Ir al contenido

Ir al índice

 KJOAʼMIYA 5

Je Samuel kui kʼoakisʼinntsjai jmeni xi sasénle Jeobá

Je Samuel kui kʼoakisʼinntsjai jmeni xi sasénle Jeobá

Saʼnda nga sʼa ʼndíkji, je Samuel yaa tsakʼejna kʼoa yaa kisixá ya ndʼianajñole Jeobá. Ya ndʼianajño yaa jñani kichokʼétsʼoale Jeobá je chjota. A meli jchai ánni nga ya tsakʼejnani je Samuel. Kʼianga jchaa anni, títjon kjoanla kataʼyaa xi tʼatsʼe je na̱le. Je xi Ana tsakʼin.

Je Ana nʼio koanmele nga jngo ʼndí sʼe̱le, tonga likui koan kisʼele xti. Kuinga tsakʼétsʼoasínile Jeobá kʼoa kitso: “Tʼiain kjoanda, Jeobá, tisenkaonái. Tsa jngo ʼndí sʼe̱na, yaa si̱kasén ya ndʼianajñoli nga ya katabʼejna kʼoa nga ya katasíxá”. Je Jeobá kinrʼoé je kjoabʼetsʼoale Ana kʼoa jngo ʼndí kisʼele. Kʼoa je ʼndí xi kisʼele Samuel kitsole. Kʼianga jejan kʼoa tsa ño nóle Samuel, je Ana kʼoakisʼin jokitso kʼoa yaa kikao je tiʼndíle ya ndʼianajñole Jeobá nga ya katasíxále Niná.

Je xi naʼmitítjon koan ya ndʼianajñole Jeobá Elí tsakʼin. Nga jao xtile, jejchínga kjoan, kʼoa kʼoati ya kisíxá. Ya ndʼianajño jebi yaa sʼetsʼoale Jeobá kʼoa kuinga je chjota xi ya síxá tjínnesínile nga nda sʼin. Tonga je Samuel tsabe nga je xtile Elí nʼio chʼao tjíomasʼín. Jósi ngái ji, a kʼoati kisʼin Samuel jokisʼin je xtile Elí... Mai. Je Samuel tosi tonda kui kʼoakisʼin jmeni xi tsjoake Jeobá, jokjoansʼin tsakakóyale xijchále.

Jméni xi tjínnele kisʼin tsakai je Elí. A tsí tjínnenile tsakatekjáyale tsakai je xtile, jósi ngái ji... Jaonjin. Alikui koa̱n tsjoáʼndele tsakai nga ya sixá ya ndʼianajñole Jeobá. Tonga je Elí alikui kʼoakisʼin. Kuinga nʼio koanjtinile Jeobá xi kao Elí kʼoa kao nga jao xtile, kʼoa kjoañʼai kitsjoale.

Je Samuel kʼoakitsole je Elí jmeni xi kitsole Jeobá

Ñandia nga nitje̱n, nga jekijnafe, je Samuel kinrʼoé nga tjín xi tínchja̱le xi i̱ kitsole: “Samuel”. Kjoan tsakisótjeen kʼoa ya kikonle Elí, kʼoa Elí kʼoakitsole nga tsín jejin xi tínchja̱le. Kʼoa ngi jao kʼa kinrʼoé nga tjín xi tínchja̱le. Tonga xi koanni jan kʼa, je Elí i kitsole Samuel: “Kʼiatsa kuinóʼya ijngokʼalai nga kuinchja̱li i̱ tʼinlai: Tinókjoai Jeobá, tinrʼoele”. Kʼianga kʼoakitso  Samuel, je Jeobá i kitsole: “Kʼoatʼinlai je Elí nga kjoañʼai tsjoale ngatsʼi nga nʼio chʼao tjíomasʼín”. A ñʼai koanle je Samuel nga kʼoakitsole Elí je én jebi, jósi ngái ji... Nʼiojin ñʼai koanle. Je Samuel kitsokjon nga kʼoakuitsole Elí. Tonga kisitjosonle Jeobá kʼoa kʼoakitsole je Elí ngayeje jme xi tsakʼinle. Jmeni xi kitso je Jeobá kitjoson: Nga jekoanskanni kʼien Elí kʼoa kʼoati kʼien nga jao xtile.

Nʼio tse xi bakóyaná je choa̱le Samuel. Tsandalani tsabe nga chʼao tjíomasʼín je chjota xi kjaʼaí, jé kui kʼoakisʼin ngantsjai jmeni xi tsjoake Jeobá. A kʼoati sʼiain ji. A kʼoasʼin si̱tjosonlai Jeobá jokisʼin je Samuel. Tsa kʼoasʼiain, je Jeobá nʼio tsjoa sʼe̱le kʼoa kʼoati tsjoa koa̱nle je pali kao mali.

KʼOÉXKIALA YA BIBLIA: