Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 6

Dya mi bʼu̷bʼu̷ pje kʼo ro zu̱u̱ e David

Dya mi bʼu̷bʼu̷ pje kʼo ro zu̱u̱ e David

Ma pje ri su̱ge, ¿pje ri tsjage?... Bʼu̷ma ri xipji ni tara o ni nana ra mbo̷xkʼu̷ ngekʼua dya ri su̱ge. ¿Kjo nge kʼu̷ xo ra mbo̷xkʼu̷?... Ja̱a̱, e Jehová so̷o̷ ra mbo̷xkʼu̷, angeze xe nda na ze̷zhi ke na nge yo ntee. Ma ri dyo̷tu̷ e Jehová, angeze ra mbo̷xkʼu̷ ngekʼua dya pje ri su̱ge, je ga kjanu go tsjaa e David. Angeze mi enchʼe kja o mu̷bʼu̷ e Jehová, ngekʼua ma mi trʼii dya pje mi su̱u̱. Ra xo̷ru̷ji pje go tsjaa e David.

Ndeze ma kja mi tsʼitrʼi e David, o jyote ñe o ñu̷ʼu̷ mi jichi ro tsjaa kʼo mi nee e Jehová. Ngekʼua zo pje nde go kjogu̷, angeze dya mi su̱u̱. E David mi jobi e Jehová ñe mi pa̱ra̱ kʼu̷ ro mbo̷sʼu̷. Na nu paa e David mi kʼasʼu̷ o nzhenchju̷ru̷, ¡dʼangua za̷trʼa̷ na león ba zu̷ru̷ na ndenchju̷ru̷! ¿Gi pa̱rge pje go tsjaa e David? Go ma jyodʼu̷ kʼe león go mbo̷trʼu̷ ko o dye̷e̷. Xo go mbo̷trʼu̷ na oso ma mi nee ro zaa yo nzhenchju̷ru̷. ¿Kjo go mbo̷sʼu̷ e David ro tsjaakʼo?... Ja̱a̱, e Jehová go mbo̷sʼu̷.

Na nu paa ma yo israelita mi chu̱ji yo filisteo, e David dya go zu̱u̱ ro chu̱bi e Goliat, ¡angeze mi xundaro kja kʼo filisteo, mi trʼabʼe̷zo ñe mi ma nrra̱ʼa̱! E Goliat mi trjembe yo xundaro israelita xo mi sadʼu̷ e Jehová. Mi xipji yo xundaro: “¡Kjo ra chu̱gobʼe!”. Dya kjo mi nee nange me mi su̱ji e Goliat. Ma e David go dya̷ra̷ ja ma ñaa e Goliat, e David go xipji: “¡Ra chu̱gobi! ¡E Jehová ra mbo̷xku̷ ngekʼua ra to̱nkʼu̷!”. ¿Ixi na kjuana e David dya pje mi su̱u̱?... Ja̱a̱, angeze dya kjo mi su̱u̱. Xi ra nuji pje go kjogu̷.

E David go jñu̷sʼu̷ tsʼicha tsʼirojo, mi kana nu trʼenzho, kjanu go ma chje̷bi e Goliat. Ma go jñanrra e Goliat kʼu̷ kja mi trʼii e David, go ndembe. Nuʼma e David go xipji: “Ba e̱kjeba, ba ne po̷tʼku̷go ko in trʼatrjedyi, ¡pe e Jehová ra mbo̷xko ra to̱nkʼu̷!”. Nudyakʼua e David o jñutrʼu̷ na tsʼirojo kja nu trʼenzho, kjanu o bʼu̷gu̷ ja mi bʼu̷bʼu̷ e Goliat go pjatrʼu̷ kʼe tsʼirojo. Nu tsʼirojo jotrjo ba ndontʼu̷ a nzhe̱e̱ e Goliat. ¡Ixko nu̷gu̷ e Goliat ba nrru̱u̱! Ma go jñanrrajikʼo yo filisteo, me ko pizhiji, dabadiji go kʼueñeji.  ¡Zo kja mi trʼii e David go ndo̱mpu̷ chu̱ʼu̱ e Goliat! ¿Kjo nge kʼu̷ go mbo̷sʼu̷ e David ro ndo̱mpu̷ e Goliat?... E Jehová go mbo̷sʼu̷, ¡angeze xe nda na ze̷zhi ke yo trʼabʼe̷zo!

E David dya kjo mi su̱u̱ nange mi pa̱ra̱ ke e Jehová mi pjo̷sʼu̷

¿Pje jitsʼkoji kʼo go tsjaa e David?... Xe nda na ze̷zhi e Jehová ke yo ntee. Ma ra bʼu̷bʼu̷ dʼa paa ke ri su̱ge, e Jehová so̷o̷ ra mbo̷xkʼu̷ ngekʼua dya ri su̱ge, akjanu so̷o̷ ri jobi e Jehová.

RA XO̸RU̸JI NE BIBLIA: