Typuat⁠ꞌ⁠i Peteru 3:1-18

3  Typua ra⁠ꞌ⁠yn atipo⁠ꞌ⁠oro uimiwan ehewowi uiwyria⁠ꞌ⁠in. I⁠ꞌ⁠ewyte mesuwat uimiwan aikotã sa⁠ꞌ⁠awy⁠ꞌ⁠i einapin hap ewywuat rẽ. Yt eweiwaure tei⁠ꞌ⁠o aikotã sa⁠ꞌ⁠awy⁠ꞌ⁠i ho⁠ꞌ⁠owasat rakaria ewy eweikupte⁠ꞌ⁠en. Koitywy ti eiwanetup hap yt ipit pit hin i ra⁠ꞌ⁠yn toine⁠ꞌ⁠en. Pyno o yt eweiwaure tei⁠ꞌ⁠o aikotã sa⁠ꞌ⁠awy⁠ꞌ⁠i ho⁠ꞌ⁠owasat rakaria eweikupte⁠ꞌ⁠en eiwanetup hawe hap. I⁠ꞌ⁠ewyte yt eweiwaure tei⁠ꞌ⁠o aikotã meiũran tuut eima⁠ꞌ⁠at hanuaria ikahuro turan wuat hap ete. Mi⁠ꞌ⁠i ti aru Tupana ehay etiat wekyry⁠ꞌ⁠i hat e hap.  Aikotã sa⁠ꞌ⁠awy⁠ꞌ⁠i wuaria mienoi iwan miat Tupana ehay ewy put⁠ꞌ⁠ok e. Aikotã uruto Aika⁠ꞌ⁠iwat Iesui potmu⁠ꞌ⁠eria e hap ewy.  Tuut wyti aru eimu⁠ꞌ⁠e hanuaria. Mi⁠ꞌ⁠iria ti aru ta⁠ꞌ⁠atumiky⁠ꞌ⁠esat ete yn eimu⁠ꞌ⁠e. Ta⁠ꞌ⁠atupiit piat miky⁠ꞌ⁠esat sa⁠ꞌ⁠ag ko⁠ꞌ⁠i hap ta⁠ꞌ⁠atunug kahato ekyewi i⁠ꞌ⁠ewyte ehekare⁠ꞌ⁠en kyewi. Mi⁠ꞌ⁠i hawyi eimimohey Iesui tuut aru e hap ete ta⁠ꞌ⁠atukyry⁠ꞌ⁠i kahato.  -Yt tuut i wyti Eika⁠ꞌ⁠iwat Iesui i⁠ꞌ⁠atu⁠ꞌ⁠e irane ahepe. Pyno eipe i⁠ꞌ⁠ewyte sa⁠ꞌ⁠awy⁠ꞌ⁠i wuaria Tupana mohey haria -Tuut irane uruka⁠ꞌ⁠iwat ewei⁠ꞌ⁠e ra⁠ꞌ⁠yn wen ma⁠ꞌ⁠ato yt tuut i te i⁠ꞌ⁠atu⁠ꞌ⁠e irane ahepe. Ta⁠ꞌ⁠i sa⁠ꞌ⁠awy⁠ꞌ⁠i wuaria Tupana mohey haria i⁠ꞌ⁠ewyte Iesui potpo⁠ꞌ⁠ororia 12 ok takaria topap yne pykai yt tuut i te i⁠ꞌ⁠atu⁠ꞌ⁠e. Sa⁠ꞌ⁠awy⁠ꞌ⁠i wuat mesuwat mytyyp waha⁠ꞌ⁠awynug hap ewy ra⁠ꞌ⁠yn topyhu⁠ꞌ⁠at mesup. Mi⁠ꞌ⁠i tupono ti yt put⁠ꞌ⁠ok e hin i irane aiminug sa⁠ꞌ⁠ag ai⁠ꞌ⁠apiheg hamuat Tupana piat i⁠ꞌ⁠atu⁠ꞌ⁠e irane mesuwarotiaria wo⁠ꞌ⁠okyry⁠ꞌ⁠i haria.  