Ir al contenido

Ir al índice

Nga chjoéxkoá yaoná: Basenkaoná nga ndasʼin biyoaa ngixko̱n Jeobá

Nga chjoéxkoá yaoná: Basenkaoná nga ndasʼin biyoaa ngixko̱n Jeobá

“Kʼianga kichobatijin kao primona, tsakajtínsinña kʼoa kisixijndoña. Sikʼienña tsakai” (Paul).

“Totjín totjen xi sijtinile yaona ya niʼyana. Sixkoa̱ña jmeni xi tjío kʼoa tojmeni xi tjoéna” (Marco).

Tsakui nichxin alikuikjoan kʼoasʼiaan. Tonga sakʼoaa ñʼai maná ngatsʼiaa nga chjoéxkoá yaoná. Ánni. Kuinga chjotajée maa nga̱ ntje̱le Adán kitjenñá (Rom. 5:12). Tojo koan je Paul kao Marco, tjínkʼa xi ñʼai male nga kjoéxkó yaole jokjoan. Kʼoa tjínkʼa xi kjoajkon bʼetʼale kʼoa kuinga ñʼai manile nga kjoéxkó yaole. Kʼoa tjín xi ñʼai male nga bʼéchjoale yaole nga kui símekon xi kjoajndí tjenkao, nga toxkia ʼbi xán kʼoa tsa droga kjen.

Je xi tsín kjoéxkó yaole josʼin síkjaʼaitsjen, jme xi símekon kʼoa kao jme xi sʼín tsee kjoa batiojin. Tsa koa̱nná chjoéxkoá yaoná alikuijin kjoa jtsaojiaan. Jan koya tjínni xi chótʼayajiaan xi koasenkaoná nga koa̱nná chjoéxkoá yaoná. Xi títjon, jósʼin tíjna nga chjoéxkoá yaoná. Xi majaoni, ánni nga nʼio tjínnile kjoandosin nga kʼoasʼiaan. Kʼoa xi majanni, jókoa̱n sʼiaan nga koa̱nná chjoéxkoá yaoná (Gál. 5:22, 23). Kʼoati chótʼayajiaan jme xi koa̱n sʼiaan nga jngó jngoá tsa sakʼoa ñʼai maná nga chjoéxkoá yaoná.

JÓSʼIN TÍJNA NGA CHJOÉXKOÁ YAONÁ

Je chjota xi male kjoéxkó yaole alikui tokui fini jmeni xi símekon. Tosaa kui kʼoasʼín jmeni xi sasénle Niná.

Je Jesús tsakakó josʼin tíjna nga chjoéxkoá yaoná

Je Jesús nʼio nda choa̱ tsakʼéjnaná josʼin tíjna nga maná chjoéxkoá yaoná. Je Biblia itso: “Kʼia nga kinokjoaʼaonle nijojin kitso nga je. Kʼia nga tsakjaʼá kjoañʼai likui kiskankao, toya kiskanitʼale kjoa je xi bʼéndajin kao kjoakixi” (1 Ped. 2:23). Kʼianga ya tjenbʼatʼa yá je ʼNdíle Niná koanle kiskoéxkó yaole ninga tsabesin je kontrale (Mat. 27:39-44). Kʼoati koanle kiskoéxkó yaole kʼianga énndiso tsakáne je chjotatítjonle religión (Mat. 22:15-22). Kʼoa kʼianga jngojtín chjota judío xi koanmele la̱jao̱ tsakasénle ʼndele nga sijndani je Jesús tosaa “tsakʼejnaʼma, jitjoni yo̱ngo̱” (Juan 8:57-59).

Koaan chjénngilee je Jesús jokji tjen kʼoakoa̱nná. Je pastro Pedro itso xi kiski: “Je Cristo kʼoati tsakjaʼá kjoañʼai xi tʼatsaan. Tsakʼéjnachoyaná ndiaa xi tsʼe, jméni nga kʼoati jon kuimasínio josʼin tsakʼamje nga je” (1 Ped. 2:21). Ninga chjotajée maa, koaan kjuintjenngiaa je choa̱le Jesús jokji tjen kʼoakoa̱nná. Ánni nga nʼio tjínnile kjoandosin nga kʼoasʼiaan.

