Ir al contenido

Ir al índice

 KJOAʼMIYA 2

Je Rebeca koanmele nga tsjoa katasʼele Jeobá

Je Rebeca koanmele nga tsjoa katasʼele Jeobá

Je Rebeca nʼio tsjoake koan je Jeobá. Kʼoa je Isaac, xi xʼinle koan je Rebeca, kʼoati nʼio tsjoake koan je Jeobá. Kataʼyala josʼin tsabexkon xínkjín kʼoa anni nga tsjoa kisʼeni kon je Jeobá xi tʼatsʼe Rebeca.

Je pale Isaac, Abrahán tsakʼin kʼoa male, Sara tsakʼin. Je Abrahán kui xi koanmele nga je chjoón xi Jeobá síxále kuixankao je tile. Tonga nga kʼia, yaa tjío ya Canaán, jngo ʼnde jñani nga tsín je Jeobá bʼétsʼoale je chjota. Kuinga jngo choʼndale kisikasénsíni ya Harán, tsakui nichxin je xi Eliezer tsakʼin. Ánni nga ya kisikasénsíni. Kuinga ya tjíokʼa xínkjín je Abrahán kʼoa nga ya koa̱nsjaile jngo chjoón xi nda sʼín je Isaac.

Je Rebeca nʼio kisixá nga kitsjoale nandá je camello

Je Eliezer ki ya Harán kʼoa kikao kʼa choʼndale je Abrahán. Te camello kikao xi kisikʼa tsojmi xi ma chine kʼoa kao tsojmi xi kitsjoakjoatjao. Tonga je Eliezer, jósʼin koa̱nsjainile jngo chjoón xi nda sʼín xi kuixankao je Isaac. Je Eliezer be kʼianga tíjna jngo xjáonandá jñani bichókʼá nandá je yánchjín xi ya tsʼe. Kʼoa nga kicho ya Harán, yaa ki ya jñani tíjna je xjáonandá. Xijekoan, tsakʼétsʼoale je Jeobá kʼoa i kitsole: “Jngo tsoti sijéle nandá. Tsa tsjoána nandá kʼoa tsjoále je camellona, jéní xi meli nga chjoónle katama je Isaac”.

Kʼiakjoán kicho Rebeca ya jña tíjna xjáonandá. Je Biblia kʼoatso nga nʼio naskánakisʼe  je Rebeca. Je Eliezer kisijéle nandá Rebeca kʼoa Rebeca i kitso: “Tsjoale nandá kʼoa kʼoati tsjoale camelloli”. Je camello nʼio tse nandá ʼbi, nʼiojin tse nandá tsakʼasje ya xjáonandá je Rebeca. Ngotjo ngosajin kikʼáni nandá. Chótsenlalai sén xi faʼaitʼa ya pájina 6. Jméni xi tísʼín je Rebeca... Je Eliezer ñaki tokʼoakoanle nga kʼoasikji nʼio kisixá je Rebeca. Tsabe nga kinrʼoé Jeobá je kjoabʼetsʼoa xi tsakʼéjnale.

Je Eliezer naskánakjoan tsojmi xi kitsjoale je Rebeca, kʼoa je Rebeca kʼoakitsole Eliezer kao chjota xi tje̱nkao nga katafi ya niʼyale. Je Eliezer kʼoakitsole je xínkjín Rebeca jme xá kisikasénni Abrahán ya Harán, kʼoa kʼoati kitsole nga kinrʼoé Jeobá je kjoabʼetsʼoa xi tsakʼéjnale. Kʼianga jekʼoakitso Eliezer, je xínkjín Rebeca nʼio tsjoa koanle kʼoa koanjyole nga katabixankao je Isaac.

Je Rebeca kikao Eliezer ya Canaán kʼoa chixankao je Isaac

A koanmele Rebeca nga chixankao je Isaac, jósi ngái ji... Kʼianga kichjonangile Rebeca tsa mele kuixankao Isaac, kʼoakitso nga mele. Ánni. Kuinga be nga je Jeobá kisikasén je Eliezer. Kikao Eliezer ya Canaán kʼoa nga jekicho chixankao Isaac.

Je Rebeca kisitjosonle Jeobá kʼoa kuinga kisikuindasíni. Kʼoa xi ijngosani, je Rebeca chjotajchíngale koan je Jesús. Je Jeobá kʼoati sikuindali tsanda ji kʼiatsa si̱tjosuin jokisʼin je Rebeca. Kʼoa kʼoati tsjoa sʼe̱le je Jeobá.

KʼOÉXKIALA YA BIBLIA: