Ir al contenido

Ir al índice

 KJOAʼMIYA 69

Jngo tsotiʼndí tsakasenkao jngo chjota xi xángʼa tjínle

Jngo tsotiʼndí tsakasenkao jngo chjota xi xángʼa tjínle

AʼYANÍ jmeni xi títso tsotiʼndí xokji. Kui kʼoatítsole chjoón xokji xi tʼatsʼe Eliseo je xi nchjaya tʼatsʼe Jeobá, kʼoa kao kjoaxkón xi kao nganʼiole Jeobá kʼoasʼínni. Je chjoón a likui be xi tʼatsʼe Jeobá, nga tsín israelitajin. Kuinga, kataʼyala ánni nga ya tíjnasíni je tsotiʼndí ya ndʼiale chjoón xokji.

Naxinandá Siria tsʼe je chjoón xokji. Kʼoa Naamán tsakʼin xʼinle, je tsakasentítjonle chjota kjoajchán Siria. Chjota sirio kitsoa tsotiʼndí xokji, kuinga choʼndale koansíni chjoónle Naamán.

Je Naamán jngo chʼin xi nʼio tao kisʼele, kjiʼndojon yaole. Je chʼin jebi saʼnda bʼasjekaya yaoná. Kʼoa kui jebi xi títso tsotiʼndí xokji: “Tsa jelani naina xi koai ya Israel jña tíjna chjota xi nchjaya tʼatsʼe Jeobá, sindayajin nga kʼoasʼin tífiʼndojon yaole”. Xijekoan, kʼoatsakʼinle je xʼinle chjoón xi tʼatsʼe jebi.

Je Naamán koanmele nga koa̱nndaya; kʼoa kuinga kisíni ya Israel. Kʼianga je kichó, ya ki ya ndʼiale Eliseo. Je Eliseo kʼoakitsole je choʼndale nga katabitjonrʼoe Naamán kʼoa nga kʼoakatatsole nga ñato kʼa katakanisʼenngindá yaole ya xongá Jordán. Je Naamán nʼio koanjtile kʼoa kitso: “¡Je xongá xi tjín ya naxinandána ngisa ndakjoan tikʼoajinni tojñanile xongá xi tjín i̱ Israel!” Nga je kʼoakitso, toki.

Tonga choʼndale kitsole: “Ji nai, tsakuilani kasíjéli Eliseo xi ñʼai tíjna, kʼoajin sʼiain”. Kʼoa ánni nga tsí chanisʼenngindásíni yaoli jokatso”. Naamán kinrʼoéle choʼndale kʼoa ñato kʼa kiskanisʼenngindá yaole ya xongá Jordán. ¡Kʼianga je kʼoakisʼin koanndaya je yaole kʼoa nda kisʼe!

Nʼio tsjoa koanle Naamán. Kinrʼoe ijngokʼani Eliseo kʼoa kitsole: “Ñaki sʼani ʼbe nga tojekjoan Ninále Israel xi Niná jngo tjíjtsa Sonʼnde”. Kuinga, sijésínile kjoanda, chjoai tsojmi xi yʼa kjoatjaole”. Tonga Eliseo kitso: “Mai, a likui skoe”. Be Eliseo nga chʼaotjín kʼiatsa kuilani kiskoe, nga jé Jeobá kisindaya Naamán. Tonga Guehazí, je choʼndale Eliseo koanmele nga tsʼe koa̱n tsojmi xokjoan.

Kʼoa kui jebi xi kisʼin Guehazí. Kʼianga je ki Naamán, kitokatjenngile kʼoa kichotjenngile, kʼoa kitsole Naamán: “Eliseo kʼoakatsona nga me xó kʼale tsojmili, je xó tsjoále je chjota xi kafaʼaisíxatʼa”. To énndiso kinchja. Tonga Naamán likui tjínjinle, kʼoa kuinga kitsjoa kʼasínile tsojmi je Guehazí.

Kʼianga je kichoni Guehazí, je tjínjinle Eliseo jmeni xi kisʼin. Jé Jeobá xokitsole. Kitsole Guehazí: “Kʼianga kʼoasʼin chʼao kanʼiai, je chʼinle Naamán nga kjiʼndojon yaole ji kʼoakaoli”. ¡Kʼoa kjitʼanangi kʼoakoan!

Jméni xi bakóyaná ngayeje jebi. Xi títjon, nga chjénngilee je tsotiʼndí kʼoa kuinókjoañá xi tʼatsʼe Jeobá. Nʼio nda sikao je chjota. Xi majaoni, nga tsín ngʼakon katamaa jokoankjoan Naamán nga títjon, tosa sitjosonle je choʼndale Jeobá. Kʼoa xi majanni, nga tsín koa̱n énndiso kuinókjoa jokisʼin Guehazí. Nʼio tse xi bakóyaná je Biblia, a tsí jaon.