Ir al contenido

Ir al índice

 KJOAʼMIYA 6

Jósʼin chjoéjiaan kjoasʼetsaojin xi ndatjín

Jósʼin chjoéjiaan kjoasʼetsaojin xi ndatjín

“Kʼoatʼiaon ngayije xi tʼatsʼe kjoajeyale Niná.” (1 CORINTIOS 10:31.)

1, 2. Jñánile kjoasʼetsaojin xi chjoéjiaan.

TIKJAʼAITSJENLAI tsa jngola manzana chi̱nai xi ñaki nʼio ndasʼin matsen tonga ʼndotʼani kji nga jchai, jósi̱koai. A chi̱není ngakjijngo ninga kʼoakji axo tosi̱kʼatjenní, axo kuichátʼaní jñani ʼndotʼa kji kʼoa toya chi̱nai jñani nda kji.

2 Je kjoasʼetsaojin xi tjín sonʼnde alikui tondatjíoyeje, yaa mangóson manzana jebi. Jmé xi koa̱n sʼiaan. Jan koya jmeni xi sʼín kʼa xíngiaa. Tjínkʼa xi tsín faʼájin je kjoasʼetsaojin xi tjín, alikui kui fini tsa ndatjío kʼoa tsa chʼaotjío. Kʼoa tjínkʼa xi ñaki jngokʼa bʼasjengi ngayeje, nga̱ tsín mele nga chʼao sikao. Kʼoati tjínkʼa xi tosa bʼéchjoale yaole kjoasʼetsaojin xi bele kon nga tsín nda sikao kʼoa tosa kui bʼétsaojin sakʼoa jmeni xi nda tíjna. Kʼoa ñá, jñále kjoasʼetsaojin xi chjoéjiaan kʼianga tosi tonda sʼe̱ná kjoatsjoachale Niná.

3. Jmé xi chótʼayajiaan xi fini.

3 Me ngatsʼiaa nga tokui chjoéjiaan kjoasʼetsaojin xi ndatjín kʼoa bʼechjoalee yaoná je xi bele tokoán nga sikitsónná. Kuinga machjénsíni nga kataʼyaa jñánile kjoasʼetsaojin xi ndatjío kʼoa jñánile xi chʼaotjío. Kuila títjon chótʼayajiaan jósʼin skoe̱kon Jeobá je xá xi tibʼailee kʼiatsa kui chjoéjiaan kjoasʼetsaojin xi tsín nda tíjna.

“KʼOATʼIAON NGAYIJE XI TʼATSʼE KJOAJEYALE NINÁ”

4. Jósʼin basenkaoná nga kui chjoéjiaan kjoasʼetsaojin xi nda tíjna kʼianga jetsakʼaitʼalee yaoná je Jeobá.

4 Alijo tokjoatse nga i̱ kitso jngo testigole Jeobá xi kʼia kisʼenngindá  kʼianga nó 1946: “Nikʼiajinla nga sikʼatoa kjoanokjoaya xi bʼaile je xi kanísʼenngindá yaole kʼoa ñaki nda basenñoa jmeni xi ʼmile joni tsa an xi sʼa kjuísʼe̱nngindá”. Xijekoan, kʼoakitso anni nga kʼoasʼínsíni, kitso: “Kui síkjaʼaitsjenjinna nga jekitsjoatʼale yaona je Jeobá kʼoa jebi kui basenkaona nga ñaki kixi fitʼale”. Kʼoakjoánti bixoán tsanda ñá. Kʼianga kixi kjuintʼalee je Jeobá kʼoati machjénná nga si̱kjaʼaitsjenjiaan jmeni xi tsakʼinlee nga tsakʼaitʼalee yaoná, nga kʼoatsakʼinlee nga tojé jesi̱xálee (tʼexkiai Eclesiastés 5:4). * Jmeni xi tsakʼinlee je Jeobá kʼianga tsakʼaitʼalee yaoná kui síkjaʼaitsjenná josʼin tinitjosoán je xá xi tsakánená Cristo. Xi ijngosani, basenkaoná nga nda mangínkoaa yaoná kʼoa josʼin bʼetsaojiaan. Kui kinchja̱ni je pastro Pablo kʼianga i̱ kitsole je chjotale Cristo xi tsakatio nga kui nichxin: “Tsa bicho, kʼoa tsa ʼyo, tsa tojmenibe xi nʼiao, kʼoatʼiaon ngayije xi tʼatsʼe kjoajeyale Niná” (1 Corintios 10:31).