 ÁNNI NGA NʼIO TJÍNNILE KJOANDOSIN NGA CHJOÉXKOÁ YAONÁ

Tjínnená nga chjoéxkoá yaoná kʼiatsa mená ndasʼin kuiyoaa ngixko̱n Jeobá. Ninga jenkjín nó nga kixi timangíntʼalee, tsa tsín chjoéxkoá yaoná jmeni xi bixoán kao jmeni xi nʼia kui xosikaoná nga tsín timiyoná koa̱nni.

Kataʼyala xi tʼatsʼe Moisés, jé xi ngisasa nʼio ndʼé koan tikʼoajinni je chjota xi tsakatio Sonʼnde (Núm. 12:3). Nkjín nó nga tsejta koan kʼoa kichokjoajinle ninga tsakjayojéetʼale je chjota israelita. Tonga ñandia nga tsín koanle kiskoéxkó yaole kʼoa koanjtile nga si kisʼin je chjota israelita nga tsínle nandá. I kitsole: “Tinóʼyao chjotaxíjin xokjoaon. A i na̱xi̱ jebi chʼa̱sjenilaijin je nandá” (Núm. 20:2-11).

Je Moisés tsín koanle kiskoéxkó yaole. Alikui je Jeobá tsakʼasjengʼa kʼianga kitjo nandá (Sal. 106:32, 33). Kuinga tsín kitsjoaʼndenile nga jaʼasʼen ya ʼNde jña tsakʼinle nga kʼoaile (Núm. 20:12). Kʼoajin koannile je Moisés jmeni xi kitso josaʼnda nga kʼien (Deut. 3:23-27).

Jméni xi bakóyaná choa̱ jebi. Ningalani jenkjín nó nga ya tiyojiaan naxinandále Jeobá, alikui koa̱n nga toxkia kuinókjoakoaa tsa ʼyani xi síjtiná kʼoa tsa ʼyani xi machjén nga jtíkjáyale (Efes. 4:32; Col. 3:12). Kʼianga jefiná nó sakʼoaa likui titsejta mañá. Tonga koaan chjénngiaa je choa̱le Moisés. Chjoéxkoá yaoná ánni nga tsín si̱chañá je kjoanda xi tísokóná jokjitse jetinixálee Niná. Kʼoa jósʼiaan nga koa̱nná chjoéxkoá yaoná.

JÓSʼIAAN NGA KOA̱NNÁ CHJOÉXKOÁ YAONÁ

Kʼianga kʼoétsʼoalee Jeobá si̱jélee nganʼiotsjele. Ánni nga kui si̱jésíñá. Kuinga tʼatsʼe nganʼiotsjele Niná nroani nga maná chjoéxkoá yaoná, kʼoa je Niná tsjoále nganʼiotsjele je xi síjéle (Luc. 11:13). Kui nganʼiotsjele Jeobá síchjén nga basenkaoná nga koa̱nná chjoéxkoá yaoná (Filip. 4:13TNM). Xi ijngosani, kʼoati basenkaoná nga bakosaa je kjoanda xi tsjoá je nganʼiotsje, jolani kjoatsjoacha kʼoa kui xosíkaoná nga ngisa maná chjoéxkoá yaoná (1 Cor. 13:5).

Chjoéxkólee yaoná xi chʼaotjín

Chjoéxkólee yaoná xi chʼaotjín. Si̱kuindalee yaoná jmeni xi faʼaitʼa ya Internet kao je kjoasʼetsaojin xi kjoajndí tjenkao (Efes. 5:3, 4). Kʼoa kao ngayeje xi kui ska̱nijinná xi chʼaotjín (Prov. 22:3; 1 Cor. 6:12). Tobʼelañá, tsa jngo chjota xi kui tísímekon xi kjoajndí tjenkao machjén nga  tsínkui kʼoexkia libro kʼoa tsínkui skótsenle película xi kui ska̱niya jko̱ xi chʼaotjín.

