Ir al contenido

Ir al índice

 KJOAʼMIYA XI CHOTʼAYA 50

“Jó sʼin si̱kjaʼáyanile xi kʼen”

“Jó sʼin si̱kjaʼáyanile xi kʼen”

“Ji kjoabiya, jñá tíjna naʼyátsʼinli. Kʼoa ji tsjó, jñá tíjna xi kinjeli” (1 COR. 15:55).

KJOAJNDA 141 Je kjoabijnachon jngoní kjoatjao

XI TÍNCHJA̱NI *

1, 2. Ánni nga nʼio tjínnile kjoandosin nga koa̱njinná ngatsʼiaa xi choʼndale Jeobá maa jokoa̱n je xi ya ngʼajmi kjoaʼáyanile.

NGATSʼIAA xi choʼndale Jeobá maa mená nga jchasaa jokoa̱n je xi ya ngʼajmi kjoaʼáyanile. Jé chjotale Cristo xi ya ngʼajmi koai xi ngisaa mandosinle tʼatsʼe jebi. Ngisaa nkjín mani je choʼndale Jeobá xi i̱ Sonʼnde koyale koatio, tonga kʼoati mandosinle tsanda je, nga̱ tsee kjoanichikontʼain sʼe̱ i̱ Sonʼnde nga tjínkʼa chjotale Cristo xi ya ngʼajmi kjoaʼáyanile.

2 Jé Niná tsakándiaa kʼale je chjotale Cristo xi tsakatio nga siglo 1 nga kui kiski tʼatsʼe chjotale Cristo xi ya ngʼajmi koai. Je pastro Juan i kitso: “Ndʼaibi ʼndíle Niná nía nga ñá. Kjesa matsenjin jo koa̱nkjoan, tonga ʼyanía kʼia nga koa̱ntsen nga je, kʼoati kʼoakoa̱n kjoan jo kjoan nga je” (1 Juan 3:2). Je chjotale Cristo xi ya ngʼajmi koai alikui be josʼin koatio kʼianga jekjoaʼáyanile. Tonga xi majinle kuinga ñaki xko̱n skoe̱ni je Jeobá. Je Biblia alikui tsoyayeje jokoa̱n je xi ya ngʼajmi kjoaʼáyanile. Tobʼelañá, je pastro Pablo kʼoakitso nga je xi ya ngʼajmi koai yaa jetjíokao je Cristo kʼianga sikjeson “ngatsʼi xi tjío títjon, kʼoa ngatsʼi xi tjínle nganʼio, kʼoa ngatsʼi xi batéxoma”, kʼoa kʼoati kjoaʼaxin je kjoabiya. Nga jekoa̱nni, je Jesús kao xi ya koatexomakao jé Jeobá tsjoá ijngokʼanile je xá xi kitsjoale kʼoa tojé koatexoma nga jekoa̱nni (1 Cor. 15:24-28). Nʼiojin naskánakoa̱n nga kʼia. *

3. Tojo tso ya 1 Corintios 15:30-32, jméni xi kisʼin Pablo nga koankjainle nga kjoaʼáyanile kʼien.

 3 Kʼianga koankjainle Pablo nga sʼe̱ kjoafaʼáya kui xi tsakasenkao nga kichokjoajinle je kjoa xi jaʼatojin (tʼexkiai 1 Corintios 15:30-32). * Kʼoakitsole je chjotale Cristo xi Corinto tsʼe nga xkón tsakʼejna nga nyaon nyaon. Kʼoa i kitsosale: “Kiskankoa xa ya Efeso”. Tsakui nichxin kui xokitsole nga ñaki kao xa kiskan ya circo xi kisʼejna naxinandá Éfeso (2 Cor. 1:8; 4:10; 11:23). Kʼoa tsa je xokitsoleje̱ chjota judío xi tsakatiochjoale kao chjotakontrale (Hech. 19:26-34; 1 Cor. 16:9). Je Pablo kichokjoajinle tojme kjoa xi jaʼatojin nga̱ kui kisikjaʼaitsjen nga tsjoa sʼe̱ kon nichxin xi sʼa nroa (2 Cor. 4:16-18).

Jngo familia xi tosi tonda kotʼaya xi tʼatsʼe Niná ninga tíchjoale xále Niná ya jñani tsʼe, kuinga kʼoasʼínni nga̱ makjainle kʼianga kʼoatso Niná nga tse kjoanda tsjoále nichxin xi sʼa nroa (Chótsenlai párrafo 4)

4. Jósʼin tsjoánganʼioná ndʼaibi nga makjainná nga sʼe̱ kjoafaʼáya (chótsenlai sén xi faʼaitʼa ya portada).

4 Kʼoati xkón chon nichxin xi tiyoaa ndʼaibi. Tjínkʼa ndsʼee xi jée tjíosʼene. Tjínkʼa xi ya tjío ya ʼnde jñani xkón chon nga kjoajchán tjín. Tjín ʼnde jñani tsín tjoʼndele nga tsoyason, kʼoa tosi tonda tjíosíxále je Jeobá ninga ndoyá tjíonikatíoʼya. Tosi tonda tjíosíxále je Jeobá kʼoa nʼio nda choa̱ tjíobatíoná. Ninga si̱kʼien, alijme xi tsokjónle, nga̱ be nga je Jeobá tsjoá ijngokʼanile kjoabijnachon nichxin xi sʼa nroa.

5. Jméni xosikaoná nga tsín tinanda koa̱nkjainniná nga sʼe̱ kjoafaʼáya.

5 Je Pablo kʼoakitsole je ndsʼe̱ nga tjínkʼa xi kjaʼaísʼin kisikjaʼaitsjen. I kitso kʼa: “Tsa je xi kʼen likui nikjaʼáyale, kuichaa, sʼioaa, nga̱ nyaonli kuiyanía”. Tokʼoa jekjoatse nga kʼoasʼin síkjaʼaitsjen je chjota. Tsakui nichxin kui kisikʼaxki̱ je Pablo jmeni xi tso ya Isaías 22:13, jñani kʼoatso nga je chjota israelita tosaa to tsakʼétsaojin ʼndele nga je Niná sichriantʼale. Je chjota israelita kʼoati kitso tojo tso chjota nichxin xi tiyoaa ndʼaibi, nga kʼoatso nga “tosa kʼoétsaojiaan nga̱ likui ʼyaa jmeni xi koa̱nná nyaonli jngili ján”. Tonga ʼyañá nga tsín nda kichomani jmeni xi kisʼin je naxinandá Israel (2 Crón. 36:15-20).

6. Tsa makjainná nga sʼe̱ kjoafaʼáya, ánni machjénni nga chósonnilee ʼya xi si̱miyoaa.

6 Kʼianga makjainná nga sʼe̱ kjoafaʼáya kʼoati machjén nga kuenta sʼiaan ʼyá xi si̱miyoaa. Je chjotale Cristo xi Corinto tsʼe alikui je kisimiyo je chjota xi tsín koankjainle nga kjoaʼáyanile kʼien. Jebi kui bakóyaná nga tsín koa̱n je si̱miyoaa chjota xi tsín kuenta sʼín nichxin xi sʼa nroa, kʼoa xi tokui ngisa mandosinle nga bʼétsaojin. Tsa je nʼio si̱miyoaa alikuijin tinda sʼianñá. Chanjin kui kʼoasʼiaan xi jtike Niná. Kuinga i̱ tsoni je kjoafaʼaitsjen xi kitsjoa Pablo: “Tikjaʼálao yaono, tikjaʼaitsjaon xi kjoakixi, kʼoa ali jéejin tibijnyinio” (1 Cor. 15:33, 34).

JÓKJOAN NGA KJOAʼÁYANILE

7. Tojo tso 1 Corintios 15:35-38, jókuitso kʼa chjota tʼatsʼe kjoafaʼáya.

7 (Tʼexkiai 1 Corintios 15:35-38). *  Je chjota xi mele nga to jao sʼe̱ná tʼatsʼe kjoafaʼáya, i̱jin kuitso: “Jó sʼin si̱kjaʼáyanile xi kʼen. Jó kjoan yaole xi kjoaʼaíkaoni”. Koasenkaoná nga chótʼayajiaan jmeni xi kitso Pablo, nga̱ nʼio nkjín chjota xi kjaʼaí kjaʼaísʼin síkjaʼaitsjen joma kʼianga jebiyaa. Tonga jméni xi bakóya je Biblia.

Je Pablo kui choa̱ kisichjén joma jngo tocho kao jngo xka̱ nga kitsoya nga je Niná koaanle kjaʼaí kjoan yao tsjoále je chjota xi kjoaʼáyanile (Chótsenlai párrafo 8)

8. Jmé choa̱ xi basenkaoná nga majinná jokoa̱n je xi ya ngʼajmi kjoaʼáyanile.

8 Kʼianga jebiya jngo chjota, fiʼndo yaole. Tonga je Jeobá, xi tsakʼénda ngayeje xi tjín koaanle sikjaʼáyale xi jekʼien kʼoa tsjoále jngo yao xi chjotse (Gén. 1:1; 2:7). Je Pablo jngo choa̱ kisichjén nga kitsoya nga tsín tongóson kjoan yao tsjoále Niná je xi kjoaʼáyanile. Kʼoakjoan yao tsjoále josʼin mele Niná. Je Pablo kui kinchja̱ni joma jngo “na̱xi̱n” kʼoa tsa jngo tocho, kʼianga jesʼentje, xka̱ mʼónya nga jemani. Je xka̱ jebi alikui timangósonni jokji je tocho ngasʼa.

9. Jótso 1 Corintios 15:39-41 tʼatsʼe nga nkjín koya yao tjín.

9 (Tʼexkiai 1 Corintios 15:39-41). * Je Pablo kui kinchja̱ni nga nʼio nkjín tsojmi koannda. Tobʼelañá, kjaʼaí kjaʼaí kjoan je yao xi yʼa je cho̱, je nise kao je jti̱. Kʼoati kitso nga je Tsʼuí kao Sá alikui mangóson, kʼoakitso nga tsín mangóson nga jngó jngó “kjoajeyale niño”. Ninga likui ʼyañá kao xkoaan, tonga je chjota científico kʼoatso nga nkjín koya niño tjín, kʼoatso nga tjín xi yʼai kjoan, xi ʼndí kjoan, xi ni sʼin tsen, xi chxoa kjoan kʼoa xi sine sʼin matsen, jolani je Tsʼuí. Je Pablo kʼoati kitso nga “tjín yao xi tsʼe ngʼajmi, kʼoa tjín yao xi tsʼe sonʼnde”. Jmé  xi kinchja̱ni nga kʼoakitso. Ñá xi i̱ Sonʼnde tiyoaa yao kichʼá, tonga je xi ya tjío ngʼajmi espírituní, jolani je ánkje.

10. Jókjoan yao xi kʼoaile je xi ya ngʼajmi kjoaʼáyanile.

10 Je Pablo i kitsosa: “Kʼoatisʼinni kao kjoafaʼáyale xi kʼen. Sʼeñai je xi tofitsonyaní, tonga nikjaʼáyale je xi likui fitson”. Kʼianga jngo chjota biya, fiʼndo yaole kʼoa niʼnde ma ijngokʼa (Gén. 3:19). Jókoa̱nnile nga tsín tikjuitsónni je yaole xi kjoaʼáyanile. Je Pablo ali tsakuijin xokitsole jokoa̱n nga kjoaʼáyale je chjota i̱ Sonʼnde, tojo koan je chjota xi kisikjaʼáyale Elías, Eliseo kao Jesús. Jé kinchja̱ni je xi “espíritu” sʼin kjoaʼáyanile ya ngʼajmi (1 Cor. 15:42-44).

11, 12. Jmé yao xi tsakʼa je Jesús kʼianga jejaʼáyanile, kʼoa jókjoan yao xi kʼoa̱ nga jekjoaʼáyanile je chjotale Cristo xi ya ngʼajmi koai.

11 Kʼianga jaʼai Jesús i̱ Sonʼnde kui yao tsakʼa jokjoaan ngatsʼiaa xi chjotaa. Kʼianga jejaʼáyanile kui “koan espíritu” xi tsjoá kjoabijnachon kʼoa yaa ngʼajmi ki. Kʼoatisʼinni je chjotale Cristo xi ya ngʼajmi koai, espíritu koa̱n nga jekjoaʼáyanile. Je Pablo i kitso: “Josʼin nga tjínná sénle xi tsʼe niʼnde, kʼoati sʼe̱ná sénle xi tsʼe ngʼajmi” (1 Cor. 15:45-49).

12 Kuenta sʼiaan nga tsín tikui yao tsakʼani Jesús jokjoaan ñá kʼianga jejaʼáyanile. Kʼianga kitsoya Pablo xi ngisa chjíle kʼoakitso “nga je yao kao njínná likui koa̱n sʼe̱kjoatjaole kjoatéxomale Niná” ya ngʼajmi (1 Cor. 15:50). Kʼianga koai ya ngʼajmi, je pastro kʼoa kao chjotale Cristo xi ya koai, alikui tikjuitsónni je yaole, nga̱ tsín tikʼoakjoanni yao xi kʼoa̱ jokjoaan xi chjotaa. Kʼiáni kjoaʼáyanile. Je Pablo kʼoakitso nga tsín tokjoan kjoaʼáyale kʼianga jekuiyá. Kʼianga kiski Pablo jmeni xi tso ya 1 Corintios, tjínkʼa je chjotatjenngile Cristo xi jekʼien, jolani je pastro Santiago. Kʼoa je xi ngikʼa pastro skan kʼien (Hech. 12:1, 2; 1 Cor. 15:6).

