Ir al contenido

Ir al índice

 XI NGISA TÍNCHJA̱NI REBISTA JEBI: A MACHJÉN NGA KIXI KOAAN

Nʼio chjíle nga kixi maa

Nʼio chjíle nga kixi maa

“Nda kjoafaʼaitsjen tjínnajin, nga̱ menajin nga nda koangínkoaijin yaonajin ngayije kjoa” (Hebreos 13:18).

Ya Biblia, je én xi “nda koangínkoaijin yaonajin” sʼin jaʼatoya ibi, kui tínchja̱ni jmeni xi toxá ʼyañá nga ndatjín. Kʼoati kui tsoyanile jme xi ndasʼin matsen kʼoa xi nʼio chjíle jonʼia.

Je chjotale Cristo kisitjoson je én xi kinchja̱ je pastro Pablo nga kitso: “Menajin nga nda koangínkoaijin yaonajin ngayije kjoa”. Jósʼin tsoyanile én jebi.

XI BIXKANTʼAKOAA

Je chjota kʼianga kje bitjojin niʼyale títjon kjoanla cho̱tsín kotsenya. Kui xi mele nga nda sʼin katamatsen. Tonga tjín xi ngisa chjíle tikʼoajinni nga nda sóyoaa kʼoa nga nda kʼoé ntsja̱jkoaa. Jokjoaan kui xi kuitsoni tsa ndasʼin koa̱ntsenlee xi ngikʼa kʼoa tsa mai.

Je Biblia kʼoatso nga kui ngisa mangíntʼalee je xi chʼaotjín. Génesis 8:21 itso: “Je ni̱ma̱le chjota josaʼnda nga sʼa xti ñaki kui fitʼale xi chʼaotjín”. Tsa mená nga kui xi kixi kʼoasʼiaan tjínnele nga kʼoénelee yaoná. Je pastro Pablo kʼoakitso josʼin kiskantʼakao je jée xi yʼa. Kitso: “Tjínna kjoatsjoa xi tʼatsʼe kjoatéxomale Niná, josʼin tjín ni̱ma̱na. Tonga ʼbe ngijngo kjoatéxoma i̱jin ngayije jko̱yale yaona xi kjánkao je kjoatéxoma xi tsʼe kjoafaʼaitsjenna. Jébi xi síkʼéjnatʼanʼiona je kjoatéxoma xi tsʼe jée xi tíjnajin ngayije jko̱yale yaona” (Romanos 7:22, 23).

Tobʼelañá, kʼianga jekui kjimamená kʼoasʼiaan xi tsín kixi tíjna, koaan kʼoéchjoalee yaoná. Ñá xi kuixónñá tsa kʼoasʼiaan kʼoa tsa mai nga̱ tsín choʼndalejin maa. Kʼianga tsín bʼaiʼndelee yaoná nga kui kʼoanʼia xi chʼaotjín, kixi maa ninga tsín kʼoasʼín je chjota xi tiyojinlee.

CHʼA̱SJEE NGANʼIO NGA KIXI KATAMAA

Tsa koanngíntjenngiaa jme xi makjainná kixi koaan. Tonga nʼio nkjín chjota xi kui kʼoasʼín jme xi tsín kixi tíjna tojoni nga nda koatio ngixko̱n xi kjaʼaí. Tojme xi bʼangini yaole kʼianga kjenndiaale. Je libro xi The (Honest) Truth About Dishonesty (La [honesta] verdad sobre la deshonestidad) ʼmi itso: “Kʼoakji tjen chʼanachaa jokji tjen kʼoasʼin makjainná nga tsín chʼaotjín jme xi tinʼia”. Tonga, jméni xi koasenkaoná nga jchaa tsa ma chʼanachaa.

Miyón mani chjota xi tjín jngo tjíjtsa Sonʼnde xi tjíobe nga nʼio basenkaoná je Biblia. Je Énle Niná tsjoáná kjoafaʼaitsjen xi ndatjín (Salmo 19:7). Tsjoá kjoafaʼaitsjen tʼatsʼe familia, tʼatsʼe xá, tʼatsʼe Niná kʼoa josʼin kjuinkoaa yaoná. Jmeni xi tso tojo machjén ndʼaibi. Je kjoatéxoma xi faʼaitʼa kʼoa kao kjoafaʼaitsjen xi tsjoá machjénle toʼya  chjotani, tojñani tsʼe, tojme ntje̱ kitjenni kʼoa tojosʼin tsʼen yaole. Tsa kʼoéxkiaa je Biblia, tsa si̱kjaʼaitsjenjiaan jmeni xi tso kʼoa tsa si̱tjosoán, chjotakixi koaan.

