Ir al contenido

Ir al índice

 KJOAʼMIYA XI CHOTʼAYA 25

“Ansoa koasje je barréna”

“Ansoa koasje je barréna”

“Ansoa koasje je barréna kʼoa sikuindaña” (EZEQ. 34:11).

KJOAJNDA 105 “Jé Niná xi kjoatjaocha”

XI TÍNCHJA̱NI *

1. Ánni nga kʼoasʼin kisingósonkaoni yaole Jeobá joni jngo na̱.

KʼIANGA nichxinle profeta Isaías, je Jeobá i kitsole naxinandále: “A sichajin jngo chjoón je ʼndíleele [...]. Ninga kʼoasʼin yánchjín jebi, xi an nikʼiajinla sichajinle” (Is. 49:15). I̱ texto jebi kʼoasʼin síngósonkao yaole Jeobá joni jngo na̱, ninga tsín tongantsjai nga kui choa̱ síchjén. Kui choa̱ kisichjén jokji tsjentʼale jngo na̱ je ʼndíleele nga kitsoya jokji tsjoake je choʼndale. Me tongatsʼi xi na̱ ma nga kʼoasʼín jokitso jngo tichjaa xi Jasmín ʼmi, nga i̱ kitso: “Kʼianga nikakiaa je ʼndíná, nʼio tsjentʼalee xíngiaa ngantsjai”.

2. Jósʼe kon Jeobá kʼianga síkjin jngo choʼndale.

2 Je Jeobá be kʼianga jngo choʼndale tsín titsoyasonni kʼoa tsín tifini kjoajtín. A fiyaa jkoaa jokji aon male Jeobá nga jmi choʼndale síkjinle nga xki̱ nó. *

3. Jméni xi mele je Jeobá.

3 Nda chjoéyaa je ndsʼee xi jekisikatío xále Niná kʼianga fi ijngokʼani kjoajtín. Je Jeobá kui xi mele nga je katasíxá ijngokʼale kʼoa kʼoati kui xi mená tsanda ñá (1 Ped. 2:25). Jósʼin koa̱n kʼoainganʼiolee je ndsʼee xi jekisikatío xále Niná. Kʼianga koa̱n kuisenkoaa, kuila kataʼyaa jméni xosíkao nga tsín titsoyasonni kʼoa tsín tifini kjoajtín.

ÁNNI NGA SÍKATÍO KʼANI XÁLE NINÁ

4. Jósʼin bichómani nga tokui xále nʼio makjájon kʼale.

4 Tjínkʼa xi xále nʼio makjájonle. Jngo ndsʼee xi Asia tsʼe, xi Hung ʼmi, * itso: “Ñaki tokui xána koankjájonna, kʼoa kʼoasʼin kisikjaʼaitsjen nga ngisa nda sixále Jeobá tsa ngisa  tse tao̱n kuinje̱na. Nkjín hora kisixá kʼoa tsín tikʼoakoannina nga kia kjoajtín. Chaan kisikjinle je jtín. Je Na̱i kui síchjén jmeni xi chon sonʼnde nga tobijbi síkjinle Niná je chjota”.

5. Jókoan jngo tichjaa kʼianga tse kjoa jaʼatojin.

5 Kʼoati tjín ndsʼee xi tse kjoa tjíofaʼatojin. Kataʼyala tʼatsʼe Anne, jngo tichjaa xi Gran Bretaña tsʼe kʼoa xi aon mani xtile. Itso: “Yo̱ma̱ kitsin jngo ʼndína. Kʼoa nga jeki nichxin, jngo tsotina tsakichonsjejin naxinandále Niná, kʼoa xi ijngo tina kʼoatsakʼinle nga nʼio táo chʼin tjínle jko̱. Nʼio ba kisʼe tokoan, tsín tikiña kjoajtín, tsín tikixinyasonña kʼoa chaan kisikʼéjna xále Niná”. Ba satío tokoán kʼianga ñʼai tjín kjoa faʼatojin je ndsʼee tojo koan je tichjaa Anne kao familiale.

