Ir al contenido

Ir al índice

Alikui toxitsjoa nga tiyochoán

Alikui toxitsjoa nga tiyochoán

Je Faizal kʼianga jejaʼato jngo nó nga kʼien je chjoónle kʼiaa kitiya nga chʼin tjínle je ni̱ma̱le. Itso: “Kʼianga bʼexkia je libro xi tsʼe Job, majinna nga je Jeobá tjín anni nga kui libro tsakájnani. Kʼianga ʼyaa nga kʼoati kui kjoa jaʼatojin je chjota xi faʼaitʼa ya Biblia je kjoa xi bitjatojiaan, nda sʼe tokoán”. Kʼoa itsosa: “Nʼio chjíle nga tiyochoán”.

Je Tarsha kʼiaa xti nga kʼien je na̱le. Itso: “Kʼianga ʼyaa je xi kisindaná majinná jme xá tiyoñá, sʼená kjoachoya kʼoa tsjoa sʼe tokoán ninga kjoa bitjatojiaan. Je Jeobá nʼio tse nganʼio tjínle nga basenkaoná nichxin nga nyaon”.

YA KJOAʼMIYA xi jekafaʼato kui kaʼyaa nga nʼio tse kjoa bitjatojiaan kʼoa kʼoasʼin nikjaʼaitsjeen nga tsín tichókjoajinniná. Tsakui nichxin kʼoati kui kjoa tibitjatojin kʼoa kʼoasʼin nikjaʼaitsjain nga toxitsjoani nga tijnachuin kʼoa nga tsín ʼya xi mandosinle xi tʼatsi. Tonga je Niná aon male kʼianga kjoa bitjatojin. Je Niná mandosinle xi tʼatsi.

Je xi kiski Salmo 86 jé Niná kisinʼiotʼa yaole kʼoa i kitso: “Ji sijéle nganʼio kʼianga kjoañʼai tijnajian, nga̱ ji kuinóʼyanái” (Salmo 86:7). Tonga tsakui nichxin kui chjonangilai yaoli jebi: “Jósʼin basenkaoná Niná kʼianga ba sʼe tokoán”.

Ningalani tsín ndi̱to̱n kjoaʼaxin kjoa xi tibitjatojiaan je Niná, koasenkaoná nga nyʼán sʼe̱ tokoán kʼoa nga chókjoajinná. Je Biblia itso: “Ali kʼoajin mano. Tojmenibe xi machjénno, tijélao Niná, tʼetsʼoalao, kʼoa tʼailao kjoanda. Kʼoasʼin katasʼejinle Niná jme xi nijáo. Je kjoanyʼántakonle Niná xi ñaki faʼatole ngayije kjoafaʼaitsjenle chjota, jé xi sikuinda ni̱ma̱no kao kjoafaʼaitsjenno” (Filipenses 4:6, 7). Kʼianga chótʼayajin je texto xi faʼaitʼa ibi, jchaní nga mandosinle Niná xi tʼatsi.

Je Niná mandosinle xi tʼatsi

Nijngojin nise xi “tíchajinle Niná. [...] Ngisasa chjíno nga jon kaoni tsa nkjín ʼndínise” (Lucas 12:6, 7).

TIKJAʼAITSJENLAI JEBI: Je Niná kuenta sʼín saʼnda je nise xi nʼio ʼndí kjoan kʼoa nʼio chjí be. Tonga ngisaa chjí bená ñá xi chjotaa tikʼoajinni je ʼndínise. Sénle kisikʼaná kʼoa koaan kʼoakoa̱nkjoaan jokjoan je (Génesis 1:26, 27).

“Ji Jeobá, ji tichotʼajin ngakjijngo yaona, kʼoa ʼyanái. [...] Kʼoa kjin ʼyani jotjín je kjoafaʼaitsjenna. [...] Chótʼajinnái, kʼoa kataʼyai jme xi kjáojinna” (Salmo 139:1, 2, 23).

TIKJAʼAITSJENLAI JEBI: Je Niná kuenta sʼínná nga jngó jngoá, be jotjín tokoán kʼoa jmeni xi nʼio nikjáojiaan. Ningalani tsín ʼya xi koa̱njinle jokji kjoañʼai tichjaʼai, je Niná makjáojinle xi tʼatsi kʼoa mele koasenkaoli. Nga ʼyaa jebi majinná nga nʼio chjíle nga tiyochoán.

 Ali toxitsjoajin nga tijnachuin

“Ji Jeobá, tinóʼyai je kjoabʼetsʼoana; tinóʼyanái nga nganʼio tisijé. [...] Tasenñui kʼoa tinóʼyanái kʼianga kuinchjale”. Je Jeobá “kjuinrʼoéle je kjoabʼetsʼoale chjota xi nʼio ma̱ tjío” (Salmo 102:1, 2, 17).

TIKJAʼAITSJENLAI JEBI: Jokji kjoañʼai tjíofaʼá je chjota josaʼnda nga kisʼenda je Sonʼnde nʼio tse ndáxko̱n tjíobʼéjten kʼoa kuenta tísʼín je Niná (Salmo 56:8). Kʼoa kʼoati nʼio mandosinle xi tʼatsi. Je Niná be jokji kjoa tibitjatojin kʼoa jokji tibʼejtain ndáxkuin kʼoa nʼio chjí be.

“Ali tsa nikjáojinjin, nga̱ anña Nináli. An tsjoanganʼiole, an koasenkaole. [...] Nga̱ an Jeobá Nináli, [...] an xi i̱ tixinle: Ali tsa nokjonjin, an koasenkaole” (Isaías 41:10, 13).

TIKJAʼAITSJENLAI JEBI: Je Niná mele koasenkaoli. Jé tsjoánganʼioli kʼianga ba sʼe̱ tokuin.

Ndasʼin kuiyoaa nichxin xi nroaján

“Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai” (Juan 3:16).

TIKJAʼAITSJENLAI JEBI: Je Niná nʼio tsjoakeli, saʼnda kitsjoa je ʼNdíle xi tʼatsi. Xi totʼatsʼe nga kitsjoa kjoabijnachonle Jesús koaan nda sʼe̱ tokuin ndʼaibi kʼoa ndasʼin kuijnai ngantsjai nichxin. *

Ninga ba tjín tokuin kʼoa ninga jekichobekaoli kjoa xi tibitjatojin, tsa chʼa̱sjeʼai nichxin nga chótʼayai Biblia ngisaa nʼio sʼe̱jna kjoamakjainli tʼatsʼe jme xi tso Niná. Tsa kʼoasʼiain, tsjoa sʼe̱ tokuin kʼoa koanjinli nga tsín toxitsjoa nga tiyochoán

^ párr. 19 Tsa mesali jchai je kjoanda xi tjenkao je kjoabʼechjíntjaile Jesús, chótsenlai je video Si̱kjaʼaitsjenyá je kjoabiyale Jesús, ya www.jw.org/mau. Ya XO̱N KAO GRABACIÓN > VIDEO > KJOAJTÍNNAJIN KAO JOSʼIN ʼMIYASUINJIN.