Ir al contenido

Ir al índice

 KJOAʼMIYA 15

Ánni nga machjénsíni nga tosi tonda chótʼayai Biblia

Ánni nga machjénsíni nga tosi tonda chótʼayai Biblia

1. Jósʼin koasenkaoli kʼiatsa tosi tonda chótʼayai Biblia.

Jokji nga jetichotʼayai Biblia kao xo̱n jebi jejin ngisa tsjoachasai Jeobá. Tonga tjínnele nga sa nda sa nda koa̱ntsjoachasai (1 Pedro 2:2). Kʼiatsa meli nga so̱koli kjoabijnachon xi tsínkʼia fetʼa tjínnele chrian kuijnalai Jeobá, kʼoa je xi koasenkaoli kuinga tosi tonda chótʼayai Biblia. Tʼexkiai Juan 17:3 kao Judas 21TNM.

Kʼianga sa tse sa tse koa̱nli xi tʼatsʼe Niná kʼoati koa̱ntajasa kjoamakjainli. Kʼoa nʼio nda sʼe̱le Niná (Hebreos 11:1, 6). Nga̱ kui kjoamakjainli xosikaoli nga kʼoakoa̱nnili jéeli kʼoa nga si̱kʼantjaiyani yaoli. Tʼexkiai Hechos 3:19.

2. Jósʼin kuisenkoai chjota nga katabe tʼatsʼe Jeobá.

Koaan jngo kjoabʼetsʼoa kʼoéjnalai Jeobá nga kʼoaitʼalai yaoli ánni nga nda kuijnasíni ngixko̱n

Tsakui nichxin jemeli kʼuínyalai chjota jmeni xi jetiʼyai tʼatsʼe Niná. Toxá kʼoamani kʼianga naskátso én tjínjinná, ñaki mená kʼuínyalee toʼyani. Kʼianga sa nda sa nda koa̱nli Énle Niná kʼoati koa̱nli si̱chjain Biblia kʼianga chja̱kaonajmí chjota tʼatsʼe Jeobá kʼoa tʼatsʼe énnda chjotse xi mele nga katasʼejinle chjota. Tʼexkiai Romanos 10:13-15TNM.

Koaan je títjon chja̱kaonajmí je xíngi kʼoa kao je chjota xi ndali. Tonga ngasin nganda chja̱koai. Ali tokʼoajin ʼmikixilai nga tsín ndatjín jme xi makjainle. Tosa kui tʼeyanajmílai je kjoanichikontʼain xi kjoaʼaíkao Niná. Kʼoa kuenta tʼiain nga je xi ngisa fini chjota ali tsakuijin jme xi ʼmilee, kui josʼin mangínkoaa yaoná. Tʼexkiai 2 Timoteo 2:24, 25.

3. Jmé kjoanda xi sʼe̱li tsa tosi tonda chótʼayai Biblia.

Kʼiatsa tosi tonda chótʼayai Énle Niná ngisa koa̱ntajasa kjoamakjainli kʼoa ngisasa nda kuijnai ngixko̱n Jeobá. Kʼoa ñaki ʼndíle kuitsoli. Tʼexkiai 2 Corintios 6:18.

 4. Jméni xi koasenkaoli nga koa̱nchriantʼasalai Niná.

Kʼiatsa tosi tonda chótʼayai Biblia sa nda sa nda koa̱nchoyali josʼin kʼuíntjenngi kjoatéxomale Niná (Hebreos 5:13, 14). Kʼoatʼinlai jngo testigole Jeobá nga katatsoyali Énle Niná kao je libro Jmé kjoanni xi bakóya je Biblia. Kʼianga sa tse sa tsesa jchai tʼatsʼe Niná ngisasa nda kuijnai kʼoa ngisa tsjoa sʼe̱li. Tʼexkiai Salmo 1:1-3 kao 73:27, 28.

Je énnda chjotse xi faʼaitʼa Biblia yaa tínroani tʼatsʼe Jeobá, je Niná xi tsjoa tjínle. Kʼoa tsa meli nga koa̱nchriantʼalai je Jeobá machjénní nga kʼuín je kjoajtín xi batío choʼndale (Hebreos 10:24, 25). Tsa tosi tonda kʼoénelai yaoli nga kʼoasʼiain jme xi mele Jeobá sʼeeli kjoabijnachon xi tsínkʼia fetʼa. Alikui jao tjínná nga je xi ngisa nda sʼiain kuinga je Niná si̱chriantʼalai. Tʼexkiai 1 Timoteo 1:11TNM kao 6:19.