Ir al contenido

Ir al índice

 KJOAʼMIYA 85

Jesús ya kitsin jña satíoʼya cho̱

Jesús ya kitsin jña satíoʼya cho̱

AʼYANÍ ʼyáni ʼndílee xosíkji. Jaon, je Jesús. Ya kitsin jñani satíoʼya cho̱. Ya tísíkájnaya María ya kaxa xi kjenya búrró kao xi kjaʼaisa cho̱. Tonga, ánni nga i̱ tíjnasíni María kao José jña tjío cho̱. Nga likui i̱ chon jñani tjínnele jtsín jngo ʼndílee, a tsí mai.

Maijin. Tonga kuinga i̱ tjíoni ibi kʼianga je chjota xi tíbatéxoma Roma, je Augusto César (César Augusto), jngo kjoatéxoma tsakʼasje xi kʼoatso nga ngatsʼi je chjota ya katafikʼétʼaxo̱n yaole ya ʼnde jñani kitsin. José ya kitsin ya Belén. Tonga kʼianga kichó José kao María, likuiti kisokoʼndenile ndʼia jñani tsakatio. Kʼoa kuinga ya kisíni jñani tjío je cho̱. ¡Kʼoa kʼiakjoan kitsin Jesús! Tojosísʼin matsen ibi, je Jesús nda kitsin.

A tiʼyaní chjota xi koʼnda cho̱ xi tjíonroanrʼoésí Jesús. Ya tjíokoʼnda jinsén cho̱le tsakai nga nitjen kʼoa jngo lʼí kisiʼisenndaile. ¡Lʼí jebi ánkjení! Je chjota xi tjíokoʼnda cho̱ nʼio kitsokjon. Tonga je ánkje kitsole: “¡Ali nokjonjion! Énnda chjotse jaʼaikaono. Ndʼaibi, ya Belén, je katsin je Cristo je Nainá. ¡Jé kʼoasjentjai naxinandá! Najño títsʼójin kʼoa ya kijnaya kaxa xi kjenya cho̱”. Kʼoa toxijña, nio nkjín ánkje jaʼai xi tsakʼasjengʼa Niná. Xijekoan, je chjota xi koʼnda cho̱ kjitʼanangi kikásjai Jesús, kʼoa koansjaile tojosísʼin matsen ibi.

A ʼyaní ánni nga tsín mangósonsíni je Jesús kao chjota. A ʼyaní ʼyá kjoanni je Jesús. A faʼaitsjenli, je kjoaʼmiya xi títjon nroatʼa xo̱n jebi kuiná kichotʼaya tʼatsʼe je ʼNdí títjonle Niná. Kʼoa je kisixákao Jeobá nga tsakʼénda ngʼajmi kao Sonʼnde kʼoa kao tsojmi xi ngikʼa. Ngo, ¡ʼndí jebi jéní je Jesús!

Jaon, je Jeobá kiskoe ʼNdíle ya ngʼajmi kʼoa ya kisikʼéjnaya yatsʼoa̱ María. Xijekoan, jngo ʼndílee koanjcháya tsʼoa̱ María tojoma ʼndílee xi kjaʼai nga ya majcháya tsʼoa̱ je na̱le. Tonga ʼndílee jebi ʼNdíle Ninání. Kʼoa ya kitsin ya Belén ya jña satioʼya cho̱. A je koanjinli ndʼaibi ánni nga nʼio tsjoa koansínile je ánkje kʼianga kʼoakitsole je chjota xi koʼnda cho̱ nga Jesús kitsin.