼo ntee, ngekʼua go xipji e Jehová: “Kja ri trʼigo, dya ri pa̱rgo ja rga zopju̷ yo ntee”. Kjanu e Jehová go nrru̷ru̷: “Dya ri su̱u̱, nutsʼko ra pjo̷xkʼu̷”.

 Nukʼua e Jeremías go xipji yo ntee: “Ma dya ri jye̷ziji kʼo na sʼoo, ra zu̷kʼu̷ji Mizhokjimi”. ¿Go ngotrʼpu̷ji ñiʼi e Jeremías?... Iyo, kʼo ntee go nrrembeji ñe bʼu̷nkʼo me go mbe̷kue̷ji. ¡Bʼu̷nkʼo go manji ro mbo̷trʼu̷ji! ¿Gi pa̱rge ja gua zoʼo e Jeremías ma go mba̱ra̱kʼo?... Me go zu̱u̱, kjanu go mama: “Dya kja ra zopju̷go yo ntee o jñaa e Jehová”. Pe, ¿na kjuana dya kja go zopju̷ yo ntee o jñaa e Jehová?... Iyo, dya go tsjaakʼo. E Jeremías mi nee ro tsjaa kʼo bi mama e Jehová, ngekʼua o sido o zopju̷ yo ntee. E Jehová go mbo̷sʼu̷, ngekʼua dya pje go tsjapu̷ji kʼo ntee kʼu̷ mi u̷mbu̷ji.

Na nu paa go bʼu̷bʼu̷ bʼe̷zo kʼo go ma pa̱ntrʼa̱ e Jeremías kja na meje kʼu̷ me ma je̱e̱. E Jeremías a ma ngibi kja kʼe meje, mi otrjo pje ro zii. ¡Kʼo bʼe̷zokʼo, mi neji ke ro nrru̱u̱ e Jeremías kja kʼe meje! Pe, ¿go nrru̱u̱ e Jeremías? Iyo, nange e Jehová o tsjapu̷ ro ngu̷su̷ji kja kʼe meje ja mi oʼo.

O bʼu̷bʼu̷ paa ma go zu̱u̱ e Jeremías, pe go sido go zopju̷ yo ntee o jñaa e Jehová. ¿Pje nge kʼo ri pjechiji ma ri xo̷ru̷ji kʼo go tsjaa e Jeremías?... Ma ra ma jichiji o Jñaa e Mizhokjimi, ra bʼu̷bʼu̷ ntee kʼu̷ ra nrrengegoji o ra u̷ngu̷ji. Bʼu̷ma ra tsjeji o ra su̱ji. Pe, dya ra je̷ziji ra zopju̷ji yo ntee o Jñaa e Jehová. Angeze ra mbo̷xkoji kʼua ja nzi ba mbo̷sʼu̷ e Jeremías.