6. Jósʼin kuichomani tsa tsín kjuintjenngiaa jme xi tso Colosenses 3:13.

6 (Tʼexkiai Colosenses 3:13). * Tjínkʼa choʼndale Jeobá xi miʼaon kjoafaʼaitsjenle tʼatsʼe jmeni xi sʼín kʼoa tsa jotso je ndsʼee. Je pastro Pablo kʼoakitso nga sakʼoa kʼoama kjoaixi. Tsakui nichxin tsín kixi tíjna jme xi síkaoná xíngiaa. Tsa tokui kjuinñá, kuijin xosikaoná nga kʼoéngijtiñá tokoán kʼoa sikjinnile je naxinandále Jeobá. Kataʼyala jokoan jngo ndsʼee xi Sudamérica tsʼe, xi Pablo ʼmi. Alikui kʼoatjín jme jée xi kisʼene, kʼoa kisichaa je xá xi tjínle jinnaxinandále Niná. Jósʼin kisikjaʼaitsjen je ndsʼee. Itso: “Nʼio koanjtina kʼoa kisikjinle je jtín”.

7. Jósʼin kuichomani tsa tokui kʼoéya ʼndeʼndee jkoaa nga kisokojéená.

7 Je ndsʼee xi ai jée tsakajngi ngasʼa tsakui nichxin tokui faʼaitsjen ʼndeʼndele kʼoa kʼoasʼin síkjaʼaitsjen nga tsín bakinle nga tsjoake koa̱n Niná. Kʼoa tsa kʼoatsoje̱ nga tsín tibakinnile nga ya koatiojin naxinandále Niná ninga jekʼoakoannile je jéele kʼoa ninga jekisʼendajin kjoale. Kʼoakisʼe kon jngo ndsʼee xi Francisco ʼmi. Itso: “Censura tsakʼaina kʼianga kjoachajngi kiskajian. Ningalani tojo kia kjoajtín, ba kisʼe tokoan kʼoa kʼoasʼin kisikjaʼaitsjen nga tsín tibakinnina nga ya koatejnajian naxinandále Jeobá. Tsín tinda kisʼeni tokoan kʼoa kʼoasʼin kisikjaʼaitsjen nga kjesa síchatʼajinna Jeobá. Chaan tsín tikixinyasonña kʼoa alikui tikiña kjoajtín”. Jósʼin nikjaʼaitsjeen kʼianga kui kjoa faʼatojin je ndsʼee. A nijinlee yaoná josatío kon. Kʼoa xi ngisa chjíle, jósʼin síkjaʼaitsjen Niná tʼatsʼe xi kui kjoa faʼatojin.

JE JEOBÁ TSJOAKE CHOʼNDALE

Ya naxinandá Israel, je chjota xi barré kiskoʼnda tsakásjai nga jngo barréle kicha (Chótsenlai párrafo 8, 9) *

8. Jósʼin ʼyañá nga tsín síchajin Jeobá josʼin kisixále je choʼndale.

8 Je Jeobá tsín síchajin je choʼndale ninga kisikjin choatse kʼoa tsín síchajin josʼin kisixále (Heb. 6:10). Je profeta Isaías jngoo choa̱ kisichjén kʼianga kitsoya josʼin síkuinda Jeobá je naxinandále kʼoa josʼin bakóle kjoatsjoacha. I kitso: “Kʼoasʼin sikuinda je barréle josʼín chjota xi cho̱ntje koʼnda. Kao xjale kʼoexkóni je barréʼndí” (Is. 40:11). Je Jesús kʼoakitso josʼe kon Jeobá kʼianga jngo choʼndale síkjinle kʼianga i̱ kitsole je chjotatjenngile: “Jó bixón. Tsa jngo chjota tjínle jngo siento barré, kʼoa tsa kicha jngo barré, a tsí tsa sikatío je xi ño kan kaoni xjaʼaonño, nga koai yajinjñá nga koai kásjai je xi kacha. Tsa koa̱nsjaile, xi kjoakixi xi xinno, ngisa matsjoale xi tʼatsʼe xi jngo xi kicha kaoni tsa xi tʼatsʼe je xi ño kan  kaoni xjaʼaonño xi tsín tsa kicha” (Mat. 18:12, 13).

9. Jósʼín jngo chjota xi nda koʼnda barréle (chótsenlai sén xi faʼaitʼa ya portada).

9 Ánni nga kixi tíjnani nga je ningósonkao Jeobá jngo chjota xi barré koʼnda. Kuinga je chjota xi barré koʼnda tjaole je barréle. Tobʼelañá, je David kisitoánntjai je barréle kʼianga jngo xa kʼoa jngo oso kikao tsakai (1 Sam. 17:34, 35). Je chjota xi nda koʼnda barréle ndi̱toon be kʼiatsa jngo barréle jcha (Juan 10:3, 14). Kʼianga básjai je barré xi cha, tsakui nichxin ya nyʼoále síkʼasʼen je xi 99 kʼoa tsa je báneleje̱ xi kʼoati barré koʼnda. Je Jesús kui choa̱ jebi kisichjén kʼianga kitsoya josʼe kon je Jeobá. I kitso: “Likui mele Nʼaino xi tíjna ya ngʼajmi nga cha̱ jngo xi je ʼndíxtibi” (Mat. 18:14).

