Ir al contenido

Ir al índice

 KJOAʼMIYA XI CHOTʼAYA 41

Kixi kjuintʼalee Niná kʼianga jetíjna kjoañʼai xi nʼio tse

Kixi kjuintʼalee Niná kʼianga jetíjna kjoañʼai xi nʼio tse

“Tsjoacha katamao Jeobá, ngatsʼio xi kixi mangíntʼalao. Je Jeobá síkuindaa je xi kixi fitʼale” (SAL. 31:23).

KJOAJNDA 129 Kao kjoaka si̱xálee Niná

XI TÍNCHJA̱NI *

1, 2. 1) Jmé xi jeme kʼoakuitso je chjota. 2) Jmé xi chótʼayajiaan i̱ kjoaʼmiya jebi.

KUILA si̱kjaʼaitsjeen tsa jeʼi̱ tjíotso je chjota: “Jo nda nyʼán tiyoaa. Nijmejin xi koa̱nná”. Tsakui nichxin kʼoakuitso nga kjesa kʼoasʼin nʼio ndasʼin batiojin je chjota jokji jngo tjíjtsa Sonʼnde. Kʼoa tsa kʼoakuitso nga tsín tijme kjoa sʼe̱ni. Tonga alikui koa̱nle kʼoechjoale je kjoa xi kjoaʼaíne nga koa̱nskanni. Ánni. Nga̱ je Biblia itso: “Kjoaʼaíneleʼni nga kuixo̱ya ndi̱to̱n [...]. Niʼyajin xi cha̱tʼale” (1 Tes. 5:3).

2 Xi tʼatsʼe jebi, nkjín koya xi nʼio tjínle kjoandosin chótʼayajiaan, jolani, jmé xi koa̱n nga jetíjna je kjoañʼai xi nʼio tse. Jmé xi mele Jeobá nga sʼiaan nga kui nichxin. Kʼoa jmé xi machjén nga sʼiaan ndʼaibi nga kixi kjuintʼalee Niná nga kui nichxin (Mat. 24:21).

JMÉ XI KOA̱N NGA JETÍJNA JE KJOAÑʼAI XI NʼIO TSE

3. Tojo tso Apocalipsis 17:5, 15-18, jósʼin sikjeson Niná je “Babilonia xi nʼio je”.

3 (Tʼexkiai Apocalipsis 17:5, 15-18). * Je “Babilonia xi  nʼio je” ni̱kjeson. Tojosʼin jekaʼyaa, je chjota alikui kʼoakoa̱nle kʼoechjoale jmeni xi koa̱n nga jekjoaʼaí je kjoañʼai xi nʼio tse. Ánni nga tsín je kʼoakoa̱nnile. Nga̱ “Niná kʼoasʼin kitsjoale chjotabe ni̱ma̱ xi kʼoasʼin sitjosonle josʼin mele Niná”. Kʼoa je xi mele Niná kuinga sikjeson ngatsʼi religión ndiso, kao je religión xi chjotale Cristo tsole yaole. Jé “nra̱ xi te mani” xi tsʼe “cho̱ xi ní kji” sichjén Niná nga sikjeson ngatsʼi religión ndiso. Je nra̱ xi te mani, jé tsoyanile ngatsʼi gobierno xi ya tsjoánganʼiole je “cho̱ xi ní kji”, xi je tsoyanile Naciones Unidas (Apoc. 17:3, 11-13; 18:8). Kʼianga kʼoetʼale chjotaxá jebi je religión ndiso kʼiaa koaitsʼia je kjoañʼai xi nʼio tse. Toxijña kʼoakoa̱n jngo tjíjtsa Sonʼnde kʼoa nʼio tso̱kjon je chjota.

4. 1) Jméni xosikao je chjotaxá nga kʼoetʼanile je religión ndiso. 2) Jméni xi tsakui nichxin kʼoasʼin je chjota xi ya tsakatiojinle je religión ndiso.