5. Jméni xi bʼéchjoa Levítico 22:18-20 kʼoa jósʼin síchoyaná jmeni xi bájinkonná ya Romanos 12:1.

5 Tojmeni xi sʼiaan koaan tsa sa̱sénle Jeobá kʼoa tsa mai josʼin tinixálee. Je Pablo kʼoasʼin tsakájinkon je chjotale Cristo xi tjío ya Roma nga kitsole: “[T]inyabasaon yaono nga kʼoaitʼalao Niná je yaono joni jngo kjoatjao xi tíjnakon, xi tsje, xi sasénle Niná”  (Romanos 12:1). Je xi “yaono” kitsole je pastro Pablo kuiní ngayeje kjoafaʼaitsjenná, ni̱ma̱ná kʼoa kao nganʼioná, kʼoa kui nichjén kʼianga nixálee Niná (Marcos 12:30). Kʼianga kʼoasʼin nixálee Niná kao ngayeje yaoná, je Pablo kui kisingósonkao joni jngo kjoatjao xi bʼaitʼale Niná. Je én xi “kʼoaitʼalao Niná [...] joni jngo kjoatjao” kitsole je pastro Pablo nʼio chjíle jmeni xi bakóyaná. Ánni. Je kjoatéxomale Moisés likui kitsjoaʼnde nga je cho̱ xi chʼao kjoan tsakʼaitʼale Niná, nga̱ je Niná likui kisasenle (Levítico 22:18-20). Tikʼoasʼinni ndʼai, tsa jngo chjotale Cristo xi Niná tísíxále tonga likuini tsje tífikao yaole, je Jeobá alikui sa̱sénle xále. Jñá kjuinroani nga kʼoasjengi Niná je kjoatjao xi bʼaitʼalee.

6, 7. Jósʼin síkitsón kʼa yaole je chjotale Cristo kʼoa jókji tse kjoa bichómani nga kʼoasʼín.

6 Je pastro Pablo i kitsole je chjotale Cristo xi tsakatio ya Roma: “Niʼi̱tséjin bʼaiʼndelao jée jo tjín jko̱yale yaono”. Kʼoa i kitsosale: “[Ti]kʼaon je kjoa xi sʼín yaoná” (Romanos 6:12-14; 8:13). Je pastro Pablo jesa kʼoakitsole jñanile “je kjoa xi sʼín yaoná”. Kʼoa i kitso tʼatsʼe je chjota xi jée bajngi: “Je tsʼoa ñaki tjíkitse xi chʼao tso”. “Kjaínga chjinga ndso̱ko̱ nga njín bʼéjten.” “Likui tsakjónke Niná yajin kjoafaʼaitsjenle [alikui tsokjónke Niná ya ngixko̱n, TNM].” (Romanos 3:13-18.) Kʼiatsa jngo chjotale Cristo xi kʼoasʼin, sikitsónjin ngakjijngo yaole. Tobʼelañá, tsakuila skótsenle jñani kui bakó chjota xi tjíosíchajngi kʼoa kao xi tsʼatole jo cho̱ sʼín nga síkiʼaon kʼoa nga síkʼien xínkjín jetíbajngijée kao xko̱n kʼoa kʼoasʼin tísíkitsón ngakjijngo yaole. Alikui tisa̱sénnile Niná josʼin nga tísíxále nga̱ jelikui titsjeni ngayeje yaole (Deuteronomio 15:21; 1 Pedro 1:14-16; 2 Pedro 3:11). Xi totʼatsʼe nga tsín male kjoejin je kjoasʼetsaojin xi tjín alijme tichjí koa̱nnile je xále ngixko̱n Niná.

7 Tojosʼin jetiʼyaa tse kjoa bichómani kʼianga tsín maná chjoéjiaan je kjoasʼetsaojin xi tjín sonʼnde. Kuinga tosa kui chjoéjinñá je kjoasʼetsaojin xi nda sikʼéjnaná ngixko̱n Jeobá kʼoa mai je xi sijndí xá xi tibʼailee. Kuila kataʼyaa ndʼaibi jósʼin jchañá je kjoasʼetsaojin xi nda tíjna kʼoa xi tsín nda tíjna.

