Ir al contenido

Ir al índice

 KJOAʼMIYA XI CHOTʼAYA 6

Kixi katamaa

Kixi katamaa

“¡Saʼnda nga an xi kuiyá kixi koa̱n!” (JOB 27:5).

KJOAJNDA 34 Ñaki kixi kjuíkoa yaona

XI TÍNCHJA̱NI *

1. Jósʼin tsakakó nga jan ndsʼee xi bʼaxki̱ nga kixi tjíofitʼale Niná.

JANLA choa̱ kataʼyaa. Jngo tsoti xi skuela tsoʼba kʼoatsole je maestrole nga katafi je sʼuí xi bʼasjele chjota je naxinandále kʼoa tsa tʼatsʼe je religión. Tonga tsoti jebi bení nga likui sasénle Niná sʼuí jebi kʼoa ngasin nganda kʼoatsole je maestrole nga tsín koai. Jngo ti xi títsoyason be nga ya kjoaʼa ya ndʼiale jngo ti xi ñatjen tjíotsoma skuela xi besin je testigole Jeobá, ninga tsokjón tonga síkjanetʼaa je xo̱ntjoa. Jngo xi nʼai ma yaa tíjna jñani síxá kʼoa je xi naile mani kʼoatsole nga kui kʼoakatasʼín jmeni xi tsín kixi tíjna. Ninga sicha je xále kʼoatsole je naile nga tsín kʼoasʼin nga̱ sítjoson kjoatéxoma kʼoa chjotakixi ma, nga̱ kui xi mele Niná nga sʼin je xi choʼndale mani (Rom. 13:1-4; Heb. 13:18).

2. Jmé xi chótʼayajiaan i̱ kjoaʼmiya jebi, kʼoa ánni.

2 Jméni xi tsakakó nga jan ndsʼee jebi. Alikui kitsokjon kʼoa tsín tsakʼéndiso. Tonga xi ngisa tsakakó kʼoa xi tsakinyakao nga nda kisʼin kuinga kixi koan. Tjíobʼénele yaole nga kixi tjíofitʼale je Jeobá kʼoa nga tjíosítjoson je kjoatéxomale. Kʼoa nga kʼoatjíosʼín nʼiojin tsjoa sʼe kon je Jeobá. Ñá kʼoati mená nga kjoáyatsjoaa kon je Niná. Kuinga machjénsíni nga chjónangilee yaoná jebi: Jmé xi tsoyanile nga kixi maa. Ánni nga nʼio chjínile nga kixi koaan. Kʼoa jméni xi koasenkaoná nga tosi tonda kixi koaan ninga ñʼai kjimachon nichxin xi tiyoaa ndʼaibi.

JMÉ XI TSOYANILE NGA KIXI MAA

3. 1) Jmé xi tsoyanile nga kixi maa. 2) Jmé choa̱ xi basenkaoná nga majinná josʼin tsoyanile nga kixi maa.

3 Nga kixi maa, kui xi tsonile nga tsjoachaa je Jeobá, nga toje ʼyaxkoán kʼoa nga kui kʼoanʼia ngantsjai jmeni xi  sasénle. Ya Biblia, nga én hebreo je én xi “kixi maa” tso kui tsoyanile jmeni xi kjijngo kʼoa jmeni xi ndakjoan. Tobʼelañá, je kjoatéxoma xi kitsjoale Jeobá je chjota israelita kʼoatso nga tjínnele ndakjoan cho̱ kitsjoatʼale (Lev. 22:21, 22). * Alikui koan nga kui kitsjoatʼale jngo cho̱ xi chjiʼngé kji, xi tsín jngo xoño kʼoa tsa jngo xko̱n, kʼoa tsa je xi tjíomʼe. Je Jeobá kui xi koanmele nga ndakjoan cho̱ tsakʼaitʼale (Mal. 1:6-9). Ánni nga kʼoatsosíniná je Jeobá nga kui kʼoailee je xi nda kʼoa xi kjijngo. Tobʼelañá, kʼianga jngo to xi ma chine bindaa, kui chjoejiaan xi nda kji kʼoa xi tsín chxʼoátʼa kji. Kʼoatisʼinni xi kao Jeobá, kui xi mele nga kui kʼoailee je xi nda kʼoa xi kjijngo, xi tsonile, nga tsjoacha koaan kao ngayeje ni̱ma̱ná kʼoa nga kixi kjuintʼalee.

4. 1) A tojé chjota xi tsje xi koa̱n kixi koaitʼale je Niná. 2) Tojo tso Salmo 103:12-14, jméni xi tsín síjéná je Jeobá.

4 Nga chjotajée maa, tsakui nichxin kʼoasʼin si̱kjaʼaitsjeen nga toje chjota xi tsje xi koa̱n kixi koaitʼale Niná. Tonga mai, jaola koya kataʼyaa anni. Xi títjon, je Jeobá alikui kui kotsenle je jéená. Je Biblia itso: “Kʼiatsa tokuilani je jée xi kuenta sʼiain, ji Jah, ji Jeobá, ʼyáni xi koa̱n koase̱nkixi” (Sal. 130:3). Je Jeobá bení nga chjotajée maa kʼoa tíjnandaa nga síchatʼaná (Sal. 86:5). Xi majaoni, be jokji tjen bichó nganʼioná kʼoa alikui kui síjéná jmeni xi tsín kʼoakoa̱nná (tʼexkiai Salmo 103:12-14). * Tonga jmé xi tsoyanile nga kao ngayeje ni̱ma̱ná kjuintʼalee je Jeobá kʼoa nga kixi koaan.

5. Ánni nga kjoatsjoacha machjénsíni nga kixi koaan.

5 Je xi nʼio machjén nga kixi koaan kui je kjoatsjoacha. Tjínnele tsjoacha koaan je Jeobá kao ngayeje ni̱ma̱ná kʼoa nga kixi kjuintʼalee nga̱ kui xi koasenkaoná nga kixi koaan ninga kjoa kuitjátojiaan (1 Crón. 28:9; Mat. 22:37). Si̱kjaʼaitsjenla ijngokʼá je choa̱le ndsʼee xi jenása kanikʼaxkiaa. Je tsoti mele nga tsjoa sʼe̱ kon ya ndʼiaskuela, kʼoa je ti likui mele nga kjoasoa kʼoéjnajin nga títsoyason, kʼoa je xi nʼai ma alikui mele nga sicha je xále. Nga jan bení nga kixi je kjoatéxomale Niná kʼoa kui xi mele nga tsjoa sʼe̱ kon je Jeobá. Nga tsjoake je Jeobá kui xosíkao nga kui kʼoasʼínni xi ndatjín. Kʼoa bakó nga kixi tjíofitʼale.

ÁNNI NGA NʼIO CHJÍNILE NGA KIXI KOAAN

6. 1) Ánni nga nʼio chjísínile nga kixi koaan nga jngó jngoá. 2) Jósʼin tsakakó je Adán kao Eva nga tsín kixi kitʼale Niná.

6 Ánni nga nʼio chjínile nga kixi koaan nga jngó jngoá. Kuinga je Na̱i tíbesin je Jeobá kʼoa kʼoati tíbesinná tsanda ñá. Je ánkje tsʼen jebi alikui kisitjosonle Niná ya ʼndenaxóle Edén, kuinga Satanás ʼmisínile, xi tsonile, nga “tsakʼejnachjoale” Niná. Chʼaosʼin kisikʼéjna je jaʼaínle Jeobá kʼianga kʼoakitso nga tsín male batéxoma, nga to yaole fini kʼoa nga tsín kixi jmeni xi sʼín. Je Adán kao Eva, jé Na̱i tsakʼaʼénle kʼoa yátsʼin tsakinyále je Jeobá (Gén. 3:1-6). Kʼianga ya tsakatio ya ʼndenaxóle Edén, je Adán kao Eva koan nga tosi tonda tsakakó tsakai nga tsjoake je Jeobá. Tonga kʼianga yátsʼi̱n tsakasénle Niná je Na̱i, je Adán kao Eva, kui tsakakó  nga tsín kixi tjíofitʼale je Jeobá kao ngayeje ni̱ma̱le. Xi jejaʼato nichxin, kʼianga tsakʼejna je Job, ijngo kjoa kisʼejnabasen. Kui tsa tjín chjota xi kixi koaitʼale Niná. Xi tsonile, tsa ñaki kao ngayeje ni̱ma̱le koaitʼale.

7. Tojo tso Job 1:8-11, jókitso je Jeobá nga kixi tífitʼale je Job, tonga jókitso je Na̱i.

7 Je Job kʼiaa tsakʼejna kʼianga ya tjío je chjota israelita ya Egipto. Nga kui nichxin, tojé xi kixi koan ningalani kʼoati chjotajée koan joni tsa ñá. Tonga je Niná tsjoake koan nga̱ kixi kitʼale. Tsakui nichxin sa jetsabesin Na̱i je Jeobá kʼianga kʼoakitso nga nijngojin chjota xi kixi koaitʼale. Tonga je Jeobá kʼoakitsole je Na̱i nga tíjna je Job xi kixi tífitʼale. Josʼin kikao yaole je Job tsakakó nga to chjotandiso je Na̱i. Kʼoa je Na̱i kʼoakitsole je Jeobá nga skótʼayakao je Job tsa kixi kʼoa tsa mai. Je Jeobá be nga kixi je Job kuinga kitsjoaʼndesínile je Na̱i nga kiskotʼayakao (tʼexkiai Job 1:8-11). *

8. Jósʼin kiskotʼayakao Na̱i je Job.

8 Je Na̱i nʼio tsʼen kʼoa male síkʼien. Tsakjáʼayejele je Job jmeni xi tjínle. Tsakjáʼale kjoanyinále kao choʼndale kʼoa chʼaosʼin kisikʼéjna ngixko̱n chjota. Xi ijngosani, kʼoati kisikʼien je xtile xi te koanni. Kʼoa xijekoan, jngoo chʼintáo kitsjoale nga jtsé tsangajon ngayeje yaole.  Ba koanle je chjoónle kʼianga tsabe je kjoañʼai xi tífaʼá je Job kʼoa kʼoakitsole nga katanchja̱ʼaonle je Niná kʼoa nga katamʼe. Ningalani koanmele je Job nga kuiyá, tosi tonda kixi kitʼale je Niná. Tonga je Na̱i tikjaʼaísʼin kiskotʼayakaongáni je Job, jan miyole Job kisichjén nga kichosíxatʼa, tonga alikui kisinʼio kon je Job jmeni xi kitsole, tosaa totsabesin kʼoa alikui nda tso én tsakjákao. Kʼoakitsole nga je Niná xi kjoañʼai títsjoále kʼoa nga tsín mandosinle tsa kixi tífitʼale kʼoa tsa mai. Saʼnda kʼoakitsole nga chjotatsʼen je Job kʼoa nga bakinle jmeni xi kjimatʼain (Job 1:13-22; 2:7-11; 15:4, 5; 22:3-6; 25:4-6).

9. Ninga tse kjoa jaʼatojin je Job, jméni xi kisʼin.

9 Jókisʼin je Job kʼianga kʼoasikji kjoañʼai tsakjaʼá. Koanjtile kʼoa kiskankao je miyole xi tsínni kitsjoanganʼiole kʼoa kui kinchja̱ je én xi skanni kʼoakoanle. Kʼoakitso nga ngisa kixi síkjaʼaitsjen tikʼoajinni Niná (Job 6:3; 13:4, 5; 32:2; 34:5). Ningalani tse kjoa jaʼatojin alikuikʼia yátsʼi̱n tsakasénle je Jeobá. Alikui koankjainle je én xi kinchja̱ je chjota xi to énndisoni tsakjákao. I kitso: “¡Ni bixónjinlao nga tsje kʼoasjeno! ¡Saʼnda nga an xi kuiyá kixi koa̱n!” (Job 27:5). Kʼianga kinchja̱ én jebi, kui xi kitsonile nga ñaki tjínjngo kon nga kixi koa̱n ninga tojme kjoa kjoaʼatojin. Kixi koan ngantsjai kʼoa kʼoati koa̱n sʼiaan tsanda ñá.

10. Jósʼin bʼetʼaná nga jngó jngoá je kjoa xi tsakʼéjnabasen je Na̱i xi tʼatsʼe Job.

10 Jósʼin bʼetʼaná nga jngó jngoá je kjoa xi tsakʼéjnabasen je Na̱i xi tʼatsʼe Job. Je Na̱i kʼoatso nga tsín ñaki tsjoachaa je Jeobá. Nga tsín tije si̱xánilee tsa jme kjoa xi kuitjátojiaan kʼoa nga tsín tikixi kjuintʼanilee (Job 2:4, 5; Apoc. 12:10). Jósʼe tokoán nga kʼoatso je Na̱i. Aon maná. Tonga si̱kjaʼaitsjenla tʼatsʼe jebi: Je Jeobá be nga ska̱ná kʼoa kuinga tsjoáʼndeni nga kotʼayakaoná je Na̱i, kʼoa nga kʼoasʼín tsjoáʼndená nga bakoá nga kixi mangíntʼalee kʼoa nga chjotandiso je Na̱i. Tonga je Jeobá kʼoati tsoná nga koasenkaoná (Heb. 13:6). Nʼio tsjoa sʼe je tokoán kʼianga be je Niná, xi batéxomale ngayeje, nga kixi timangíntʼalee. Nʼio chjíle nga kixi kjuintʼalee je Jeobá nga̱ kʼoasʼin koakoñá nga tsín kʼoatjín jmeni xi tso je Na̱i. Nitoánntjaiñá je jaʼaínle Nʼainá xi tíjna ngʼajmi kʼoa josʼin batéxoma. Tonga jméni xi sʼiaan nga tosi tonda kixi kjuintʼalee je Niná.

