Ir al contenido

Ir al índice

 KJOAʼMIYA 62

Kjoa kisʼe ya ndʼiale David

Kjoa kisʼe ya ndʼiale David

KʼIANGA je tíbatéxoma David ya Jerusalén, nkjín kʼa tsakasenkao Jeobá je chjota kjoajchánle David nga kinjele. Je Niná Jeobá kʼoaná kitso nga jela chjota israelita tsjoále je ʼnde Canaán. Kʼoa kao nganʼiole Jeobá kitjoenile ngayeje ʼnde xi tsakʼinle nga kʼoaile.

Je David nda tsakatéxoma. Tsjoake koan je Jeobá. Kʼoa je xi títjon kisʼin nga je kitjoele Jerusalén, kuinga ya kikao je kaxa jña kixinya je kjoa xi tsakʼéndajin Jeobá. Koanmele nga jngo yo̱ngo̱ kʼoenda jña sikʼéjnaʼya je kaxa xokji.

Nga je jaʼato jngo jao nó, jngo jée xi nʼio ai tsakajngi David. Jé, bení nga chʼaotjín nga kui chjoe je tsojmi xi kjaʼai xi tsʼe. Tonga ñandia kʼianga je koanjnjio, nga tíjna ya sonndʼiale, kiskotsen nangini kʼoa jngo chjoón tsabe xi nʼio naskánakji. Bat-seba tsakʼin, kʼoa Urías tsakʼin xʼinle, kʼoa chjota kjoajchánle koan David.

Je David nʼio koanmele je Bat-seba kʼoa tsakʼéxá nga kichʼale. Je xʼinle Bat-seba, kjin tsoʼbajin kjoajchán nga kʼia. Je David tsakajnakao je chjoón kʼoa skan kisʼejinle nga jngo ʼndí sʼele. Nʼio kisikjaojin David kʼoa kʼoakitsole Joab nga ya katasíkaséjna títjonle chjota kjoajchán je Urías ánni nga kuiyásíni. Kʼianga je kʼien Urías, David chixankao je Bat-seba.

Nʼio koanjtile Jeobá xi kao David. Kisikasén je Natán, choʼndale, nga kikjákao je David xi tʼatsʼe jéele. Sén xi faʼaitʼa ibi matsen Natán kao David. Je David nʼioni kʼoakoanle tʼatsʼe jme xi kisʼin, kʼoa Jeobá likui kisikʼien. Tonga kitsole: “Kʼianga kui kʼoakanʼiai je xi chʼaotjín, nʼio tse kjoa sʼeli yaniʼyali”. ¡Kʼoa nʼio tse kjoa kisʼele David!

Xi títjon koan, je ʼndí xi kisʼele Bat-seba kʼien. Xijekoan, Amnón je tijchíngale David, kisikaojée ndichja xi Tamar tsakʼin. Je Absalón, xi kʼoati tile koan David, koanjtile nga kʼoakisʼin je Amnón kʼoa kisikʼien. Xijekoan, je Absalón tsakásjaile jokisʼin nga nkjín chjota kitʼale kʼoa kʼoakisʼin nga rey kinikaséjna. Tonga je David chan kisikinjele kjoajchán je Absalón, kʼoa Absalón kʼien. Jaon, nʼio tse kjoa kisʼele David.

Kʼianga kʼoakoan ngayeje jebi, jngo ʼndí kisʼele Bat-seba xi Salomón tsakʼin. Kʼianga je koanjchínga David kʼoa kisʼele chʼin, Adonías je tile tsakásjaile jokisʼin nga rey kinikaséjna. Je David kʼia kʼoakitsole naʼmi xi Sadoc tsakʼin nga siti katabʼéjtenson jko̱ Salomón ánni nga jchasínile nga je xi rey koa̱n. Xijekoan, kʼien David kʼoa jankan kao te nóle nga kʼien. Ñachan nó tsakatéxoma. Kʼoa jé Salomón tsakatéxoma xijekoanni.