Ir al contenido

Ir al índice

 KJOAʼMIYA 9

Jngo kaxaje kisinda Noé

Jngo kaxaje kisinda Noé

JNGO koanni chjoónle Noé kʼoa jan koanni xtile. Sem, Cam kʼoa Jafet tsakʼin xtile. Kisʼele yánchjín nga jan. Jin koansonni yaniʼyale Noé.

Je Niná kʼoakitsole Noé nga kui katasínda jmeni xi kjesa síndajin. Kʼoakitsole nga jngo kaxaje katasínda. Kaxa jebi kʼoakisʼeje joni jngo chitso, kʼoa ndo kisʼe. “Jan piso tʼelai”, kʼoa “tʼenyʼoakjáyai” kitsole Niná. Kuinga tsakʼényʼoakjáyani nga je tsakatioʼya Noé kao yaniʼyale, je cho̱, kʼoa kao tsojmi xi kiskine.

Niná kʼoakitsole Noé josika kaxa jebi ánni nga tsín nandá kjoaʼasʼensíni. Kitsole: “Jngo jtsínʼio sikasén kʼoa sikjesonña ngayeje xi tjín sonʼnde. Xi tsín ya tíjnaʼya ya kaxa kuiyání”.

Noé kao xtile kisitjosonle Niná kʼoa tsakʼénda je kaxa. Tonga totsakijno chjota xi ngikʼa. Tosi tonda tsʼen koan. Liʼya xi koankjainle kʼianga kʼoakitsole Noé jme xi sʼin Niná.

Kʼianga kʼoasikjije kisʼe je kaxa nʼio tse koanjngonile. Kʼianga je ki nó, chan koanjngole. Niná kʼoakitsole Noé nga katasíkjaʼasʼen cho̱. Kʼoakitsole nga tjínkʼa cho̱ xi jao jao sikjaʼasʼen, jngo chjoón jngo xʼin. Tonga koati kitsole nga tjínkʼa cho̱ xi ñato sikjaʼasʼen. Kʼoati kitsole Noé nga sikjaʼasʼen jotjín koya nise tjín. Noé kʼoakjoan kisʼin jokitsole Niná.

Xijekoan, Noé kao yaniʼyale kʼoati jaʼasʼen ya yakaxa. Xijekoan, Niná tsakʼéchjoa xo̱ntjoa. Nga je ya tjíoʼya Noé kao yaniʼyale kiskoya. Tikjaʼaitsjenlai tsa ya tíjnaʼyai kʼoa tichoyai. A kjoaʼai xótse je jtsínʼio xi kitso Niná.