 “CHʼAOCHA KATAMAO XI CHʼAO TJÍN”

8, 9. 1) Jñánile nga jao koya kjoasʼetsaojin xi tjín. 2) Jñánile kjoasʼetsaojin xi tjínnele chʼa̱sjengiaa kʼoa ánni.

8 Je kjoasʼetsaojin xi tjín jao koya mani. Je xi títjon, kuiní xi ñaki bʼechjoalee yaoná xi chjotale Cristo maa. Kʼoa je xi majaoni, kuiní xi tsjoáʼnde kjoafaʼaitsjenná nga kʼoanʼia. Kuila kataʼyaa ndʼai je xi títjon koya, xi tsín koa̱n kʼoasʼiaan xi choʼndale Niná maa.

9 Tojosʼin tsaʼyaa ya kjoaʼmiya 1 xi tsʼe libro jebi, tjínkʼa kjoasʼetsaojin xi kui tjenkao jmeni xi kontra tíjnale jotso Biblia. Tobʼelañá, xi faʼa ya telebisión, xi bakó ya Internet, jmeni xi tso je canción xi tjín kʼoa kao je pelíkula, me tokui nchja̱ni kjoajndí xi totjín tomani, xi xá chajngi male, xi tsʼatole jo cho̱ sʼín nga síkiʼaon kʼoa nga síkʼien xínkjín kʼoa xi kjoatjiʼe tjenkao. Jótjínnele sʼiaan xi chjotale Cristo maa xi tʼatsʼe kjoasʼetsaojin xi kʼoatjío, jñani tosa kui chʼasjenda je xi chʼaotjín, xi kontra tíjnale jotso Énle Niná. Tjínnele chʼa̱sjengiaa (Hechos 15:28, 29; 1 Corintios 6:9, 10; Apocalipsis 21:8). Kʼiatsa kʼoasʼiaan kʼoasʼin koakolee Jeobá nga nʼio ʼyachjiá kjoatéxomale, jolani je xi tso: “Chʼaocha katamao xi chʼao tjín”, kʼoa kao je xi bʼénele chjotale Cristo nga “katabasenxinle kjoatsʼen”. Kʼiatsa si̱tjosoán nga jao kjoatéxoma jebi koakoñá “nga ñaki kjoakixi makjainná” (Romanos 12:9; 1 Pedro 3:11; 1 Timoteo 1:5).

10. Jósʼin síkjaʼaitsjen kʼa xíngiaa, kʼoa ánni nga nʼio xkón tíjnasíni tsa kʼoasʼin si̱kjaʼaitsjeen.

10 Tjínkʼa xi kʼoasʼin síkjaʼaitsjen nga tsín chʼaotjín nga kui chotsenlee jmeni xi bʼasjengi ya Biblia. Tsakui nichxin i̱ tso: “Lijme xi tjínle nga̱ totichotsenlee nga̱ tsín tsakui kʼoatinʼia”. Je xi kʼoasʼin síkjaʼaitsjen tije tjíobʼanachanile yaole kʼoa xkón tjíobatio (tʼexkiai Jeremías 17:9). * Tsa nda chotsenná jmeni xi jtike je Jeobá, a koaan kʼoakuixoán kʼianga “chʼaocha k[jimaa] xi chʼao tjín”. Maijin. Tsa tosi tonda  kui chótsenlee xi chʼaotjín chanjin likui tichʼao koa̱nnile kjoafaʼaitsjenná, kʼoa tsakui nichxin saʼnda kui jée kuijnyá kʼoa likui tichʼaosʼin jchatokonñá jmeni xi chʼao sʼín je chjota (Salmo 119:70; 1 Timoteo 4:1, 2).

11. Jósʼin basenkaoná jme xi tso ya Gálatas 6:7 xi tʼatsʼe kjoasʼetsaojin xi tjín.

11 Kʼianga kui kotsenle je chjotale Cristo jmeni xi kjoajndí tjenkao kui kjoa tsaojin nga jemani. Kʼoa tokʼia be yaole nga jekjoa tsaojin. Tojo tso Énle Niná: “Ngayije xi kʼoentje [...] chjota kʼoatisʼin tikui kʼoexkóni” (Gálatas 6:7). Alikui kui che̱n katatsaoyaa tsanda ñá. Kʼiatsa kui kuinyaa kjoafaʼaitsjenná xi ñaki tsje tíjna, ndasʼin kuijnaa kʼoa likui kjoa jtsaojiaan (chótsenlai rekuadro xi tso: “ Jmé kjoasʼetsaojin xi skoéjian”).

