Ir al contenido

Ir al índice

 KJOAʼMIYA XI CHOTʼAYA 23

“Kataʼyaxkón jaʼaínli”

“Kataʼyaxkón jaʼaínli”

“Ji Jeobá, tíjna ngantsjai je jaʼaínli” (SAL. 135:13).

KJOAJNDA 10 Chʼa̱sjengʼaa je Nináná Jeobá

XI TÍNCHJA̱NI *

1, 2. Jméni xi tsjoachaa nga chotʼayajiaan ñá xi testigole Jeobá maa.

NʼIO tjínle kjoandosin xi kao ñá nga kuitjotsje je jaʼaínle Jeobá kʼoa nga jchale nga toje xi tiʼndele batéxoma. Xi testigole Jeobá maa tsjoachañá nga chotʼayajiaan xi tʼatsʼe jebi. Tikuini xi nokjoañá ningalani jao koya tjínni.

2 Majinná nga kui xi machjén nga katabitjotsje je jaʼaínle Niná kʼoa nga kataʼyale nga toje Jeobá xi nda batéxoma. Nga jao koya jebi machjén nga nda katamajinná.

3. Jmé xi nchja̱ni je jaʼaínle Jeobá.

3 Je jaʼaínle Jeobá kui nchja̱ni ngayeje jokjoan je Nináná, jolani josʼin batéxoma. Tsa kʼoabixoán nga nʼio tjínle kjoandosin nga kuitjotsje jaʼaínle Niná, kʼoani tikui xi tibixoán nga kataʼyale nga toje Jeobá xi nda batéxoma. Je jaʼaínle Jeobá kʼoati kui nchja̱ni nga toje batéxomale ngayeje (chótsenlai je recuadro “ Nga kuitjotsje jaʼaínle Jeobá”).

4. 1) Jmé xi tso Salmo 135:13 xi tʼatsʼe jaʼaínle Niná. 2) Jmé xi chótʼayajiaan i̱ kjoaʼmiya jebi.

4 Je jaʼaínle Jeobá alikui jme xi mangósonkao (tʼexkiai Salmo 135:13). * Ánni nga nʼio tjínnile kjoandosin. ʼYáni xi títjon kontra tsakʼejnale jaʼaín jebi. Jméni xi sʼín Niná  nga bʼasjetsje je jaʼaínle. Jósʼiaan nga si̱toánntjé. Kui tʼatsʼe jebi chótʼayajiaan i̱ kjoaʼmiya jebi.

JÓKJI KJOANDOSIN TJÍNLE JE JAʼAÍNLE NINÁ

5. Jótso kʼa chjota kʼianga kui nikʼaxkiaa nga katabitjotsje je jaʼaínle Niná.

5 Je Jesús kʼoakitso nga je xi nʼio tjínle kjoandosin xi si̱jé nga kʼoétsʼoalee Niná kuinga kataʼyaxkón je jaʼaínle (Mat. 6:9). Jmé xi tsoyanile én jebi. Nga kataʼyaxkón tso kui xi tsonile nga katabitjotsje. Tonga tsakui nichxin tjínkʼa xi i̱ kuitso: “A tsí jetsje je jaʼaínle Jeobá. Ánni nga chʼa̱sjetsjesíñá”. Nga jchaa xi tʼatsʼe jebi, tjínnená nga si̱kjaʼaitsjeen ngayeje jmeni xi tsoyanile jngo jaʼaín.

6. Ánni nga nʼio chjínile jngo jaʼaín.

6 Jngo jaʼaín ali tsa to sʼetʼaxo̱njin kʼoa ali tsa to bʼaxki̱jin. Je Biblia itso: “Ngisaa nda nga nda bʼaxkiaa tikʼoajinni tsa nʼio tse kjoanyiná tjínná” (Prov. 22:1; Ecl. 7:1). Ánni nga nʼio chjínile. Kuinga kao jaʼaínná ʼyanile ʼya chjotañá. Je xi nʼio chjíle ali tsakuijin joʼmi jngo chjota, kuiní josʼin síkjaʼaitsjen xi kjaʼaí kʼianga nrʼoé je jaʼaínle.

7. Jótínikao je jaʼaínle Niná.

7 Kʼianga ʼya xi énndiso nchja̱ xi tʼatsʼe Jeobá, síjndí je jaʼaínle Niná nga̱ tsín nda síkʼaxki̱. Yaa ʼndenaxóle Edén nga chʼaosʼin tsʼaxki̱ títjon je jaʼaínle. Kataʼyala jmé xi bakóyaná jmeni xi koan nga kʼia.

NGA CHʼAOSʼIN TSʼAXKI̱ TÍTJON JE JAʼAÍNLE JEOBÁ

8. 1) Jmé xi tsabe tʼatsʼe Jeobá je Adán kao Eva. 2) Jmé xi chjonangiaa tʼatsʼe Adán kao Eva.

8 Je Adán kao Eva tsabee joʼmi Niná, kʼoati tsabe nga je kisinda ngayeje jmeni xi tjín, nga je kitsjoale kjoabijnachon, nga jngo ʼndenaxó kisikatíojin kʼoa nga je kitsjoale ñangale (Gén. 1:26-28; 2:18). Tonga, a tojo kisikjaʼaitsjenjin ngayeje xi kitsjoale Jeobá. A tojo tsjoake koan kʼoa a kitsjoale kjoanda. Kʼiaa tsaʼyale nga kiskotʼayakao je Na̱i.

9. Tojo tso Génesis 2:16, 17 kao 3:1-5, jmé xi kitsole Jeobá je Adán kao Eva, kʼoa jósʼin kisikitsónjin je Na̱i.

9 (Tʼexkiai Génesis 2:16, 17; * 3: 1-5 *)Jngoo ye̱ kisichjén je Na̱i nga i̱ kitsole Eva: “A kjoaixi nga kʼoakitsono Niná nga tsín koa̱n chi̱nao tole ngayeje yá xi tjín i̱ ʼndenaxó”. Je Na̱i tsakásjaile josʼin tsakʼanachale Eva. Je Niná kʼoakitsole nga koa̱n ski̱ne ngayeje tole yá xi tjín ya ʼndenaxó, tojngoo xi tsakʼéchjoale. Je Adán kao Eva nʼiojin nkjín koya tole yá xi koan kiskine (Gén. 2:9). Je Jeobá kitsjoale ngayeje xi koanchjénle. Tonga kʼoakitsole nga jngo yá sénjna xi tsín koa̱n ski̱ne tole. Kʼoa je Na̱i kisikitsónjin jme xi kitso Niná kʼoa kʼoakitso nga tsín nda chjota. Tsakui nichxin kui kiya jko̱ Eva nga kui tísʼechjoale je xi ndatjín.

10. Jmé énndiso xi tsakáne Niná je Na̱i, kʼoa jósʼin kichomani.

10 Nga kʼia, je Eva be nga je Jeobá batéxomale. Je Eva tikui kʼoakitsonile je Na̱i jokitso Niná. Kʼoa saʼnda kʼoakitso nga tsín koa̱n sikao je yá xi kisʼechjoale. Nga̱ be nga kʼoakitsole Niná nga kuiyá tsa tsín sitjosonle. Tonga je Na̱i i kitsole: “Likui kuiyáo” (Gén. 3:2-4). Chʼaosʼin kisikʼaxki̱ jaʼaínle Niná, nga̱ kuikjoánni xi kitso nga tsakʼéndiso je Jeobá. Kʼoa kuinga kʼoati Na̱i ʼminile je Satanás, xi énndiso báne sʼin tsoyanile. Je Eva koankjainle jme xi kitsole je Na̱i kʼoa kʼoasʼin kichʼanachanile (1 Tim. 2:14). Ngisaa tsakʼaʼénle je Na̱i tikʼoajinni je Jeobá. Nga kʼoakisʼin, alikui kisitjosonle je Niná kʼoa kiskine je tole yá xi kisʼechjoale. Kʼoati kisʼin je Adán (Gén. 3:6).

11. Jmé xi koan kisʼin tsakai je Adán kao Eva.

11 Jótjínnele kitso tsakai je Eva. Koanjin i̱ kitsole je Na̱i: “Alikui ʼbexkonle, tonga je Nʼaina Jeobá, ʼbexkonña. Tsjoake̱ña kʼoa jé sinʼiotʼa. Jé kitsjoanajin ngayeje jmeni xi tjínnajin. Jótso tokuin nga chʼaosʼin nikʼaxki̱. Ali tosi tondajin kʼoaʼminái”. Nʼiojin tsjoa kisʼe kon je Jeobá tsa kʼoalani kitso je Eva, kʼoa kʼoajinsʼin tsakakóni nga tsjoake kʼoa nga kixi kitʼale (Prov. 27:11). Tonga je Adán kao Eva alikui tsjoake koan kjoaixi je Jeobá. Kuinga tsín kisitoánntjaini je jaʼaínle Nʼaile.

12. Jókisʼin je Na̱i nga jao katasʼe kon Eva, kʼoa jméni xi tsín kʼoakisʼin je Adán kao Eva.

12 Tojosʼin tiʼyaa, je Na̱i chʼaosʼin kisikʼéjna je jaʼaínle Jeobá nga̱ kui xi koanmele nga jao katasʼe kon Eva. Kʼoa je Adán kao Eva alikui kisitoánntjai je  jaʼaínle Jeobá. Kuinga koankjainnile jme xi kitsole je Na̱i kʼoa yátsʼin tsakinyále Niná. Je Na̱i tojo kʼoatísʼín ndʼaibi. Chʼaosʼin síkʼaxki̱ je jaʼaínle Niná nga énndiso báne, kʼoa je xi makjainle énndisole bʼasjengi josʼin batéxoma Jeobá.

JE JEOBÁ BʼASJETSJE JAʼAÍNLE

13. Tojo tso Ezequiel 36:23, jmé xi ngisa tínchja̱ni Biblia.

13 Jmé xi kisʼin je Jeobá nga énndiso kisʼene. Ya Biblia kʼoatso jme xi tísʼín Jeobá nga tíbakó nga to énndiso jmeni xi kitso je Na̱i ya ʼndenaxóle Edén (Gén. 3:15). Je xi ngisa tínchja̱ni Biblia kuinga kʼoatso nga je Chjotaxále sichjén nga kʼoasjetsje je jaʼaínle, jé ʼNdíle koatexoma kʼoa jé xosʼin nga sʼe̱ ijngokʼa kjoanyʼán kao kjoatéxomakixi i̱ Sonʼnde. Yaa Biblia tsoyaná josʼin kʼoasjetsje je jaʼaínle Jeobá (tʼexkiai Ezequiel 36:23). *

14. Jósʼin tíbʼasjetsje je jaʼaínle Jeobá.

14 Je Na̱i tíbásjaile jotísʼín nga tsín katabitjoson jme xi tjínndajinle Jeobá, tonga alikui je kʼoakjimale. Ya Biblia bakóyaa josʼín je Jeobá kʼoa alikui ʼya xi mangósonkao. Ningalani aon koanle nga yátsʼi̱n tsakinyá kʼale (Sal. 78:40). Kao kjoachjine tíbʼéndajin kjoa jebi, tsejtaa kjima kʼoa tíbakó kjoatéxomakixi. Kʼoati nkjín koya tíbakó jokji nganʼio tjínle. Kʼoa xi ngisa bakó kui je kjoatsjoacha (1 Juan 4:8). Je Jeobá tíbʼasjetsje ngantsjai je jaʼaínle.

Je Na̱i tsakʼéndisole Eva xi tʼatsʼe Jeobá, kʼoa jokji tífaʼato nichxin tojo chʼaosʼin tísíkʼaxki̱ Niná (Chótsenlai párrafo 9, 10, 15) *

15. Jótísʼín je Na̱i nga chʼaosʼin tísíkʼaxki̱ je jaʼaínle Niná nichxin xi tiyoaa ndʼaibi, kʼoa jósʼin tíbichómani.

15 Nichxin xi tiyoaa ndʼaibi, je Na̱i tojo chʼaosʼin tísíkʼaxki̱ jaʼaínle Jeobá. Jé xotísʼín nga jao katasatío kon je chjota tʼatsʼe nganʼiole Jeobá, kjoatéxomakixile, kjoachjinele kao kjoatsjoachale. Tobʼelañá, kui xi mele nga kʼoasʼin katasíkjaʼaitsjen chjota nga tsín Niná. Kʼoa tsa ʼya xi makjainle xi tʼatsʼe Niná, jé xosʼín nga  kʼoasʼin katamakjainle nga tsín kixi tjín kjoatéxomale kʼoa nga bʼéchjoaná tsa jmeni. Kui kjoafaʼaitsjen kaníbason nga tsʼen je Jeobá kʼoa nga kjoañʼai síkjaʼá chjota ya jñani lʼí tífaʼájnga̱. Je xi makjainle kjoandiso jebi alikui mele nga je Jeobá koatexomale. Nga kjesa nikjesonjin, je Na̱i tosi tonda kʼoendiso kʼoa kui xi mele nga si̱kjinlai je Jeobá. A kʼoakoa̱nle.

JÓSʼIN KʼOAINGANʼIOÁ NGA KUITJOTSJE JAʼAÍNLE NINÁ

16. Jmé xi koa̱n sʼiaan nga tsín ya chjénngilee jokisʼin je Adán kao Eva.

16 Ninga chjotajée maa, je Jeobá kui kjoanda títsjoáná nga kʼoainganʼioá nga kuitjotsje je jaʼaínle. Nga jngó jngoá koaanná kʼoasʼiaan jmeni xi tsín kʼoakisʼin je Adán kao Eva. Ningalani tjín je chjota xi énndiso báne kʼoa xi nchja̱ʼaonle jaʼaínle Jeobá, koaan si̱toánntjé jokjoantjínni xi tʼatsʼe Niná, nga tsje, nga kixi tíjna jmeni xi sʼín, nga nda chjota kʼoa nga bakó kjoatsjoacha (Is. 29:23). Koakoá nga mená je koatexomaná kʼoa kʼoakʼuínlee je chjota nga sʼe̱ kjoatéxomakixi, kjoanyʼán kʼoa nga tsjoa sa̱tío tokoán ngatsʼiaa kʼianga jekoatexoma je Chjotaxále Niná (Sal. 37:9, 37; 146:5, 6, 10).

17. Jmé xi kisʼin Jesús nga tsakʼéjnatsen je jaʼaínle Nʼaile.

17 Jé Jesús chjenngilee kʼianga nitoánntjé je jaʼaínle Jeobá (Juan 17:26). Nga tsakʼéjnatsen Jesús je jaʼaínle Nʼaile ali tsa tokisikʼaxki̱jin, kitsoyaa jokjoan je Jeobá. Tobʼelañá, kʼianga kʼoakitso je chjota fariseo nga nʼio bʼéne je Jeobá, nga tsín kosonnile jme xi sʼín, nga tsʼen kʼoa nga tsínle kjoamatokon, je Jesús kitsoyale chjota nga je Nʼaile kosonnile josʼín, nga tsejta, nga bakó kjoatsjoacha kao kjoamatokon. Kʼoa josʼin kikao yaole je Jesús nga nyaon nyaon kʼoasʼin tsakakóni jokjoan je Nʼaile (Juan 14:9).

18. Jósʼin koa̱n kʼoéjnatseen nga to énndiso jmeni xi tso je kontrale Jeobá.

18 Tojo kisʼin Jesús, kʼoati koa̱n chja̱kaonajmíñá xi kjaʼaí jme xi ʼyaa tʼatsʼe Jeobá kʼoa kʼoakʼuínlee nga tjínle kjoatsjoacha kʼoa nga bakó kjoanda. Kʼoasʼin  bakoñá nga to énndiso jmeni xi tso je kontrale. Chʼasjetsjeñá je jaʼaínle Jeobá kʼoa binyakaoñá chjota nga tsje katabe je jaʼaínle Niná. Kʼoa ningalani chjotajée maa, koaan chjénngilee je Jeobá (Efes. 5:1, 2). Kao jmeni xi nʼia kʼoa jobixoán beni chjota jokjoan je Jeobá, kʼoa kʼoasʼin bʼainganʼioá nga bitjotsje je jaʼaínle. Kʼoati chʼasjetsjee je jaʼaínle Niná kʼianga binyakoaa je chjota nga majinle jokjoantjínni xi tʼatsʼe Niná, kʼoa nga kixi mangíntʼalee ningalani chjotajée maa (Job 27:5).

Kuinyakoaa je xi ʼmiyalee Biblia nga katamajinle nga nda chjota Jeobá kʼoa nga tsjoakená (Chótsenlai párrafo 18, 19) *

19. Tojo tso Isaías 63:7, jméni xi ngisa tjínle kjoandosin nga kʼuínyalee je chjota.

19 Ijngosa koya xi koa̱n sʼiaan nga chʼa̱sjetsjee je jaʼaínle Jeobá. Kʼianga bakoyalee Biblia je chjota, me tongantsjai nga kui nikʼaxkiaa nga toje Niná xi tiʼndele koatexoma. Kʼoa kʼoatjín kjoaixi, tojé Jeobá xi tiʼndele koatexoma i̱ Sonʼnde kao ya ngʼajmi. Ningalani tjínle kjoandosin nga ʼmiyalee chjota je kjoatéxomale Jeobá, je xi ngisa tjínle kjoandosin kuinga kuinyakoaa nga katamatsjoake kʼoa nga kixi katafitʼale je Nʼainá xi tíjna ngʼajmi. Kuinga machjénsíni nga kʼuínyalee je chjota jokjoan je Jeobá kʼoa jme xi tsoyanile je jaʼaínle (tʼexkiai Isaías 63:7). * Tsa kʼoasʼiaan, je chjota tsjoakejin koa̱n je Jeobá kʼoa kuijin nga sitjosonnile nga mele kixi koaitʼale.

