Ir al contenido

Ir al índice

 KJOAʼMIYA 12

Jngo ndʼia xi nʼio ngʼa kji tsakʼénda chjota

Jngo ndʼia xi nʼio ngʼa kji tsakʼénda chjota

NKJÍN nó jaʼato. Kʼoa je xtile Noé nkjín xti kisʼele. Kʼoa nga je koanjchínga xti je kʼoati nkjínsa xti kisʼele. Sasa koannkjínyani chjota i̱ Sonʼnde.

Jngo chjota xi tsakʼejna jé tile tindaile Noé kʼoa Nemrod tsakʼin. Tsʼen koan, kitsoa kʼoa kisikʼien cho̱ kao chjota. Nemrod rey kisikao yaole nga tsakatéxomasonle xi kjaʼai chjota. Je Niná likui kisasenle jme xi kisʼin Nemrod.

Ngatsʼi chjota xi tjío nga kui nichxin tojngo én male. Nemrod koanmele nga jtín sikatío nga koa̱n koatéxomasonle. Kuinga, a ʼyaní jméni xi kisʼin. Kʼoakitsole nga jngo naxinandá katabʼénda kʼoa jngo ndʼia xi nʼio ngʼa kji. Sén xi nroatʼa ibi matsen nga ladrillo tjíosínda.

Je Niná Jeobá likui kisasenle ndʼia jebi. Kui xi koanmele nga xín katafi chjota kʼoa nga katabatio ngakjijnda Sonʼnde. Tonga je chjota kitso: “¡Kʼoasʼiaan! Jngo naxinandá kʼoénda kʼoa jngo ndʼia kʼoénda xi nʼio ngʼa kji xi saʼnda katabichókangi ya ngʼajmi. ¡Kʼoa nʼio kʼoaxkiaa!” Toyaole koanmele tsakʼasjengʼa, likui Niná tsakʼasjengʼa.

Kuinga tsakʼéchjoasínile Niná nga tsínti tsakʼéndani je ndʼia xokji. A ʼyaní jókisʼin. Kui xi kisʼin nga toxijña kjaʼai kjaʼai tso én koanle chjota, ʼndele nga tojngo én koa̱nle. Likuiti koanjinnile jokitsole xínkjín. Kuinga Babel (Babilonia) tsakʼinsíni naxinandále, xi tsonile nga «Likuiti kinrʼoénile xínkjín».

Xijekoanni je chjota kitjoni ya Babel. Chjota xi tikuini én koanle tsen kikao xínkjín jña xín ʼnde.