KJOAFAʼAITSJEN XI FAʼAITʼA BIBLIA CHʼA̱NGIÑÁ JME XI SʼIAAN NGA JNGÓ JNGOÁ

12. Jósʼin basenkaoná Gálatas 6:5 tʼatsʼe kjoasʼetsaojin xi chjoéjiaan, kʼoa jñáni so̱koná kjoafaʼaitsjen josʼiaan nga jngó jngoá.

12 Kuila kataʼyaa ndʼaibi xi majaoni koya kjoasʼetsaojin xi tjín, je xi tsínkjoan kʼoatsokixi ya Énle Niná tsa ndatjín kʼoa tsa chʼaotjín. Ñá xi kuixónñá nga jngó jngoá jñanile kjoasʼetsaojin xi bele tokoán nga tsín chʼao sikaoná (tʼexkiai Gálatas 6:5). Tonga alikui totsaan kjoafaʼaitsjen si̱chjén. Kui xá kijnani je Biblia nga tsjoáná kjoafaʼaitsjen. Yaa bakóyaná josʼin síkjaʼaitsjen Jeobá. Kʼiatsa nda chótʼayajiaan kjoafaʼaitsjen xi faʼaitʼa Biblia koa̱nchoyaná “josʼin nga mele Nainá [Jeobá]” nga kjuinkoaa yaoná (Efesios 5:17).

13. Jméni xi koasenkaoná nga tsínkui chjoéjiaan kjoasʼetsaojin xi tsín sasénle Jeobá.

13 Nga jngó jngó chjotale Cristo alikui tongóson kji jekoanchjine kjoafaʼaitsjenle nga male faʼájin je xi ndatjín kao xi chʼaotjín (Hebreos 5:14). Xi ijngosani, kjaʼaí kjaʼaí kjoasʼetsaojin tsjoachaa nga jngó jngoá. Kuinga tsín koa̱nngósonsíñá ngatsʼiaa jmeni xi chjoéjiaan. Ninga kʼoalani, nʼio machjén nga kjitʼaa si̱kjaʼaitsjenjiaan kjoafaʼaitsjen  xi faʼaitʼa ya Biblia kʼoa kui katasíxákao kjoafaʼaitsjenná kao ni̱ma̱ná. Kʼiatsa kʼoasʼiaan, ngisa choa ñʼai koa̱nná nga tsínkui chjoéjiaan kjoasʼetsaojin xi tsín sasénle Jeobá (Salmo 119:11, 129; 1 Pedro 2:16).

14. 1) Jméni xi kʼoati kuenta sʼiaan xi tʼatsʼe kjoasʼetsaojin. 2) Jméni xi koasenkaoná nga kui títjon si̱kʼéjnaa ngantsjai xi tʼatsʼe Niná.

14 Tojosísʼin tiʼyaa, machjénní nga chjónangilee yaoná jótjío kjoasʼetsaojin xi tsjoachaa nga̱ kʼoasʼin jchañá jósʼin tiʼyatokoán jmeni xi ndatjín kʼoa jmeni xi chʼaotjín. Tonga  xi kʼoati kuenta sʼiaan kuiní jokji tse nichxin nikʼayalee kjoasʼetsaojin jebi, nga̱ yaa jchañá tsakui ngisa títjon tinikʼéjnaa. Je xi ngisa títjon nikʼéjnaa je xi chjotale Cristo maa kuiní xi tʼatsʼe Niná (tʼexkiai Mateo 6:33). Jméni xi koasenkaoná nga tosi tonda kʼoasʼiaan. Kui kjoafaʼaitsjen xi kitsjoa je pastro Pablo: “Chótsaon, tsokʼoa, nga kixi timao, ali joni chjota xi tsínle kjoafaʼaitsjenjin, tonga joni chjota xi tjínle kjoafaʼaitsjen. Ali nichxinjin nichalao yaono” (Efesios 5:15, 16). Kʼiatsa nda kʼoéndajiaan jotjín tse nichxin nikʼayaa nga bʼetsaojiaan ngisa tse nichxin sʼe̱ná nga kui kʼoasʼiaan jmeni xi ngisa chjíle, xi koasenkaoná nga nda kuijnaa ngixko̱n Niná (Filipenses 1:10TNM).