20. Jmé xi chótʼayajiaan ya kjoaʼmiya xi ijngo.

20 Nga kui xi mená nga nda katabʼaxki̱ je jaʼaínle Jeobá, jósʼin kjuinkoaa yaoná kʼoa jósʼin koakoyalee je chjota nga katasíchriantʼale Niná. Yaa kjoaʼmiya xi ijngo chótʼayajiaan xi tʼatsʼe jebi.

KJOAJNDA 2 Jeobá ʼmi jaʼaínli

^ párr. 5 Jmé kjoa xi bʼetʼale ngatsʼi je chjotasonʼnde kao ánkje. Ánni nga tjínnile kjoandosin kʼoa jméni xi koa̱n sʼiaan ñá nga sʼe̱ndajin kjoa jebi. Nga jchaa tʼatsʼe jebi koasenkaoná nga ngisa koa̱nmiyoaa je Jeobá.

^ párr. 4 Salmo 135:13: “Ji Jeobá, tíjna ngantsjai je jaʼaínli. Ji Jeobá, kʼoaxki̱ní tojo kji tse koatio je chjota”.

^ párr. 9 Génesis 2:16, 17: “Kʼoa je Niná Jeobá kʼoati kui kjoatéxoma jebi kitsjoale je chjota: Koaan chi̱nai tole ngayeje yá xi tjín i̱ ʼndenaxó saʼnda nga koa̱nski. 17 Tonga alikui koa̱n chi̱nai je tole yá xi tsʼe kjoankjíntokon xi ndatjín kao xi chʼaotjín, nga̱ nichxin nga kui chi̱nai, kuiyání”.

^ párr. 9 Génesis 3:1-5: “Kʼoa je ye̱ jé xi ngisa maña koan tikʼoajinni ngatsʼi cho̱jñá xi kisinda Jeobá. Kʼoa i kitsole je chjoón: A kjoaixi nga kʼoakitsono Niná nga tsín koa̱n chi̱nao tole ngayeje yá xi tjín i̱ ʼndenaxó. 2 Kʼoa je chjoón i kitsole je ye̱: Koaan chi̱naijin je tole yá xi tjín i̱ ʼndenaxó. 3 Tonga xi tʼatsʼe tole yá xi séjna ngabasenle ʼndenaxó i kitso Niná: Alikuijin chinao, alikuijin nikao. Tsa kʼoasʼiaon, kuiyáñó. 4 Kʼoa je ye̱ i kitsole je chjoón: Likui kuiyáo. 5 Je Niná bení nga tjóxʼángi xkon nichxin kʼianga kui chi̱nao kʼoa koa̱nngósonñó kao Niná nga jchao xi ndatjín kao xi chʼaotjín”.

^ párr. 13 Ezequiel 36:23: “Kʼoa kʼoasjetsjeña je jaʼaínna, xi koanjndí ya jinnaxinandá, xi kʼoasʼin kichʼasjejndío; kʼoa je naxinandá skoe̱ní nga anña je Jeobá, kui xi tso je Jeobá, kʼianga kuitjo̱tsje ya ngixkon kʼoa ngixko̱n je naxinandá”.

^ párr. 19 Isaías 63:7: “Kʼoeyanajmíña je kjoatsjoacha xi bakó je Jeobá, bakinle nga kuitjojeya, ngayeje jmeni xi tísʼín xi tʼatsaan, ngayeje kjoanda xi títsjoále je ndʼiale Israel, nga tjínle kjoamatokon kʼoa nga bakó xi ñaki kjoatsjoacha”.

^ párr. 66 XI TÍNCHJA̱NI SÉN XI FAʼAITʼA: Je Na̱i chʼaosʼin kisikʼaxki̱ je Jeobá kʼianga kʼoakitsole Eva nga ndiso Niná. Jokji tífaʼato nichxin, je Na̱i énndiso tíkaníbason, jolani nga kʼoatso nga tsʼen je Niná kʼoa nga tsín je kisindaná.

^ párr. 68 XI TÍNCHJA̱NI SÉN XI FAʼAITʼA: Jngo ndsʼee xi Biblia títsoyale chjota, kui ngisa tíbakóyale jokjoan je Niná.