Pyno ti aru te⁠ꞌ⁠eruwepyi ra⁠ꞌ⁠yn yt iwe⁠ꞌ⁠eg i rakaria wo te⁠ꞌ⁠eropyhu⁠ꞌ⁠at mi⁠ꞌ⁠iria katupono mi⁠ꞌ⁠iria ti yt Tupana ehay kaipyi i te⁠ꞌ⁠eruwemu⁠ꞌ⁠e. Katupono Tupana to⁠ꞌ⁠e -Sa⁠ꞌ⁠awy⁠ꞌ⁠i ti waikiru ko⁠ꞌ⁠i tukupte⁠ꞌ⁠en mi⁠ꞌ⁠i hawyi i⁠ꞌ⁠ewyte mesuwat yi. Mi⁠ꞌ⁠i hap ewy te ti mesuwat yi toine⁠ꞌ⁠en. Mi⁠ꞌ⁠i hawyi y⁠ꞌ⁠y toine⁠ꞌ⁠en mesuwat yi tote. Pyno ti mi⁠ꞌ⁠i tã sa⁠ꞌ⁠awy⁠ꞌ⁠i te toine⁠ꞌ⁠en y⁠ꞌ⁠y yn ma⁠ꞌ⁠ato y⁠ꞌ⁠y pe yi toine⁠ꞌ⁠en. Mi⁠ꞌ⁠i hawyi meiũran pe⁠ꞌ⁠am⁠ꞌ⁠e ra⁠ꞌ⁠yn yi y⁠ꞌ⁠y pyi. Mi⁠ꞌ⁠i hawyi y⁠ꞌ⁠y tuwepat⁠ꞌ⁠ok ta⁠ꞌ⁠yn. Mi⁠ꞌ⁠i hawyi yi po⁠ꞌ⁠og ywaiti y⁠ꞌ⁠y kai toine⁠ꞌ⁠en. Ma⁠ꞌ⁠ato i⁠ꞌ⁠ewyte toĩ y⁠ꞌ⁠y ywyt⁠ꞌ⁠okpype.  Mi⁠ꞌ⁠i hawyi meiũran aikotã sa⁠ꞌ⁠awy⁠ꞌ⁠i wuat ewy y⁠ꞌ⁠y i ra⁠ꞌ⁠yn po⁠ꞌ⁠og iwato mekewat Nu⁠ꞌ⁠e e⁠ꞌ⁠at pe. Heremo rakaria min⁠ꞌ⁠i⁠ꞌ⁠atu⁠ꞌ⁠e i ra⁠ꞌ⁠yn. Mi⁠ꞌ⁠i hawyi ti mekewat sa⁠ꞌ⁠awy⁠ꞌ⁠i wuat yi heremo rakat min⁠ꞌ⁠e yne i ra⁠ꞌ⁠yn. Mi⁠ꞌ⁠i hawyi ti topyhu⁠ꞌ⁠at yt sa⁠ꞌ⁠awy⁠ꞌ⁠i wuat ewy i ra⁠ꞌ⁠yn mytyyp.  Aikotã mekewat e⁠ꞌ⁠at pe Tupana to⁠ꞌ⁠e Nu⁠ꞌ⁠e pe mi⁠ꞌ⁠i hap ti tutunug na⁠ꞌ⁠yn. Ma⁠ꞌ⁠ato koitywy ti mekewat sa⁠ꞌ⁠awy⁠ꞌ⁠i wuat ewy sehay wẽtup te toĩ. Ma⁠ꞌ⁠ato ti mekewat yi wuk hap etiat ra⁠ꞌ⁠yn Tupana tohenoi -Pyno ti aru meimuẽwat aria wo yi waikiru yne atimoma aria wo e ti Tupana. Aikotã sa⁠ꞌ⁠awy⁠ꞌ⁠i te atimoma yne y⁠ꞌ⁠y wo hap ewy te ti aru. Ta⁠ꞌ⁠i tuut ti aru mekewat e⁠ꞌ⁠at katupono mi⁠ꞌ⁠i hap ewy atunug e ti Tupana. Mi⁠ꞌ⁠i hawyi ti aru yt nakuap i nug haria apiheg hap e⁠ꞌ⁠at put⁠ꞌ⁠ok e ra⁠ꞌ⁠yn e ti Tupana are. Ma⁠ꞌ⁠ato mio tã e Tupana pykai yt tuut i aru i⁠ꞌ⁠atu⁠ꞌ⁠e ne⁠ꞌ⁠i meimuẽ waria ta⁠ꞌ⁠atuwanetup hap kaipyi ne⁠ꞌ⁠i.  Ma⁠ꞌ⁠ato uimiehakyera⁠ꞌ⁠at ko⁠ꞌ⁠i uimiky⁠ꞌ⁠eria yt eweipyhu⁠ꞌ⁠at rei⁠ꞌ⁠o i⁠ꞌ⁠atuehay upi. Eweikuap to aikotã mekewat Tupana e⁠ꞌ⁠at. Ta⁠ꞌ⁠i Tupana yt tomorania i ti yne e⁠ꞌ⁠at aikotã aikotã hap ko⁠ꞌ⁠i. Wẽtup e⁠ꞌ⁠at yn ni Tupana po pe toine⁠ꞌ⁠en aikotã wẽtup 1 miu anu hap ewy. Tupana wanetup hawe wẽtup e⁠ꞌ⁠at wẽtup 1 miu anu hap ewy i⁠ꞌ⁠ewyte wẽtup 1 miu anu wẽtup e⁠ꞌ⁠at hap ewy Tupana wanetup hawe.  Katupono sa⁠ꞌ⁠awy⁠ꞌ⁠i te wuat -Atunug aru e hap tutunug na⁠ꞌ⁠yn. Pyno ti Aika⁠ꞌ⁠iwat wyti sa⁠ꞌ⁠awy⁠ꞌ⁠i wuat -Atunug aru e hap tutunug na⁠ꞌ⁠yn. Yt aima⁠ꞌ⁠at hin i are. Ta⁠ꞌ⁠i Tupana ti yt waure⁠ꞌ⁠e hin i sa⁠ꞌ⁠awy⁠ꞌ⁠i wuat tehay -Ati⁠ꞌ⁠atu⁠ꞌ⁠apiheg ti aru yt nakuaria i te hap ete. Ma⁠ꞌ⁠ato ahowawi ti iperup⁠ꞌ⁠i kahato. Yt tutunug neran i te aiky⁠ꞌ⁠e haype katupono toiky⁠ꞌ⁠esat yt wẽtup i ho⁠ꞌ⁠owasat hap. Yne torannia topo piat hap toiky⁠ꞌ⁠esat. Kat pote yt meremo i ai⁠ꞌ⁠apiheg neran i ma⁠ꞌ⁠ato ti hepama put⁠ꞌ⁠ok e mekewat mio tã e hap. Toiky⁠ꞌ⁠esat miit⁠ꞌ⁠in te⁠ꞌ⁠eruwemorem tewowiat yt naku i pywiat hap haype. Mi⁠ꞌ⁠i pote hepama put⁠ꞌ⁠ok e mekewat -Atunug aru e hap. Yt toiky⁠ꞌ⁠esat i miit⁠ꞌ⁠in moma hamuat hap. 10  Ma⁠ꞌ⁠ato pywo put⁠ꞌ⁠ok e irane mekewat e⁠ꞌ⁠at pe. Ta⁠ꞌ⁠i pywo ti aru put⁠ꞌ⁠ok e Aika⁠ꞌ⁠iwat piat miit⁠ꞌ⁠in apiheg hap. Ma⁠ꞌ⁠ato ti karamuo kat e⁠ꞌ⁠at pe yt uwe i ikuap ma⁠ꞌ⁠ato ti put⁠ꞌ⁠ok e hamuat. Aikotã sero⁠ꞌ⁠ok e hat ewywuat tuut irane. Kat e⁠ꞌ⁠at pe yt uwe i ikuap are. Mekewat e⁠ꞌ⁠at pe ti aru ikahuro ra⁠ꞌ⁠yn waikiru ko⁠ꞌ⁠i. Mekewat e⁠ꞌ⁠at pe tehay pirik wo toimoweityk ta⁠ꞌ⁠yn waikiru ko⁠ꞌ⁠i. I⁠ꞌ⁠ewyte mesuwat yi tuweityk ta⁠ꞌ⁠yn. Mi⁠ꞌ⁠i hap e⁠ꞌ⁠at pe ti aru yi ihywop ta⁠ꞌ⁠yn hakup wote yt aikopiat wẽtup hakup i⁠ꞌ⁠ewy⁠ꞌ⁠ewy i hakup sese ti ra⁠ꞌ⁠yn. Mi⁠ꞌ⁠i hawyi ti aru wuk⁠ꞌ⁠e yne ra⁠ꞌ⁠yn mesuwarotiat miit⁠ꞌ⁠in minug sa⁠ꞌ⁠ag ko⁠ꞌ⁠i. I⁠ꞌ⁠ewyte yi ikahuro ra⁠ꞌ⁠yn. 11  Pyno uiwyria⁠ꞌ⁠in watikuap ta⁠ꞌ⁠yn mesuwat yi ihywop irane hap. Mi⁠ꞌ⁠i hawyi yt kat i ra⁠ꞌ⁠yn. Mi⁠ꞌ⁠i