15. Ánni nga ndatjínsíni nga chʼa̱sjengiaa kjoasʼetsaojin xi to jao bʼéná kʼoa kao xi bele tokoán nga tsín ndatjín.

15 Ijngokʼala si̱kʼaxki̱ngáñá manzana xi kanikʼaxkiaa ya párrafo xi títjon. Kʼianga tsín ya chi̱nee jñani ʼndotʼa kji saʼnda bichatʼa choaa jñani nda kji. Kʼoakjoánti tjínni xi tʼatsʼe kjoasʼetsaojin, ñaki chʼasjengiñá je xi kontra tíjnale Énle Niná. Tonga kʼoati machjén nga chʼa̱sjengiaa kjoasʼetsaojin xi to jao bʼéná kʼoa tsa bele tokoán nga tsín ndatjín kʼoa chʼaosʼin sikʼéjnaná ngixko̱n Jeobá (Proverbios 4:25-27). Xi koasenkaoná nga kʼoasʼiaan kuinga ñaki kʼoasʼin koanngíntjenngiaa kjoafaʼaitsjen xi faʼaitʼa Énle Niná.

“NGAYIJE XI TSJE TJÍN”

Je kjoafaʼaitsjen xi faʼaitʼa Biblia basenkaoná nga kui chjoéjiaan kjoasʼetsaojin xi tsín chʼaosʼin síkatíoná ngixko̱n Niná

16. 1) Jósʼin bakoá nga kʼoatisʼin nikjaʼaitsjeen tsanda ñá josʼin síkjaʼaitsjen Jeobá. 2) Jósʼin koanngínkoaa yaoná kʼianga nyaon nyaon.

16 Kʼiatsa mená kʼoétsaojiaan, ñá xi ñaki chjotale Cristo maa, kui títjon sʼiaan kuenta josʼin síkjaʼaitsjen Niná. Kʼoa xi koasenkaoná jé Biblia nga̱ ya faʼaitʼa kjoatéxomale Jeobá kʼoa yaa kʼoatso josʼin síkjaʼaitsjen. Tobʼelañá, koaan kʼoéxkiaa jotjín koya kjoa xi kisikʼaxki̱ Salomón, jñanile xi jtike Jeobá, jolani “xi ndiso ni̱je̱n”, “xi njínle chjota xi tsín jme jée tjínle bʼéjten ntsja”, “xi kui bʼénda ya jinni̱ma̱le xi chʼaotjín”, “xi chjinga ndso̱ko̱ nga kʼoasʼín xi chʼaotjín” (Proverbios 6:16-19). Kʼianga jejchaa josʼin síkjaʼaitsjen  Niná, jókoa̱n sʼiaan. Je salmista kʼoatso jokoa̱n sʼiaan: “Jon xi tsjoachao je Jeobá jticha katamao je xi chʼaotjín” (Salmo 97:10). Je kjoasʼetsaojin xi chjoéjiaan kui koako nga nʼio jtichaa tsanda ñá jmeni xi jtike Jeobá (Gálatas 5:19-21). Kʼoa li tsa tokʼiajin kʼoasʼiaan nga chjota tjíobená, kʼoati tjínnele kʼoasʼiaan kʼianga toñá tiyoaa nga̱ kʼiaa ʼyale tsa ñaki jticha kjoaixiaa xi chʼaotjín (Salmo 11:4; 16:8). A me kjoaixiná nga kʼoasʼin koanngínkoaa yaoná jotso je Jeobá. Kʼiatsa jaon, kuenta sʼiaan nga nyaon nyaon je kjoafaʼaitsjen xi faʼaitʼa Énle Niná tojmeni xi sʼiaan (2 Corintios 3:18).

17. Jméni xi chjónangilee yaoná tʼatsʼe kjoasʼetsaojin xi chjoéjiaan.

17 Jmésani xi koa̱n sʼiaan kʼianga jchaa tsa sasénle Jeobá kjoasʼetsaojin xi chjoéjiaan. Machjénní nga chjónangilee yaoná: “A nda sikaona kjoasʼetsaojin jebi kʼoa a tojo nda sikʼéjnana ngixko̱n Niná”. Tobʼelañá, tsa jngola pelíkula chótsenlee títjon kjoanla chjónangilee yaoná: “Jósʼe̱ kjoafaʼaitsjenna nga jekakotsenle”. Chótʼayajinla kʼaa je kjoafaʼaitsjen xi faʼaitʼa Énle Niná xi koasenkaoná tʼatsʼe jebi.

