Ir al contenido

Ir al índice

 KJOAʼMIYA XI CHOTʼAYA 52

Jmé xi koasenkaoná kʼianga nikʼajenlee tokoán

Jmé xi koasenkaoná kʼianga nikʼajenlee tokoán

“Je Jeobá tikʼami je chʼáli, kʼoa jé koasenkaoli. Alikui tsjoáʼnde nga ska̱jenngi je xi chjotakixi” (SAL. 55:22).

KJOAJNDA 33 Je Jeobá tikʼami chʼáli

XI TÍNCHJA̱NI *

1. Jósʼin bʼetʼaná nga nikʼajenlee tokoán.

NGATSʼIÑÁ nga kjoa bitjatojin sakʼoaa, kʼoa fasjailee jonʼia nga nda biyoaa. Ngisaa tiñʼai mangániná nga nikʼajenlee tokoán. Nga kʼoama, alikui tichjí ʼyatokonñá yaoná kʼoa tsín titsjoa sʼeni tokoán kʼoa nroajeen nganʼioná. Tojo tso Proverbios 24:10: “Tsa nroajen tokuin kʼianga ñʼai kjoa tibitjatojin, alikui tisʼe̱nili nganʼio”.

2. 1) Jméni xosikaoná nga ni̱kʼajennilee tokoán. 2) Jméni xi jchaa i̱ kjoaʼmiya jebi.

2 Nkjín koya xi nikʼajennilee tokoán. Jolani nga chjotajée maa, nga sakʼoa saténgiaa, nga chʼin bʼetʼaná, nga tsínkui xá bʼainá xi mená jinnaxinandále Niná kʼoa tsa ya ʼmiyasoán jña tsín nanda nrʼoé chjota je Énle Niná. I̱ kjoaʼmiya jebi kui jchaa jméni xi koa̱n sʼiaan kʼianga nikʼajenlee tokoán.

NGA CHJOTAJÉE MAA KʼOA NGA SATÉNGI SAKʼOAA

3. Jméni xi koasenkaoná nga tsínkui nʼio kʼoéjintokoán jñani saténgiaa.

3 Alikui nda sʼe̱ tokoán tsakui kʼoéjintokoán jñani saténgiaa, kʼoa kʼoajinsʼin si̱kjaʼaitsjeen nga tsín tsjoáʼndená je Jeobá nga ya sonʼnde chjotse kuiyoaa. Tiñá si̱kiʼaonñá yaoná tsa kʼoasʼin si̱kjaʼaitsjeen. Jméni xi koasenkaoná. Chjotajée maa ngatsʼiaa, tojékjoán Jesús xi chjotatsje koan nga jaʼai i̱ Sonʼnde (Rom. 3:23). Tonga je Jeobá alikui kui kotsenle jñani chʼao nʼia kʼoa be nga sa̱téngi sakʼoaa nga̱ chjotajée maa. Je Jeobá, jngoo Nʼai xi nʼio tsjoakená kʼoa xi tsejta. Be nga bʼenelee yaoná nga kʼoanʼia xi ndatjín kʼoa nga bʼenelee yaoná nga tsín tiñá nʼio faneñá jée yaoná, kʼoa tíjnanda ngantsjai nga basenkaoná (Rom. 7:18, 19).

Je Jeobá be jmeni xi ndatjín kinʼia ngasʼa kʼoa jmeni xi ndatjín tinʼia ndʼaibi (Chótsenlai párrafo 5) *

4, 5. Tojo tso 1 Juan 3:19, 20, jméni xi tsakinyakao nga jao tichjaa nga tsín tosi tonda kisikʼajenle kon.

 4 Kataʼyala jmeni xi tso je Deborah kao María. * Kʼianga sʼa ʼndí je Deborah alikui tsjoake koan je familiale kʼoa me tongantsjai nga tsín nda tsabekon. Alikui nda kisʼe kon kʼoa kʼoasʼin kisikjaʼaitsjen nga tsín jme chjíle ninga tosʼa choa kjoa jñani tsín nda kisʼin. Kʼoasʼin kisikjaʼaitsjen nga tsínkʼia nda sʼin. Kʼoati koantʼain je María. Totaon tsabe je xínkjín kʼoa kʼoasʼin kisikjaʼaitsjen nga tsín jme chjíle. Xijekoan, chaan tsabe jotso je Énle Niná kʼoa ninga kʼia nga jekisʼenngindá kʼoasʼin kisikjaʼaitsjen nga tsín bakinle nga testigole Jeobá kʼuín.

