Ir al contenido

Ir al índice

 KJOAʼMIYA 107

Nga kinikʼienkao lajao je Esteban

Nga kinikʼienkao lajao je Esteban

JE CHJOTA xosíkji sénxkónyʼin jení Esteban. Jngoní chjota tjenngile Jesús xi kixi koan. ¡Tonga chótsenlalai kui tínikao! Lajaoyʼai tjíobasénle chjota xosíkjoan. Ánni nga kʼoasikji jtike koansíni Esteban nga kʼoakisikaosíni. Kataʼyala.

Je Niná tsakasenkao Esteban nga kʼoati kisʼin kjoa xi tomaxkónná. Kʼoa chjota xokjoan a likui kisasenle, tsakjaoti kao Esteban nga kui tsakakóyale chjota xi kixi tjín. Tonga nʼio tse kjoachjine kitsjoale Niná je Esteban, kʼoa tsakʼéjnatsen nga to énndiso tjíomatsoya chjota xokjoan. Nʼio ti koanjtingánile, kuinga kiskoeni Esteban kʼoa kinchja kʼasínile chjota xi énndiso tsakáne.

Je naʼmi títjon kitsole: “A kʼoatjín kjoaixi jme xi tjíotso”. Je Esteban kinchja kʼoa ya kiskoénile Biblia jme xi kitsole. Nga je jetʼale kʼoakitsole nga tsakatio chjota tsʼen xi koanjtike je chjota xi kinchjaya tʼatsʼe Niná nichxin kjoatse, kitsosale: “Kʼoati kjoaon tsanda jon. Kinikʼienño Jesús, je choʼndale Niná, kʼoa likui tinitjoson je kjoatéxomale Niná”.

¡Ngisa ti nʼio koanjtingánile je chjota títjonle religión! Ñaki kiskinené niʼño nga nʼio koanjtile. Kʼianga kiskomingʼa jko̱ Esteban kʼoa kitso: “¡Koeni! Tiʼbeña Jesús nga sénndotʼa ngakixile Niná ya ngʼajmi”, je chjota xokjoan tsakʼéchjoa xo̱ño kʼoa kiné Esteban. Kiskenʼndójbe nga tsakʼaonsje ya naxinandá.

Tsakʼasje najñole kʼoa je kitsjoale jngo ti xi Saulo ʼmi nga kisikuinda. A tiʼyaní je Saulo. Tjío kʼa chjota xi lajao tsakasénle je Esteban. Tsakasenxkónyʼin Esteban, josísʼin matsen ibi, kʼoa tsakʼétsʼoale Niná, kitsole: “Jeobá, ali kjoañʼaijin bʼailai jmeni xi tjíosʼín”. Je Esteban be nga tjío kʼa xi jé tsakʼanachale chjota títjonle religión. Xijekoan, kʼien Esteban.

Kʼiatsa ʼyani xi chʼao síkaoli, a nijndangajaoni, a xo jé Niná nijélai nga tjín xi katasíkao. A likui kʼoakisʼin Esteban, kʼoati tsín kʼoakisʼin Jesús. Nda kisikao ninga je chjota xi totaon tsabe. Chjénngia choa̱ jebi.