4 Alikui ʼyaa jméni xosikao je chjotaxá nga je Babilonia xi nʼioje kʼoetʼanile. Tsakui nichxin kʼoakuitso nga je religión tjínle jée nga tsín kjoanyʼán kʼoa nga kjoa política tsjonjin yaole. Kʼoa tsakuije̱ nga nʼio tse kjoanyiná tjínle kʼoa nʼio nkjín koya xi je kjinentsja (Apoc. 18:3, 7). Tonga alikui kjoeson ngatsʼi je xi ya religión ndiso tjíojin. Je xi sikjeson je chjotaxá jé jtín xi tjíole je religión ndiso. Kʼianga jeni̱kjeson jtín jebi, je chjota xi ya tsakatiojin kʼiaa skoe̱ nga to tsakʼanachanile je xi tsakinyatítjonle jtín jebi kʼoa kuinyaxinjinle.

5. Jméni xi tongini tso je Jeobá tʼatsʼe je kjoañʼai xi nʼio tse, kʼoa ánni.

5 Je Biblia alikui kʼoatso jokjitse kʼoachxinle nga ni̱kjeson je Babilonia xi nʼioje, je xi ʼyaa kuinga tochoatse kʼoakoa̱n (Apoc. 18:10, 21). Je Jeobá kʼoatso nga sichoaya je nichxin nga sʼe̱jna je kjoañʼai xi nʼio tse ánni nga kuinje̱ngini je choʼndale xi kitjoejin kao je religión xi kixi (Mar. 13:19, 20). Jmé xi mele je Jeobá nga sʼiaan kʼianga jekoaitsʼia je kjoañʼai xi nʼio tse kʼoa nga sʼe̱jna je kjoajchán xi tsʼe Armagedón.

TOSI TONDA SI̱XÁLEE JE JEOBÁ

6. Jmé xi mele je Jeobá nga sʼiaan.

6 Tojosʼin tsaʼyaa ya kjoaʼmiya xi jejaʼato, je Jeobá kui xi mele nga tsín ya kuinójiaan  yaoná tojmeni xi tʼatsʼe Babilonia xi nʼioje nroani. Tonga alikui tokui xi machjén nga sʼiaan. Tjínnele nga ñaki kʼoakʼoé tokoán nga je Jeobá si̱xálee. Jaola koya kataʼyaa josʼiaan.

Tosi tonda kuiyojtián ninga kʼia nga ñʼai koa̱nchon (Chótsenlai párrafo 7) *

7. 1) Jósʼin bakoñá nga nitjosoán je kjoatéxomale Jeobá. 2) Tojo tso Hebreos 10:24, 25, ánni nga nʼio tjínnile kjoandosin nga kuiyojtián, ngisaa nichxin xi tiyoaa ndʼaibi.

7 Xi títjon, tjínnele si̱tjosoán jotso je kjoatéxomale Niná. Alikui koa̱n nga kui je kjoafaʼaitsjen xi tjín sonʼnde kjuintjenngiaa. Tobʼelañá, alikui sasénná je kjoachajngi, jolani nga tixʼin xínkjín kʼoa nga tiyánchjín xínkjín bixankaoni chjota kʼoa tsa jmesani xi sʼín nga síchajngi (Mat. 19:4, 5; Rom. 1:26, 27). Xi majaoni, tjínnele nga tosi tonda kuiyojtián nga kʼoétsʼoalee je Jeobá kao je ndsʼee. Tosi tonda biyojtián tojñani tiyoaa. Tobʼelañá, ya Ndʼia jña chotʼayá, ya ndʼiale ndsʼee kʼoa ninga toʼma. Tojme kjoa xi kuitjátojiaan tosi tonda kuiyojtián kʼianga kʼoétsʼoalee Niná. Je Biblia itso: “Tongisa kʼoasʼiaon josʼin nga jchao nga je nichxinbe nroachrian” (tʼexkiai Hebreos 10:24, 25). *

8. Jmé énni xi tsakui nichxin kʼuínyasoán.

8 Tsakui nichxin alikui tikui én koakoyasonñá joni ndʼaibi kʼianga sʼe̱jna je kjoañʼai xi nʼio tse. Nichxin xi tiyoaa ndʼaibi kui énnda chjotse ʼmiyasoán kʼoa chjotatjenngile Cristo nikoaa je chjota. Nga kʼia tsakui nichxin kui kʼuínyasoán je én xi nchja̱ni Biblia, xi ya mangóson joni jtsílao̱ (Apoc. 16:21). Tsakui nichxin kui kʼoakuixoán nga to jekjoeson jmeni xi chon sonʼnde nga je Na̱i kjinentsja. Nga jekoai nichxin kʼiaa kʼoakʼuínná jmeni xi kuixoán kʼoa josʼin koakoyasoán. Alikuikjoan ʼyaa ndʼaibi tsa tojo kʼoasʼin koakoyasoán jotinʼia xi jetsʼato 100 nó tífaʼato kʼoa tsa kʼoantjaiya josʼin kʼuínyasoán. Tojosʼinni, kui kjoanda sʼe̱ná nga kao kjoanʼiojin koakoyasoán jmeni xi sʼin je Jeobá (Ezeq. 2:3-5).

9. Jósʼin je chjota kʼianga kjuinrʼoé je én xi kʼuínyasoán, tonga ánni nga tsín jao kʼoéñá tokoán.

9 Tsakui nichxin koa̱nmele je chjota kʼoechjoaná nga kʼuínyasoán. Joni ndʼaibi, nga je Jeobá ninʼiotʼaa nga ʼmiyasoán tojo jé si̱nʼiotʼaa nga kʼia. Alikui jao kʼoé tokoán nga je Jeobá koasenkaoná nga kʼoasʼiaan josʼin mele (Miq. 3:8).

TONGINI KUIYONDAA KʼIANGA KʼOETʼANÁ JE CHJOTA

10. Tojo tso Lucas 21:25-28, jósʼin je chjota kʼianga skoe̱ jmeni xi koa̱n nga jetíjna je kjoañʼai xi nʼio tse.

10 (Tʼexkiai Lucas 21:25-28). * Kʼianga jetíjna je kjoañʼai xi nʼio tse, je chjota tso̱kjon kʼianga skoe̱ nga tsínni josʼin kuinyakao jmeni xi kisinʼiotʼa. Je chjota nʼio sikjáojin kʼoa nʼio tso̱kjon nga̱ nʼio tse kjoañʼai sʼe̱ nga kui nichxin (Sof. 1:14, 15). Nga kʼia nʼio ñʼai koa̱nchon, kʼoa kʼoati ñʼai koa̱nle je choʼndale Niná. Tsakui nichxin tse kjoa kuitjátojiaan nga tsín i̱ nojiaan yaoná jmeni xi chon sonʼnde. Kʼoa tochajinle koa̱ntsínná je tsojmi xi nʼio machjénná.

11. 1) Ánni nga toñá kʼoetʼaniná je chjota. 2) Ánni nga tsín kuinókjonsíñá nga kjoaʼaí je kjoañʼai xi nʼio tse.

 11 Kuicho nichxin nga nʼio koa̱njtile je chjota xi kinikjeson je religiónle nga skoe̱ nga tsín tíchangi je religiónná xi testigole Jeobá maa. Nʼiojin koa̱nngabason je én xi tʼatsʼe jebi, saʼnda yajin sʼe̱jinkonni je chjota ya tjen Internet. Je Na̱i kao je chjota, nʼio koa̱njtikená nga̱ toñásaa xi testigole Jeobá maa xi sʼe̱ná religión. Alikui je kʼoakoa̱nle kjoaʼaxin je religiónná. Nga jekoa̱ntsín religión xi kjaʼaí, ñaki jetoñá kʼoetʼaná. Kʼoa ya Biblia Gog xi tsʼe Magog * sʼin tsjoájaʼaínle je chjota jebi. Kui xá koatiojtínni nga kʼoetʼale je naxinandále Jeobá (Ezeq. 38:2, 14-16). Nga tsínkjoan ʼyaa jmeni koa̱n, tsakui nichxin kui si̱kjáojiaan. Tonga alikui koa̱n nga kuinókjoaan kʼianga kjoaʼaí je kjoañʼai xi nʼio tse, nga̱ jé Jeobá kʼoakuitsoná jmeni xi sʼiaan nga kuinje̱ngilee yaoná (Sal. 34:19). Je Biblia itso: “Chótsenngʼao, kʼoa chjómitjaon jko, nga̱ je kjoabitjontjaino nroachrian”. *

12. Jósʼin tjíosíkatíondaná je “choʼnda xi nʼiotʼakon, xi nda be xá” tʼatsʼe jmeni xi koa̱n nichxin xi nroaján.

12 Je “choʼnda xi nʼiotʼakon, xi nda be xá” tongini tjíosíkatíondaná nga kixi kjuintʼalee je Jeobá kʼianga kjoaʼaí je kjoañʼai xi nʼio tse (Mat. 24:45). Nkjín koya je kjoafaʼaitsjen xi tsjoáná. Tobʼelañá, je kjoajtíntse xi jan nichxin kisatio nga nó 2016 saʼnda nó 2018, tsakinyakaoná nga tsaʼyaa jmeni xi machjénná nga sʼiaan nga jetíjnachrian nichxinle Jeobá.

TOSI TONDA KIXI KATAMAA, KATAKANÁ KʼOA NʼIOJIN KATAMAA

Jmé xi machjén nga sʼiaan ndʼaibi nga kuinje̱ngilee yaoná kʼianga kjoaʼaí je kjoañʼai xi nʼio tse (Chótsenlai párrafo 13-16) *

13. Jósʼiaan nga tosi tonda kixi kjuintʼalee Niná, kʼoa ánni machjénsíni nga kʼoasʼiaan ndʼaibi.

13 Kixi katamaa. Je kjoajtíntse xi kisʼejna nga nó 2016 xi “Kixi katamaa xi kao Jeobá” tsakʼin, kui kitsoyaná nga kixi kjuintʼalee je Jeobá kʼiatsa miyoná mani. Kʼoati tsakʼinyaná nga kʼoati machriantʼalee Niná kʼianga ñaki ni̱ma̱ná nroajinni nga bʼetsʼoaa kʼoa nga chotʼayá je Biblia. Kui xi kuinyakaoná ninga tse kjoa kuitjátojiaan. Kʼianga to jetífikjetʼa nichxin, ngisaa titse kjoa kuitjátojinngáñá, kʼoa yaa koakoñá tsa kixi kjuintʼalee Niná kao Chjotaxále. Kʼoa je chjota tosi tondajin koa̱njtikená (2 Ped. 3:3, 4). Nga̱ tsín i̱ nojiaan yaoná jmeni xi chon sonʼnde. Tjínnele nga kixi kjuintʼalee Niná ndʼaibi ánni nga kixi kjuintʼasínilee nga kjoaʼaí je kjoañʼai xi nʼio tse.

14. 1) ʼYáni xi koandiaale xále Niná i̱ Sonʼnde kʼianga jetíjna je kjoañʼai xi nʼio tse. 2) Ánni machjénsíni nga kjuintjenngiaa josʼin sʼe̱ndiaaná nga kui nichxin.

14 Kʼianga jetíjna je kjoañʼai xi nʼio tse, alikui tije ndsʼee xi ya ngʼajmi tjínle kjoachoya koandiaanile je xále Niná i̱ Sonʼnde. Nga kʼia, je chjotale Cristo xi ya ngʼajmi tjínle kjoachoya xi tjíosa i̱ Sonʼnde kʼiaa koai ya ngʼajmi, nga̱ kʼoati je kuinyakao Jesús nga sʼe̱jna je kjoajchán xi tsʼe Armagedón (Mat. 24:31; Apoc. 2:26, 27). Jebi kui xi tsonile nga tsín tiʼi̱ koatiokaoniná je Cuerpo Gobernante. Ninga kʼoalani, je choʼndale Niná xi i̱ Sonʼnde tjínle kjoachoya tojo jtín sʼin koatio, nga̱ jé ndsʼee xi jetjínle kjoafaʼaitsjen xi i̱ Sonʼnde koyale koatio koandiaaná. Tjínnele koakoá nga kixi mangíntʼalee  Niná kʼianga si̱tjosoán josʼin koandiaaná ndsʼee jebi. Nga̱ kui xi koasenkaoná nga kuitjo̱ntjé.

15. Jósʼiaan nga tosi tonda chókjoaná, kʼoa ánni nga nʼio tjínnile kjoandosin nga chókjoajinná je kjoa xi bitjatojiaan ndʼaibi.