5 Ninga kʼoalani kisatio kon tichjaa jebi tosi tonda kisixále je Jeobá. Jméni xi tsakinyakao. Jé Jeobá tsakʼétsʼoale kʼoa tsakʼéyanajmíle jotjío kon (Sal. 55:22). Koanjinle nga be je Jeobá nga sakʼoa tsín nda satío tokoán nga kui nikjaʼaitsjeen jme xi koan ngasʼa. Je Jeobá be jñani nda nʼia ninga kʼoasʼin nikjaʼaitsjeen nga tsín jme xi nda nʼia (tʼexkiai 1 Juan 3:19, 20). *

6. Jósʼe kon jngo xi tikui kjoa kajinngáni xi kisʼin ngasʼa.

6 Tsa jngo xi tíbʼénele yaole nga tsínkui kʼoasʼin xi chʼaotjín, kuijin xosikao nga sikʼajenile kon tsa tikui kjoa ska̱jinngáni. Kʼianga sokójéená toxá tsín nda sʼeni tokoán (2 Cor. 7:10). Tonga alikui koa̱n si̱kʼatoné choa̱le josʼin si̱kjaʼaitsjeen kʼoa tsa i̱ kuixoán: “Alikuila kʼia koa̱nndaya kʼoa alikuijin kʼia sichatʼana je Jeobá”. Alikui kixi tíjna tsa kʼoasʼin si̱kjaʼaitsjeen, kuijin xosikaoná nga si̱kjinnilee je Jeobá. Xi ijngosani, si̱kjaʼaitsjeen jmeni xi tso Proverbios 24:10, tsa si̱kʼajenlee tokoán, kjuinroajen nganʼioná. Tosaa nda nga je Jeobá kʼoétsʼoalee kʼoa kʼoakʼuínlee nga katasíchatʼaná (Is. 1:18). Skoee nga tibʼenelee yaoná nga kui mená kʼoasʼiaan xi ndatjín kʼoa sichatʼaná. Xi ijngosani, kʼoéyanajmílee je xi chjotajchínga sʼin tjío, ngasin nganda kuinyakaoná nga nda kuiyoaa ngixko̱n Niná (Sant. 5:14, 15).

7. Tsa tikui kjoa jtsaojinngáñá jmeni xi kinʼia ngasʼa, ánni nga tsín si̱kʼajennilee tokoán.

7 Jngo xi chjotajchínga sʼin tíjna ya Francia, xi Jean-Luc ʼmi, i tsole je xi tikui kjoa tsaojinngáni jme xi kisʼin ngasʼa: “Je xi kixi bekon je Jeobá ali tsa jejin xi tsínkʼia saténgi, jéní xi kʼoamanile nga kui kʼoasʼín xi chʼaotjín kʼoa bʼénele yaole nga  kui kʼoasʼín xi ndatjín” (Rom. 7:21-25). Kuinga tsín koa̱n kʼoasʼin si̱kjaʼaitsjenñá nga tsínkʼia koa̱nndayaa. Si̱kjaʼaitsjeen nga sokójéená ngatsʼiaa, tonga je Jeobá síchatʼaná xi totʼatsʼe kjoanda xi bakóná kʼoa nga tsakʼéchjíntjainá je Jesús (Efes. 1:7; 1 Juan 4:10).

8. ʼYáni xi koa̱n kuinyakaoná kʼianga nganʼio machjénná.

8 Kuinyakaoná je ndsʼee kʼianga nganʼio machjénná. Sinʼio tokoán kʼoa kjuinrʼoéná kʼianga nganʼio machjénná (Prov. 12:25; 1 Tes. 5:14). Jngo tichjaa xi Nigeria tsʼe, xi Joy ʼmi, xi síkʼajen sakʼoale kon itso: “Alikuijin josʼin tjónganʼionina tsa tsín je ndsʼee. Kʼoasʼin ʼbeña nga nrʼoé je Jeobá kʼianga bʼetsʼoale. Nga tsjoánganʼiona je ndsʼee kʼoati ma tsjoanganʼiole je xi ba tjío kon”. Alikuijin tongantsjai nga skoe̱ je ndsʼee kʼianga nganʼio machjénná, kuinga ndatjínni nga si̱jélee nganʼio tsa jngo ndsʼee kʼoa tsa jngo tichjaa xi jetjínle kjoafaʼaitsjen.