tupono waku watomohãpyk yne aiwanetup hap ko⁠ꞌ⁠i. Mi⁠ꞌ⁠i hawyi wakuaria Tupana ewaku hap ewywuat watukupte⁠ꞌ⁠en. Waku Tupana kape yn aiwanetup hap watukupte⁠ꞌ⁠en mesuwarotiat turan. Mi⁠ꞌ⁠i hawyi ti aheko pakup wywo yn ra⁠ꞌ⁠yn ahewyry waku kat pote wakuaria yn na⁠ꞌ⁠yn aito. 12  Mi⁠ꞌ⁠i hawyi ti waku -Eriot ro Mehin Eriot ro Mimi wato⁠ꞌ⁠e yn na⁠ꞌ⁠yn. Mi⁠ꞌ⁠i pote ti wateha⁠ꞌ⁠at kahato ra⁠ꞌ⁠yn Tupana put⁠ꞌ⁠ok e hap e⁠ꞌ⁠at kape. Yt pya i ra⁠ꞌ⁠yn wato⁠ꞌ⁠e yn na⁠ꞌ⁠yn. Ta⁠ꞌ⁠i wuk⁠ꞌ⁠e ti aru waikiru ko⁠ꞌ⁠i. Mi⁠ꞌ⁠i hawyi ti aru tuweityk yne ra⁠ꞌ⁠yn wato⁠ꞌ⁠e. Watikuap ta⁠ꞌ⁠yn mio tã e hap. Ta⁠ꞌ⁠i meiũran ti aru yne ra⁠ꞌ⁠yn iheg nakat i⁠ꞌ⁠ewyte yt iheg i rakat i ti aru wuk⁠ꞌ⁠e ra⁠ꞌ⁠yn hakup pote ihywop yne. Ma⁠ꞌ⁠ato ti aito watikuap ta⁠ꞌ⁠yn. 13  Mi⁠ꞌ⁠i hawyi i⁠ꞌ⁠ewyte Tupana to⁠ꞌ⁠e -Atunug ti aru mi⁠ꞌ⁠i rẽ wẽtup yi ipakup takat. I⁠ꞌ⁠ewyte ti waikiru ko⁠ꞌ⁠i ipakup takat ra⁠ꞌ⁠yn atunug e. Ma⁠ꞌ⁠ato ti aru mi⁠ꞌ⁠i hawyi itote sa⁠ꞌ⁠awy⁠ꞌ⁠i wuat ko⁠ꞌ⁠i kai hãpyk sese rakaria yn na⁠ꞌ⁠yn. Mi⁠ꞌ⁠i hawyi ti aru wakuat nug haria yn na⁠ꞌ⁠yn tukupte⁠ꞌ⁠en itote Tupana mimoewaku ko⁠ꞌ⁠i mio tã wato⁠ꞌ⁠e ti aiwo⁠ꞌ⁠ope. Uiwyria⁠ꞌ⁠in mi⁠ꞌ⁠i watikuap ta⁠ꞌ⁠yn hawyi ti aru merep ta⁠ꞌ⁠yn watiky⁠ꞌ⁠esat put⁠ꞌ⁠ok e yi pakup hap i⁠ꞌ⁠ewyte waikiru pakup ko⁠ꞌ⁠i. Waku Hãpyk Takaria Wo I⁠ꞌ⁠ewyte Tupana Ehay Mu⁠ꞌ⁠e Haria Wo Watoine⁠ꞌ⁠en 14  Mi⁠ꞌ⁠i pote ti hãpyk yn watiky⁠ꞌ⁠esat watoine⁠ꞌ⁠en Tupana wywuat hap. Irania⁠ꞌ⁠in wywuat aiwo⁠ꞌ⁠owese hap yn waku watikat. Tupana wywuat aiwo⁠ꞌ⁠owese hap yn watiky⁠ꞌ⁠esat. Pyno uiwyria⁠ꞌ⁠in waku watoine⁠ꞌ⁠en iwywo mekewat e⁠ꞌ⁠at pe. Waku yt kat i i⁠ꞌ⁠aparap hap aiwanetup hawe. Waku yt kat i yt nakuap i aikai Tupana wanetup hawe. Waku yt