Ir al contenido

Ir al índice

 KJOAʼMIYA 3

A ñaki tʼatsʼe Niná jaʼaini je énnda chjotse

A ñaki tʼatsʼe Niná jaʼaini je énnda chjotse

1. ʼYá tsʼe én xi nroatʼa Biblia.

Je énnda xi tso nga i̱ tʼanangi kuiyoaa ngantsjai nichxin yaa Biblia faʼaitʼa (Salmo 37:29). Je chjota xi kiskoejin Niná nga kiski je xi jankan kaoni jaon libro tjínle je Biblia ñachanla koanni. Nga aon libro xi fitsʼiani jé Moisés kiski kʼoa jela jan jmi basen nó tjínle nga kiski. Kʼoa je libro xi fetʼani jé pastro Juan kiski kʼoa jela jngo jmi kao ñajan siento nó tjínle nga kiski. ʼYá tsʼe én xi nya ya Biblia. Je chjota xi kiski Biblia kui kjoafaʼaitsjenle Niná kiski, ali tsakuijin kiski kjoafaʼaitsjen xi tsʼe. Kʼoa je Niná kui nganʼiotsjele kisichjén nga tsakʼéjnatsenle énle (2 Samuel 23:2). Jebi kui xi bakóná nga tsʼení Jeobá je én xi nroatʼa Biblia. Tʼexkiai 2 Timoteo 3:16 kao 2 Pedro 1:20, 21.

Chótsenlai je video ʼYá tsʼe én xi nroatʼa Biblia

2. Ánni nga koa̱n koa̱nkjainsíniná nga ñaki kʼoatjín jotso je Biblia.

Kuinga tsín jao tjínsíniná nga tʼatsʼe Niná jaʼaini je Biblia nga̱ tongini kʼoatso jme xi ma kʼoa ñaki kʼoakjoánsʼin bitjoson. Tsa jelani chjota alikuijin kuitjoson énle (Josué 23:14). Tojékjoán je Niná, xi tjínle ngayeje nganʼio, xi male tongini kʼoatso jmeni xi koa̱n. Tʼexkiai Isaías 42:9 kao 46:10.

Tsínsa ijngo libro xi mangósonkao Biblia nga̱ tʼatsʼe Niná jaʼaini. Siento koya én tíbitjo kʼoa miyón jetíbʼabíson. Ningalani jenʼio kjoatse kichji, mangósonkao jmeni xi jebe ndʼaibi je chjota científico. Kʼoa nijngojinla én kjántʼa ninga ñachan koanni chjota xi kiski. * Xi ijngosani, ngakjijngo je Biblia kui bakóná je kjoatsjoachale Niná kʼoa male síkʼantjaiya jokjoan je chjota. Kuinga jemiyón masíni chjota xi ñaki tjíojngo kon nga ñaki Énle Niná je Biblia. Tʼexkiai 1 Tesalonicenses 2:13.

Chótsenlai je video Ánni nga koa̱n koa̱nkjainsíniná nga ñaki kʼoatjín jotso je Biblia

 3. Jméni xi tínchja̱ni je Biblia.

Kui tínchja̱ni jme xi tjínndajinle Niná tʼatsʼe chjotasonʼnde. Bʼéyanajmíná jme xi koan kʼianga sʼa koannda je chjota kʼoa josʼin kisicha je ʼndenaxó jña tsakatio. Tonga kʼoati tsoya josʼin sʼe̱jna ijngokʼani ʼndenaxó jebi. Tʼexkiai Apocalipsis 21:4, 5.

Je Énle Niná kʼoati faʼaitʼa kjoatéxoma kao kjoafaʼaitsjen. Kʼoati bʼéyanajmí jokisikao Niná je chjota xi nda kisʼin kʼoa xi chʼao kisʼin nichxin kjoatse, kʼoa jebi kui bakóná jokjoan je Niná. Tojosísʼin tiʼyaa, je Biblia basenkaoná nga ʼyaa je Niná kʼoa tsoyaná jósʼiaan nga miyole koaan. Tʼexkiai Salmo 19:7, 11; Santiago 2:23, kao 4:8.

4. Jósʼin koa̱nchoyali jme xi tínchja̱ni je Biblia.

Kʼianga kitsoya Énle Niná je Jesús títjon kjoanla kui kisikʼaxki̱ jotso Biblia kʼoa kʼiaa kitsoya josʼin tínchja̱ni, ánni nga koanchoyasínile chjota jme “xi tjíotʼa xo̱n Escritura”. Kʼoa je xo̱n jebi kʼoatisʼin kuitsoyali ánni nga koa̱nchoyasínili jme xi bakóya je Biblia. Tʼexkiai Lucas 24:27, 45.

Je énnda chjotse xi tíbájinkonná Niná nʼio naskátjín, tsínsa jme xi mangósonkao. Tonga nʼio nkjín chjota xi tsín mandosinle nga nrʼoé kʼoa tjínkʼa xi saʼnda majtile nga kui chjakaoñá. Tonga ji li bʼaiʼndejin nga kui sítsʼeli. Je Biblia kʼoatso nga je chjota xi skótʼaya tʼatsʼe Niná koaan koatio ngantsjai nichxin. Tʼexkiai Juan 17:3.

 

^ párr. 3 Tsa mesali jchai tʼatsʼe jebi, chótʼajin je xo̱n A ʼyaní jme xi tínchjani je Biblia.