Ir al contenido

Ir al índice

 KJOAʼMIYA 56

Xi títjon rey koan ya Israel jé Saúl

Xi títjon rey koan ya Israel jé Saúl

CHÓTSENLALAI Samuel, siti tíbʼéjtenson jko̱ chjota xokji. Kʼoanikao ngasʼa jngo chjota ánni nga ʼyasínile nga rey katjoejin. Jé Jeobá xokitsole Samuel nga siti katabʼéjtenson jko̱ Saúl. Jngo siti xi nʼio nda nje.

Je Saúl kje tíjnandajin nga rey koa̱n koanle. Kʼoa kitsole Samuel: “Ntje̱le Benjamín kitjenña, xi ngisa choa mani i̱ Israel. Ánni nga kʼoasisíni nga rey koa̱n”. Je Jeobá kisasenle je Saúl nga tsín mele nga yaole kʼoasjengʼa. Kuinga je kiskoejinsíni nga rey koa̱n.

Tonga litsa ma̱jin koan je Saúl, ni ʼndíjinla kisʼe. Chjota nyiná kitjenni, naskánakisʼe kʼoa nʼio ngʼa kisʼe. ¡Me to sonxjale kichole chjota israelita xi ngikʼa! Kʼoati nʼionda kitoka, kʼoa nʼio taja koan. Tsjoa koanle je chjota kʼianga je kiskoejin Jeobá nga rey koa̱n. Ngatsʼi tsakʼéjta nga kitso: “¡Katabitjongʼa je rey!”

Je kontrale chjota israelita tojo tse nganʼio kisʼele. Kʼianga je rey kinikʼéjna Saúl, kichominrʼoe je chjota amonita nga skaan. Tonga nʼio nkjín chjota kjoajchán kisikatíonda je Saúl, kʼoa kisikinjele je chjota amonita. Tsjoa koanle naxinandá nga je Saúl xi rey tsakʼejnale.

Nga je ki nó, nga je Saúl tsakasentítjonle chjota israelita nʼio nkjín kjoajchán kinjele. Kʼoati jngo ti kisʼele Saúl xi nʼiojin koan xi Jonatán tsakʼin. Kʼoa je Jonatán tsakasenkao je naxinandá Israel nga nkjín kjoajchán kinjele. Tonga tojo je chjota filisteo xi nʼio kontrale koan je naxinandá Israel nga kui nichxin. Jngo nichxin nga nʼio nkjín jmi chjota kjoajchán filisteo kichonrʼoe je naxinandá Israel.

Samuel kʼoakitsole Saúl nga katakoyale saʼnda nga kuichó, ánni nga kʼia koakanile cho̱ je Jeobá. Tonga tsakʼachxinle Samuel. Saúl kitsokjon kʼiatsa kʼoetsʼiakao kjoajchán je chjota filisteo, kuinga tosa je tsakakásíni je cho̱. Kʼianga je kichó Samuel, kʼoakitsole Saúl nga likui kisitjoson, kitsole: “Je Jeobá kjaʼai chjota skoéjin xi rey koa̱n i̱ Israel”.

Xijekoanni, ijngokʼa tsín tikisitjosonngáni Saúl. Samuel kitsole: “Tongisa nda nga nitjosonle Jeobá tikʼoajinni tsakui kʼoai kjoatjaole barré xi nʼio nda kjoan. Nga tsín kanitjosonlai Jeobá, a likui tsjoáʼnde nga tosi tonda ji rey kuijnalai naxinandá Israel”.

Nʼio nda bakóyaná jebi. Kui bakóyaná nga nʼio chjíle nga sitjosonle Jeobá ngantsjai. Kʼoati kui xi bakóyaná nga jngo chjota xi ndasʼín tsakai, joni tsa Saúl, koa̱nle kui kʼoasʼin xi chʼaotjín tsa je xi tsjoáʼndele yaole. ¡Nikʼiajin kʼoakatamañá! A tsí mai.