kat i hin i ra⁠ꞌ⁠yn aiminug sa⁠ꞌ⁠ag aikawiat ko⁠ꞌ⁠i. 15  Ta⁠ꞌ⁠i eweheha⁠ꞌ⁠at kahato mekewat e⁠ꞌ⁠at pe hekatup turan. Yt perup⁠ꞌ⁠i puo hin i ewehekatup ma⁠ꞌ⁠ato Tupana miky⁠ꞌ⁠esat nug hap ete ewehekatup are katupono Tupana tunug irane to⁠ꞌ⁠e hap ewy wen ma⁠ꞌ⁠ato yt waure⁠ꞌ⁠e hin i ahehakyera⁠ꞌ⁠at hamuat hap ete. Toiky⁠ꞌ⁠esat wuat⁠ꞌ⁠i miit⁠ꞌ⁠in ehakyera⁠ꞌ⁠at hamuat pote yt merep i tuut. Yt tuut i te katupono toiky⁠ꞌ⁠esat yne eiperia tomiehakyera⁠ꞌ⁠at ko⁠ꞌ⁠i wo eweipyhu⁠ꞌ⁠at hap. Aikotã aheyke⁠ꞌ⁠et Pauru henoi hap ewy are. Tuwe⁠ꞌ⁠eg hap Tupana kaipywiat wo eimu⁠ꞌ⁠e mi⁠ꞌ⁠i hat ti meke. Tupana miium ewy kahato eimu⁠ꞌ⁠e. Ta⁠ꞌ⁠i toiwan kahato ti mesuwat ehewowi. 16  Ta⁠ꞌ⁠i mio tã e Pauru Tupana uut hap etiat tohenoi tomiwan miat. Yne tomiwan me mio tã e. Aimu⁠ꞌ⁠e kahato mekewat sehay wo. Pyno niatpo kahato aimu⁠ꞌ⁠e wen mekewat sehay wo. Yt watikuap i kahato ti yne aiwy Pauru miwan ko⁠ꞌ⁠i. Mi⁠ꞌ⁠i pote tukupte⁠ꞌ⁠en yt we⁠ꞌ⁠eg i haria mekewat Pauru ehay ywyk haria. Mi⁠ꞌ⁠i pote ti mehin Pauru miwan kaipyi eimu⁠ꞌ⁠e wen ma⁠ꞌ⁠ato ti yt aimu⁠ꞌ⁠e hat Pauru mienoi ewy sese i. Ta⁠ꞌ⁠i mi⁠ꞌ⁠i haria ti i⁠ꞌ⁠atu kahato. Kat pote mekewat Pauru miwan etiat yt wemu⁠ꞌ⁠e kahato haria pykai i are. Mi⁠ꞌ⁠i pote Iesui mohey ran haria i⁠ꞌ⁠ewyte Tupana mipo⁠ꞌ⁠ororia ran nakaria pote Tupana ehay pun haria mi⁠ꞌ⁠iria. I⁠ꞌ⁠ewyte ta⁠ꞌ⁠atuero⁠ꞌ⁠ok ta⁠ꞌ⁠yn imienoi kat e hap kat e hap. Mi⁠ꞌ⁠i hawyi ti ta⁠ꞌ⁠atuwanetup hap kaipyi ra⁠ꞌ⁠yn ta⁠ꞌ⁠atunug yt Pauru e hap ewy i. Mi⁠ꞌ⁠i hap kaipyi ti te⁠ꞌ⁠eruwema⁠ꞌ⁠at Tupana ehay ran enoi hap ete. Mi⁠ꞌ⁠i hawyi Tupana mimoma haria te⁠ꞌ⁠eropyhu⁠ꞌ⁠at. 17  Pyno uhekatuwyria eiwe⁠ꞌ⁠eg wo o mi⁠ꞌ⁠i haria pupi are. Mi⁠ꞌ⁠iria yt aiwy Pauru ewy