JMÉ XI KOA̱N SʼIAAN NGA KIXI KOAAN NDʼAIBI

11. Jméni xi bakóyaná je choa̱le Job.

11 Je Na̱i sa nʼio sa nʼio tíbásjaile josʼin tíbʼétʼale choʼndale Niná je nichxin fetʼa xi tiyoaa ndʼaibi (2 Tim. 3:1). Kuinga, jméni xi sʼiaan nga tosi tonda kixi koaan. Kui choa̱le Job koasenkaoná. Kʼianga kjesa faʼatojinjin kjoañʼai, je Job tokʼoa jenkjín kʼa tsakakó nga kixi koan. Janla koya kataʼyaa jmeni xi kisʼin kʼoa jósʼin koa̱n chjénngilee.

Jméni xi koasenkaoná nga ñaki kʼoakʼoé tokoán nga tosi tonda kixi koaan (Chótsenlai párrafo 12) *

12. 1) Tojo tso Job 26:7, 8, 14, jméni xokisikao je Job nga tokʼoakoannile kʼoa nga tsabexkónsíni je Jeobá. 2) Jméni xosikaoná nga sʼe̱ná kjoaxkóntokon xi kao Niná.

12 Nʼio tsjoake koan je Niná kʼianga kisikjaʼaitsjenjin tʼatsʼe jmeni xi kisinda. Je Job kisikʼayaa nichxin kʼianga kisikjaʼaitsjenjin ngayeje jmeni xi kisinda je Jeobá (tʼexkiai Job 26:7, 8, 14). *  Tokʼoakoanle kʼianga kisikjaʼaitsjenjin josʼin koannda Sonʼnde, ngʼajmi, yojbi kʼoa kao je chʼao̱n. Kʼoakitso kʼianga nʼio tochoa be jmeni xi kisinda Niná. Kʼoati nʼio tsabechjí jmeni xi kitsoyale Jeobá, kʼoa kuinga i̱ kitsosíni: “Nʼio tibʼejnatjoa jmeni xi tso” (Job 23:12). Kʼianga tokʼoakoanle jme xi kisinda je Jeobá kʼoa nga nʼio tsabexkón kui xokisikao nga tsjoake koanni kʼoa nga kui kʼoakisʼinni jmeni xi sasénle. Kʼoa kʼoati kui xi tsakasenkao kʼianga kixi koan. Tojo kisʼin Job, kʼoati koa̱n chʼa̱sjeʼaa nichxin nga si̱kjaʼaitsjenjiaan jmeni xi kisinda Jeobá. Nichxin xi tiyoaa ndʼaibi, je chjota ngisaa tjíokotʼayason tʼatsʼe jmeni xi koannda tikʼoajinni nga tsakʼejna Job. Kʼoa kʼoati kijnaná ngakjijngo je Biblia, je xi basenkaoná nga ndasa ʼyaa je Niná. Kʼianga jcha̱saa xi tʼatsʼe Niná koasenkaoná nga tosi tonda jchaxkoán. Kʼoa kui xosikaoná nga tsjoacha koaan kʼoa nga si̱tjosonlee kʼoa kixi kjuintʼalee (Job 28:28).

Kʼianga ñaki kʼoakʼoé tokoán nga kixi kjuintʼalee Niná, tjínnele nga tsín pornografía chótsenlee, alikui kui si̱metokoán tsojmi xi tjín sonʼnde, kʼoa nga kui kuenta sʼiaan je kjoachoya xi tjínná (Chótsenlai párrafo 13) *

13, 14. 1) Tojo tso Job 31:1, jósʼin kikao yaole Job. 2) Jósʼin koa̱n chjénngilee.

