Ir al contenido

Ir al índice

 KJOAʼMIYA 14

Ánni nga jngo naxinandá tíjnasínile Niná ndʼaibi

Ánni nga jngo naxinandá tíjnasínile Niná ndʼaibi

1. Ánni nga je chjota israelita kiskoejinsíni Niná ngasʼa nga naxinandále koan.

Nichxin kjoatse, je Niná jngo naxinandá kisikao je ntje̱le Abraham kʼoa naxinandá Israel kitsole. Kitsjoale kjoatéxoma kʼoa jtín sʼin kisikatío. Tojé naxinandá jebi xi ñaki je Jeobá tsakʼétsʼoale, kʼoa tojéní xi kitsʼaile kjoatéxomale Niná (Salmo 147:19, 20). Kʼoa kao naxinandá Israel koa̱nchikontʼainni tsakai ngatsʼi naxinandá xi tjín Sonʼnde. Tʼexkiai Génesis 22:18.

Je Niná jé naxinandá Israel kiskoejin nichxin kjoatse nga testigole koan. Jme xi jaʼatojin naxinandá jebi kui bakóná nga tongisa nda nga nitjosoán kjoatéxomale Niná (Deuteronomio 4:6). Je chjota xi xin naxinandále kʼoati tsabe ʼyani je Niná kʼianga tsabe je chjota israelita. Tʼexkiai Isaías 43:10, 12.

2. Ánni nga mesínile Niná nga jtín sʼin katabatio choʼndale ndʼaibi.

Je naxinandá Israel kisicha je kjoanda xi kisʼele ngixko̱n Jeobá. Kʼoa nga kʼoakoan, jé chjotale Cristo kiskoejin Jeobá nga naxinandále koan (Mateo 21:43; 23:37, 38). Nichxin xi tiyoaa ndʼaibi, je xi testigo tsole Jeobá jéní xi ñaki chjotale Cristo ma, ali tsa tijejinni je chjota israelita. Tʼexkiai Hechos 15:14, 17.

Je Jesús kʼoakitsole chjota tje̱nngile josʼin sixá kʼianga kuitsoyason kʼoa josʼin sinkjín chjotale jngo tjíjtsa Sonʼnde (Mateo 10:7, 11; 24:14; 28:19, 20). Kʼoa ndʼai ndʼaibi nga ngisa nʼio tjíotsoyason je chjotale Cristo. Je nichxin fetʼa xi tiyoaa ndʼaibi, jenkjín miyón mani je chjota xi tíbʼéxkó Jeobá ngakjijnda naxinandá kʼoa yaa tísíkatíojin je relijión xi ñaki kixi (Apocalipsis 7:9, 10). Jmé kjoanda xi tjínle kʼianga kʼoasʼin jtín tjío je xi ñaki chjotale Cristo ma. Tsjoánganʼiole xínkjín kʼoa binyakaongañá xínkjín. Kʼoa tongóson tso jme xi tjíoʼmiyale  ngatsʼi kʼianga batiojtín nga kotʼaya Biblia. Tʼexkiai Hebreos 10:24, 25.

3. Kʼiá kinroatsʼiani je relijión xi tsʼe testigole Jeobá.

Kʼiaa kinroatsʼiani nga jejaʼato nó 1870. Nga kui nichxin jngo jtín koanni chjota xi nda kiskotʼaya Biblia. Kʼiaa tsabe jokjoantjínni énle Niná xi tsín ʼyale tsakai josʼin tsoyanile. Chjota jebi be nga kʼoakitsole Jesús je chjotale nga katatsoyason tʼatsʼe gobiernole Niná kʼoa kuinga tsakʼétsʼiakaosíni nga kitsoyason ngakjijnda naxinandá. Kʼoa nga nó 1931 kʼiaa testigole Jeobá tsakʼin. Tʼexkiai Hechos 1:8; 2:1, 4, 11, kao 5:42.

4. Jósʼin tjíosíxájtín je testigole Jeobá nga tjíotsoyason.

Nichxin kjoatse, nʼio nda kisixá ngatsʼi jtín xi kisatio xi tsʼe naxinandále Cristo, nga̱ jngo jtín koanni chjotale Cristo xi tsakándiaale. Kʼoa je xi kui xá jebi kisʼenele kuenta kisʼin nga je Jesús xi ngʼajko̱ tíjnale naxinandále (Hechos 16:4, 5). Kʼoa nichxin xi tiyoaa ndʼaibi, kʼoati jngo jtín mani je ndsʼee xi jenʼio kjoatse tjíosíxále Niná, xi Cuerpo Gobernante ʼmi, xi tjíobándiaale ngatsʼi testigole Jeobá kʼoa xi tjíosíkuinda sucursal xi tjíole jngo tjíjtsa Sonʼnde. Jmé xá xi kjima nga jngó jngó sucursal. Yaa tífaʼatoya xi kjaʼaí én je xo̱n xi énle Niná faʼaitʼa, tiyaa kjimandani kʼoa tsʼato jaon siento koya én tíbitjo. Je Cuerpo Gobernante kui Biblia síchjén nga bándiaale kʼoa nga tsjoánganʼiole ngatsʼi jtín xi tjíole je testigole Jeobá, xi jetsʼato jngo siento jmi mani. Kʼoa nga jngó jngó jtín jebi tjío xi chjotajchínga sʼin tjío, xi ngasin nganda síkuinda je choʼndale Niná. Tʼexkiai 1 Pedro 5:2, 3.

Ngatsʼi je testigole Jeobá tjíosíxájtín nga tjíotsoyason je énnda chjotse kʼoa nga chjotale Cristo tjíosíkao je chjota. Kʼoa xki̱ niʼya tsoyason tojo kisʼin je pastro (Hechos 20:20). Kʼoati bakóyale Biblia je xi tsjoake énle Niná. Ngatsʼi je testigole Jeobá tsjoakengañá xínkjín kʼoa ñaki ndsʼe kao tichja sʼin bekon xínkjín kʼoa jé Jeobá, je Nʼainá xi tíjna ngʼajmi, tjíosíkuinda (2 Tesalonicenses 1:3). Kʼoa mani nga tjíobʼénele yaole nga kʼoatjíosʼín josʼin mele Jeobá kʼoa nga tjíobinyakao chjota, ñaki jtín sʼin tjío jngo tjíjtsa Sonʼnde kʼoa ñaki tsjoa tjíole ngatsʼi. Tʼexkiai Salmo 33:12 kao Hechos 20:35.