Ir al contenido

Ir al índice

 KJOAʼMIYA 96

Kisindaya Jesús je xi chʼin kisʼele

Kisindaya Jesús je xi chʼin kisʼele

KʼIANGA tsakʼamje Jesús ya Israel, kisindaya xi tjíomʼe. Je naxinandá xi ya ndaini tjío kisʼejinle jme choa̱ xi tsakatío. Kuinga kikaosínile je xi yo̱ma̱, xi xka̱, xi chjiʼngé kʼoa xi kjaʼaisa chjota xi tjíomʼe. Kʼoa Jesús, kisindaya ngatsʼi.

Nga kʼia je tsʼato jan nó jaʼato nga kʼoasʼin kiskanisʼenngindá Juan je Jesús. Kʼoa Jesús kʼoakitsole pastrole nga ya koai Jerusalén, jñani sikʼien, kʼoa nga xijekoa̱n kjoaʼáyajinnile kʼien. Kʼoa nga kjesa nikʼienjin kisindayalasa je chjota xi tjíomʼe.

Ñandia kʼianga xotó tíbakóya Jesús. Nga xotó jngoní nichxin nga kisikjáya je chjota judío. Je chjoón xi nroatʼasí ibi xjaʼaonjan nó nga ndsitin kisʼe, kʼoa likui koan tsakasenkixi. Kuinga Jesús tsakájnasonsínile ntsja kʼoa koankixi. ¡Koanndayaní!

Je chjota títjonle religión koanjtile nga kʼoakisʼin Jesús kʼoa jngo xi i̱ kitsole chjotankjín: “Jaon nichxin tjín nga ma nixá. ¡Kui nichxin nga koa̱n kjoaʼao nga koa̱nndayao, kʼoa mai kʼianga xotó”.

Tonga Jesús kitso: “¡Nʼio tsʼaon! Tsa jon chjójndaʼñójion je búrróno kʼoa koannginikʼijion nandá kʼianga xotó. Kʼoa kuinga, a tsín koa̱n nga sindaya je ʼndí chjoón xokji, nga je xjaʼaonjan nó tjínle chʼin”. Nga je kʼoakitso Jesús tokoansoale je chjota tsʼen xokjoan.

Xijekoanni, je Jesús kao pastrole ya ki Jerusalén. Nga je ya tjíochrian ya Jericó, jao chjota xi xka̱ xi taon síjeson xi kitsole: “Jesús, tisenkaonaijin”.

Jesús kinchjale je chjota xi xka̱ kʼoa kitsole: “Jmé xi meno nga sikaono”. Je chjota xi xka̱ kitso: “Ji Nai, katatjoʼaingi xkuinjin”. Jesús kisikao xko̱n, ¡kʼoa kjitʼanangi koantsenle! A ʼyaní ánni nga kʼoasʼin kisindayasíni chjota je Jesús. Kuinga tsjoake koan kʼoa mele nga katasʼele kjoamakjain xi tʼatsʼe. Kui jebi xi bʼéjngo tokoan kʼianga je koatexoma Jesús a liʼya xi ti chʼin sʼe ijngokʼanile i̱ Sonʼnde.