 TJÓXIN JE KJOABIYA

13. Jméni xi koa̱n nga jetíbatéxoma Cristo ya ngʼajmi.

13 Je Jesús kao Pablo tongini kʼoakitso jmeni xi koa̱n nga jetíbatéxoma Cristo, sʼee kjoajchán, cháon, chʼinʼbi kʼoa xi kjaʼaísale. Kʼiaa kitsʼiani jebi nga nó 1914 nga tíbitjoson jmeni xi kitso. Je Jesús kʼoakitso nga je Énle Niná “kuinókjoayani ngakijnda sonʼnde” kʼoa kʼiaa kjoaʼaí kjoafetʼa (Mat. 24:3, 7-14). Kʼianga jekoatexoma Jesús ya ngʼajmi, kʼoakitso je Pablo nga kʼia kjoaʼáyanile je chjotale Cristo xi ya ngʼajmi koai xi jekjoatse kʼien (1 Tes. 4:14-16; 1 Cor. 15:23).

14. Jóma je chjotale Cristo xi ya ngʼajmi koai xi ndʼai tjíobiya nga jetíbatéxoma Cristo.

14 Nichxin xi tiyoaa ndʼaibi, kʼianga jebiya je chjotale Cristo xi ya ngʼajmi koai, tokjoan faʼáyanile ya ngʼajmi. Jómani ʼyaa. Yaa tsoyaná jokitso Pablo tojosʼin faʼaitʼa ya 1 Corintios 15:51, 52: “Likui ngatsʼiaa kuiyá, tonga ngatsʼi nía ni̱kʼantjaiyaná, xi ndi̱to̱nndi̱to̱n xi tojngo nikʼajtsoaa xkoaan, kʼia nga je xjao xi fetʼani kjoane”. Je én jebi, tíbitjoson nichxin xi tiyoaa ndʼaibi. Kʼianga jekjoaʼáyanile je chjotale Cristo jebi, nʼio tsjoa sa̱tío kon nga ya koatiokao Cristo ngantsjai nichxin (1 Tes. 4:17).

Je chjotale Cristo “xi tojngo nikʼajtsoaa xkoaan” kjoaʼáyanile yaa kjoaʼaíkao je Jesús kʼianga kjoaʼaísíkjeson je chjotatsʼen (Chótsenlai párrafo 15)

15. Jméni xi sʼin ya ngʼajmi je chjotale Cristo “xi tojngo nikʼajtsoaa xkoaan” kjoaʼáyanile.

15 Je Biblia kʼoatso jmeni xi sʼin ya ngʼajmi je chjotale Cristo “xi tojngo nikʼajtsoaa xkoaan” kjoaʼáyanile. Je Jesús itsole: “Je xi sikinje, kʼoa xi sitjoson je xána saʼnda nga kjoetʼa, an tsjoale ʼnde nga koatexoma naxinandále sonʼnde. Koatexomale kao yájtiki̱cha̱le. Koakjanjinle joni tsa jngo tii. Tikʼoasʼinni  josʼin nga Nʼaina kitsjoana kjoatéxoma” (Apoc. 2:26, 27). Sitjosonle je xi séntítjonle kʼoa kao “yánisele xi ki̱cha̱” koatexomanile je naxinandá (Apoc. 19:11-15).

16. Jósʼin sikinjenile kjoabiya je chjota xi millón mani.

16 Je chjotale Cristo xi ya ngʼajmi koai sikinjele kjoabiya (1 Cor. 15:54-57). Je xi ya kjoaʼáyanile ya ngʼajmi kʼoati je xosʼin nga kjoaʼaxin ngayeje xi chʼaotjín i̱ Sonʼnde nga kjoaʼaí Armagedón, kʼoa tojeme kʼoakoa̱n. I̱ Sonʼnde millón mani je chjotale Cristo xi kjoaʼatojintjínkon je kjoañʼai xi nʼio tse kʼoa kui kjoanda sʼe̱le nga ya ʼndenaxó koatio (Apoc. 7:14). Je chjota jebi skoeeni xko̱n nga ni̱kinjele je kjoabiya kʼianga millón koa̱nni je chjota xi kjoaʼáyanile xi jekjoatse kʼien. Nʼiojin tsjoa sa̱tío tokoán nga kʼoakoa̱n (Hech. 24:15). Ngatsʼi je xi kixi koaitʼale je Jeobá kʼoati sikinjele je kjoabiya kʼoa koaan koatio ngantsjai nichxin.

