Ir al contenido

Ir al índice

 KJOAʼMIYA 98

Ya nindo xi Olivos ʼmi

Ya nindo xi Olivos ʼmi

JÉ Jesús xosíkji kʼoa ya tíjna ya nindo xi Olivos ʼmi. Kʼoa nga ño chjota xi yasí tjíokao je pastrole. Jé Andrés kao ndsʼe xi Pedro tsakʼin, kʼoa Jacobo kao ndsʼe xi Juan tsakʼin. Kʼoa je ndʼiangʼa xosíkji matsen kui yo̱ngo̱le Niná xi kisʼejna Jerusalén.

Nga kʼia je jao nichxin jaʼato nga kʼoanásʼin búrró tsakʼejnasonle Jesús nga jaʼasʼen ya Jerusalén. Nga majte nga tjío ibi. Nga tongini, ya yo̱ngo̱ ki Jesús. Je naʼmi xi ya tjío koanmele nga tsoa kʼoa sikʼien Jesús. Tonga kitsokjon, nga je chjota nda kisasenle xi tʼatsʼe Jesús.

Je Jesús “¡Ye̱ kʼoa xtile ye̱!” kitsole chjota xokjoan. Kʼoakitsole nga kjoañʼai tsjoále Niná nga kʼoasʼin chʼao kisʼin. Xijekoan, kʼia kimi Jesús ya nindo xi Olivos ʼmi, kʼoa nga ño pastro xi tjíokao ibi tjín xi kiskonangile, a ʼyaní jméni xi kiskonangile.

Kui kiskonangile jméni xi koa̱n je nichxin xi nroaján. Bení kʼianga kjoaʼaxín Jesús ngayeje jmeni kjoatsʼen xi tjín i̱ Sonʼnde. Tonga koanmele skoe kʼiáni nga kʼoakoa̱n. Kʼiáni nga ti kjoaʼaingáni Jesús nga jo rey sʼin koatexoma.

Je Jesús be kʼianga je chjota tjenngile xi tjío i̱ Sonʼnde likui skoeni xko̱n kʼianga kjoaʼai ijngokʼa. Nga ya ngʼajmi kʼoéjna, kʼoa lijosʼin koa̱n skoeni je chjota tjenngile. Kuinga kʼoakitsosínile Jesús je pastrole jmeni xi koa̱n i̱ Sonʼnde kʼianga je tíbatéxoma ya ngʼajmi. Jñá kʼanile jebi xi kitsole.

Jesús kʼoakitso nga nʼio sʼe kjoajchántse, nga nʼio nkjín chjota xi chʼin sʼele kʼoa kao kjinrá, nga nʼio sʼe kjoatsʼen kʼoa kao cháonnʼio. Kʼoa kʼoati kitso nga kʼuinyason ngayeje Sonʼnde je énnda chjotse xi tʼatsʼe jme xi sʼin Rey xi kiskoejin Niná. A tiʼyañá ngayeje jebi je nichxin xi tiyoa ndʼaibi. ¡Jaon! A likui jao tjínná kʼianga je tíbatéxoma Jesús ya ngʼajmi. Je me sikjeson ngayeje kjoatsʼen xi tjín i̱ Sonʼnde.