Ir al contenido

Ir al índice

 KJOAʼMIYA 23

Je nijñá xi tsakʼaile Faraón

Je nijñá xi tsakʼaile Faraón

NGA je jao nó jaʼato, tojo ndoyá tíjnaʼya José. Je xi tsjoále vino je Faraón likui jaʼaitsjenle xi tʼatsʼe José. Jngo nitjen nga jao nijñá xi kjaʼai tso tsakʼaile Faraón, kʼoa kiskonangile yaole jósʼin tsoyanile. A tiʼyaní nga kijnafesí. Nga je koannyaonni kinchjale je chjota chjinele kʼoa kitsoyale nijñále. Tonga likui koanle josʼin tsoyanile nijñá xi tsakʼaile Faraón.

Je xi tsjoále vino Faraón jaʼaitsjenle xi tʼatsʼe José. Kitsole Faraón: “Kʼianga tijnaʼya ndoyá jngo chjota tíjnaʼya xi male bʼéyanajmí josʼin tsoyanile nijñá”. Kjitʼanangi kʼoakitso Faraón nga katabichosje ndoyá je José.

Faraón tsakʼéyanajmíle José nijñá xi tsakʼaile. “Ñato nraja yʼai kaʼbe, xi naskánakjoan. Kʼoati ñato nraja xi nʼio xkʼién kjoan kaʼbe xi ñaki toninda. Je xi xkʼién kjoan kakjine je nraja xi yʼai kjoan.

“Xi majaoni nijñána jngo trigo xi ñato mani xka̱ntsja kaʼbe xi yʼai kjoan kʼoa je koanjchá tole. Xijekama jngo trigo xi ñato mani xka̱ntsja kaʼbe xi nrʼoe kjoan kʼoa tokixí kjoan. Je xka̱ntsja trigo xi nrʼoe kjoan kakjine je xka̱ntsja trigo xi ndakjoan xi ñato mani”.

José kitsole Faraón: “Ngoson sʼin tsoyanile nga jao nijñá jebi. Je xi ñato nraja yʼai kʼoa kao je trigo xi ñato mani xka̱ntsja xi yʼai kjoan ñato nó tsoyanile, kʼoa je nraja xi ñato mani xi xkʼién kjoan kʼoa kao xi ñato xka̱ntsja trigo xi nrʼoe kjoan ñato nó tsoyanile. Ñato nó nga nʼio koa̱njchá tsojmi i̱ Egipto. Kʼoa xijekoa̱n ñato nó nga nʼio tochoa tsojmi koa̱njchá”.

Kuinga José kʼoakitsosínile Faraón: “Jngo chjota xi chjine chjoéjin kʼoa je xi ñato nó nga nda koa̱n tsojmi je tjanelai nga katabʼéxkó. Kʼoa je chjota likui kjinrá kuiyáni xi ngi ñato nó kʼianga tochoa tsojmi sʼe”.

Nda kisasenle Faraón jokitsole José. Kʼoa jé José kiskoejin nga je katabʼéxkó tsojmi, kʼoa katabinyátjao. Je José koanjaonile Faraón, kʼoa nʼio ngʼa tsakʼejna ya Egipto.

Xi koanni jin nó, nga kjima kjinrá, José tsabe nga tjíonroa chjota. A ʼyaní ʼyani. ¡Jé xi te ndsʼe José xi majchínga! Jé nʼaile kisikasén ya Egipto nga je koanchoa tsojmi xi kiskine ya Canaán. José tsabe nga je ndsʼe, tonga je ndsʼe likui tsabe tsa je José. A ʼyaní anni. Kuinga je ngisa jchínga kji José, kʼoa kui yʼakjá najño xi machjén ya Egipto.

José jaʼaitsjenle nijñá xi tsakʼaile nga sʼa tiʼndí, kʼianga tjíomʼaojenle jko̱ je ndsʼe. A faʼaitsjenli nga jená tsakʼexkiai xi tʼatsʼe jebi. Kuinga koanchoyasínile José nga je Niná xi kʼoasʼin kisikasén ya Egipto kʼoa nga tsín tokjoatjao nga kisikasén. A ʼyaní jméni xi kisʼin José. Chótsenlalee.