17. Tojo tso 1 Corintios 15:58, jméni xi machjén nga sʼiaan.

17 Nichxin xi tiyoaa ndʼaibi, ngatsʼiaa xi chjotale Cristo maa nʼio tsjoánganʼioná jmeni xi kitsole Pablo je chjotale Cristo xi Corinto tsʼe, tʼatsʼe nga kjoaʼáyanile kʼien. Kuinga machjénsíni nga kʼoasʼiaan nga i̱ kitso Pablo: “Ngisa tse tixásalao Nainá ngantsjai” (tʼexkiai 1 Corintios 15:58). * Tsa kixi kjuintʼalee Niná kʼoa tsa kʼoénelee yaoná jokji tjen kʼoakoa̱nná nga si̱xálee, nʼio tsjoa sa̱tío tokoán nichxin xi sʼa nroa, saʼnda tsín fiya jkoaa ndʼaibi jokji tsjoa sa̱tío tokoán. Kʼoa jchañá nga tsín toxitsjoa nga je Niná tinixálee.

KJOAJNDA 140 Kjoabijnachon xi tsín kjoetʼa

^ párr. 5 Ya 1 Corintios capítulo 15, kui tsoyasa tʼatsʼe nga kjoaʼáyanile je kʼien, kʼoa kui ngisa tínchja̱ni tʼatsʼe xi ya ngʼajmi koai. Jmeni xi kiski Pablo kʼoati basenkao xi kjaʼaí barré ʼmile. I̱ kjoaʼmiya jebi kui kuitsoyaná josʼin tjínnele kjuinkoaa yaoná nga kui kjoachoya tjínná nga kjoaʼáyanile je kʼien, kʼoa jósʼin koasenkaoná nga tsjoa sʼe̱ tokoán nga kui si̱kjaʼaitsjeen nichxin xi sʼa nroa.

^ párr. 2 Ya jñani “Tjínkʼa xi kjonangi” tso, xi faʼaitʼa revista jebi, yaa bakóya jmeni xi kinchja̱ni Pablo jmeni xi tso 1 Corintios 15:29.

^ párr. 3 1 Corintios 15:30-32: “Kʼoati ñá, ánni nga xkón bimasínía tojme horani. 31 Josʼin nga bʼasjejeya yaona tʼatsaon nga tiyokoaa Cristo Jesús, kʼoasʼin nga nyaonnyaon mʼe. 32 Tsa an kiskankoa xa ya Efeso, jo sʼín chjota, jmé xi njena. Tsa je xi kʼen likui nikjaʼáyale, kuichaa, sʼioaa, nga̱ nyaonli kuiyanía”.

^ párr. 7 1 Corintios 15:35-38: “Tonga tjín kʼa xi kuitso: Jó sʼin si̱kjaʼáyanile xi kʼen. Jó kjoan yaole xi kjoaʼaíkaoni. 36 A skáyali. Je xi bʼentjai, tsa tsín tongini biya, likui bʼeyokon. 37 Kʼoa je xi bʼentjai, likui kʼoakji yaole jo kji nga koa̱njchá, tonga bʼentjai je na̱xi̱n nga tokʼoakjoan, tsa tsʼe trigo, axo tsa tsʼe xi kjaʼaí na̱xi̱n. 38 Tonga Niná tsjoále yaole josʼin koanmele, kʼoa nga jngójngó ntje̱ titsʼeni yaole”.

^ párr. 9 1 Corintios 15:39-41: “Ngayije yao likui tongóson, tonga jngo yao xi kjoakixi tsʼe chjota, kʼoa ngijngo yao xi tsʼe cho̱, kʼoa ngijngo xi tsʼe jti̱, kʼoa ngijngo xi tsʼe nise. 40 Tjín yao xi tsʼe ngʼajmi, kʼoa tjín yao xi tsʼe sonʼnde, tonga xi kjoakixi jngo kjoajeyale xi tsʼe ngʼajmi, tonga kjaʼaíngá kjoan kjoajeyale xi tsʼe sonʼnde. 41 Ngijngo kjoajeyale tsʼuí, kʼoa ngijngo kjoajeyale sá, kʼoa ngijngo kjoajeyale niño, nga̱ jngo niño kjaʼaíngá kji kjoajeyale kaoni tsa tsʼe xi ngijngo”.

^ párr. 17 1 Corintios 15:58: “Kʼoasʼin, ndsʼe xi tsjoake̱no, kixi tiyo. Ali nikʼantjaiyajion. Ngisa tse tixásalao Nainá ngantsjai, nga̱ ʼyanío nga je xáno nga tiyokao Nainá ali tokjoatjaojin”.