Ñʼaijin koa̱nná nga kjuintjenngiaa kjoafaʼaitsjen jebi. Tonga tsa kʼoasʼiaan, je Jeobá koasenkaoná nga koa̱nná chjoéxkólee yaoná tʼatsʼe jmeni xi nimetokoán (2 Ped. 1:5-8). Koasenkaoná nga koa̱nná si̱kuindaa je kjoafaʼaitsjenná, josʼin nokjoaa kao jmeni xi nʼia. Tobʼelañá, je Paul kao Marco xi jenása kanikʼaxkiaa, koanle kiskoéxkó yaole ninga nʼio tsʼen koan tsakai. Si̱kjaʼaitsjenla je choa̱le jngo ndsʼee xi sasa síjtinile yaole tsakai kʼianga carro síxákao. Saʼnda tsakjáoti kao je chjota xi kʼoati carro síxákao. Jmé xi kisʼin ndsʼee jebi nga kisikʼantjaiya yaole. Itso: “Nyaon nyaon tsakʼetsʼoa. Kiskotʼayajinña je kjoaʼmiya xi kui nchja̱ni josʼin chjoéxkoá yaoná kʼoa tsakʼejinkonña textole Biblia xi tsakasenkaona. Ninga jenkjín nó nga kʼoasʼin tibʼenele yaona, kʼoabʼe tokoan nga nyaon nyaon nga tsín yaona sijtile kʼoa kui xi tíbasenkaona. Kʼoa kʼianga tjín jña fia, ngisaa xátí fia ánni nga tsín xitso xiská kʼoamjeña”.

TSA ÑʼAI MANÁ NGA CHJOÉXKOÁ YAONÁ

Sakʼoaa ñʼai maná nga chjoéxkoá yaoná. Kʼianga kʼoamaa tsakui nichxin tsín kuitso tokoán nga kʼoétsʼoalee Jeobá. Tonga kʼiaa nga ngisasa machjénná nga kʼoétsʼoaa. Tokjoan si̱jélee Jeobá nga katasíchatʼaná, si̱jélee nganʼio nga katabasenkaoná kʼoa kʼoénelee yaoná nga tsín tikui kʼoasʼianñá tsa jme xi kanʼia (Sal. 51:9-11). Je Jeobá alikui kʼoasjengi je kjoabʼetsʼoaná tsa ñaki ni̱ma̱ná kjuinroajinni nga kʼoakʼuínlee nga katabakóná kjoamatokon (Sal. 102:17). Je pastro Juan kʼoakitso nga je “njínle Jesucristo ʼndíle Niná sítsjeyaná ngayije jéená” (1 Juan 1:7; 2:1; Sal. 86:5). Si̱kjaʼaitsjeen nga kʼoatsoná je Jeobá nga tjínnele kjitʼa si̱chatʼalee xíngiaa. Kʼoa kʼoéjngoaa tokoán nga kʼoatisʼin sichatʼaná je Jeobá (Mat. 18:21, 22; Col. 3:13TNM).

Kʼianga tsín koanle kiskoéxkó yaole Moisés tʼatsʼe jme xi kitso ya ʼndekixí, je Jeobá alikui kisasenle, tonga kisichatʼale. Je Biblia kʼoatso nga jé Moisés xi ngisasa kisʼele kjoamakjain (Deut. 34:10; Heb. 11:24-28). Ningalani tsín kitsjoaʼndele Jeobá nga jaʼasʼen ya ʼNde jña tsakʼinle nga kʼoaile, tsjoáʼndele nga koa̱n kʼoéjna ngantsjai nichxin kʼianga jeʼndenaxó koa̱n i̱ Sonʼnde. Ñá kʼoati koa̱n sʼe̱ná kjoanda jebi kʼiatsa tosi tonga koa̱nná chjoéxkoá yaoná (1 Cor. 9:25).