15 Katakaná. Je kjoajtíntse xi kisʼejna nga nó 2017 xi “Ali nixa̱njinlai” tsakʼin, kui kitsoyaná nga katakaná tojme kjoa xi kuitjátojiaan. Tsakʼinyaná nga tsín tokʼia machjénná kjoaka kʼianga nda tiyoaa kʼoa nga tjínnele je Jeobá si̱nʼiotʼaa nga chókjoajinná je kjoa xi bitjatojiaan (Rom. 12:12). Kuenta sʼiaan nga i̱ kitso Jesús: “Je xi jchókjoale saʼnda nga kjoetʼani, jebi kuitjontjai” (Mat. 24:13). Jebi kui xi tsonile nga tjínnele kixi kjuintʼalee Niná ninga tojme kjoa kuitjátojiaan. Tsa ska̱ná ndʼaibi, chókjoajinná kʼianga jekjoaʼaí je kjoañʼai xi nʼio tse.

16. Jmé xi koasenkaoná nga nʼiojin koaan, kʼoa ánni machjénsíni nga nʼiojin koaan ndʼaibi.

16 Nʼiojin katamaa. Je kjoajtíntse xi kisʼejna nga nó 2018 xi “Nʼiojin katamai” tsakʼin, kui kitsoyaná nga tsín tsakui xi tsonile nga nʼio nkjín koya jmeni xi maná nʼia kʼianga nʼiojin maa, kuinga nʼiojin mañá nga je Jeobá ninʼiotʼaa, to jonʼia nga kjoa bitjatojiaan. Jmé xi sʼiaan nga tosi tonda je Jeobá si̱nʼiotʼaa. Nyaon nyaon kʼoéxkiaa je Biblia kʼoa si̱kjaʼaitsjenjiaan josʼin tsakʼasjentjai Niná je choʼndale nichxin kjoatse (Sal. 68:20; 2 Ped. 2:9). Kʼianga kʼoetʼaná je chjota kʼianga jetíjna kjoañʼai xi nʼio tse machjén nga nʼiojin koaan kʼoa nga je Jeobá si̱nʼiotʼaa (Sal. 112:7, 8; Heb. 13:6). Kʼiatsa je Jeobá ninʼiotʼaa ndʼaibi, nʼiojin koaan kʼianga kʼoetʼaná je Gog. *

KAO KJOATSJOA CHÓYALEE NGA KUITJO̱NTJÉ

Tochoasa chale nga je Jesús, kao chjotale xi ya koatexomakao kʼoa kao ánkje kjoaʼaísíkjeson je kontrale Niná kʼianga sʼe̱jna je kjoajchán xi tsʼe Armagedón (chótsenlai párrafo 17).

17. Ánni nga tsín koa̱n kuijkónnilee je Armagedón (chótsenlai sén xi faʼaitʼa ya portada).

17 Tojosʼin tsaʼyaa ya kjoaʼmiya xi jaʼato, me ngatsʼiaa nga nichxin fetʼa tinijchá yaoná. Tonga kʼoati choyalee nga kuinje̱ngilee yaoná nga sʼe̱jna je kjoañʼai xi nʼio tse. Kʼianga kjoaʼaí je kjoajchán xi tsʼe Armagedón kʼiaa kjoetʼa ngayeje jmeni xi chon sonʼnde. Alikui koa̱n kuijkoán nga kʼia, nga̱ kjoajchán jebi tsʼee Jeobá (Prov. 1:33; Ezeq. 38:18-20; Zac. 14:3). Kʼianga kʼoakuitso Jeobá, jé Jesús koandiaale je kjoajchán xi tsʼe Armagedón. Kʼoa yaa kuinyakao je xi  144,000 mani kʼoa kao ánkje. Ngatsʼi kao je Na̱i skaan, kao na̱i xi ndajin kʼoa kao ngatsʼi xi ya tsjoánganʼiole (Dan. 12:1; Apoc. 6:2; 17:14).

18. 1) Jmé xi tsoná je Jeobá. 2) Jósʼin basenkaoná Apocalipsis 7:9, 13-17 nga tsínkui kuinókjonlee jmeni xi koa̱n nichxin xi nroaján.

18 Je Jeobá itsoná: “Nijngojin ki̱cha̱ xi kjuinroaneli xi kuinje̱le” (Is. 54:17). Je chjotankjín kuinje̱ngile yaole kʼianga kjoaʼaí je kjoañʼai xi nʼio tse kʼoa tosi tonda je Niná sixále (tʼexkiai Apocalipsis 7:9, 13-17). * Je Biblia basenkaoná nga tsínkui kuinókjonlee jmeni xi koa̱n nichxin xi nroaján. ʼYañá nga síkuinda Jeobá je chjota xi kixi fitʼale (Sal. 31:23). Ngatsʼiaa xi tsjoachaa je Jeobá kʼoa xi ʼyaxkoán je jaʼaínle nʼio tsjoa sa̱tío tokoán nichxin kʼianga kʼoasjengʼa je jaʼaínle (Ezeq. 38:23).

19. Jósʼin kuiyoaa kʼianga jeʼndenaxó koa̱n i̱ Sonʼnde

19 Sikjaʼaitsjenla jokjoan chjota xi síkʼaxki̱ 2 Timoteo 3:2-5 kʼoa jokoa̱nkjoan je chjota kʼianga jeʼndenaxó koa̱n i̱ Sonʼnde kʼianga jetsín tikui kjoafaʼaitsjenle Na̱i sʼe̱ni (chótsenlai je recuadro “ Jokoa̱nkjoan chjota nichxin xi nroaján”). Je ndsʼee George Gangas * xi ya tsakʼejnajinle je Cuerpo Gobernante, i kitso: “Nʼiojin naskánakoa̱nchon kʼianga jendsʼe kʼoa tichja sʼin cho̱bao ngatsʼio. Jeme kʼoasʼin kuiyo kʼianga jeʼndenaxó koa̱n i̱ Sonʼnde. Kʼoakji nichxin kuiyo joni je Jeobá. Kuiyoñá ngantsjai nichxin”. Nʼio naskásʼin kuiyoaa nichxin xi nroaján.

KJOAJNDA 122 Kixi katamaa ngantsjai

^ párr. 5 ʼYañá nga jeme kjoaʼaínená ngatsʼiaa je kjoañʼai xi nʼio tse. Jmé kjoa xi kjoaʼatojin je choʼndale Niná kʼianga jetíjna je kjoañʼai xi nʼio tse. Jmé xi mele Jeobá nga sʼiaan nga kui nichxin. Jmé xi machjén nga sʼiaan ndʼaibi nga kixi kjuintʼalee Niná. I kjoaʼmiya jebi chótʼayajiaan xi tʼatsʼe jebi.

^ párr. 3 Apocalipsis 17:5, 15-18: “Ya tjen tjítʼa jngo jaʼaín, jngo kjoaʼma: Babilonia xi nʼio je, xi na̱le chjotachajngi kao kjoana̱i xi tsʼe sonʼnde. 15 Je kitsona: Je nandá xi kaʼyaibi, jña nga chjoónchajngibe tíjnason, kui naxinandá, kʼoa chjotankjín, kʼoa ʼnde, kʼoa én. 16 Je nra̱ xi te mani xi kaʼyai kao cho̱be, jébi xi majtike chjoónchajngibe. Kjoaʼale ngayije, kʼoa sikájnajti, kʼoa ski̱ne je yaole, kʼoa koakajin lʼí. 17 Niná kʼoasʼin kitsjoale chjotabe ni̱ma̱ xi kʼoasʼin sitjosonle josʼin mele Niná, nga kʼoasʼin tjíojngokon nga tsjoále kjoatéxomale je cho̱be jo saʼnda kuitjoson je énle Niná. 18 Je chjoón xi kaʼyai jé naxinandáje xi batéxoma chjotatítjon xi tjío sonʼnde”.

^ párr. 7 Hebreos 10:24, 25: “Kʼoa si̱kjaʼaitsjenjinnía xíngiaa nga jngójngoá, nga si̱nʼiojiaan xíngiaa, nga sʼe̱ná kjoatjaocha, kʼoa nga kʼoasʼiaan xá xi nda. 25 Likui si̱kʼéjnaa nga koa̱nñaa, josʼin nga tjín kʼa xi kʼoasʼin mangale, tonga kʼoénelee xíngiaa, tongisa kʼoasʼiaon josʼin nga jchao nga je nichxinbe nroachrian”.

