Ir al contenido

Ir al índice

 KJOAʼMIYA 8

Ánni nga títsjoáʼndeni Niná nga tjín kjoatsʼen kao kjoañʼai

Ánni nga títsjoáʼndeni Niná nga tjín kjoatsʼen kao kjoañʼai

1. Kʼiá kinroatsʼiani je kjoatsʼen.

Jojekji tse nga títsjoáʼnde Niná nga je chjota tjíobatéxoma, tíʼyale nga tsín kjimale tjíofaʼáxin je kjoa xi tjín

Kʼiaa kinroatsʼiani je kjoatsʼen kʼianga tsakʼéndiso títjon je Na̱i. Je Na̱i ánkje ndaní ngasʼa kʼoa ñaki tsjení, tonga likui tosi tonda “tsakʼejnajinle xi kjoakixi” (Juan 8:44). Je Na̱i koanmele nga je sʼe̱tsʼoale ninga toje Niná xi tjínnele sʼe̱tsʼoale. Jméni xi kisʼin. Énndiso kisichjén nga tsakʼanachale Eva tojoni nga je kisitjosonle ʼndele nga Niná sitjosonle. Xijekoan, je Adán kʼoati kisʼin jokisʼin chjoónle kʼoa kʼiaa kinroatsʼiani nga kjoañʼai chjaʼá xi chjotaa kʼoa nga biyaa. Tʼexkiai Génesis 3:1-6, 19.

Jé títjon Na̱i xi yátsʼi̱n tsakasénle Niná kʼianga kʼoakitsole Eva nga katafaʼatone kjoatéxomale Niná. Likui tsabexkón je Jeobá nga toje xi tiʼndele koatexoma. Kʼoa ndʼaibi me ngatsʼi chjota nga ya tjíosíjngokao yaole je Na̱i nga tsín tjíobexkón je kjoatéxomale Jeobá. Kuinga kʼoatsosíni Biblia nga jéní “na̱i xi batéxoma sonʼndebi”. Tʼexkiai Juan 14:30 kao 1 Juan 5:19.

2. A tsín ñaki nda jmeni xi kisinda Niná.

Ngayeje xi kisinda Niná ñaki ndaní. Kʼianga kisinda je ánkje kʼoa kao chjota kʼoasʼin kisinda nga koa̱n sitjosonle (Deuteronomio 32:4, 5). Je Niná kʼoasʼin kisindaná nga koa̱nná chja̱ʼajiaan je xi ndatjín kao xi chʼaotjín. Tsakui chjoéjiaan xi ndatjín koakoñá nga tsjoachaa je Niná. Tʼexkiai Santiago 1:13-15 kao 1 Juan 5:3.

3. Ánni nga títsjoáʼndesíni Niná nga kjoañʼai tjín.

Je Jeobá tochoatsení nga títsjoáʼnde nga kʼoasʼin tsín tíʼyaxkón kjoatéxomale. Ánni. Kuinga kataʼyale nga nijngojin chjotaxá xi koa̱nle nda sikatío chjota, nga̱ tsínle nganʼiole Niná (Eclesiastés 7:29; 8:9). Xi jetsʼato jaon jmi nó tjíobatio chjota ñaki tíʼyale nga je  chjotaxá sonʼnde likui kjimale tjíofaʼáxin kjoajchán, chʼin, nga kʼoasʼin faʼatone kjoatéxoma je chjota kʼoa nga kui kʼoasʼín xi tsín kixi tjín. Tʼexkiai Jeremías 10:23 kao Romanos 9:17.

Tsa kʼoaiʼndee nga je Niná koatexomaná nʼio tse kjoanda so̱koná (Isaías 48:17, 18). Je Jeobá jeme kjoaʼaxin je chjotaxá xi tjín Sonʼnde kʼoa tojé koatio je chjota xi mele nga je Niná koatexomale (Isaías 11:9). Tʼexkiai Daniel 2:44.

Chótsenlai je video Ánni nga títsjoáʼndesíni Niná nga kjoañʼai tjín

4. Jósʼin koakolee kjoanda je Niná nga kʼoasikji tsejta.

Je Na̱i kʼoakitso nga totjín xi sʼínnile je chjota kʼianga Niná síxále. Tsa nda koanngínkoaa yaoná jokji nichxin títsjoáʼndesa Niná koakoñá nga ñaki to chjotandiso je Na̱i kʼoa nga mená nga je Niná katabatéxomaná ʼndele nga je chjotaxá sonʼnde. Tʼexkiai Job 1:8-12 kao Proverbios 27:11.

5. Jósʼiaan tsa mená nga je Niná katabatéxomaná.

Tsakui chjoéjiaan je xi sasénle Niná koakoñá nga mená nga je katabatéxomaná

Machjénní nga kataʼyaa jósʼin mele Niná nga kʼoétsʼoalee kʼoa ya si̱siaan je relijión xi kixi, nga̱ je relijión jebi yaa Biblia bʼangini jmeni xi bakóya (Juan 4:23). Kʼoa tsa kʼoasʼiaan jokisʼin Jesús nga tsín kjoa polítika kʼoa nga tsín kjoajchán kijin, koakoñá nga tichʼasjengiaa josʼin batéxoma je Na̱i. Tʼexkiai Juan 17:14.

Je Na̱i síchjén nganʼio xi tjínle kʼianga xájndí katasʼín chjota kʼoa nga kui kʼoakatasʼín xi tije síkiʼaonni yaole. Kʼianga kuinyaxinlee kjoa xotjín, tsakui nichxin skoe̱sinná je miyoná kʼoa kao xíngiaa kʼoa saʼnda kjoa koa̱njngíná (1 Pedro 4:3, 4). Jméni xi sʼiaan tsa kʼoakoa̱ntʼeen. Tosa je ngisa si̱miyoaa je chjota xi tsjoake Niná kʼoa si̱tjosoán jotso Biblia. Kʼiatsa kʼoasʼiaan, ñaki kʼoéjnatsenñá nga ñaki to kjoandiso jme xi kitso je Na̱i, kʼianga kʼoakitso nga nijngojin chjota sixále Niná kʼiatsa kjoa kjoaʼatojin. Tʼexkiai 1 Corintios 6:9, 10 kao 15:33.

Je Niná nʼio tsjoakená kʼoa kui xi bʼéjngo tokoán nga kjoaʼaxin je kjoatsʼen kao kjoañʼai xi tjín. Je chjota xi koako nga makjainle tʼatsʼe Niná, xi tsonile, xi mele nga je Niná katabatéxomale, koatio ngantsjai nichxin i̱ Sonʼnde. Tʼexkiai Juan 3:16.