18, 19. 1) Jósʼin basenkaoná je kjoafaʼaitsjen xi faʼaitʼa ya Filipenses 4:8 kʼianga kui chjoéjiaan kjoasʼetsaojin xi ndatjín. 2) A tjíosakʼa kjoafaʼaitsjen xi faʼaitʼa ya Énle Niná xi koasenkaoná (chótsenlai ya nota).

18 Jngo kjoafaʼaitsjen faʼaitʼa ya Filipenses 4:8, jñani tso: “Ngayije xi kjoakixi, ngayije xi ñaki kʼoatjín, ngayije xi tjínle kjoakixi, ngayije xi tsje tjín, ngayije xi naská tjín, ngayije xi nda tíʼyale, tojñanile xi tjínle kjoanda, tojñanile xi tjínle kjoanʼosjenda. Kui xi si̱kjaʼaitsjaon”. Kʼianga kʼoakitso én jebi je pastro Pablo ali tʼatsʼe kjoabʼetsaojinjin kinchja̱ni, kui kinchja̱ni  jmeni xi sasénle Niná xi tjínnele nga si̱kjaʼaitsjenjiaan (Salmo 19:14). Tonga je én xi kitso kʼoati basenkaoná xi tʼatsʼe kjoasʼetsaojin xi chjoéjiaan. Jósʼin basenkaoná.

19 Kuila si̱kjaʼaitsjenjiaan pelíkula xi chotsenlee, videojuego xi niská, canción xi noʼyalee kʼoa kao xi kjaʼaísanile, kʼoa chjónangilee yaoná: “A kui xinyá kjoafaʼaitsjenna xi tsje tjín”. Tobʼelañá, kʼiatsa jngo pelíkula jekachotsenlee, si̱kjaʼaitsjenjiaan jmé xi kaxinyá kjoafaʼaitsjenná. Kʼiatsa kui kaxinyá xi ndatjín, xi tsje tjín, xi nda kabʼétsaojinná, ndajin tjín jmeni xi kachotsenlee. Tonga tsa chʼao kasʼe kjoafaʼaitsjenná alikuijin ndatjín (Mateo 12:33; Marcos 7:20-23). Jósʼin síkiʼaonná nga kui nikjaʼaitsjeen xi jndí tíjna. Alikui tinyʼán sʼeni tokoán, alikui tichʼao manile kjoafaʼaitsjenná tʼatsʼe xi chʼaotjín kʼoa tsakui nichxin saʼnda likui tinda kuijnañá ngixko̱n Niná (Efesios 5:5; 1 Timoteo 1:5, 19). Kuinga machjénsíni nga tosa ñaki kʼoéchjoalee yaoná kjoasʼetsaojin xi chʼaotjín (Romanos 12:2). * Kʼoatisʼin si̱kjaʼaitsjeen josʼin kisikjaʼaitsjen je salmista kʼianga kitsole Jeobá: “Ali bʼaiʼndejin nga kui kotsenle xkoan jme xi tsín jme chjíle” (Salmo 119:37).

KUENTA SʼIAAN XI NGIKʼA

20, 21. Jósʼin koa̱n si̱chjén 1 Corintios 10:23, 24 nga chjoéjiaan kjoasʼetsaojin xi tjín.

20 Ijngosa kjoafaʼaitsjen kitsjoa je pastro Pablo xi kʼoati sʼiaan kuenta nga jngo jngoá: “Ngayije tjoʼndená, tonga likui ngayije machjénná. Ngayije tjoʼndená, tonga likui ngayije nda síkinngʼaná. Niʼyajin xi básjai nga nda kʼoéjna xi totsʼeni, tonga katabásjai nga nda kʼoéjna xi kjaʼaí” (1 Corintios 10:23, 24). Jméni xi koasenkaoná nga si̱chjén kjoafaʼaitsjen jebi kʼianga mená kʼoétsaojiaan. Machjénní nga chjónangilee yaoná: “A sa̱téngi kjoafaʼaitsjenle xi ngikʼa josʼin mena kʼoetsaojian”.