^ párr. 10 Lucas 21:25-28: “Kʼia sʼe̱ choa̱ tsʼe tsʼuí, tsʼe sá, tsʼe niño, kʼoa i̱ sonʼndebi kjoaba sʼe̱le ngatsʼi naxinandáyʼai, nga i̱ nga ján kʼoejta josʼin nʼio fane ndáchikon kao ndáxóle. 26 Koa̱nʼinda chjota xi tokui kjoajkonbe, kʼoa xi skóyale je kjoabe xi kjoaʼaínele i̱ sonʼndebi, nga̱ je lʼí xi tjínle nganʼio ngʼajmi jtínyani. 27 Kʼiaa skoe̱ ʼndíle chjota xi kjoaʼaíjin yojbi kao nganʼiole, kʼoa kao tse kjoajeya. 28 Kʼia nga je kjoabi kʼoetsʼiakao nga kʼoakoa̱n, chótsenngʼao, kʼoa chjómitjaon jko, nga̱ je kjoabitjontjaino nroachrian”.

^ párr. 11 JÓSʼIN TSOYANILE: Je Gog xi tsʼe Magog, xi kʼoati Gog ʼmi sakʼoale, jngo jtín naxinandá nchja̱ni xi kʼoetʼale choʼndale Jeobá kʼianga jetíjna je kjoañʼai xi nʼio tse.

^ párr. 11 Yaa capítulo 21 xi tsʼe libro xi El Reino de Dios ya está gobernando ʼmi faʼaitʼasa jmeni xi koa̱n nga kjoaʼaí je kjoajchán xi tsʼe Armagedón. Kʼoa yaa Xo̱n xi Bájinkonná xi tsʼe 1 sá julio nó 2015 página 16-​21 tsoyasa josʼin kʼoetʼale Gog xi tsʼe Magog je naxinandále Niná kʼoa josʼin sitoánntjai Jeobá je naxinandále kʼianga sʼe̱jna je kjoajchán xi tsʼe Armagedón.

^ párr. 16 Je kjoajtíntse xi jan nichxin xi tsʼe nó 2019 xi “Je kjoatjaocha nikʼiajin fetʼa” tsakʼin, kui kitsoyaná nga tsín jme xi koa̱nná kʼianga je Jeobá sikuindaná (1 Cor. 13:8).

^ párr. 18 Apocalipsis 7:9, 13-17: “Koanskanni kjoa jebi kiskotsen. Koeni jo nkjín mani chjota, jñale xi tsín maxki̱le, xi tsʼe ngatsʼi ʼnde, kao ntje̱, kao naxinandá, kao én. Tjío ngixko̱n je yáxilebe, kʼoa ya ngixko̱n je Barré. Najñochxoa yʼakjá, kʼoa xka̱jén nya yantsja. 13 Kinchja jngo chjotajchínga, kitsona: Je xi i̱ tjíobi, xi yʼakjá najñochxoa, ʼyáni xokjoanbe, jñáni kanroani. 14 Kʼoa an kixinle: Señor, ji ʼyai. Kʼoa je kitsona: Jébi xi nʼio tse kjoañʼai tsakjaʼá, kʼoa jetsakanéjon najñole, kʼoa je kisichxoa kao je njínle je Barré. 15 Kui nga i̱ tjíoni ngixko̱n je yáxilele Niná. Kʼoasʼin síxále nga nichxin kao nga nitje̱n ya yo̱ngo̱le. Je xi tíjnane je yáxile kʼoéjnajinle nga je. 16 Nikʼiajin tikoa̱nbaonile, nikoa̱nfatijinle. Kʼoa je tsʼuí likui tiska̱nenile, kʼoa nijmejin xi tikoa̱nsjuenile. 17 Je Barré xi ya tíjna ngabasenle je yáxilebe, jé xi sikjen, jé xi ska̱nindiaale jña títjo nandá xi tíjnakon. Niná sitsjejon ngayije ndáxko̱n xi tsʼe xko̱n”.

^ párr. 19 Chótʼai je revista La Atalaya xi tsʼe 1 de diciembre de 1994, jñani “Sus obras lo siguen” tso.

^ párr. 68 XI TÍNCHJA̱NI SÉN XI FAʼAITʼA: Kʼianga jetíjna kjoañʼai xi nʼio tse, je ndsʼee yaa jinjñájchá tjíobatío kjoajtín.

^ párr. 70 XI TÍNCHJA̱NI SÉN XI FAʼAITʼA: Je chjota xi kixi koaitʼale Jeobá kuinje̱ngile yaole nga kjoaʼaí kjoañʼai xi nʼio tse.