hin i ta⁠ꞌ⁠atuhenoi -Ta⁠ꞌ⁠i Pauru e hap mi⁠ꞌ⁠i i⁠ꞌ⁠atu⁠ꞌ⁠e pykai. Yt ehewyry tei⁠ꞌ⁠o i⁠ꞌ⁠atuehay upi are. Yt nakuaria i mi⁠ꞌ⁠iria are. Yt Tupana miky⁠ꞌ⁠esat ewywuat nug haria i mi⁠ꞌ⁠iria. I⁠ꞌ⁠ewyte yt miit⁠ꞌ⁠in miky⁠ꞌ⁠esat ewywuat nug haria i. Pyno mesup yian mete uimiwan me ahenoi ra⁠ꞌ⁠yn yne yne eimowe⁠ꞌ⁠eg hap. Aikotã aru aikotã aru miit⁠ꞌ⁠in eima⁠ꞌ⁠at reran haria put⁠ꞌ⁠ok e aru ehete hap turan. Mi⁠ꞌ⁠iria ti aru wẽtup Iesui e hap ran ta⁠ꞌ⁠atumoherep wen ma⁠ꞌ⁠ato yt to⁠ꞌ⁠e hap ewy hin i are. Karãpe aru meimuẽwat ewywuat put⁠ꞌ⁠ok i⁠ꞌ⁠atu⁠ꞌ⁠e ehã⁠ꞌ⁠ãg hamo mi⁠ꞌ⁠i hawyi ti aru -Yt rat ewei⁠ꞌ⁠e yn no i⁠ꞌ⁠atuepe. -Kopuo yn muap meiko yn muap i⁠ꞌ⁠atu⁠ꞌ⁠e pykai ti aru. -Yt rat ewei⁠ꞌ⁠e o i⁠ꞌ⁠atuepe Iesui ehay sese upiaria uruto ewei⁠ꞌ⁠e ro. Eheso i rat ewei⁠ꞌ⁠e i ro i⁠ꞌ⁠atuepe. Mi⁠ꞌ⁠i hawyi ti aru yt eima⁠ꞌ⁠at kuap i ra⁠ꞌ⁠yn mi⁠ꞌ⁠iria. Ta⁠ꞌ⁠i mi⁠ꞌ⁠iria eima⁠ꞌ⁠at teran haype wẽtup sehay upi. Mi⁠ꞌ⁠i hawyi awyato ewy tõ⁠ꞌ⁠ẽ ei⁠ꞌ⁠u hamo. Ta⁠ꞌ⁠atuky⁠ꞌ⁠esat Iesui mohey hap ahepiat hep hamuat. Ta⁠ꞌ⁠atuky⁠ꞌ⁠esat watunug yt naku i ta⁠ꞌ⁠atuminug sa⁠ꞌ⁠ag hap ewy. Eiwe⁠ꞌ⁠eg wo mi⁠ꞌ⁠iria pupi are. Pyno yt ewei⁠ꞌ⁠atoiat tei⁠ꞌ⁠o Iesui mohey hetiat hap i⁠ꞌ⁠atumimohey wẽtup sehay upi paĩ are. Ma⁠ꞌ⁠ato iheg me kahato imohey hawe waku eweikupte⁠ꞌ⁠en pote waku pe ra⁠ꞌ⁠yn eweikupte⁠ꞌ⁠en wuat⁠ꞌ⁠i e⁠ꞌ⁠at pe are paĩ. 18  Pyno eiwemotag o Tupana ehay wo hegyi⁠ꞌ⁠at hap kaipyi are i⁠ꞌ⁠ewyte Tupana eiky⁠ꞌ⁠e hap kaipyi. Ahehakyera⁠ꞌ⁠at hat Aipotypot Iesui mohey hamo eiwemotag o. Imohey kahato haria wo eweikupte⁠ꞌ⁠en hawyi ihãite kahato rakaria eipe. Imohey hap upi ihay wakuat upi yn atiky⁠ꞌ⁠esat eweikupte⁠ꞌ⁠en uito are⁠ꞌ⁠e ehepe uimiwan me ahenoi.

Miwan hit koꞌiyi kai