13 Kʼoasʼin kikao yaole josʼin mele Niná. Je Job tsabee nga koa̱n kixi koaitʼale Niná tsa sitjosonle. Kʼianga nitjosonlee Niná kui xi mená nga kixi koanngíntʼalee. Je Job kʼoasʼin kikao yaole josʼin mele Niná. Tobʼelañá, nʼio tsabexkón je yánchjín (tʼexkiai Job 31:1). * Kʼoa nga jechjoón tjínle, tsabee nga chʼaotjín tsa kjaʼaí chjoón skótsenle. Nichxin xi tiyoaa ndʼaibi ñaki tokjoachajngi tjín sonʼnde. Kʼoati sʼiaan jokisʼin je Job nga tsín je chótsenlee je xi tsín tsa xʼinná kʼoa xi tsín chjoónná mani. Kʼoéchjoalee yaoná nga tsín pornografía chótsenlee kʼoa tsakui sén xi kjoachajngi tjenkao (Mat. 5:28). Kʼiatsa koa̱nná  chjoéxkoá yaoná nga nyaon nyaon, tosi tonda kixi kjuintʼalee je Niná.

Kʼianga ñaki kʼoakʼoé tokoán nga kixi kjuintʼalee Niná, tjínnele nga tsín pornografía chótsenlee, alikui kui si̱metokoán tsojmi xi tjín sonʼnde, kʼoa nga kui kuenta sʼiaan je kjoachoya xi tjínná (Chótsenlai párrafo 14) *

14 Je Job kʼoatisʼin tsabekon je tsojmi xi tjín sonʼnde josʼin bekon Jeobá. Kʼoakitso nga chʼao kisʼin tsa tokui kisinʼiotʼa je tsojmi xi kisʼele kʼoa nga kjoañʼai tsjoále je xi juez sʼin tjío (Job 31:24, 25, 28). Nichxin xi tiyoaa ndʼaibi, je chjota to tsojmi nʼio fitjenngi. Tsa kʼoasʼin si̱kjaʼaitsjeen tʼatsʼe tao̱n kʼoa kao tsojmi xi tjín sonʼnde tojo tso je Biblia, koakoñá nga kixi timangíntʼalee je Niná (Prov. 30:8, 9; Mat. 6:19-21).

Kʼianga ñaki kʼoakʼoé tokoán nga kixi kjuintʼalee Niná, tjínnele nga tsín pornografía chótsenlee, alikui kui si̱metokoán tsojmi xi tjín sonʼnde, kʼoa nga kui kuenta sʼiaan je kjoachoya xi tjínná (Chótsenlai párrafo 15) *

15. 1) Jósʼin tsakasenkao je Job je kjoachoya xi kisʼele nga kixi kitʼale Niná. 2) Ánni nga si̱kjaʼaitsjenjinsíñá je kjoachoya xi tsjoáná Jeobá.

15 Kui kisikjaʼaitsjen je kjoachoya xi kisʼele nga Niná sichikontʼain. Je Job ñaki kʼoatsakʼé kon nga mandosinle Niná tsa kixi koaitʼale kʼoa tsa mai (Job 31:6). Ningalani tse kjoa jaʼatojin bení nga Jeobá sichikontʼain kʼoa kui xi tsakasenkao nga kixi kitʼale. Nʼio tsjoa kisʼele je Jeobá xi tʼatsʼe Job kʼoa nʼio tse kjoanichikontʼain kitsjoale (Job 42:12-17; Sant. 5:11). Kʼoa nichxin xi nroaján, ngisaa tse kjoanichikontʼain tsjoále Jeobá. Kʼoa ñá, a kʼoati choyalee nga sichikontʼainná Jeobá kʼianga kixi timangíntʼalee. Je Nináná alikui tíbʼantjaiya (Mal. 3:6). Kʼiatsa si̱kjaʼaitsjenjiaan nga bechjí nga kixi mangíntʼalee kui xi koasenkaoná kʼianga tsín si̱chajiaan je kjoachoya xi tjínná tʼatsʼe nichxin xi nroaján (1 Tes. 5:8, 9).

16. Jméni xi ñaki kʼoakʼoé tokoán nga sʼiaan.

16 Ñaki kʼoakʼoé tokoán nga kixi kjuintʼalee ngantsjai je Jeobá. Tsakui nichxin sakʼoa kʼoasʼe tokoán nga toñá xi kʼoatinʼia. Tonga mai. Jngo tjíjtsa Sonʼnde miyón mani je ndsʼee xi kʼoati tjíobʼénele yaole nga kixi tjíofitʼale je Niná. Xi ijngosani, kʼoati ya koa̱nxki̱koaa je choʼndale Jeobá xi tsakatio nichxin kjoatse, xi kisʼele kjoamakjain kʼoa xi kixi kitʼale Jeobá ninga kinikʼien (Heb. 11:36-38; 12:1). Kjuintjenngiaa je choa̱le Job kʼoa kʼoati kuixoán jokitso: “¡Saʼnda nga an xi kuiyá kixi koa̱n!”. Kʼoa nga kixi kjimaa, jé Jeobá kuitjojeya ngantsjai.