 21 Tsakui nichxin tsjoáʼnde kjoafaʼaitsjenná jmeni xi bʼetsaojiaan. Tonga tsa jchaa nga tjíokʼa je ndsʼee xi tsín sasénle jme kjoasʼetsaojin xi tsjoachaa ñá, koaan kjaʼaí kjoasʼetsaojin kjoásjee. Ánni nga kʼoasʼiansíñá. Kuinga tsín mená nga ñá si̱katéngiaa je ndsʼee kʼiatsa nda tjíosíxále je Niná. Je xi kʼoasʼín i kitsole je pastro Pablo: “Kʼoasʼin bijnyitʼalao jée [je] ndsʼee, [...] kʼoatisʼin bijnyitʼalao jée Cristo”. Je xi mená kuinga si̱tjosoán én jebi: “Tikjaʼaitsjaon nga tsín kʼoéjnao xi sa̱téngi ndsʼao” (1 Corintios 8:12; Romanos 14:13). Ñá xi chjotale Cristo maa kʼoati bʼechjoalee yaoná kjoasʼetsaojin xi “tjoʼndená” tonga xi tsín síkinngʼa je ndsʼee. Kʼoa kʼoasʼin mangíntjenngiaa je kjoafaʼaitsjen xi kitsjoa je pastro Pablo (Romanos 14:1; 15:1).

22. Ánni nga jchaxkónsíñá kjoafaʼaitsjenle xi ngikʼa.

22 Kʼoa jósʼiaan kʼiatsa ñá xi tsín sasénná je kjoasʼetsaojin xi tsjoake je ndsʼee. A kjoanʼio kʼoénelee nga kʼoatisʼin katasíkjaʼaitsjen joni tsa ñá. Maijin, alikuijin ndatjín tsa to yaoná koanngínñá. Kuila si̱kjaʼaitsjenjiaan tsa karrola tinixákoaa, a tjínnele nga kʼoati kji nʼio koaikao xi ngikʼa je karrole jokji nʼio timangínkoaa ñá. Maijin. Kʼiatsa kui kjoasʼetsaojin skoéjin xi ngikʼa xi tsín kontra tíjnale jotso Biblia tonga xi tsín tsjoáʼnde kjoafaʼaitsjenná ñá, jósʼiaan. Kʼiatsa tsjoachaa xíngiaa, jchaxkónjián kjoafaʼaitsjenle. Kʼiatsa kʼoasʼiaan skoee ngatsʼi chjota nga tsín toñá nʼia kuenta yaoná, nga kʼoati nʼia kuenta je xi ngikʼa (Filipenses 2:4; Eclesiastés 7:16).

23. Jméni xi sʼiaan kʼianga kui chjoéjiaan je kjoasʼetsaojin xi ndatjín.

23 Tojosʼin jekaʼyaa, jméni xi sʼiaan kʼianga kui chjoéjiaan je kjoasʼetsaojin xi ndatjín. Títjon kjoanla kui kuenta sʼiaan tsa kontra tíjnale Biblia kjoasʼetsaojin jebi, ánni nga tosa chʼa̱sjengisíñá. Kʼoa nga kui chjoéjiaan kjoasʼetsaojin xi tsín jotso Biblia tsa ndatjín kʼoa tsa chʼaotjín, kui kjoafaʼaitsjen xi faʼaitʼa Énle Niná si̱chjén. Xi ijngosani, kʼoati kʼoéchjoalee yaoná xi chʼao kʼoe kjoafaʼaitsjenná kʼoa xi sikaténgi je chjota, kʼoa ngisa je ndsʼee. Kʼiatsa kui chjoéjiaan kjoasʼetsaojin xi ndatjín jé Niná chʼa̱sjengʼaa kʼoa tosi tonda sʼe̱ná kjoatsjoachale, ñá kʼoa kao yaniʼyaná.

^ párr. 4 Eclesiastés 5:4: “Kʼiatsa énli kʼoailai Niná, ali tijijin bisenneni énli, nga̱ je alikui sasénle je chjotachini. Kʼiatsa énli kʼoai, kʼoatʼiain jokasi”.

^ párr. 10 Jeremías 17:9: “Je ni̱ma̱ná ngisa nʼio bʼanacha tikʼoajinni tojmeni, kʼoa matso maskále. ʼYáni xi be jokjoan”.

^ párr. 19 Ya Proverbios 3:31; 13:20; Efesios 5:3, 4 kao Colosenses 3:5, 8, 20 tsjoása kjoafaʼaitsjen xi koa̱n si̱chjén kʼianga kʼoétsaojiaan.