Jngo chjota israelita xi barré kiskoʼnda nichxin kjoatse tíbájtéjon jñani kitsiʼaon je barréle xi kicha tsakai (Chótsenlai párrafo 9)

JE JEOBÁ BÁSJAI CHOʼNDALE

10. Tojo tso Ezequiel 34:11, 12, 16, jméni xi kitso Jeobá nga sʼin tʼatsʼe choʼndale xi jekisikjin.

10 Je Jeobá tsjoake nga jngó jngó choʼndale, ninga xi jekisikjinle naxinandále. Jé profeta Ezequiel kisichjén Jeobá kʼianga kʼoakitso nga koasjai barréle xi kicha, xi tsonile, je choʼndale xi jekisikjinle nga koasenkao nga nda koatio ijngokʼani ngixko̱n. Kʼoakitso nga kʼoatisʼin koasjai je choʼndale tojo kisʼin je chjota israelita xi barréle kicha (tʼexkiai Ezequiel 34:11, 12, 16). * Xi títjon, tsakásjai je barréle ninga tse nichxin kʼoa ninga tse kjoama̱ kisʼengile. Kʼoa nga jekoansjaile, kikao ijngokʼani ya jñani tjío xikʼa barré. Kʼoa tsa kitsiʼaon tsakájtéjon, kisikjen kʼoa tsakáyandsome. Nga je xi chjotajchínga sʼin tjío kjinele síkuinda choʼndale Niná kʼoati tjínnele  kui choa̱ koaitjenngi nga koasjai xi jekisikjinle je jtín (1 Ped. 5:2, 3). Je xi chjotajchínga sʼin tjío básjai, tsjoánganʼiole nga katabichó ijngokʼani ya jinjtín, kʼoa bakóle kjoatsjoacha nga binyakao nga nda katabatio ijngokʼani ngixko̱n Niná. *

11. Jméni xi koanjinle jngo chjota xi nda kiskoʼnda je barré.

11 Je chjota xi nda kiskoʼnda barré koanjinle nga sakʼoa cha je barré. Kʼianga kʼoakoan alikui totaon tsabe je barréle. Nichxin kjoatse, tjínkʼa choʼndale Jeobá xi tsín kʼoakisʼin choatse josʼin koanmele, kataʼyala jokisʼin je Jeobá.

12. Jósʼin tsabekon Jeobá je Jonás.

12 Je profeta Jonás tsakangaa nga tsín kisitjoson je xá xi kisʼenele. Tonga je Jeobá alikui kʼoasʼin kisikjaʼaitsjen nga tsín tije tsjoáxánile. Tojo sʼín je chjota xi nda koʼnda barréle, je Jeobá tsakasenkao kʼoa kitsjoale nganʼio xi koanchjénle nga kitjosonle je xá xi tsakánele (Jon. 2:7; 3:1, 2). Kʼoa jngoo xka̱na̱cho̱ʼbá kisichjén nga kitsoyale nga nʼio chjí bekon Jeobá nga jngó jngó chjota (Jon. 4:10, 11). Jmé xi bakóyaná jebi. Kui bakóyaná nga je xi chjotajchínga sʼin tjío alikui koa̱n nga tokʼoejngole kon xi jekisikatío xále Niná. Tosaa machjén nga sijinle yaole ánni nga kisikjinnile je jtín. Kʼoa kʼianga jekjoaʼaí ijngokʼani ya jinjtín tjínnele tosi tonda koakole kjoatsjoacha kʼoa koa̱nndosinle.

13. Jméni xi bakóyaná josʼin kisikjaʼaitsjen Jeobá tʼatsʼe jokisʼe kon je xi kiski Salmo 73.

13 Je xi kiski Salmo 73 kisikinroajen kon kʼianga tsabe nga ngisa ndatjío je chjotatsʼen. Kʼoasʼin kisikjaʼaitsjen nga toxitsjoa nga Niná nixálee (Sal. 73:12, 13, 16). Je Jeobá alikui kiskankao nga kʼoakitso. Tosaa ya Biblia kisʼetʼaxo̱n jmeni xi kitso. Kʼoa nga jeki nichxin, je xi kiski salmo koanjinle nga kui xi ngisa chjíle  nga miyole Jeobá maa (Sal. 73:23, 24, 26, 28). Jméni xi bakóyaná jebi. Kui bakóyaná nga je xi chjotajchínga sʼin tjío alikui koa̱n nga tokjoán kjaʼaísʼin sikjaʼaitsjen tʼatsʼe jngo ndsʼee xi kʼoatso nga toxitsjoa nga je Jeobá nixálee. ʼNdele nga skankao, tosaa tjínnele sijinle yaole ánni nga kʼoatsoni kʼoa kʼoasʼin síkjaʼaitsjenni. Kʼianga jeskoe̱ ánni nga kʼoasʼin síkjaʼaitsjenni koaan kui Biblia sichjén nga tsjoánganʼiole.

14. Ánni nga nganʼio koanchjénnile je Elías, kʼoa jósʼin kitsjoanganʼiole Jeobá.

14 Je profeta Elías kitokachjingale je reina Jezabel (1 Rey. 19:1-3). Kʼoasʼin kisikjaʼaitsjen nga tojesa xi profetale Jeobá ma nga kʼia kʼoa nga toxitsjoa jmeni xi tísʼín. Nʼio ba kisʼe kon kʼoa saʼnda kʼoakitso nga tosa nda nga katamʼe (1 Rey. 19:4, 10). Je Jeobá alikui kiskankao je Elías. Tosaa kui xi kitsole nga tsín toje tíjna, nga je tsjoánganʼiole kʼoa nga tsesa xá tjín xi sʼin. Je Jeobá ngasin nganda kinrʼoele je Elías kʼianga tsakʼéyanajmí jotjín kon, kʼoa kitsjoasale xá (1 Rey. 19:11-16, 18). Jmé xi bakóyaná jebi. Kui bakóyaná nga tjínnele koakolee kjoanda je ndsʼee, tjínnele kʼoasʼiaan ngatsʼiaa kʼoa ngisaa xi chjotajchínga sʼin tjío. Kʼiatsa jngo ndsʼee xi tokuinchja̱ti kʼoa tsa kʼoasʼin síkjaʼaitsjen nga tsín bakinle je kjoamatokonle Jeobá, je xi chjotajchínga sʼin tjío ngasin nganda kjuinrʼoele nga kʼoeyanajmí jotjín kon. Kʼoa machjén nga kʼoakuitsole nga nʼio chjí bekon je Jeobá.

 JÓSʼIN TJÍNNELE JCHATOKOÁN JE CHOʼNDALE NINÁ XI JEKISIKJIN

15. Tojo tso Juan 6:39, jósʼin tsabekon Jesús je choʼndale Nʼaile.

15 Je Jesús nda choa̱ tsakʼéjnaná josʼin mele Jeobá nga jchatokoán je choʼndale xi jekisikjin. Je Jesús koanjinle nga nʼio chjí bekon Niná ngatsʼi je choʼndale. Kuinga tsakasenkaoni je “barré xi kicha, xi tsʼe ndʼiale Israel”, xi tsonile, tsakasenkao je chjota nga kisichriantʼa ijngokʼanile Jeobá (Mat. 15:24; Luc. 19:9, 10). Je Jesús kʼoati ya ningósonkao jngo chjota xi nda koʼnda barré, kuinga nʼio tsakʼénenile yaole nga nda kisikuinda je choʼndale Nʼaile (tʼexkiai Juan 6:39). *

16, 17. Jósʼin tjínnele skoe̱kon xi chjotajchínga sʼin tjío je xá xi kjinele nga kuinyakao xi jekisikatío xále Niná (chótsenlai je recuadro “ Jósʼe kon jngo choʼndale Niná xi jekisikjin”).

16 Je pastro Pablo kʼoakitsole je xi chjotajchínga sʼin tsakatio ya jtín xi kisʼejna Éfeso nga kui choa̱le Jesús katafitjenngi. I kitsole: “Kjaínga tomachjén nga kʼoasʼin nixá nga kuinyakoaa xi tjíomʼe, nga si̱kjaʼaitsjeen je énle Nainá Jesús xi kitso: Tongisa ndaní nga kʼoee kaoni tsa nga chjoé” (Hech. 20:17, 35). Tojosʼin tiʼyaa, je xi chjotajchínga sʼin tjío tsee xá kjinele. Jngo ndsʼee xi chjotajchínga sʼin tíjna ya España xi Salvador ʼmi, itso: “Kʼianga kui sikjaʼaitsjen jokji tsjoake Jeobá je choʼndale xi jekisikjin, bʼenele yaona nga basenkoa jokji tjen kʼoamana. Alikui jao sʼe tokoan nga kui xi mele Jeobá nga kʼoasʼian”.

17 Ngatsʼi xi kanikʼaxkiaa i̱bi xi jekisikatío xále Niná tsakai, kitsʼainganʼiole kʼoa jé Jeobá tjíosíxá ijngokʼanile. Si̱kjaʼaitsjeen nga nʼio nkjín xi kʼoati mele sixá ijngokʼanile Jeobá. Jósʼin koa̱n kʼoainganʼiolee. Yaa kjoaʼmiya xi ijngo kuitsoyasaná.

KJOAJNDA 139 A fiya jkui nga tijnai ya sonʼnde chjotse

^ párr. 5 Ánni nga tjínkʼani ndsʼee xi síkjinle je jtín ninga nkjín nó nga kixi kitʼale Jeobá. Jósʼin síkjaʼaitsjen Niná xi tʼatsʼe ndsʼee jebi. I kjoaʼmiya jebi chótʼayajiaan tʼatsʼe jebi. Kʼoati jchaa josʼin tsakasenkao Jeobá je choʼndale xi tsakatio nichxin kjoatse, kʼoa jósʼin koasenkaoná choa̱ jebi.

^ párr. 2 JÓSʼIN TSOYANILE: Kʼianga kui én si̱chjén i̱ kjoaʼmiya jebi xi jekisikjin kao xi jekisikatío xále Niná tso, jé kuinókjoañá xi jejaon sá kʼoa tsa tsesa nga tsín titsoyasonni. Ninga kʼoalani, tojo ndsʼee mañá kʼoa tojo tsjoachañá.

^ párr. 4 Alikui tsa ñaki kʼoaʼmi kʼa chjota xi bʼaxki̱ i̱bi.

^ párr. 6 Colosenses 3:13, TNM: “Tosi tonda katakano xíngio kʼoa kao kjoatsjoa tichatʼalao xíngio ninga jme xi síkaono xíngio. Je Jeobá kao kjoatsjoa kisichatʼano, kʼoati tʼiaon tsanda jon”.

^ párr. 10 Ezequiel 34:11, 12, 16: “Kui jebi xi tso je Jeobá, xi batéxomale ngayeje: I tijna kʼoa ansoa koasje je barréna kʼoa sikuindaña. 12 Sikuindaña je barréna tojo sʼín xi cho̱ koʼnda nga masjaile je barréle xi ngaʼi̱ ngaján tjíotsoma kʼoa nga síkjen. Kjuíkʼaña ngakjijnda ʼnde jñani kitsaoba kʼianga yojbi koanchon kʼoa kisʼejna njio njio. 16 Je xi kicha koasjaiña, je xi kitsaoba kjoaʼaikaoña, je xi kitsiʼaon koajtéjonña kʼoa tsjoanganʼiole je xi tsínle nganʼio. Tonga je xi yʼai kjoan kʼoa xi taja kjoan sikjesonña. Kʼoa kjoañʼai tsjoale”.

^ párr. 10 Ya kjoaʼmiya xi ijngo kui chótʼayajiaan jokoa̱n sʼin je xi chjotajchínga sʼin tjío nga kuitjosonle jebi.

^ párr. 15 Juan 6:39: “Kui xi mele je Nʼainá xi kisikasénna, nga nijngojin cha̱na je ngatsʼi xi je kitsjoana, tonga an sikjaʼáyanile nga kuichokjetʼa nichxin”.

^ párr. 63 XI TÍNCHJA̱NI SÉN XI FAʼAITʼA: Jngo chjota xi barré koʼnda básjai nga cha je barréle kʼoa fikao ijngokʼani jñani tjío xikʼa barré. Nichxin xi tiyoaa ndʼaibi kʼoati sʼín je xi chjotajchínga sʼin tjío nga básjai je choʼndale Niná xi jekisikjin.

^ párr. 67 XI TÍNCHJA̱NI SÉN XI FAʼAITʼA: Kʼianga ya tíjnaya carro jngo tichjaa xi jekisikʼéjna xále Niná, be je ndsʼee kao chjoónle nga tsjoa tjío kon nga tjíotsoya Énle Niná.