Ir al contenido

Ir al índice

 KJOAʼMIYA 101

Nga kinikʼien Jesús

Nga kinikʼien Jesús

¡CHÓTSENLALAI kuisi chʼao kjima ibi! Jé Jesús tínikʼien. Jngo yá kijnatʼa. Xó nyasʼen je ntsja kao ndsoko. ʼYáni xokitso nga kʼoakoantʼain.

Kuinga tjío kʼa chjota xi jtike koan. A ʼyaní ʼyáni. Jngo xi kʼoasʼin kontrale koan je ánkje tsʼen, je Satanás je Na̱i. Je xokisʼin nga likui kisitjosonle Jeobá je Adán kao Eva. Kʼoa kʼoati je xokisʼin kʼianga kʼoasʼin kisikʼien je chjota kontrale Jesús.

Kʼianga kjesa nikʼientʼajin yá Jesús, je chjota kontrale totaon tsabe. A faʼaitsjenli nga yaná kichó ya ʼnde jña Getsemaní ʼmi kʼoa kikaoná. ʼYá chjotani xi kʼoasʼin kontrale koan. Jaon, jé chjota títjonle religión. Kataʼyala jméni xi koan nga koanskanni.

Kʼianga kikao Jesús je chjota títjonle religión, je pastrole kitoka. Kitsokjon, kʼoa toje kisikʼéjna Jesús kao chjota kontrale. Tonga je pastro Pedro kao Juan a likui kjin ki. Kitjenngichrianle nga skoe jméni xi koa̱ntʼain Jesús.

Je naʼmi ya kikaole Jesús je chjota jchínga xi Anás ʼmi, je xi naʼmi ngʼajko̱ tíjna tsakai. A likui tse ya tsakatio je chjotankjín. Xijekoanni ya kikao Jesús ya ndʼiale Caifás, je xi naʼmi títjon tíjna nga kʼia. Nʼio nkjín chjota títjonle religión xi ya tjío.

Ya ndʼiale Caifás kinijtsoʼa Jesús. Je chjota xokjoan kichokao kʼa chjota nga kʼoasʼin énndiso katabáne Jesús. Ngatsʼi chjota títjonle religión kitso: “Katanikʼien je Jesús”. Kʼoa tsakʼéchxáʼa Jesús, kʼoa tsakʼéle xo̱ngo.

Kʼianga kʼoakjima, je Pedro ya tíjna nditsinni. Nyʼán chon nga kui nitjen, kʼoa lʼí tsakʼétseya chjota. Kʼianga tjíosísole yaole ya ndailʼí, jngo chjoón choʼnda kiskotsenle Pedro kʼoa kitso: “Je chjota xokji kʼoati ya tsakʼejnakao Jesús”.

Kitso Pedro: “¡Mai, a likui ya tsakatejnakoa!”

Jan kʼa kʼoakitsole chjota je Pedro nga ya tsakʼejnakao Jesús. Mai kitsoʼnde Pedro. Kʼianga je koanni jan kʼa nga mai kitso, je Jesús kiskotsenle Pedro. Kʼoa Pedro nʼio ba koanle kʼianga kʼoasʼin tsakʼéndiso, ki kʼoa kiskiʼndá.

Kʼianga je kitjo Tsʼuí nga bixine tajnjio, je naʼmi ya kikao Jesús jñani nga batioxkó chjota Sanedrín. Ya tsakʼéndajin jmeni xi sikao je Jesús. Ya kikaotʼale Poncio Pilato, je xi tíbatéxoma ya Judea.

Je chjota Sanedrín kitsole Pilato: “Chjota tsʼenní chjota xokjibi, katanikʼien”. Xije kiskonangile Jesús je Pilato, kitso: “Lijme xi masjaina xi tʼatsʼe chjota jebi tsa chʼao tísʼín”. Xijekoan je Pilato ya kisikaséntʼale Herodes Antipas, xi tíbatéxoma Galilea kʼoa ya tíjna Jerusalén nga kʼia. Kʼoati tsabe nga tsín jme xi chʼaotjín kisʼin Jesús, kʼoa kisikasén ijngokʼanile Pilato.

Je Pilato koanmele nga sikʼéjnandai Jesús. Tonga je chjota kontrale Jesús kui koanmele nga tosa jngo chjota ndoyá sikʼéjnandai Pilato, jngo chjotaché xi Barrabás tsakʼin. Je me nyisen kʼianga Pilato tsakʼaonsje Jesús ya nditsin. Je Pilato kitsole je chjota: “¡Chótsenlao! ¡Je reyno!” Tonga je naʼmi títjon tsakʼéjta kʼoa kitso: “¡Chjaʼaxin! ¡Tikʼain!” Kʼoa kʼoasʼin tsakʼejnandai je Barrabás, kʼoa je Jesús kikao nga sikʼien.

Nga bixine koanxon kʼianga sʼasa nʼio xátí yá kinikʼientʼa Jesús. A likui matsen sén xi faʼaitʼa ibi, tonga kʼoati jao chjotaché kinikʼientʼakao yá Jesús. Kʼianga kjesa mʼejin Jesús, jngo chjotaché xi kitsole: “Tikjaʼaitsjennai kʼianga je koatexomai ya ngʼajmi”. Kʼoa Jesús kitso: “Ñaki kʼoaxinle nga ya kuijnakaonai ya ʼndenaxó”.

¡Jmési naskánatjínni én xi kitso Jesús! A tsí jaon, a ʼyaní jme ʼndenaxó xi kinchjani. Jñáni nga ʼndenaxó kisichon ngasʼa je Niná. Jaon, i̱ Sonʼnde. Kʼianga je koatexoma Jesús ya ngʼajmi, kʼia sikjaʼáyale je chjota xokji nga kʼoetsaojin sonʼndenaxó chjotse xi sʼejna i̱ Tʼanangi. A tsí nʼio naskánatjín jebi.