Ir al contenido

Ir al índice

 KJOAʼMIYA 5

Jmé xi tjínndajinle Niná xi kao Sonʼnde

Jmé xi tjínndajinle Niná xi kao Sonʼnde

1. Jmé xá kisindani Niná je Sonʼnde.

Je Jeobá kui xá kisindani je Sonʼnde nga i̱ kuiyoaa xi chjotaa. Kʼianga kisinda je Adán kao Eva, je chjotajchínganá xi títjon tsakatio, ali tsakuijin xá kisindani nga ya koatio ngʼajmi. Nga̱ je Niná tokʼoa jekisinda je ánkje ya ngʼajmi (Job 38:4, 7). Je Jeobá naskánachon jña kisikʼéjna je chjota xi títjon kisinda, yaa ʼNdenaxó xi Edén tsakʼin kisikʼéjna (Génesis 2:15-17). Je Niná kʼoakitsole je Adán nga koa̱n kʼoéjna ngantsjai nichxin i̱ Sonʼnde kao ngatsʼi xti xi sʼe̱le. Tʼexkiai Salmo 37:29 kao 115:16.

Tonga toyakjoán ya ʼNdenaxóle Edén jña naskánakoanchon. Je Adán kao Eva kʼoatsakʼinle nga katamankjínya ánni nga choa choa ʼndenaxó sikaosíni jngo tjíjtsa Sonʼnde (Génesis 1:28). Je Sonʼnde nikʼiajinla kuixo̱ya, chjota koatioson ngantsjai nichxin. Tʼexkiai Salmo 104:5.

Chótsenlai je video Jmé xá kisindani Niná je Sonʼnde

2. Ánni nga tsín naskáchonsíni ndʼaibi i̱ Sonʼnde.

Kuinga tsín kisitjosonle Niná je Adán kao Eva. Nga kʼoakisʼin tsakichonsjejin ya ʼNdenaxóle Edén. Kichaní ʼNdenaxó jebi kʼoa nijngojinla chjota xi kjimale nga kʼoatísíchon ijngokʼani. Kʼoa tojo tso Biblia, je Sonʼnde jé kjinentsja chjotatsʼen saʼnda nga kʼia (Job 9:24). Tʼexkiai Génesis 3:23, 24.

A toje toya kisʼe jme xi tjínndajinle Jeobá tʼatsʼe chjotasonʼnde. Majain, nga̱ je Jeobá jéní Niná xi tjínle ngayeje nganʼio kʼoa likʼia chajin jme xi bʼéndajin (Isaías 45:18). Kʼoa je Niná jetjínndajinle nga kʼoasʼin koatio ijngokʼani chjota jokjoansʼin koanmele nga sʼa kisinda. Tʼexkiai Salmo 37:11, 34.

3. Jósʼin sʼe̱jna ngindiani je ʼNdenaxó.

Je Jesús ʼndenaxó sikao je Sonʼnde nga̱ jé xi Rey sʼin kisikʼéjna Niná. Je Jesús kao ánkjele sikjeson ngatsʼi je xi kontra tjíole Niná kʼianga sʼe̱jna je kjoajchán xi Armagedón ʼmi. Xijekoa̱n, jngo jmi nó sikʼéjnaʼyanʼio je Na̱i. Tonga je Jesús sikuinda  kʼoa koandiaale je choʼndale Niná ánni nga kjoaʼatojin tjínkonsíni kjoaxkón jebi. Xijekoa̱n, je choʼndale Niná yaa koatio ya ʼNdenaxó tokʼia saʼndani. Tʼexkiai Apocalipsis 20:1-3 kao 21:3, 4.

4. Kʼiáni tjóxin je kjoañʼai.

Kʼiáni kjoaʼaxin Niná je kjoatsʼen xi tjín Sonʼnde. Je Jesús jngo “choa̱” kitsjoa xi koako nga jemachrianle nga kʼoakoa̱n. Jmeni xi chon ndʼaibi kui bakóná nga jeme “kjoetʼa [xi chon] sonʼndebi”. Tsa tosi tondalani kʼoakoa̱nchon chanjin kjoeson ngatsʼi chjotasonʼnde. Tʼexkiai Mateo 24:3, 7-14, 21, 22.

Je Jesús jngo jmi nó koatexomason Sonʼnde kʼoa yaa tje̱n ngʼajmi koatexomani. Rey jebi, tobijbi kjoaʼaxin ngayeje kjoañʼai xi tjín (Isaías 9:6, 7; 11:9). Kʼoa mani nga kʼoati naʼmitítjon koa̱n, sitsje jéele ngatsʼi chjota xi tsjoake Niná. Tojosísʼin tiʼyaa, je Niná jé Jesús sichjén nga kjoaʼaxin je chʼin, je kjoabiya kʼoa nga i̱sʼin majchíngaa. Tʼexkiai Isaías 25:8 kao 33:24.

5. ʼYáni xi ya koatio ya ʼNdenaxó.

Ya Ndʼia jña kotʼaya je Testigole Jeobá jtsaojinní je chjota xi tsjoake Niná kʼoa xi tjíosítjosonle

Je chjota xi sítjosonle Niná yaa koatio ya ʼNdenaxó (1 Juan 2:17). Je Jesús kʼoasʼin tsakʼénele chjotale nga koaikásjai je chjota xi ndʼé tjío ni̱ma̱le kʼoa nga katatsoyale jméni xi sʼin nga nda koatio ngixko̱n Niná. Je Jeobá miyón mani je chjota xi tísíkatíonda ndʼaibi xi ya koatio ya ʼNdenaxó (Sofonías 2:3). Je xíngiaa xi ya batiojtín ya Ndʼia jña kotʼaya je Testigole Jeobá, tjíoʼmiyale jósʼin koatiokao xínkjín xi jechixan kʼoa jósʼin sijchá ʼndíxtile. Je xti kʼoa kao xi xijchá ma ñatje̱n mañaa nga bexkón Niná kʼoa ʼmiyale jósʼin koasenkao énle Niná nga ngisa nda koatio. Tʼexkiai Miqueas 4:1-4.