NGA CHʼIN BʼETʼANÁ

9. Jósʼin sínʼio tokoán jmeni xi tso Salmo 41:3 kao 94:19.

9 Kʼoakʼuínlee je Jeobá nga katabasenkaoná. Alikui nda satío tokoán kʼianga chʼin tjínná, ngisaa tsa táo chʼin xi bʼetʼaná. Ningalani tsín kjoaʼaxinná je Jeobá chʼin xi tjínná ndʼaibi, tonga sínʼio tokoán kʼoa̱ tsjoáná nganʼio xi machjénná nga chókjoajinná (tʼexkiai Salmo 41:3; * 94:19 *). Jósʼin basenkaoná je Jeobá. Sakʼoaa je ndsʼee síchjén nga binyakaoná nga fikatse tsa jme xi machjénná kʼoa binyakaoná je xá xi tjín ya yaniʼya. Kʼoati je Jeobá xosʼín kʼianga bʼétsʼoantjainá je ndsʼee kʼianga fichókonná. Kʼoati koa̱nle koasenkaoná nga si̱kjaʼaitsjenjiaan jotso je Énle, jolani nga kui kjoachoya tjínná nga nʼio nda kuiyoaa kʼoa nga tsín tijme chʼin sʼe̱ni nga jekjoaʼaí sonʼnde chjotse (Rom. 15:4).

10. Jmé xi tsakasenkao je Isang nga nda kisʼe ijngokʼani kon ningalani kjoa kiskajin.

10 Je Isang, xi Nigeria tsʼe, jngo kjoaxkón kiskajin kʼoa tokisʼeyása yaole, je chjinexki kʼoakitsole nga tsín tikʼia koa̱n koaini. Itso: “Nʼio aon kisʼe ni̱ma̱na kʼoa kinroajen tokoan”. Jmé xi tsakasenkao nga nda kisʼe ijngokʼani kon. Itsosa: “Kao je chjoónna ntsjaintsjai tsakʼetsʼoalaijin je Jeobá kʼoa ntsjaintsjai kichotʼayaijin je Énle. Kinikjaʼaitsjenjinníjin josʼin tísíchikontʼainnajin je Jeobá kʼoa bʼailaijin kjoanda, jolani nga kui kjoanda tsjoáná nga koa̱n kuiyoaa ya sonʼnde chjotse”.

Je xi chʼin tjínle kʼoa xi jejchínga, koaan tsjoa sa̱tío kon nga kuitsoyason kʼoa ndasʼin kuichomani nga kʼoasʼin (Chótsenlai párrafo 11-13)

11. Jmé xi tsakasenkao je Cindy nga tsjoa kisʼe kon ninga nʼio táo chʼin kiskatʼale.

11 Je Cindy, xi México tsʼe, kʼoakitsole je chjinexki nga tsín ʼyale tsa kʼoéjnakon nga̱ nʼio táo chʼin xi tjínle. Jméni xi kisʼin. Kʼianga koanxkile, ñaki kʼoatsakʼé kon nga nyaon nyaon kuitsoya je Énle Niná. Itso xi kiski: “Nga kixinyasoan kui xi tsakasenkaona nga ngisa kuenta kisʼian xi ngikʼa tikʼoajinni nga jtíya, jokji bao koa̱n kʼoa nga tsín nda kisʼe tokoan. Tsakjakaonajmíña je chjinexki kʼoa kjonangile jósʼin tjíoni xínkjín. Kjonangile ánni nga kui xá kiskoejinni nga chjinexki koan. Nga kui kjonangile ngisaa choa ñʼai mana nga fakaonajmíña Énle Niná. Nkjín xi kʼoakitsona nga tsín tongatsʼi je chjota xi maxkile nga kui kjonangi kʼoa nkjín xi kitsjoana kjoanda nga kʼoasʼin tsakjakaonajmía. Nkjín xi saʼnda kitsjoana je númerole  teléfonole. Ningalani kui kjoa tijnajian nga kʼia, jé Jeobá tsakasenkaona nga nʼio tsjoa kisʼe tokoan, tiʼan tokʼoakoannina jokji tsjoa kisʼe tokoan” (Prov. 15:15).

12, 13. Jósʼin tsoyason kʼa je ndsʼee xi chʼin tjínle kʼoa tsa xi jejchínga, kʼoa jósʼin bichómani nga kʼoasʼín.

12 Tjínkʼa je ndsʼee xi chʼin tjínle kʼoa xi jejchínga, síkinroajen kon nga tsín tima tse síxánile je Jeobá. Tonga básjaile josʼín nga tsoyason. Ya Estados Unidos, jngo tichjaa xi Laurel ʼmi, xi 37 nó nga ki̱cha̱ tsakʼejnaya nga koan kiskenjta. Xi ijngosani, cáncer kiskatʼale, nkjín kʼa kitiya, kʼoa nʼio táo chʼin xi kisʼele yaole. Ningalani nʼio táo chʼin kisʼele, alikʼia tsakájñále nga kitsoyason. Kitsoyale je chjinexki kʼoa kao xi tsakinyakao jokjitse nga koankuinda ya ndʼiale. Xjaʼaonjaola chjota tsakasenkao nga testigole Jeobá koan. *

13 Jmeni xi tso jngo ndsʼee xi jejchínga xi Francia tsʼe, xi Richard ʼmi, nʼio koasenkao je xi tsín ma bitjo ndʼiale kʼoa tsa ya jñani tjío, itso: “Koaan tjayobasen jngo jao je xo̱n xi Énle Niná yʼangini. Kʼianga be je chjota, kjonangi kʼoa ma chjakaonajmíñá je Énle Niná. Tsa kʼoasʼin, nʼio kuinyakao je ndsʼee xi tsín tima bitjoni ndʼiale”. Je ndsʼee xi to yasa ndʼiale batio koaan carta skí kʼoa tsa teléfono kuinchja̱ nga kuitsoyason.

NGA TSÍN BʼAINÁ JE XÁ XI MENÁ JINNAXINANDÁLE NINÁ

14. Jmé choa̱ xi tsakʼéjnaná je rey David.

14 Tsakui nichxin jngo xá mená nga kʼoainá ya jinjtín kʼoa tsa ya circuito. Nkjín koya tjínni anni nga tsín bʼaininá je xá xi mená. Tobʼelañá, tsa kuinga jejchíngaa, tsa chʼin tjínná kʼoa tsa kjaʼaísanile. Koasenkaoná nga si̱kjaʼaitsjenjiaan je choa̱le rey David. Nʼio koanmele tsakai nga je tsakʼénda je yo̱ngo̱le Niná, kʼoa kʼianga kisʼejinle nga kjaʼaí chjota kitjoejin xi kʼoenda je yo̱ngo̱, kitsjoanganʼiole je chjota xi kiskoejin Niná. Nʼio nkjín tao̱nsine kao tao̱nchxoa kitsjoa. Nʼio nda choa̱ tsakʼéjnaná (2 Sam. 7:12, 13; 1 Crón. 29:1, 3-5).

15. Jmé xi tsakasenkao jngo ndsʼee kʼianga kisikʼajenle kon.

15 Jngo ndsʼee xi Hugues ʼmi, xi Francia tsʼe, chʼin kiskatʼale kʼoa tsín tichjotajchínga sʼin tsakʼejnani. Saʼnda tsín tikoan jme xá kisʼinni ya ndʼiale. Itso xi kiski: “Nga títjon nʼio kisikʼajenle tokoan kʼoa kʼoasʼin kisikjaʼaitsjen nga tsín tijme chjínina. Nga jeki nichxin, tsjoa kisʼeni tokoan kʼoa kui kisikjaʼaitsjen jmeni xi koa̱n sʼian nga síxále je Jeobá. Alikui sixa̱nle.  Yaa mangósoan joni Gedeón kao xi 300 chjotale, ningalani tsín tichókjoanina tosi tonda sixále je Jeobá” (Juec. 8:4).

16. Jmé xi bakóyaná je choa̱le ánkje.

16 Je ánkje kʼoati nʼio nda choa̱ batíoná. Ñandia nga kʼoakitsole Jeobá je ánkje nga katatsjoá kjoafaʼaitsjen jósʼin kʼoanachale je rey Acab. Nkjín xi kʼoakitso jokoa̱n sʼin, tonga je Jeobá tojngoo xi kiskoejin kʼoa kʼoakitsole nga nda kuichomani jmeni xi sʼin (1 Rey. 22:19-22). A kisikʼajenle kon je ánkje xi ngikʼa kʼoa a i kitso: “Tikʼoalani lijo kaxian”. Alikui jña faʼaitʼa Biblia tsa kʼoakitso. Nangitokon ma je ánkje kʼoa kui xi mele nga je Jeobá kuitjongʼa (Juec. 13:16-18; Apoc. 19:10).

17. Jméni xi koa̱n sʼiaan kʼiatsa tsín nda sʼe tokoán nga tsín jme xá tjínná jinnaxinandále Niná.

17 Kuenta sʼiaan nga nʼio tse kjoanda tjínná kʼianga testigole Jeobá maa kʼoa nga Énle Niná ʼmiyaa. Ningalani sʼená xá jinnaxinandále Niná, kʼoati bichó nichxin nga tsín tikui xá nʼiañá xi tjínná tsakai. Ali tsakuijin xá xi tjínná jinnaxinandále Niná xi tsoni nga chjí bekonná je Jeobá kao je ndsʼee, je xi chjí be kuinga nangitokon maa. Kuinga machjénsíni nga kʼoakʼuínlee je Jeobá nga tosi tonda nangitokon katamaa. Si̱kjaʼaitsjenjiaan je choa̱le choʼndale Jeobá xi nangitokon koan xi faʼaitʼa Biblia, kʼoa kuinyakoaa je ndsʼee jokji tjen kʼoakoa̱nná (Sal. 138:6; 1 Ped. 5:5).

TSA TSÍN NRʼOÉNÁ JE CHJOTA JÑANI ʼMIYASOÁN

18, 19. Jmé xi koasenkaoná nga tosi tonda tsjoa sʼe̱ tokoán nga kʼuínyasoán ninga tsín nrʼoé chjota jñani ʼmiyasoán.

18 A tjín ʼnde jñani tsín nrʼoéná je chjota nga ʼmiyasoán kʼoa tsa tsín ya ndʼiale nga bichoaa. Jméni xi sʼiaan nga tosi tonda tsjoa sʼe̱ tokoán ningalani kʼoama. Tsjoá kʼa kjoafaʼaitsjen xi koasenkaoná je recuadro “ Jósʼiaan nga ngisa tsjoa sʼe̱ tokoán nga kʼuínyasoán”. Kʼoati nʼio chjíle nga kuenta sʼiaan ánni nga ʼmiyasonñá.

19 Kuenta sʼiaan nga kui xi ngisa chjíle nga kʼuínyaa tʼatsʼe Niná kao tʼatsʼe Chjotaxále. Je Jesús kʼoakitso nga tochoa koa̱nni je chjota xi ya koaiya ndiaa xi ya kuichokao kjoabijnachon (Mat. 7:13, 14). Kʼianga ʼmiyasoán, jé nixákoaa Jeobá, Jesús kʼoa kao ánkje (Mat. 28:19, 20; 1 Cor. 3:9; Apoc. 14:6, 7). Xi ijngosani, jé Jeobá xosʼín nga faʼai jinnaxinandále  je chjota xi mele nga je sixále (Juan 6:44). Je chjota xi tsín nrʼoéná ndʼaibi, tsakui nichxin skanni kjuinrʼoéná.

20. Tojo tso Jeremías 20:8, 9, jmé xi koasenkaoná nga tsín si̱kʼajenlee tokoán.

20 Nʼio koasenkaoná jme xi kisʼin je profeta Jeremías. Alikui kinrʼoé je chjota nga kitsoyale je Énle Niná. Totsakijnoke kʼoa totsabesin tsʼajnda nichxin (tʼexkiai Jeremías 20:8, 9). * A kisikʼajenle kon kʼoa a tsín tikitsoni kon nga kitsoyason. Mai, tosi tonda kitsoyason. Nga̱ kʼoakitso nga je Énle Jeobá yaa koanngóson ya jinni̱ma̱le joni lʼí xi tíbʼájnga̱. Kʼoati koaan tsanda ñá tsakui kʼoéyaa jkoaa kʼoa kui kʼoéjnajiaan ni̱ma̱ná je Énle Niná. Kuinga machjénni nga nyaon nyaon chótʼayá je Énle Niná kʼoa si̱kjaʼaitsjenjiaan. Tsa kʼoasʼiaan, ngisaa tsjoa sa̱tío tokoán nga kʼuínyasoán kʼoa ngisaa so̱koná je chjota xi kjuinrʼoé nga kʼuínyalee je Énle Niná (Jer. 15:16).

21. Jméni xi koasenkaoná kʼianga nikʼajenlee tokoán.

21 Je Deborah xi saje kanikʼaxkiaa ya párrafo 4, itso: “Kʼianga nikʼajenlee tokoán kʼiaa matsjoale je Na̱i nga bʼetʼaná”. Tonga je Jeobá ngisaa tse nganʼio tjínle tikʼoajinni je Na̱i. Tojme kjoa xi sikʼajen tokoán, kʼoéyanajmílee je Jeobá jotjín tokoán kʼoa si̱jélee nganʼio. Je Jeobá koasenkaoná nga tsín si̱kʼajenlee tokoán nga chjotajée maa kʼoa nga saténgi sakʼoaa, koasenkaoná kʼianga chʼin bʼetʼaná. Koasenkaoná nga tsjoa sʼe̱ tokoán ni tjínná xá kʼoa ni mai jinnaxinandále Niná, koasenkaoná nga tsjoa sʼe̱ tokoán nga kʼuínyasoán je Énle. Jé Jeobá koasenkaoná nga tsín si̱kʼajenlee tokoán.

KJOAJNDA 41 Jeobá, tinóʼyai kjoabʼetsʼoana

^ párr. 5 Ngatsʼiñá nga sakʼoa nroajen tokoán. I̱ kjoaʼmiya jebi kui chótʼayajiaan jméni xi koa̱n sʼiaan nga kʼoasatío tokoán. Jchañá jósʼin basenkaoná je Jeobá kʼianga nda satíoni tokoán.

^ párr. 4 Alikui tsa ñaki kʼoaʼmi kʼa chjota xi bʼaxki̱ i̱bi.

^ párr. 5 1 Juan 3:19, 20: “Kʼoasʼin ʼyanía nga ñábi tsʼe xi kjoakixi, kʼoa nʼio nda tíjna ni̱ma̱ná ngixko̱n nga je. 20 Tsa ni̱ma̱ná bánginá, ngisa ngʼa tíjna Niná kaoni tsa ni̱ma̱ná. Je ñaki be ngayije kjoa”.

^ párr. 9 Salmo 41:3: “Jé Jeobá tsjoánganʼiole nga chʼin tíjnasonkao nachanle; ji si̱kʼantjaiyai nachanle nga chʼin tjínle”.

^ párr. 9 Salmo 94:19: “Kʼianga nʼio kisikjáojian, ji kininʼiojin tokoan kʼoa kinikinjenyʼánjin ni̱ma̱na”.

^ párr. 12 Xi tʼatsʼe Laurel Nisbet yaa jaʼaitʼa je revista ¡Despertad! xi tsʼe 22 de enero de 1993.

^ párr. 20 Jeremías 20:8, 9: “Kʼianga ñandia ñandia nchja, i xian: Kjoatsʼen tjín kʼoa tífeson chjota. Kʼoa nga kui kʼoaxian je énle Jeobá je chjota tobijnokena kʼoa tobesinna bʼajnda nichxin. 9 Kuinga i̱ kixinña: Alikui tikuinchjaña tʼatsʼe kʼoa alikui tikʼoaxínña jme xi kuitsona. Tonga ya jinni̱ma̱na je énle kʼoakoan joni lʼí xi tíbʼájnga̱ xi tíjnajin nindana. Kʼoa alikui tikichokjoanina nga toʼan tsakʼejinkoan”.

^ párr. 73 XI TÍNCHJA̱NI SÉN XI FAʼAITʼA: Kʼianga síkjaʼaitsjen jñani nda kisʼin ngasʼa kʼoa kʼianga bʼétsʼoale je Jeobá, je tichjaa xi kisikʼajenle kon tsakai majinle nga kuenta sʼín je Jeobá jmeni xi kisʼin ngasʼa kʼoa kao jmeni xi tísʼín ndʼaibi.