Tonga nga tsín kixi jme xi sʼín je chjota xi tiyojinlee kʼoa bʼénená nga kui kʼoasʼiaan xi chʼaotjín, alikui tokui xi machjén nga jchaa jme xi tso je Biblia kʼiatsa mená nga kixi koaan machjénní nga kʼoétsʼoalee je Niná kʼoa kʼoakʼuínlee nga katabasenkaoná (Filipenses 4:6, 7). Tsa kʼoasʼiaan, sʼeená kjoanʼiojin nga kui kʼoasʼiaan xi ndatjín kʼoa chjotakixi koaan.

KJOANDA XI SʼENÁ NGA KIXI MAA

Je Hitoshi, xi kanikʼiaa ya kjoaʼmiya xi títjon, nʼio tsakasenkao nga kixi koan. Kitsjoaxále jngo chjota xi nʼio bechjí je chjota xi kixi. Je Hitoshi itso: “Nʼio tsjoa kjoanda nga kisokona jngo xá jñani tsín tjínnele kʼoendisoa kʼoa ndatjín kjoafaʼaitsjenna”.

Nkjín chjota xi tjíosokóle kjoanda nga kixi kjima. Si̱kjaʼaitsjenjinla jotso kʼa chjota xi tjíofitjenngi kjoafaʼaitsjen xi tsjoá je Biblia, nga nda tjíofikao yaole tojmeni xi tjíosʼín.

  • Nda sʼe tokoán

    “Kʼianga 13 nóna alikui tikiña skuela tosa to chjotaché tsakajta kʼoa yaa kikoa nga kisíché. Me ngayeje xi kisʼena nga ya jaʼaini nga kisiché. Nga jeki nichxin chixanña kʼoa je xʼinna kao an kichotʼayaníjin Biblia kao je testigole Jeobá. * Tsaʼyaníjin nga jtike Niná jme xi tsín kixi tíjna, kʼoa kuinga kinikʼantjaiyanijin yaonajin [Proverbios 6:16-19]. Kʼiaa tsangínsʼenngindáijin nga nó 1990 kʼoa testigole Jeobá koainjin”.

    “Ngasʼa ñaki tokui tsojmi xi kisiche kijnakitse niʼyana, tonga ndʼai jemai. Ndʼaibi ndatjín kjoafaʼaitsjenna. Kʼianga sikjaʼaitsjen nga kʼoasʼin kisiché ngasʼa, tsjoale kjoanda je Jeobá nga tsakakóna kjoamatokon. Ñaki ndatjín tokoan nga bajnafe nga̱ ʼbeña nga nda tíbekonna je Jeobá” (Cheryl, xi Irlanda tsʼe).

    “Kʼianga kisʼejinle je naina nga koankaina nga tsakʼanacha kʼianga kʼoakitsona jngo chjota, i kitsona: Je Nináli tíbasenkaoli nga kixi kjimai. Nʼio ndani nga i̱ tinixákaonáijin. Kʼianga kixi jme xi sʼian ndatjín tokoán ngixko̱n Jeobá. Kʼoa koaan koasenkao je familiana kʼoa kao xi kjaʼaí nga kʼoati katasʼín” (Sonny, xi Hong Kong tsʼe).

  • Nyʼán sʼin biyoaa

    “Yaa banco internacional sixá. Kʼoa negosio jebi liʼya xi kixi síxá, tokui fini chjota jme xi njesonle. Ngatsʼi kʼoasʼin síkjaʼaitsjen nga tsín chʼaotjín nga chʼanacha choa tojoni nga tsesa tao̱n kuinje̱sonná kʼoa ngisa nda kuiyoaa. Tonga nyʼán sʼin tijna nga kixi jmeni xi sʼian. Kʼoa tosi tonda kixi koa̱n ninga tojme kjoa kjoaʼatojian. Je naina bení nga tsínkʼia koasenkoa nga énndiso kuinchja. Kʼoa kʼoati be nga tsínkʼia kʼoendisole tsanda je” (Tom, xi Estados Unidos tsʼe).

  • Ndasʼin bekonná xi ngikʼa

    “Kʼianga tsojmi kicha ya jñani tisixá, je naina kʼoakitsona nga kʼoendisoa tonga mai kixinle. Kʼianga jetsaʼyale ʼya xi kisiché, je naile xá kitsjoana kjoanda. Kjoanʼiojin machjén nga kixi maa. Tonga xijemani, je xi ngikʼa ngisa bexkónná kʼoa sínʼiotʼaná” (Kaori, xi Japón tsʼe).

Je kjoanda xi sʼená nga kixi maa kuinga nda sʼe tokoán, nyʼán biyoaa kʼoa nda bekonná xi ngikʼa. Kui xi ngisasa chjíle.

^ párr. 18 Ya Biblia kʼoatso nga Jeobá ʼmi jaʼaínle Niná.