KJOAJNDA 124 Kixi kjuítʼale ngantsjai

^ párr. 5 Jmé xi tsoyanile nga kixi maa. Ánni nga mandosinnile je Jeobá nga kixi katama je choʼndale. Ánni nga nʼio chjínile nga kixi koaan nga jngó jngoá. I̱ kjoaʼmiya jebi kui chótʼayajiaan jmeni xi bakóya je Biblia tʼatsʼe kjoachjonangi jebi. Kʼoati koasenkaoná nga tosi tonda kixi koaan ngantsjai nichxin. Tsa kʼoasʼiaan, tsee kjoanichikontʼain sʼe̱ná.

^ párr. 3 Kʼianga én hebreo nga kui nchja̱ni jngo cho̱ xi nda kji kʼoati kui tsoyanile jngo chjota xi kixi.

^ párr. 4 Salmo 103:12-14: “Jokji kjin tíjnale jña bitjoni tsʼuí kao jña kantjaini, kʼoakji kjin síkʼéjna je jée xi bijnyaa. 13 Josʼín jngo nʼai nga bakóle kjoamatokon je xtile, je Jeobá kʼoasʼin bakóle kjoamatokon je xi tsokjónke. 14 Nga̱ nʼio nda be josʼin koanndaa, kʼoa faʼaitsjenle nga to chaoñá”.

^ párr. 7 Job 1:8-11: “Kʼoa je Jeobá i kitsole Satanás: A tichotsenlai Job je choʼndana, nga niʼyajinla xi tjín sonʼnde xi kʼoasʼín joni tsa je. Nʼio kixi tífitʼana, tsokjónkena kʼoa xin tíjnale xi chʼaotjín. 9 Kʼoa je Satanás i kitsole Jeobá: A toxkia tíbexkón Niná je Job. 10 A tsí tsa ji tinikuindai jngotjondaile kʼoa jngotjondaile niʼyale kʼoa jngotjondaile ngayeje xi tjínle. Ngayeje jme xi sʼín nichikontʼainní, kʼoa je cho̱ntjele kjimankjínya ya sonʼnde. 11 Tonga, chja̱ʼalalai ngayeje jme xi tjínle, a tsílaxó ñaki ngixkuin kuinchja̱ʼaonli”.

^ párr. 12 Job 26:7, 8, 14: “Tokijnajinsénle ngʼá, totíjnajinsénle je sonʼnde. 8 Kui yojbi síchjén nga bʼéjté je nandá. Kʼoa je yojbi likui xijndakao ninga nʼio ai. 14 ¡Koeni! To choaa xále ʼyaa, kʼoa to choaa ʼyaa xi tʼatsʼe. Kuinga ʼyáni xi koa̱nchoyale jósʼínnile nga kʼoasikji nganʼio tjínnile je chʼao̱n”.

^ párr. 13 Job 31:1: “Jngo kjoa tjínndajinna kao xkoan. Jókjiʼi̱ña nga jngo tsotixo̱ngó xi chʼaosʼin skotsenle”.

^ párr. 54 XI TÍNCHJA̱NI SÉN XI FAʼAITʼA: Kʼianga sʼa xti je Job tíbakóya kʼale je xtile jmeni xi kisinda Jeobá.

^ párr. 56 XI TÍNCHJA̱NI SÉN XI FAʼAITʼA: Jngo ndsʼee xi tosa totísíkjin nga kʼoatjíotsole je chjota xi ñatjen síxá nga pornografía katakotsenle.

^ párr. 58 XI TÍNCHJA̱NI SÉN XI FAʼAITʼA: Jngo ndsʼee xi tsín tísíjyo kʼianga kʼoatíʼmile nga kui katabatse jngo televisión xi nʼioje kji kʼoa xi nʼio chjí.

^ párr. 60 XI TÍNCHJA̱NI SÉN XI FAʼAITʼA: Jngo ndsʼee xi kui sonʼndenaxó tísíkjaʼaitsjenjin kʼianga tíbʼétsʼoa.